Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ISAMBILILO 13

E Timoti Walondaanga Ukwaavwa Awaantu

E Timoti Walondaanga Ukwaavwa Awaantu

E Timoti waliinji amulumeendo wino wakunziile ukwaavwa awaantu. Wayaanga mu viipya ivilekanelekaane mu kwaavwa awaantu wanji. Pamulandu wakwe coo, waliinji ni cimwemwe nkaninye mu wuumi wakwe. Wuzye ungakuunda ukumaanya vino caliinji?—

E nyiina wakwe Timoti poonga nu nyinakuulu awano wamusambiliziizye pe Jehova

E Timoti wakuliziile mu musuumba wuno witwaangwa ukuti Listra. Pano waliinji amutiici, e nyinakuulu e Loisi nu nyiina e Yunisi, watalisiile ukumusambiliizya pakwe Jehova. Pano e Timoti wakulaanga, walondaanga ukwaavwa wanji ukusambiliila pakwe Jehova.

Pano e Timoti waciliinji amulumeendo, e Pauli wamuwuziizye ukuti: ‘Wuzye ungakuunda ukuti tupiite swensi mu kuwiizya ku viipya na viinji?’ E Timoti watoleleziile  ati: ‘Eta, ningakuunda!’ Waliinji amuyipekaanye ukupiita, nu kuyayavwa wanji.

E Timoti wapisiile nu Pauli ku Makedonia mu musuumba wuno witwaangwa ukuti Tesalonika. Pakufiika koko, waliinji nu kupiita pansi uwuleendo uwutaali, nga swinya waliinji nu kukweela uwaato. Pano wafisiile, wavwiliziizye awaantu awavuule ukusambiliila pa kwe Jehova. Lelo awaantu wamwi wafuziilwe, swinya walondaanga nu kuwasansa. Acino e Pauli nu Timoti wafumileeko nu kuya mukuwiizya ku viipya viinji.

E Timoti waliinji nu wuumi uwuziima swinya uwacimwemwe

Pansizi ya myeezi, e Pauli waneniile Timoti ukunyoceela ku Tesalonika nu kuyaloola vino iwuungwe lyalundulukaanga. Caliinji acakutiinya ukunyoceela kwe wowo umusuumba! Nanti ciwe wowo e Timoti wasinziile nukunyoceela koko amuno wasakamiile iwuungwe. Pano wanyosiile waneniile e Pauli ilyaasi iziima. Waneniile e Pauli ukuti iwuungwe ku Tesalonika likulunduluuka iceete nkaninye!

E Timoti wawomviile poonga nu Pauli pa myaaka imivuule. E Pauli wawalisiile kuno e Timoti waliinji amuuntu umuyanaane wino waliinji nu kutuuma mu kwaavwa amawuungwe. E Timoti wakunziile Jehova poonga na waantu.

Wuzye nawewenye wakuunda awaantu icakuti ukaloonda ukuwaavwa ukusambiliila pa kwe Jehova?— Ndi watwaliliila ukuciita woo, uliwa nu wuumi uwuziima swinya uwacimwemwe nkaninye ndi vino e Timoti waliinji!

WAZYA MWE BAIBOLO WAKO

  • 2 Timoti 1:5; 3:15

  • Imilimo 16:1-5; 17:1-10

  • 1 Watesalonika 3:2-7

  • Wafilipi 2:19-22