Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ICIWUZYO 6

Uzye Ningacita Wuli Pakuti Ntakoncelela Awanji?

Uzye Ningacita Wuli Pakuti Ntakoncelela Awanji?

CINO UFWILE UKUMANYA ACAKUTI

Nga cakuti usakukoncelela wanji ulimanya ivyakuyisunga swinya utaliwatungululwa vye na wawuyo.

UZYE UNGACITA WULI?

Yelenganya vino vikucitika: Pano Brian walola awawuye wawili wano akasambilila nawo wakwiza, wivwa na munda mwasunguluka. Imiku yiwili mwe we-e esabata wakumupaticizya ukuti mpaka apeepe fwaka. Wo-o wukuwa, amuku waciti tatu.

Umulumendo wakutalicila walanda:

“Ni lelo uli wenga nye? Leka nkulanjizyeko e wunji”

Wasinizya e Brian pano walanda ukuti “e wunji” ko-o lyo akufumya cimwi mwitumba lyakwe nu kutambika Brian.

E Brian walola ukuti kweni cino alemile kwi kasa we fwaka. Awe nomba na maka yasila.

E Brian walanda ukuti, “Nsakulonda. Nene naminena kali ukuti nsipe . . . ”

Umulumendo waciti wili wamucilinganya namazwi ya kuti: “Si we cantete!”

E Brian wasipa pakulanda ukuti “Awe!”

Umulumendo waciti wili wawika ikasa lyakwe pa ciweya ce Brian. Watontelela pano akulanda ukuti, “Senda vye nawe.”

Umulumendo wakutalicila wapalamizya e fwaka kwe Brian nu kumutokotezya ukuti: “Tutalinena nanti wumwi. Pasi na wino alimanya.”

Uzye nga walinji we Brian, ungacita wuli?

 TEYELENGANYA!

Uzye wa-a awalumendo wamanyile uwuwipe wuno wuli mwe vino wakucita? Uzye wayisolezile aweneco ukucita vino wakucita? Awe. Cino cikalenga, wakakoncelela wanji. Wasilonda wawapate, acino wakacitila vyonsinye vino awawuye wakulonda pakuti wakwivwana

Ivya musango wo-o nga vyakuciticizile, uzye ungakoncelela awawuyo nanti ungakana?

  1. UWAKWILUKA

    E Baibolo ikati: “Umuntu wamano akalewuka ndi walola intazi zikwiza, ukuwa [‘wino atawa na mano akayitwala,’ NWT] mu ntazi, ayizuka pano aminzi yafika mu nsingo.”—Imilumbe 22:3.

    Ilivule, ungiluka ukuti wandi uyitwale mu ntazi. Ku cakulolelako, ungalola wano mukasambilila nawo akatalamucila kunkolelo, wakupeepa fwaka. Ukwiluka kucili kungakwavwa ukuyipekanya ukuwomba ni ntazi pano itani fike.

  2. YELENGANYA

    E Baibolo ikati: “Wani nu kampingu muzima,”—1 Peter 3:16 NWT.

    Yiwuzye ukuti, ‘Uzye ndiyivwa wuli kunkolelo nga cakuti nakoncelela awanji?’ Kweni nga cakuti wankocelela awawuyo wangakutemwa pampindi ntici. Nomba, uliyivwa wuli mukupita kwa mpindi? Uzye ungakunda ukusula vino wasambilila pa mulandu vye wakusecelesya awawuyo?—Ukufuma 23:2.

  3. SOLAPO IVYAKUCITA

    E Baibolo ikati: “Umuntu wamano akalewuka intazi.”—Imilumbe 14:16.

    Mwe vino tukasolapo ukucita mungafuma ivizima nanti iviwipe. E Baibolo ikalanda pa wantu wano wasozile ivyakucita ivizima ndi vino e Jozefu, Job, nu Yesu. Swinya ikalanda na pe Kaini, Esau, nu Yuda wano watasozile ivyakucita ivizima. Nga wewe, avyani vino ulisolapo ukucita?

E Baibolo ikati: “Uwawa ni cisinka.” (Amalumbo 37:3 NWT) Nga cakuti uyelenganizizye lyankani pe vino vingafumamo nu kumanya ivyakucita, ungazunguka ukulola vino ungalanda cete ukwasowa intete.

Utafwile nu kunena awawuyo ivivule. Ungakana vye ukuti NSAKULONDA. Nanti nga ukulonda ukuti wivwicisye, ungati vye:

  • “Nene mutampendelako!”

  • “Nene nsicitako vyo vyo!”

  • “Nga cawa wuli ilelo wayaya, mwamanya kali ukuti nene nsicitako vyo vyo!”

Inkama akulanda paponye swinya ukwasowa intete. Nga cakuti ukucita wo-o, ulizunguka vino awawuyo walileka ukukupaticizya ukucita vino usilonda!

 VINO UNGACITA NDI WAKUKUSEKA

Nga wati uwakoncelela awawuyo, waliwakutungulula vye nge wecilisiilu

Uzye ungacita wuli awawuyo nga wati wakuseka? Nganga cakuti wakunena ukuti, “Acani fwendi—si we cantete?” Uwamanya ukuti avino wakacita pakuti wanji wawakoncelela. Uzye ungacita wuli? Ungasolapo ukucita conga pe vyo-o viwili.

  • Ungazumila (“Ee, indi nintete!” Nga apano ulande na cino walandila wowo.)

  • Ungakaana. Nu kulanda umulandu wuno wakanila, ungalanda ukuti. (“Nene nkalola ngati mwacenjela nkaninye, icakuti mutange mupeepe nu fwaka!”)

Nga cakuti awawuyo watwalilila ukukuseka uwafumapo vye! Cino uwakwizuka acakuti, nga utafumilepo zuwa apano wangalemasya ukukuseka. Nga wafumapo, lyo walanjizya ukuti pasi nanti wenganye wino angakucinja.

Ukulanda vye icisinka, awawuyo walitwalilila ukukutunka ukucita iviwiipe. Lelo wemweneco awemuno ungasolapo ivyakucita, ufwile ukuwanena vino utange uciteko swinya uzipizile ukucita vino ukalanda. Ngu kulonda, ungasolapo ukukoncelela awawuyo nanti ukukana.—Joshua 24:15.