Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ICIWUZYO 5

Uzye Ningacita Wuli nga Acakuti Wakuncuzya ku Sukulu?

Uzye Ningacita Wuli nga Acakuti Wakuncuzya ku Sukulu?

CINO UFWILE UKUMANYA ACAKUTI

Vino ukacita vingalenga ivintu ukuzipilako—nanti ukuwipilako.

UZYE UNGACITA WULI?

Yelenganya vino vikucitika: E Thomas asakulonda ukuya ku sukulu. Akulonda vye ukuleka. Wano akasambilila nawo wasalanginye amalyasi yawufi pe weliwe imyezi yitatu yino yapita. Lyeni watalika nu kumwita amazina yanji. Wumwi angapunka e Tomasi umwenzonye icakuti amuponezya na mabuku, lelo acita ngati atate amuweni, wamwi nawo wakakwiza mukumuconkola ku nkonto lelo pano akwiza mukupiliwuka apotwa ukumanya wino temuconkozile. Iyoolo lyeni wapocelezile meseji iyakumutiinya ukufuma kwe wano wakamucuzya ku sukulu . . .

Uzye nga walinji we Tomasi, ungacita wuli?

TEYELENGANYA!

Ungacitapo cimwi! Swinya ungamucimvya ukwasowa nu kulwa nawe. Munzila ci?

  •   UTAKALIPA. E Baibolo ikati: “Umuntu mutumpe [akafumya icipyu cakwe consinye, NWT] lelo uwamano akayilema umwezo.” (Imilumbe 29:11) Nga wakana ukulanjizya ukuti ufuzilwe pano wakukucuzya, wangasuka watoonte wonganye.

  • UTAWANYOCEZYAMO. E Baibolo ikati: “Mutize muwalandula.” (Waroma 12:17) Ukunyocezya iciwipe pa ciwipe kukalundilako vye intazi.

  • UTAYITWALA MU NTAZI. E Baibolo ikati: “Umuntu wamano akalewuka nga walola intazi zikwiza.” (Imilumbe 22:3) Utayitwala pa wantu wano wakakucuzya, swinya utacita ivintu vino vingalenga watalike ukukucuzya.

  • UWAWASUKA MU NZILA NZIMA. E Baibolo ikati: “Ukutolelela kwakutecelela kukamyalalika icipyu.” (Imilumbe 15:1) Ungavitwala vye munseko. Ku cakulolelako, wino akukucuzya ndi akukuseka ukuti wiina nkani, ungasunsizyako vye amaweya nu kuti, “Kweni mfwile ukondako vwile!”

  • UWAFUMAPO. E Nora uwamyaka 19, watili “Nga wafumapo vye ukwasowa ukulanda cimwi pano wakukucuzya cikalanjizya ukuti we songo mu mano swinya wawoma ukulusye wino akukucuzya. Swinya cikalanjizya nu kuti wayicindika—imiwele yino wano wakukucuzya watakwata.”—2 Timoti 2:24

  • UWAYISUWILA. Wano wakacuzya wanji wakakonka wano wayisula swinya wano wakaloleka ukuti pasi na vino wangacita nanti wangawacuzya nye. Lelo wonsinye wano wakacuzya wanji wakaleka nga wazana ukuti utawasumvileko amano.

  • UWANENAKO WANJI. Wino walinji amusambilizya kali watili: “Ningawomelezya wonsinye wano wakawacuzya ukunenako wano wangawavwa. Acili icintu cizima cino wumwi angacita amuno cingacinjilila na wanji.”

Ukuyisuwila-kulilenga uwe na maka yano wino akukucuzya atakwata