Qiegħed int fiċ-​ċans li jkollok burnout, jiġifieri li tħossok eżawrit? Jekk iva, dan l-​artiklu jistaʼ jgħinek!

•  Għala jiġri dan

•  Għala hu importanti

•  Dak li tistaʼ tagħmel

•  Dak li jgħidu żgħażagħ oħra

•   Għandek wisq maʼ xiex tlaħħaq. Waħda żagħżugħa jisimha Julie tgħid, “F’kull aspett tal-​ħajja, ħafna jgħidulna biex inkomplu nagħmlu aħjar, biex nitjiebu, u biex inkomplu nagħmlu miri akbar u jkollna riżultati aħjar. Mhuwiex faċli li tkun taħt din il-​pressjoni l-​ħin kollu!”

•   It-​teknoloġija. Bil-​mowbajls, tablets, u affarijiet oħra taʼ teknoloġija, aħna nkunu onlajn jew disponibbli kważi 24 siegħa kuljum—xi ħaġa li tistaʼ tagħmilna stressati, u maż-​żmien, twassalna għal burnout.

•   Nuqqas taʼ rqad. “Minħabba l-​iskola, ix-​xogħol, u d-​divertiment, ħafna żgħażagħ iqumu kmieni u jorqdu tard, b’hekk jidħlu f’rutina ħażina li jkun diffiċli joħorġu minna,” tgħid żagħżugħa jisimha Miranda. Din ir-​rutina spiss twassal għal burnout.

 Il-​Bibbja tfaħħar lil min hu bieżel. (Proverbji 6:6-​8; Rumani 12:11) Imma ma taqbilx maʼ li wieħed jaħdem sal-​punt li kull ħaġa oħra fil-​ħajja tmur minn taħt—inkluż is-​saħħa tiegħek.

 “Darba minnhom, indunajt li kienet għaddiet ġurnata u kont għadni ma kiltx, għax kont iffokata wisq fuq ir-​responsabbiltajiet li kont aċċettajt. Tgħallimt li mhuwiex tajjeb li nkun lesta naċċetta kull biċċa xogħol—mhux sal-​punt li jkun hemm saħħti fin-​nofs.”—Ashley.

 Il-​Bibbja għandha raġuni tajba għala tgħid: “Kelb ħaj aħjar minn iljun mejjet.” (Ekkleżjasti 9:4) Li tkompli tisforza lilek innifsek jistaʼ jġiegħlek tħoss li għandek saħħa bħal taʼ ljun—almenu għal ftit żmien. Imma li tisforza lilek innifsek sakemm ikollok burnout jistaʼ jkollu konsegwenzi koroh fuq saħħtek.

•   Tgħallem għid le. Il-​Bibbja tgħid: “L-​għerf hu mal-​modesti.” (Proverbji 11:2) Persuna modesta taf il-​limiti tagħha u ma taċċettax iktar affarijiet milli tiflaħ.

   “Ħafna min-​nies li jkollhom burnout huma dawk li ma jafux jgħidu le, dawk li jipprovaw jaċċettaw kull biċċa xogħol. Dawn ma jkunux modesti meta jagħmlu hekk. U xi darba jew oħra, dan iwassal għal burnout.”—Jordan.

•   Ħu l-​mistrieħ li għandek bżonn. Il-​Bibbja tgħid: “Aħjar id mimlija bil-​mistrieħ milli tnejn mimlijin bix-​xogħol iebes u l-​ġiri wara r-​riħ.” (Ekkleżjasti 4:6) L-​irqad ġieli ġie mqabbel maʼ “ikel għall-​moħħ.” Iż-​żgħażagħ għandhom bżonn jorqdu minn tmien sigħat sa għaxra kull lejl. Imma l-​biċċa l-​kbira minnhom qed jorqdu inqas minn hekk.

   “Meta kelli wisq x’nagħmel, kelli t-​tendenza li ma norqodx biżżejjed. Imma kultant, dik is-​siegħa żejda taʼ rqad tkun eżatt dak li jkolli bżonn biex inkun iktar produttiva u ferħana l-​ġurnata taʼ wara.”—Brooklyn.

•   Organizza ruħek. Il-​Bibbja tgħid: “Il-​pjanijiet tal-​ħabrieki żgur li jkunu taʼ vantaġġ għalih.” (Proverbji 21:5) Li titgħallem tqassam il-​ħin u tikkalkula kemm tlaħħaq tagħmel affarijiet hija abbiltà li se tkun taʼ ġid matul ħajtek.

   “Ħafna mill-​istress li nitfgħu fuqna jistaʼ jiġi evitat billi nużaw kalendarju. Meta jkollok skeda ċara quddiemek, se jkun eħfef biex tara fejn tistaʼ tagħmel aġġustamenti ħalli tevita li jkollok burnout.”—Vanessa.