Kemm jekk wiċċ imb wiċċ, bit-​telefown, bl-​E-​mail, bil-​vidjow, jew b’ittra, il-​ħbieb tal-​qalb jikkomunikaw bejniethom skont kemm jippermettulhom iċ-​ċirkustanzi. B’hekk, biex inkunu qrib taʼ Alla, jeħtieġ li nikkomunikaw miegħu regolarment. Imma kif nistgħu nagħmluh dan?

Nistgħu nkellmu lil Ġeħova permezz tat-​talb. Però, it-​talb lil Alla mhux l-​istess bħal diskursata każwali li jistaʼ jkollna maʼ xi ħadd tamparna. Għandna nifhmu li meta nitolbu, inkunu qed nitkellmu mal-​Ħallieq tagħna, l-​Iktar Għoli fl-​univers. Dan għandu jqanqalna nitolbu b’sens profond taʼ rispett u riverenza. Biex talbna jintlaqaʼ minn Alla, għandna wkoll insegwu ċerti ħtiġijiet. Tlieta minnhom huma dawn li ġejjin.

L-​ewwel, it-​talb għandu jiġi indirizzat esklużivament lil Alla Ġeħova—mhux lil Ġesù, lil xi “qaddis,” jew lil xi xbieha. (Eżodu 20:4, 5) Il-​Bibbja tgħid ċar: “F’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.” (Filippin 4:6) It-​tieni, it-​talb għandu jiġi offrut f’isem l-​Iben t’Alla, Ġesù Kristu. Ġesù nnifsu spjega: “Ħadd ma jiġi għand il-​Missier ħlief permezz tiegħi.” (Ġwanni 14:6) It-​tielet, talbna għandu jkun fi qbil mar-​rieda t’Alla. Il-​Bibbja tiddikjara: “Kulma nitolbuh skond ir-​rieda tiegħu, hu jismagħna.” a—1 Ġwanni 5:14.

M’għandniex xi ngħidu, relazzjoni mill-​qrib mhix se tkun dejjiema jekk titkellem persuna waħda biss. Bħalma żewġt iħbieb jieħdu pjaċir b’komunikazzjoni li fiha jieħdu sehem it-​tnejn li huma, għandna nħallu lil Alla jkellem lilna u għandna nisimgħuh meta jagħmel dan. Int taf kif ikellimna Alla?

Illum, Alla Ġeħova “jkellimna” permezz tal-​Kelma miktuba tiegħu, il-​Bibbja. (2 Timotju 3:16, 17) Għala ngħidu hekk? Biex inġibu eżempju: Nagħmlu mod tirċievi ittra mingħand ħabib tal-​qalb. Wara li taqraha, forsi b’entużjażmu tgħid lil ħaddieħor, “Għadni kif smajt mingħand ħabibi!” Però, il-​komunikazzjoni ma kinitx mitkellma, imma bil-​miktub. B’mod simili, billi taqra l-​Bibbja, int tkun qed tħalli lil Ġeħova jkellmek. B’hekk, Gina, li kkwotajna fl-​ewwel artiklu, tgħid, “Jien naħseb li jekk irrid li Alla jqisni bħala ħabiba, għandi neżamina l-​‘ittra’ li kitbilna—il-​Bibbja.” Hi żżid, “Il-​qari tal-​Bibbja kuljum ressaqni eqreb lejn Alla.” Int tħalli lil Ġeħova jkellmek kull ġurnata billi taqra l-​Kelma tiegħu, il-​Bibbja, kuljum? Li tagħmel dan se jgħinek tħossok eqreb lejn Alla.