SKOND kalkolu wieħed, bejn l-​1952 u l-​1990, ġew pubblikati iktar minn 55 traduzzjoni ġdida bl-​Ingliż taʼ l-​Iskrittura Griega Kristjana. Minħabba l-​għażliet li jagħmlu t-​tradutturi dwar il-​mod kif jittraduċu ċerti termini, m’hemm l-​ebda traduzzjoni bħal oħra. Sabiex jara kemm hu taʼ min joqgħod fuqu x-​xogħol tat-​tradutturi, Jason BeDuhn, wieħed mill-​professuri taʼ l-​istudji reliġjużi fl-​Università tat-​Tramuntana t’Arizona, fi Flagstaff, Arizona, l-​Istati Uniti, eżamina tmien traduzzjonijiet ewlenin u qabbilhom biex jiċċekkja l-​eżattezza tagħhom. Fosthom kien hemm in-​New World Translation of the Holy Scriptures, pubblikata mix-​Xhieda taʼ Ġeħova. X’kien ir-​riżultat?

Filwaqt li kkritika xi ftit mill-​għażliet fit-​traduzzjoni, BeDuhn sejjaħ in-​New World Translation traduzzjoni “tajba ħafna,” “ħafna aħjar,” u “iktar konsistenti” minn xi traduzzjonijiet oħrajn li eżamina. Meta tqis kollox, ikkonkluda BeDuhn, in-​New World Translation “hija waħda mill-​iktar traduzzjonijiet eżatti bl-​Ingliż tat-​Testment il-​Ġdid disponibbli llum” u “l-​iktar waħda eżatta mit-​traduzzjonijiet imqabblin.”—Truth in Translation: Accuracy and Bias in English Translations of the New Testament.

BeDuhn innota wkoll li ħafna tradutturi kienu taħt pressjoni biex “jinterpretaw jew iżidu maʼ dak li tgħid il-​Bibbja biex tkun fi qbil maʼ dak li l-​qarrejja moderni jridu u għandhom bżonn jaraw fil-​Bibbja.” Mill-​banda l-​oħra, in-​New World Translation hija differenti, osserva BeDuhn, minħabba “li n-​NW hija iktar eżatta bħala traduzzjoni letterali u konservattiva taʼ l-​espressjonijiet oriġinali tal-​kittieba tat-​Testment il-​Ġdid.”

Bħalma jgħid il-​Kumitat tat-​Traduzzjoni tal-​Bibbja New World fid-​daħla tal-​bidu, hija “responsabbiltà kbira” li tittraduċi l-​Iskrittura Mqaddsa mil-​lingwi oriġinali tagħha bi kliem modern. Il-​Kumitat ikompli jgħid: “It-​tradutturi taʼ dan ix-​xogħol, li jibżgħu mill-​Awtur Divin taʼ l-​Iskrittura Mqaddsa u jħobbuh, iħossu li għandhom responsabbiltà kbira Lejh li jgħaddu l-​ħsibijiet u d-​dikjarazzjonijiet tiegħu eżatt kemm jistaʼ jkun.”

Minn mindu ġiet pubblikata għall-​ewwel darba fl-​1961, in-​New World Translation of the Holy Scriptures saret disponibbli bi 32 lingwa kif ukoll żewġ edizzjonijiet bil-​Braille. L-​Iskrittura Griega Kristjana tan-​New World Translation, jew it-​“Testment il-​Ġdid,” hija disponibbli b’18-il lingwa oħra kif ukoll edizzjoni waħda bil-​Braille. Nistidnuk taqra l-​Kelma t’Alla f’din it-​traduzzjoni moderna u “tajba ħafna,” forsi bil-​lingwa tiegħek stess.