HEMM qegħdin, b’kuluri attraenti u sbieħ, kollha lesti biex jiġbdu l-​attenzjoni tiegħek. Lanqas biss kont bi ħsiebek tieqaf biex tarahom, imma issa l-​kuluri tagħhom ġibduk lejhom. Minn fuq l-​ixkafef, dawn ir-​rivisti li jiġbdu l-​għajn qishom kollha qed jgħidulek, “Aqbadni f’idejk u ixtrini!” U għalkemm ġeneralment huwa veru li ma tistax tiġġudika ktieb mill-​qoxra taʼ barra, irridu nammettu li l-​istampi fuq il-​qoxra taʼ dawn ir-​rivisti għandhom effett speċjali fuq dawk li jarawhom. F’ħafna pajjiżi, hemm kompetizzjoni qawwija fil-​produzzjoni u l-​bejgħ taʼ dawn ir-​rivisti li bl-​Ingliż jissejħu glossies.

Ir-rivisti jistgħu jinqasmu f’żewġ kategoriji prinċipali: rivisti speċjalizzati u rivisti tal-​konsumatur. Dawn taʼ l-​aħħar nistgħu ngħidu li jittrattaw fuq kull suġġett, imma l-​pubblikaturi jipprovaw jolqtu ċerti gruppi taʼ nies. Ir-​rivisti huma differenti mill-​gazzetti kemm fl-​għamla u kemm fil-​kontenut, fil-​fatt huma iżgħar fid-​daqs u stampati fuq karta taʼ kwalità aħjar. Dan jagħtihom dehra tleqq, u b’hekk jolqtu ħafna lil dak li jkun qed jixtri. Ir-​rivisti ġeneralment għandhom inqas interess li jwasslu malajr l-​aħbarijiet u l-​ġrajjiet li qed jinbidlu milli għandhom il-​gazzetti. Huma jirrappreżentaw lil għadd taʼ kittieba u jkopru varjetà kbira taʼ informazzjoni u opinjonijiet. Ir-​rivisti jkollhom ukoll stili taʼ kitba differenti, li jibdew minn rapporti taʼ xi ħaġa li tkun ġrat għal stili taʼ kitba iktar persunali jew emozzjonali.

Waqt li tkun bil-​wieqfa tħares lejn il-​varjetà taʼ rivisti quddiemek, hemm diversi affarijiet li x’aktarx se jinfluwenzaw l-​għażla tiegħek jew saħansitra jgħinuk tiddeċiedi jekk tixtrix jew le. M’għandniex xi ngħidu, il-​fatt jekk intix raġel jew mara huwa fattur importanti. Jiddependi wkoll fuq x’inhuma l-​interessi persunali tiegħek u forsi, fuq kollox, il-​prezz tar-​rivista. Iva, dawn ir-​rivisti jistgħu jkunu daqsxejn għoljin, forsi xi tlieta jew erbaʼ darbiet iżjed mill-​prezz taʼ gazzetta. Però, il-​gazzetta taʼ llum ma ddumx ma tintrema u tinbidel mal-​gazzetta t’għada, waqt li r-​rivisti jistgħu jdumu għandek ħafna iktar. Ir-​rivista li tagħżel tistaʼ taqraha meta tkun komdu  u tistaʼ żżommha għal ġimgħat jew xhur sħaħ u forsi anki tagħtiha lil ħaddieħor biex jaqraha wkoll. Il-​libreriji kultant ikunu interessati f’kopji taʼ rivisti qodma, u xi rivisti anki jispiċċaw f’xi kollezzjoni.

Jiswew il-​Flus li Tonfoq?

M’għandniex xi ngħidu, hija deċiżjoni persunali jekk taħsibx li dawn ir-​rivisti jiswewx il-​flus li tonfoq fihom jew le. Ir-​raġuni prinċipali għala huma relattivament għoljin hi li trid spiża mhux ħażin biex tipproduċihom. Il-​pubblikatur irid jagħmel riċerka estensiva qabel ma joħroġ rivista ġdida f’suq li diġà mimli bihom. Daż-żmien, kumpaniji kbar jippubblikaw u jistampaw sa 30 rivista differenti jew iktar, u jużaw l-​istamperija tagħhom stess. Minkejja dan, l-​ispejjeż tagħhom huma kbar, minħabba li kull pubblikazzjoni għandha bżonn it-​tim għaliha.

Jekk tħares fl-​ewwel paġna taʼ rivista tal-​konsumatur, forsi tibqaʼ sorpriż meta tara kemm hemm bżonn t’edituri u maniġers. Kull wieħed, jew waħda, jieħu ħsieb artikli differenti li jkun hemm fir-​rivista, u kull wieħed minnhom għandu l-​istaff tiegħu. Ġeneralment, ir-​rivisti l-​kbar ikollhom il-​kittieba u l-​fotografi tagħhom, għalkemm ħafna kittieba u fotografi jaħdmu indipendentement jew għal diversi kumpaniji permezz t’aġenzija, u dan ifisser li jridu jitħaddmu fuq bażi regulari jew part-time.

L-artikli kollha mingħand il-​kittieba jiġu ċċekkjati minn proofreaders. Ħafna mill-​artikli jerġgħu jinkitbu jew isirulhom xi aġġustamenti mill-​edituri taʼ l-​artikli. L-​istampi jifformaw parti kbira minn dawn ir-​rivisti, u għalhekk hemm bżonn taʼ wħud li jiddisinjaw il-​grafiċi. Imbagħad il-​compilers, li jgħaqqdu l-​informazzjoni kollha flimkien, jibdew jaħdmu fuq id-​dehra ġenerali tar-​rivista, billi jiddeċiedu dak li jkun se jidher fuq kull paġna. Il-​kliem u l-​istampi jridu jiġu preżentati b’tali mod li jiġbdu lill-​qarrej, biex għajnejh imorru lejn parti wara l-​oħra tar-​rivista. Il-​maġġuranza tal-​kumpaniji li jippubblikaw jużaw stylebook​—manwâl li juri liema termini u stili għandhom jintużaw fil-​pubblikazzjonijiet tagħhom. Fl-​aħħar mill-​aħħar, ir-​responsabbiltà taqaʼ f’idejn l-​editur prinċipali. Hu, jew hi, jkollu jieħu deċiżjonijiet taʼ dak il-​ħin, sabiex il-​pubblikazzjoni ma tittardjax. Qabel ma r-​rivista tmur għall-​istampar, tiġi preparata kopja taʼ prova biex jeżaminawha d-​diretturi.

L-ispejjeż jinkludu l-​istampar u t-​tqassim kif ukoll il-​pagi tal-​ħaddiema. Minħabba li ma jinbigħux il-​kopji kollha stampati, il-​ħwienet ġeneralment jaċċettaw kwantitajiet kbar bil-​kundizzjoni li jekk ma jbigħuhomx jistgħu jirritornawhom. Ma tkunx qed tiżbalja jekk taħseb li l-​prezz tar-​rivista ma jkoprix il-​flus kollha li hemm bżonn biex issir. Fil-​fatt, rivista medja tal-​konsumatur ma tistax tibqaʼ fis-​suq jekk parti kbira minnha ma titħalliex għar-​reklami. Reċentement rivista internazzjonali taʼ 200 paġna kellha iktar minn 80 paġna sħiħa taʼ reklami. Dawk li jagħmlu r-​reklami jirrealizzaw li l-​karta tleqq taʼ kwalità tajba u stampi b’erbaʼ kuluri se juru l-​prodotti tagħhom bl-​aħjar mod.

Fl-Awstralja huwa stmat li kull individwu jqattaʼ, bejn wieħed u ieħor, 1.2 minuti kuljum jaqra xi rivista. Dan jitqabbel maʼ 1.1 minuta kuljum jara xi film fiċ-​ċinema jew 0.7 minuti kuljum jismaʼ l-​mużika. Bla dubju din hi raġuni waħda għala r-​rivisti jipprovdu mod taʼ qligħ għar-​reklami.

X’Jiġbdek Lejhom

Filwaqt li ma nistgħux neżaminaw kull rivista pubblikata, forsi nagħtu daqqa t’għajn lejn  xi rivisti għan-​nisa. Il-​kontenut tar-​rivisti għan-​nisa ġie eżaminat bir-​reqqa dan l-​aħħar, għax għalkemm xi wħud iqisuhom bla perikli, oħrajn iħossu li dawn ir-​rivisti jieħdu vantaġġ min-​nisa. Ċertament dawn iqanqlu eċċitament u faxxinu, u dawn jikkontribwixxu għall-​bejgħ. Madankollu, f’dawn l-​aħħar ftit snin, ir-​rivisti għan-​nisa għaddew minn bidla. Xi wħud mir-​rivisti li qabel kienu jittrattaw biss dwar kif wieħed jieħu ħsieb id-​dar, issa qed jippubblikaw iktar artikli dwar nies famużi. L-​artikli dwar is-​saħħa wkoll saru popolari. In-​nisa kienu jieħdu pjaċir jaqraw l-​istejjer qosra, u kienet is-​serje tan-​novelli fir-​rivisti li spiss għenet biex iktar jinbiegħu. Imma issa ftit huma r-​rivisti li jkollhom stejjer qosra u serje taʼ novelli.

X’inhu dak li jgħin il-​bejgħ illum? Huwa dak li hemm fuq il-​qoxra li qisu qed jgħajjat, “Aqbadni f’idejk u ixtrini!” Jekk tidher mara fuq il-​qoxra, trid tkun famuża jew sabiħa. Il-​mudella taʼ fuq il-​qoxra trid tkun ukoll żagħżugħa u rqiqa, u permezz tat-​teknoloġija moderna jistgħu jirranġaw ir-​ritratt biex dan joħroġ bl-​aħjar mod possibbli. Xi ngħidu dwar il-​kliem fuq il-​qoxra? M’għandniex xi ngħidu, dan irid jinbidel skond l-​etajiet u l-​istili taʼ ħajja li jridu jintlaħqu. Il-​qoxra taʼ xi rivisti tiffoka fuq il-​moda; oħrajn joffru rigali li jistgħu jintrebħu. Il-​qoxra spiss hija gwida taʼ dak li jkun hemm fir-​rivista.

Jistgħu Dawn ir-​Rivisti Jinfluwenzawna?

Il-​pubblikaturi tar-​rivisti jsostnu li jafu xi jridu n-​nisa. U huwa veru li huma jagħmlu riċerka estensiva sabiex isiru jafu xi jridu n-​nisa in ġenerali. Imma rridu nistaqsu, Qegħdin jilħqu bżonn li verament jeżisti, jew huma infushom ħolqu bżonn sabiex jissodisfawh huma stess? Ejja nikkunsidraw modi li bihom ħafna rivisti għan-​nisa jifformaw il-​ħsieb tan-​nies. L-​ewwelnett, ir-​rapport kontinwu taʼ kif jgħixu u kif jaħsbuha nies famużi. Forsi veru li dan hu dak li n-​nies jixtiequ jaqraw dwaru, imma jistaʼ jkun hemm perikli moħbijin? Fl-​istudju tiegħu About Face, Jonathan Cole, newropsikologu mediku fl-​Università taʼ Southampton, l-​Ingilterra, iwissi li jekk tkun taf wiċċ qabel ma tiltaqaʼ maʼ l-​individwu, jew qabel ma tismaʼ leħnu, jistaʼ jikkaġuna intimità artifiċjali. Maʼ dan żid l-​ammont taʼ informazzjoni li tinkiteb dwar nies famużi. Dan forsi jispjega l-​fenomenu modern tan-​niket kbir tal-​pubbliku meta jmut xi ħadd li ma kinux jafuh, imma li kienu jaraw spiss ir-​ritratti tiegħu fir-​rivisti. M’għandniex xi ngħidu, rapporti fuq it-​televixin u fil-​gazzetti jistgħu jżidu maʼ din l-​intimità immaġinarja.

Kwistjoni oħra li qed tiġi investigata hi l-​potenzjal li għandhom ir-​rivisti biex jinfluwenzaw l-​attitudni tan-​nisa dwar dik li hi kunsidrata bħala l-​figura aċċettabbli. Filwaqt li l-​livelli jinbidlu f’pajjiżi differenti, il-​messaġġ ġenerali fir-​rivisti għan-​nisa f’pajjiżi żviluppati hu li trid tkun irqiqa biex tkun mal-​moda. Kien hemm kritika  ħarxa minn għalliema, ġenituri, u anki mudelli nfushom li jgħidu li l-​istampi li jidhru taʼ spiss fir-​rivisti għan-​nisa għandhom jieħdu ftit mit-​tort għaż-​żjieda fil-​problemi tas-​saħħa konnessi maʼ l-​ikel u d-​dieti kontinwi tan-​nisa​—b’mod partikulari, it-​tfajliet.

Sabiex tivverifika dawn l-​istqarrijiet, edizzjoni Awstraljana taʼ rivista internazzjonali għamlet stħarriġ fost il-​qarrejja tagħha u stiednet panel t’esperti biex jikkummentaw fuq ir-​riżultati. Ħadu sehem iktar minn 2,000 mara, li 82 fil-​mija minnhom kienu bejn is-​16 u d-​29 sena. Il-​parteċipanti kkonsultaw tabella bil-​piż li hu rikkmandat​—jiġifieri, il-​piż skond it-​tul, l-​età, eċċetra. Madwar 60 fil-​mija min-​nisa ħasbu li kellhom piż żejjed, għalkemm 22.6 fil-​mija biss kellhom iktar piż milli kien rikkmandat. Filwaqt li 59 fil-​mija, li l-​piż tagħhom kien inqas milli kien rikkmandat, ħasbu li kienu taʼ piż normali, 58 fil-​mija li ġew deskritti bħala li huma taʼ piż normali ħasbu li kellhom piż żejjed. Tnax fil-​mija biss kienu kuntenti bil-​piż tagħhom. Xi wħud ikkritikaw it-​tabella li pprovda d-​Dipartiment tas-​Saħħa taʼ l-​Awstralja, billi sostnew li l-​piż li ngħata fuq it-​tabella għal kull tul kien iżżejjed. Iżjed minn hekk, 67 fil-​mija ammettew li dejjem jgħiru għall-​figura taʼ nisa oħrajn, u waħda minn kull tmienja ammettiet li għandha jew kellha problema kbira konnessa maʼ l-​ikel li ma kinitx tistaʼ tikkontrollaha.

Fiona Pelly, esperta fil-​qasam tan-​nutriment li kienet fil-​panel, qalet: “Huwa ovvju li l-​piż qed isir prijorità prinċipali fil-​ħajjiet tan-​nisa.” U t-​Tabiba Janice Russell, direttriċi taʼ klinika f’Sydney għal nies bi problemi konnessi maʼ l-​ikel, qalet: “Dak li hu saħansitra iktar taʼ ħsara huma s-​sentimenti taʼ ħtija u għira li jispikkaw [fl-istħarriġ]. Mhux tajjeb għas-​saħħa li tħoss dawn is-​sentimenti l-​ħin kollu.”

Madankollu, l-​iktar sejba sinifikanti kienet li għalkemm ftit minn dawk li ħadu sehem ammettew li pprovaw jimitaw l-​istilel fil-​films, 72 fil-​mija qalu li l-​iktar li jinfluwenzawhom huma l-​mudelli li jidhru fir-​rivisti. Waħda żagħżugħa, li ġiet megħjuna minn klinika biex tonqos, qalet li ħassitha kburija li tiżen 55 kilo imma ammettiet: “Xorta għadni nħoss il-​pressjoni mill-​mezzi tax-​xandir, mir-​rivisti u min-​nies famużi.” Stħarriġ ieħor li sar f’postijiet differenti spiċċa bl-​istess riżultati.

Żewġ Rivisti taʼ Kategorija Differenti

Waħda mill-​iktar rivisti informattivi u taʼ ġid li tistaʼ ssib hija dik li għandek f’idejk issa, Stenbaħ! Ma xtrajthiex minn xi ħanut tal-​kotba​—forsi offrihielek xi ħadd li kien għaddej fit-​triq, jew forsi xi ħadd ġabhielek id-​dar. Din ir-​rivista, li hi pubblikata, stampata, u mqassma madwar id-​dinja minn volontieri, tiġi offruta mingħajr ħlas. Kittieba għal Stenbaħ! jibagħtu artikli minn madwar id-​dinja kollha, u dawn ukoll huma volontieri, bħalma huma wkoll l-​artisti u t-​tradutturi. Ir-​rivista Awake! (Stenbaħ!) dehret l-​ewwel fl-​1946. Il-​predeċessuri kienu Consolation u The Golden Age, li ġew pubblikati għall-​ewwel darba fl-​1919. Dawn ir-​rivisti minn dejjem ġew pubblikati mingħajr ebda reklami mħallsin. Stenbaħ! bħalissa qed tiġi stampata b’87 lingwa, f’ħafna minnhom darbtejn fix-​xahar, u madwar id-​dinja għandha ċirkulazzjoni taʼ iktar minn 22 miljun kopja.

It-​Torri taʼ l-​Għassa li joħroġ mar-​rivista Stenbaħ! għandu rekord saħansitra iktar impressjonanti, billi issa qed jiġi stampat b’148 lingwa. Jiġu stampati ’l fuq minn 25 miljun kopja taʼ The Watchtower (It-Torri taʼ l-​Għassa) kull ħarġa u din ir-​rivista ilha toħroġ mill-​1879. Bejniethom, dawn iż-​żewġ rivisti qed jagħtu ħafna għajnuna siewja għax jinformaw lin-​nies dwar kwistjonijiet importanti f’ħajjithom, u huma taʼ interess għall-​irġiel, għan-​nisa, u għaż-​żgħażagħ minn madwar id-​dinja.

Ilkoll kemm aħna rridu nirriflettu fuq il-​fatt li ma nitwildux bl-​għarfien. L-​għerf u l-​għarfien jiżdiedu hekk kif nikbru u niżviluppaw, u spiss l-​opinjonijiet tagħna jiġu fformati u l-​istil taʼ ħajjitna jiżviluppa b’riżultat taʼ dak li naqraw. Għalhekk huwa ferm importanti li nagħżlu li naqraw affarijiet taʼ ġid u li jibnuna.

[Stampa f’paġna 25]

Ir-​rivisti jistgħu jinfluwenzaw l-​attitudni tagħna dwar il-​figura

[Stampa f’paġna 26]

Għalkemm m’humiex glossies, jitqassmu iktar minn 25 miljun kopja tat-​Torri taʼ l-​Għassa b’148 lingwa u 22 miljun kopja taʼ Stenbaħ! b’87 lingwa