Hu Dan l-​Iskop t’Alla?

AQRA liema gazzetta trid. Ara t-​televixin, jew ismaʼ r-​radju. Ħlief aħbarijiet dwar id-​delitti, il-​gwerer, u t-​terroriżmu ma ssibx! Aħseb ftit dwar l-​inkwiet tiegħek stess. Forsi tħossok imnikket ħafna minħabba xi marda jew il-​mewt taʼ xi ħadd għażiż għalik. Forsi qed tħossok bħalma ħassu r-​raġel twajjeb Ġob, li qal li kien “mgħargħar fin-​niket.”​—Ġob 10:15.

Staqsi lilek innifsek:

▪ Hu dan l-​iskop t’Alla għalija u għall-​bqija tal-​bnedmin?

▪ Fejn nistaʼ nsib għajnuna biex inkampa mal-​problemi tiegħi?

▪ Hemm xi tama li qatt naraw il-​paċi fuq l-​art?

Il-​Bibbja tipprovdi tweġibiet sodisfaċenti għal dawn il-​mistoqsijiet.

 IL-​BIBBJA TGĦALLEM LI ALLA SE JĠIB DAWN IL-​BIDLIET FUQ L-​ART.

“Jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ.”​—Rivelazzjoni 21:4

“Iz-​zopp [se] jaqbeż bħal għażżiela.”​—Isaija 35:​6

“Jinfetħu għajnejn l-​għomja.”​—Isaija 35:​5

 “Dawk kollha li qegħdin fl-​oqbra tat-​tifkira . . . joħorġu.”​—Ġwanni 5:​28, 29

“Ħadd minn min jgħammar hemm ma jgħid: ‘Jien marid.’”​—Isaija 33:24

“Ikun kotran il-​qamħ fuq l-​art.” ​—Salm 72:16

 IBBENEFIKA MINN DAK LI TGĦALLEM IL-​BIBBJA

Taqbadx u tgħid li dak li ssemma fil-​paġni taʼ qabel hu biss ħolma li ma tistax isseħħ. Alla wiegħed li se jwettaq dawn il-​wegħdi, u l-​Bibbja tispjega kif se jagħmel dan.

Però l-​Bibbja twiegħed iktar minn hekk. Tipprovdi s-​soluzzjoni biex int tgawdi ħajja sodisfaċenti saħansitra minn issa. Aħseb ftit dwar l-​ansjetajiet u l-​inkwiet li għandek int stess. Dawn jistgħu jinkludu problemi taʼ flus, problemi fil-​familja, mard, jew il-​mewt taʼ xi ħadd għażiż għalik. Il-​Bibbja tistaʼ tgħinek tkampa mal-​problemi taʼ llum, u tistaʼ ttaffilek id-​dwejjaq billi twieġeb mistoqsijiet bħal dawn:

▪ Għala nsofru?

▪ Kif nistgħu nkampaw maʼ l-​ansjetajiet tal-​ħajja?

▪ Kif jistaʼ jkollna ħajja tal-​familja iktar ferħana?

▪ X’jiġrilna meta mmutu?

▪ Qatt se nerġgħu narawhom lill-​għeżież tagħna li mietu?

▪ Kif nistgħu nkunu żguri li Alla se jwettaq il-​wegħdi tiegħu għall-​futur?

 Il-​fatt li qed taqra dan il-​ktieb juri li int tixtieq tkun taf x’tgħallem il-​Bibbja. Dan il-​ktieb se jgħinek. Innota li hemm il-​mistoqsijiet ibbażati fuq il-​paragrafi fin-​naħa t’isfel tal-​paġna. Miljuni taʼ nies ħadu gost jużaw il-​metodu taʼ studju permezz taʼ mistoqsija u tweġiba meta ddiskutew il-​Bibbja max-​Xhieda taʼ Ġeħova. Nittamaw li int ukoll. Jalla jkollok il-​barka t’Alla hekk kif tgawdi l-​esperjenza kommoventi u sodisfaċenti taʼ li ssir taf x’tgħallem verament il-​Bibbja!

[Kaxxa/Stampa f’paġna 7]

SIR AF IL-​BIBBJA TIEGĦEK

IL-​BIBBJA hi magħmula minn 66 ktieb li ftit minnhom huma ittri. Dawn huma maqsumin f’kapitli u versi li jagħmluha faċli biex tirreferi għalihom. Meta f’din il-​pubblikazzjoni tara xi skrittura, l-​ewwel numru wara l-​isem jindika l-​kapitlu tal-​ktieb jew taʼ l-​ittra fil-​Bibbja, u n-​numru li jiġi wara jirreferi għall-​vers. Per eżempju, jekk tara t-​“2 Timotju 3:​16” tkun it-​tieni ittra lil Timotju, kapitlu 3, vers 16.

Jekk tfittex l-​iskritturi li hawn f’dan il-​ktieb int malajr se ssir familjari mal-​Bibbja. U xi ngħidu jekk tagħmel skeda biex tibda taqra l-​Bibbja kuljum? Jekk taqra minn tlieta sa ħames kapitli kuljum jirnexxilek taqra l-​Bibbja kollha f’sena.