Aller au contenu

Aller au sommaire

 HAKAKO’IA 12

Pehea ‘ia ha’atata atu ‘oe me te Etua?

Pehea ‘ia ha’atata atu ‘oe me te Etua?

1. E haka’oko uanei te Etua te tau pure paotu?

E makimaki te Etua ‘ia ha’atata atu te tau enana me ia ma ‘oto i te pure. (Taramo 65:2) ‘A’o’e ia e haka’oko a ko’e ‘a e to’o i te tau pure paotu, me he pure a titahi vahana e hana kukumi i ta ia vehine. (1 Petero 3:7) ‘A’o’e te Etua i haka’oko i te tau pure a Iraere no to atou tohe i ‘oto te hana hauhau. ‘Atika, e ha’ati’a te Etua i te tau pure a te tau po’i mikeo me te hopo, ati’i me te tau mikeo toko. A pakaihi i te pure.A tatau i te Itaia 1:15; 55:7.

2. Pehea ‘ia pure?

E hana atoratio te pure. E pure tatou ‘ia Iehova anaiho to tatou Etua Pepena. (Mateo 4:10; 6:9) E enana mikeo ho’i tatou, e pure anaiho tatou ma ‘oto te ikoa ‘o Ietu, i mate ho’i no to tatou tau mikeo. (Ioane 14:6) ‘A’o’e Iehova e makimaki ‘ia pe’au ananu tatou te tau pure patu’ia a ko’e ‘a ha’amau’ia koekoe. A pure koekoe atu tatou.A tatau i te Mateo 6:7; Firipo 4:6, 7.

E haka’oko mai te Etua te tau pure koekoe. (1 Samuera 1:12, 13) E makimaki ia ‘ia pure ananu tatou i te popou’i, i te ahiahi, i te hora kaikai a ko’e ‘a ‘ia kohi’i tatou.A tatau i te Taramo 55:22; Mateo 15:36.

3. No te aha te katahi nei te tau Kiritiano?

Mea hana nui ‘ia ha’atata atu me te Etua no te mea e pohu’e nei tatou i vaveka te tau enana ‘a’o’e e ha’ati’a ‘ia ia me te ha’aha’a i ta ia tau tekao tohu e tupu nei i ‘uka o te henua. (2 Timoteo 3:1, 4; 2 Petero 3:3, 13) E makimaki tatou e ha’atata atu me titahi pupu enana katahi titahi i titahi me te apu’u atu.A tatau i te Heperero 10:24, 25.

 ‘Ia he’e tatou ma te kaokao o te tau enana pi te kaoha i te Etua, e toko ‘ia tatou no te ha’atata atu me ia. E ha’ameita’i mai te tau putuputu’ia a te tau Ite no Iehova, a oho te ‘i’i me te haka’oko atu.A tatau i te Roma 1:11, 12.

4. Pehea ‘ia ha’atata atu ‘oe me te Etua?

E koaka ‘ia ‘oe e ha’atata atu me Iehova ma te kaituto meita’i i ta ia Tekao, ta ia tau hana, ta ia tau ‘o’onaki me ta ia tau tekao tohu. ‘Ia ha’atata atu ‘oe to ‘oe kaituto me te pure, e nui to ‘oe kaoha me to ‘oe koekoe meita’i no te Etua.A tatau i te Iotue 1:8; Taramo 1:1-3.

Ma te ha’ati’a i te Etua, e ha’atata ‘oe me ia. ‘Atika te ha’ati’a me he pua ta ‘oe i ha’ataetae. No te apu’u i to ‘oe ‘ite, a umihi mai te tumu o to ‘oe ha’ati’a.A tatau i te Mateo 4:4; Heperero 11:1, 6.

5. E aha te tau meita’i ‘ia ha’atata ‘oe me te Etua?

E aukuha nei Iehova i te tau enana i kaoha ‘ia ia. E apu’u ia ‘ia ‘oe i te tau mea ha’ahauhau nei to ‘oe ha’ati’a me to ‘oe tata’i’ia i te pohu’e’ia ananu. (Taramo 91:1, 2, 7-10) Te haka’ite nei ia e aha te tau hakâtu pohu’e’ia e ha’ahopo nei to ‘oe pohu’e’ia meita’i me to ‘oe koakoa. Te hakako mai nei ia te hakâtu pohu’e’ia meita’i oko.A tatau i te Taramo 73:27, 28; Iakopo 4:4, 8.