Aller au contenu

Aller au sous-menu

Te tau Ite no Iehova

Marquisien (Nuku Hiva)

E makimaki nei ‘oe e ‘ite te tekao tiatohu?

E makimaki nei ‘oe e ‘ite te tekao tiatohu?

TE TEKAO TIATOHU i ‘uka o te aha? I ‘uka o titahi ui’ia oko ta te enana e ui nei. Ua ui oti ‘oe tenei tau ui’ia:

  • E aukuha tiatohu nei te Etua ‘ia tatou?

  • E ko’e uanei te toua me te tau mamae?

  • E aha te tupu mai ‘ia mate tatou?

  • E aha te tata’i’ia no te tau po’i mamate?

  • Pehea au ‘ia pure ‘ia haka’oko mai te Etua?

  • Pehea e koaka i au te koakoa?

I hea ‘oe e umuhi ai te tau pahono o tenei tau ui’ia? Mea nui te tau hamani i ‘oto o te vai’ia hamani me te hoko’ia hamani, i pe’au e tuku te tau pahono o tenei tau ui’ia. Mea pinepine te ‘a tau hana i pakeka titahi me titahi. E aha ‘a te tau hana mea hei, ‘ia pao mai, ua tehito ati’i ha’ahou’ia a ko’e ‘a mono’ia.

E vai nei tenei, e tahi hamani me te tau pahono toitoi i ‘oto. E hamani toitoi noa. Ua pe’au Ietu ma ‘oto o titahi pure i te Etua: “O ta ‘oe tekao te tiatohu.” (Ioane 17:17) Tenei Tekao e Pipiria hamani tapu. Ma mu’i o tenei kakaiu hamani, e ‘ite ‘oe titahi hikotai no te tau pahono’ia tahakahaka me te tiatohu ta te Pipiria kave mai i te tau ui’ia i ‘uka nei.

 E aukuha tiatohu nei te Etua ‘ia tatou?

TUMU O TE UI’IA: E pohu’e nei tatou io titahi aoma’ama pi te kaoha ko’e me te teka. E hakako a’a te nui’ia te ha’ati’a na te Etua te teka i mamae ai tatou.

TA TE PIPIRIA E HAKAKO MAI: Ko’e nui o te Etua te tumu o te mea pe. “‘A’o’e na te Etua tiatohu e hana i te mea pe me te mana oko e hana i te mea ‘a’o’e toitoi!” va’ana Iope 34:10. E makimaki te Etua te meita’i no te tau enana no keina hakako mai Ietu ‘ia tatou pehea ‘ia pure: “To matou Motua ‘io he aki, . . . ‘ia tihe to ‘oe patireia. A tae to ‘oe makimaki ‘io he aki, hakâtu i ‘uka o te henua.” (Mateo 6:9, 10) E aukuha nui te Etua no tatou me te hana no te ha’atiatohu to ia ma’akau.—Ioane 3:16.

A tiohi atu te Tenete 1:26-28; te Iakopo 1:13; me te 1 Petero 5:6, 7.

E ko’e uanei te toua me te tau mamae?

TUMU O TE UI’IA: E kukumi ananu nei te tau toua te pohu’e o te enana. Mahe mamae ha’amehea ai tatou ti’itahi.

TA TE PIPIRIA E HAKAKO MAI: Ua pe’au te Etua i hua mou po e ha’ati’a tohu’ia i te mo’u i ‘uka o te henua. Ma ‘oto tenei ha’atere’ia ‘io he aki “‘a’o’e [te tau enana] e toua atu toua mai haka’ua.” A ko’e ‘a “e pehi atou i ta atou kohe me he toki ke’i i te epo.” (Itaia 2:4) E ha’ako’e te Etua te mea ‘a’o’e toitoi me te mamae. E pe’au a’a te Pipiria: “Na [te Etua] e ho’oi i to atou vai mata, me te ha’ako’e nui i te mate’ia, i te ue, i te ta’a’au, me te mamae. Te tau mea kakiu [oia ho’i te tau mea ‘a’o’e toitoi me te tau mamae o ta tatou e ‘ite nei tenei ‘a], e ka’o.”—Apokarupo 21:3, 4.

A tiohi atu te Taramo 37:10, 11; 46:9; me te Mikea 4:1-4.

E aha te tupu mai ‘ia mate tatou?

TUMU O TE UI’IA: Te nui’ia te tau ha’ati’a e hakako a’a titahi mea ma ‘oto o te enana, e pohu’e a’a ‘ia mate ia. E ha’ati’a titahi tau po’i e koaka te tau enana mate ‘ia makaka te tau po’i pohu’e a’a a ko’e ‘a e ha’amamae te Etua te tau po’i hauhau me te humu ‘io he havaiki pe.

TA TE PIPIRIA E HAKAKO MAI: ‘Ia mate te tau enana ‘a’o’e atou e pohu’e haka’ua. “‘A’o’e te po’i mamate e ‘ite,” va’ana Kohereta 9:5. Mei te mea ‘a’o’e te tau po’i mamate e ‘ite, e ma’akau ke, ‘a’o’e ‘ia makaka te tau po’i pohu’e me te toko ‘ia atou.—Taramo 146:3, 4.

A tiohi atu te Tenete 3:19 me te Kohereta 9:6, 10.

 E aha te tata’i’ia no te tau po’i mamate?

TUMU O TE UI’IA: E makimaki tatou e pohu’e, e makimaki tatou e koakoa me te tau po’i ta tatou e ha’atahia. Mea koakoa ‘ia ha’atutuki haka’ua me te tau po’i tahia i mamate.

TA TE PIPIRIA E HAKAKO MAI: Te nui’ia te tau po’i mamate e pohu’e haka’ua atou. Ua pe’au Ietu “te po’i e moe nei i ‘oto te ‘ua e ‘oko i to ia ‘eo, e he’e mai i vaho.” (Ioane 5:28, 29) Mei ta te Etua makimaki ‘omua, te tau po’i e ha’apohu’e’ia haka’ua e noho i ‘uka o te henua ha’a’i’o’ia e tahi papua meita’i. (Ruka 23:43) I mua atu, me ta te Etua e pe’au, i ‘oto te pohu’e toitoi noa me te pohu’e ananu no te tau enana haka’oko. Ua pe’au te Pipiria: “E ‘i’o te henua no te po’i toitoi, i ‘uka iho atou e noho ananu ai.”—Taramo 37:29.

A tiohi atu te Iope 14:14, 15; te Ruka 7:11-17; me te Hana 24:15.

Pehea au ‘ia pure ‘ia haka’oko mai te Etua?

TUMU O TE UI’IA: E pure nei te nui’ia te tau po’i Kiritiano mea a, mea nui i ma’akau ‘a’o’e ta atou pure haka’oko’ia.

TA TE PIPIRIA E HAKAKO MAI: Ua hakako mai Ietu u mo’i e pe’au ananu te tau tekao ha’apei’ia atu. “‘Ia pure otou, aua e pe’au hua tau mea ananu.” (Mateo 6:7) Me he mea e makimaki tatou e haka’oko te Etua ‘ia tatou e pure tatou ma ‘oto to ia makimaki. No keina, e hakako tatou e aha to ia hia me te pure ati’i. E tatau tatou i ‘oto te 1 Ioane 5:14: “Anoa e ape tatou i te mea e hei ma ‘oto to ia makimaki, e ‘oko mai ia ‘ia tatou.”

A tiohi atu te Taramo 65:2; te Ioane 14:6, 14; me te 1 Ioane 3:22.

Pehea e koaka i au te koakoa?

TUMU O TE UI’IA: Te nui’ia o te tau po’i ua ha’ati’a te mea na te moni, na te kai’e me te kanahau e koakoa ai atou. No keina, umihi atou te atou mea, mea’a ‘a’o’e atou e koakoa.

TA TE PIPIRIA E HAKAKO MAI: Ua tuku atu Ietu te ravea o te koakoa me te pe’au: “Mama’u te po’i no to atou koekoe veve keke kuhane.” (Mateo 5:3) E tahi anaiho ravea no te ‘ite te koakoa toitoi, e ha’api to tatou makimaki oko: to tatou oke no te tekao tiatohu no te Etua me to ia makimaki no tatou. Tenei tekao tiatohu ena i ‘oto te Pipiria. E toko nei tenei ‘ite’ia ‘ia tatou mea ‘ite toitoi te mea oko me te mea ‘a’o’e oko. ‘Ia vai tatou te tekao tiatohu a te Pipiria a’ahi ta tatou ha’atoitoi’ia me ta tatou hana, pohu’e meita’i tatou.—Ruka 11:28.

A tiohi atu te Toumaki 3:5, 6, 13-18 me te 1 Timoteo 6:9, 10.

 Te mea ta tatou i tiohi mai nei e pahono anaiho a te Pipiria no tenei e ono ui’ia. E makimaki ‘oe e ‘ite haka’ua atu? Mei te mea, mi vaveka ‘oe te tau po’i e vivini a’a to atou veve te keke o te kuhane. E ui oti ‘oe titahi ui’ia atu me tenei: “Mei te mea e aukuha te Etua ‘ia tatou, no te aha e ha’ati’a ai te nui’ia makaka me te mamae i te ‘oa’ia to tatou pohu’e? Pehea au e ha’ameita’i ai to’u pohu’e ha’e?” Na te Pipiria e tuku mai te tau pahono tiatohu no tenei tau ui’ia.

‘Atika mea nui i tenei ‘a, e ha’ameta’u a’a ‘ia hu’i atu io te Pipiria. E tiohi atou te Pipiria me titahi hamani moto’u, titahi mea, mea hana nui no atou te ha’avivini’ia. E makimaki ‘oe ‘ia toko’ia no te koaka te tau pahono’ia i ‘oto te Pipiria? E haka’ite te tau Ite no Iehova ‘ia ‘oe e ‘ua hakâtu.

‘Omua ‘ika, e toko te kaiu hamani Tekao hou koakoa me io te Etua i te tau po’i ‘a’o’e nui to atou taime mea umihi te tau pahono tahakahaka a te Pipiria. Te ‘ua o te hakâtu ‘ia tatau te Pipiria hei me to ‘oe ma’akau. E koaka titahi Ite no Iehova, te ‘atapu e tahi he’e atu io to ‘oe ha’e a ko’e ‘a io titahi vahi ta ‘oe makimaki no te ha’avivini’ia Pipiria me ‘oe mea moni ko’e. Ua koaka te mirioni enana, ‘io he aoma’ama vi’ipu tenei tekao haka’ite’ia atu o te hakako’ia. Mea nui mei ‘o atou tihe io tenei ha’apa’o’ia koakoa: “Ua koaka i au te tekao tiatohu!”

‘A’o’e atu taetae oko! Ua ha’apohu’e te mea tiatohu a te Pipiria te ha’atupupu, te kohi’i me te ha’ameta’u. E tuku mai ia titahi tiaki, te ha’avivini o te pohu’e me te ha’akoakoa. Ua pe’au Ietu: “E ‘ite otou i te tekao tiatohu, na hua tekao tiatohu e ha’apohu’e ‘ia otou.”—Ioane 8:32.