Aller au contenu

Aller au sous-menu

Aller au sommaire

Te’ao hou koakoa mei io te Etua

 HAKAKOTIA 4

O ai Ietu Kirito?

O ai Ietu Kirito?

1. Pehea te pepenatina ‘o Ietu?

E aha te tau hakâtu meita’i ‘o Ietu ‘ia tapi’i te tau enata me ia?—MATEO 11:29; MAREKO 10:13-16.

I mua to ia pepenatina ‘io he fenua nei, e kuhane Ietu ‘io he ani. (Ioane 8:23) ‘O ia tomua ta te Etua i pepena. Ua ha’atutuki ia me te Etua i pepena te tau mea paotu. ‘O ia to’otahi ta Iehova i pepena ‘omua i pe’autia ai te Tama “fanau tahi.” (Ioane 1:14) ‘O Ietu te ‘Ave te’ao a te Etua, i pe’autia ai ia “te Te’ao.”A tetau i te Toukaki 8:22, 23, 30; Koroha 1:15, 16.

2. No te aha ua tihe mai Ietu ‘io he fenua?

Ua tu’u te Etua te tino enata ‘o Ietu i ‘oto te opu ‘o Maria, virikine no te fenua Iutea. ‘A’o’e ‘o Ietu e papa enata me tatou. (Ruka 1:30-35) Ua he’e mai Ietu ‘io he fenua (1) no te hakako i te te’ao tiatohu o te Etua, (2) no te ha’a’ite ‘ia tatou pehea ‘ia hana te hia o te Etua e aha ‘a te hi’iveke me (3) no te tu’u to ia tino mikeo ko’e no te “hoko.”A tetau i te Mateo 20:28.

3. No te aha e ma’ima’i ai tatou e tahi hoko?

Ua utu ia e tahi hoko no te ha’apoho’e i titahi enata ha’ahopotia i te matetina. (Ehoto 21:29, 30) ‘A’o’e te Etua i ma’ima’i e ko’oua tatou a ko’e ‘a e mate. Pehea to tatou ‘ite? Ua pe’au ia ‘ia Atamu, ‘ia putu’i e mate. Anoa Atamu i haka’ono, ‘a’o’e ia e mate. (Tenete 2:16, 17; 5:5) Va’ana te Pipiria, na Atamu te pi’o tihe mai ai te matetina i ‘oto te aoma’ama nei. Ua tu’u Atamu te mikeo me te matetina i ta ia hua’a tama. Na te’a hoko e poho’e ai tatou.A tetau i te Roma 5:12; 6:23.

 O ai te koana e hoko no te ha’apoho’e mai ‘ia tatou me ‘io he mate? E ha’ako’etia to tatou mikeo ‘ia mate tatou. ‘A’o’e e tahi enata mikeo no te utu te mikeo a titahi.A tetau i te Taramo 49:7-9.

4. No te aha Ietu i mate ai?

‘A’o’e Ietu me tatou e enata mikeo ko’e ia. Ua mate ia no te mikeo a tahipito. Ua ha’a’ite te Etua to ia kaoha hohonu no te tau enata ma ‘oto te matetina ‘o Ietu. Mea kaoha Ietu ‘ia tatou ua haka’ono ia i to ia Motua e mate no tatou.A tetau i te Ioane 3:16; Roma 5:18, 19.

5. E aha te hana ‘a Ietu tenei ‘a?

I te fenua, ua ha’ao’a Ietu i tahipito po’i hemo i te mate, ua ha’atû ia i te po’i mamate, me te aotahi i te po’i mamae. Ua ha’a’ite ia ta ia e hana i mua nei no te po’i haka’ono. (Mateo 15:30, 31; Ioane 5:28) Ma hope to ia matena, ua ha’a’i’o haka’ua mai Iehova ‘ia Ietu e kuhane. (Efetia 1:20) Ua tia’i Ietu i ‘oto te ‘ima oko o te Etua tihe atu te ‘a e tu’u ai Iehova te ‘i’i no te vivini me he Haka’iki no te fenua paotu. (Heperero 10:12, 13) Tenei ‘a e haka’iki nei Ietu ‘io he ani. E ha’amevaha nei to ia tau ‘ou’a te’a te’ao hou koakoa vi’ipu te aoma’ama nei.A tetau i te Taniere 7:13, 14; Mateo 24:14.

Tata’ekapo, e ha’a’ite Ietu to ia mana haka’iki no te ha’ako’e te tau mamae me te tau po’i e ha’amamae nei tahipito. Paotu te tau po’i e ha’a’ite to atou tiatohu me te haka’ono, e poho’e anatu atou i ‘oto e tahi papua meita’i ‘io he fenua.A tetau i te Taramo 37:9-11.