1. No hea mai te pe?

Ua ha’avai te Etua i te tau enata ‘ia vivini no te ha’a’ite ‘a’o’e atou e koana ‘ia ha’ako’e te tau hi’iveke

Ua ha’amata mai te hana pe ‘io he fenua i to Tatane tikoetia i ‘omua. E anera meita’i ia i ‘omua, “‘a’o’e ia i ha’apa’o i te te’ao tiatohu.” (Ioane 8:44) Ua ma’ima’i Tatane i te atoratio a te Etua aneiho. Ua tikoe ia ‘ia Eva, te vehine ‘omua, a haka’ono ‘ia ia umo’i ia te Etua. Ua ape’e atu Atamu ‘ia Eva me te putu’i te Etua. I to ia putu’itina ha’amata ai te tau mamae me te mate nui.​—A tetau i te Tenete 3:1-6, 19.

I to Tatane ha’atekatia ‘ia Eva umo’i e haka’ono i te Etua, ua titi’i ia i te mana nui o te Etua. Ua katahi te nuina enata me Tatane me te pe’au, ‘o Tatane “te vivini o tenei aoma’ama.”​—A tetau i te Ioane 14:30; Ioane 1, 5:19.

2. Mea teka uanei ta te Etua i pepena?

Mea meita’i te hana a te Etua. E koana i te tau enata paotu me te tau anera ta ia i pepena, e haka’ono ‘ia ia. (Teutoronomi 32:4, 5) Ua pepena ho’i ia ‘ia tatou me te vaetina, ‘ia hana i te meita’i a ko’e ‘a te hana pe. I ‘oto tenei vaetina e ha’a’ite ‘ia tatou i to tatou kaoha i te Etua.​—A tetau i te Iakopo 1:13-15; Ioane 1, 5:3.

3. No te aha te Etua i ha’avai ai te tau mamae tihe i tenei?

Ua ha’avai Iehova i te tau enata ‘ia pakeka to ia mana nui. No te aha? No te ha’a’ite ‘a’o’e e meita’i ‘ia vivini te tau enata. (Kohereta 7:29; 8:9) Te’a ihoa. ‘Imu’iho 6 000 ehua vivinitia a  te tau enata, ‘a’o’e i ko’e te toua, te ‘u’umi, te hana teka me te mate.​—A tetau i te Ehoto 9:16; Ieremia 10:23.

Mea ke te ha’avivini ‘ia a te Etua. E ha’ameita’i ia te tau po’i haka’ono ‘ia ia. (Itaia 48:17, 18) Tata’ekapo, e ha’ako’e nui Iehova i te tau hau enata. O te tau po’i e pakaihi i ta ia vivini e ‘eka ‘io he fenua.—Itaia 11:9.​—A tetau i te Taniere 2:44.

4. Ma ‘oto te mo’u o te Etua, e aha ta tatou e hana?

No Tatane, ‘a’o’e titahi enata e atoratio ‘ia Iehova ma ‘oto te kaoha. E koana ‘ia ‘oe e ha’atoitoi tenei tikoe. Ma ‘oto te mo’u o te Etua e ha’a’ite ai tatou o ai te vivini ta tatou e ma’ima’i. Ta te Etua a ko’e ‘a ta te enata? Ma ‘oto to tatou poho’etina e ha’a’ite to tatou vaetia.​—A tetau i te Iopa 1:8-12; Toukaki 27:11.

5. Pehea ‘ia vae tatou i te Etua to tatou vivini?

E ha’a’ite to tatou poho’etina e ma’ima’i hoa tatou o te Etua to tatou vivini

E ma’ima’i tatou o te Etua e vivini no tatou ma te hakako atu te Pipiria me te atoratio ‘ia ia. (Ioane 4:23) E ha’a’ite nei tatou ‘a’o’e ‘o Tatane to tatou vivini ma te ko’e e ha’atomo i ‘oto te poritita me te tau toua, mei Ietu.​—A tetau i te Ioane 17:14.

E hana nei Tatane i to ia ‘i’i no te ha’auo te tau hana pe. ‘Ia titi’i tatou te hana ‘a Tatane, e ha’ame’eme’etia tatou, ha’apakeka ‘ia tatou na te tau hoa me te hua’a. (Petero 1, 4:3, 4) Na tatou e vae. Katahi uanei tatou me te tau po’i e kaoha nei i te Etua? E haka’ono uanei tatou i ta ia tau ture pi te kaoha? Ma eia tatou, e ha’a’ite ‘ia tatou e tikoe ta Tatane. No eia, ‘a’o’e he mea te enata e haka’ono i te Etua i ‘oto te hi’iveke.​—A tetau i te Toukaki 13:20; Korinetia 1, 6:9, 10.

No to ia kaoha i te tau enata, e ha’ako’e te Etua i te tau mamae. O te tau po’i e ha’a’ite to atou tiatohu i te Etua te poho’e anatu ‘io he fenua.​—A tetau i te Ioane 3:16.