Aller au contenu

Aller au sous-menu

E ma’ima’i ‘oe e ‘ite te te’ao tiatohu?

E ma’ima’i ‘oe e ‘ite te te’ao tiatohu?

TE TE’AO TIATOHU i ‘una o te aha? I ‘una te tau uitina hohonu ta te enata e ma’akau nei. O ia nei:

  • E meta’o toitoi uanei te Etua ‘ia tatou?

  • E ko’e uanei te tau toua me te tau mamae?

  • E aha te hakâtu ‘ia mate tatou?

  • E vai uanei e tahi tia’itina no te tau po’i mamate?

  • Pehea au ‘ia pure i te Etua a pahono mai ai ‘ia ‘u?

  • Pehea e koana ‘ia ‘u te koakoa?

I hea ‘oe e hano ai te tau pahonotia o tena tau uitina? ‘Ia he’e ‘oe i ‘oto titahi fa’e paoto hamani a ko’e ‘a titahi fa’e hokotia hamani, e ‘ite oti ‘oe tautini hamani e pahono nei tena tau uitina. ‘Ati’a, mea te’ao ke te’a tau hamani titahi i titahi. E afi te’a tau hamani, ‘ati’a ‘ia koa o’o, ‘a’o’e e hei haka’ua e ha’ahoutia a ko’e ‘a e monotia.

E vai nei i ‘oto titahi hamani te tau pahonotia tiatohu. E mea tiatohu o’o te’a hamani. Ua pe’au Ietu Kirito i ‘oto ta ia pure i te Etua: “O ta ‘oe te’ao hoi, te te’ao tiatohu.” (Ioane 17:17) O te Pipiria te’a te’ao. E ha’a’ite momo atu nei tenei tapa hamani te tau pahonotia puaha me te toitoi a te Pipiria i te tau uitina i ‘una mai.

 E meta’o toitoi uanei te Etua ‘ia tatou?

TE TUMU O TE’A UITINA: E poho’e nei tatou i ‘oto te aoma’ama pi te makaka o’o me te hana teka. E hakako nei te nuina ha’ati’a na te Etua i ma’ima’i te tau mamae.

TA TE PIPIRIA E HAKAKO NEI: ‘A’o’e o te Etua te tumu o te pe. “Ko’e nui te Etua Pa’oko’oko e hana i te hana ‘a’o’e e toitoi!” va’ana Iopa 34:10. E ma’ima’i te Etua te meita’i no te tau enata. No eia ua hakako mai Ietu pehea ‘ia pure: “To matou Motua ‘io he ani, . . . ‘ia tihe mai to ‘oe Patireia. ‘Ia ha’amevahatia to ‘oe hia ‘io he fenua ati’i me te ani.” (Mateo 6:9, 10) E meta’o toitoi te Etua ‘ia tatou ‘ia tupu to ia hia.—Ioane 3:16.

A tiohi atu Tenete 1:26-28; Iakopo 1:13; me Petero 1, 5:6, 7.

E ko’e uanei te tau toua me te tau mamae?

TE TUMU O TE’A UITINA: Te ‘u’umi anatu nei te tau toua i te nuina enata. Te mamae nei tatou to’otahi.

TA TE PIPIRIA E HAKAKO NEI: Ua pe’au te Etua e vai nei e tahi ‘a e ha’amana ia te mo’u ‘io he fenua. “‘A’o’e [te tau enata] e hakako haka’ua i te toua” i ‘a’o to Iehova Patireia, a ko’e ‘a o te hau o te ani. ‘Ati’a, “e pehi atou ta atou tau koheta mea hu’i ‘epo.” (Itaia 2:4) E ha’ako’e nui te hana teka me te mamae. Te pe’au nei te Pipiria: “Na [te Etua] e ho’oi to atou vaimata, ko’e nui te matena, te ue, te ta’a’au, me te mamae. Ua na’o nui te tau mea kakiu.”—Apokarupo 21:3, 4.

A tiohi atu Taramo 37:10, 11; 46:9; me Mikea 4:1-4.

E aha te hakâtu ‘ia mate tatou?

TE TUMU O TE’A UITINA: E hakako nei te nuina ha’ati’a e vai nei e tahi mea i ‘oto te enata mamate. E ha’ati’a nei titahi tau enata na te tau po’i mamate e ha’amamae te tau po’i poho’e a ko’e ‘a e tuki te Etua te tau po’i makaka i ‘oto te havai’i pe.

TA TE PIPIRIA E HAKAKO NEI: ‘Ia mate te enata, ua mate nui. “Te tau enata i mate . . . ‘a’o’e atou e ‘ite haka’ua,” ha’a’ite Kohereta 9:5. Te mea ‘a’o’e te tau po’i mamate e ‘ite a ko’e ‘a e ma’akau, ‘a’o’e atou ha’amamae te tau po’i poho’e a ko’e ‘a e toko ‘ia atou.—Taramo 146:3, 4.

A tiohi atu Tenete 3:19 me Kohereta 9:6, 10.

 E vai uanei e tahi tia’itina no te tau po’i mamate?

TE TUMU O TE’A UITINA: E ma’ima’i tatou e poho’e me te koakoa te poho’etina me to tatou po’i tahia. Mea hei ‘ia ma’ima’i tatou e ‘ite haka’ua to tatou tau po’i mamate.

TA TE PIPIRIA E HAKAKO NEI: E ha’atûtia te nuina tau po’i mamate. Ua pe’au Ietu “te tau po’i i tohe ‘ua’epo . . . e he’e mai atou i vaho.” (Ioane 5:28, 29) Me he mea a te Etua i ma’ima’i, te tau po’i ha’atûtia ‘o atou te poho’e ‘io he fenua i ‘oto te papua meita’i. (Ruka 23:43) I ‘oto te’a te’ao tapu a te Etua e koana te tau po’i haka’ono te poho’etina anatu. E ha’atiatohu te Pipiria: “E noho te enata toitoi ‘io he fenua, e noho anatu atou i ‘una iho.”—Taramo 37:29.

A tiohi atu Iopa 14:14, 15; Ruka 7:11-17; me Hana 24:15.

Pehea au ‘ia pure i te Etua a pahono mai ai ‘ia ‘u?

TE TUMU O TE’A UITINA: E pure nei te nuina Kiritiano i ‘oto tahipito ha’ati’a. ‘Ati’a, e ma’akau te nuina ta atou pure ‘a’o’e te Etua e pahono mai.

TA TE PIPIRIA E HAKAKO NEI: Ua hakako mai Ietu umo’i pe’au anatu hua tau pure. “‘Ia pure ana’e otou,” ha’a’ite Ietu “umo’i e pe’au anatu i hua tau pure nei.” (Mateo 6:7) ‘Ia ma’ima’i tatou e haka’ono mai te Etua, a pure va’ana to ia hia. No eia, a hakako e aha to ia hia me te pure ati’i. Ha’a’ite Ioane 1, 5:14: “Te mea o ta tatou e ‘ape va’ana e to ia hia, e ‘ono ia ‘ia tatou.”

A tiohi atu Taramo 65:2; Ioane 14:6, 14; me Ioane 1, 3:22.

Pehea e koana ‘ia ‘u te koakoa?

TE TUMU O TE’A UITINA: Ua ha’ati’a te nuina enata, na te moni te ka’i’e a ko’e ‘a te kanahau e ha’akoakoa ‘ia atou. E imi a atou te’a tau memau, mea a ‘a’o’e e koana te koakoa.

TA TE PIPIRIA E HAKAKO NEI: Ua ha’a’ite Ietu pehea e koana ai te koakoa ma te pe’au: “A koakoa te tau po’i i tiatohu i to atou veve no te keke kuhane.” (Mateo 5:3) No te ‘ite te koakoa toitoi e tahi mea e ha’apa’o: te mate one te ha’ati’a i te Etua me to ia hia no tatou. Ena i ‘oto te Pipiria te’a te’ao ha’ati’a. ‘Ia ‘ite ‘oe te’a te’ao ha’ati’a e vivini totahi atu ‘oe te te’ao hohonu. Anoa e ha’avai tatou na te te’ao ha’ati’a e ha’avivini, totahi atu to tatou poho’etina meita’i.—Ruka 11:28.

A tiohi atu Toukaki 3:5, 6, 13-18 me Timoteo 1, 6:9, 10.

 Ua tiohi aneiho matou e ono uitina ta te Pipiria i pahono. Ua ma’ima’i ‘oe ha’ahohonu atu to ‘oe ‘ite? E, anoa i vai nei ‘oe i vavena te’a tau po’i e ‘ite to atou veve kuhane. E ma’akau nei oti ‘oe: ‘Anoa e meta’o te Etua ‘ia tatou, no te aha i ha’avai ai te tau hana pe me te tau mamae i te koatia o to tatou poho’etina? Pehea au e ha’ameita’i ai to’u hua’a fa’e?’ E tu’u mai te Pipiria te tau pahonotia tiatohu no tenei tau uitina me tahipito atu.

‘Ati’a, e koekoe ‘ua te nuina po’i tenei ‘a ‘ia hakako te Pipiria. E tiohi atu te’a hamani ke’i o’o, mea hana nuina hakako. E ma’ima’i ‘oe e tahi tokotia no te ha’akoana i te tau pahono i ‘oto te Pipiria? E tu’u atu nei te tau Ite no Iehova e ‘ua tumu te’ao.

E tahi, no te tau po’i ‘a’o’e to atou tai i ha’apeipeitia te tui’ia hamani Te’ao hou koakoa mei io te Etua ‘ia koana te tau pahonotia puaha a te Pipiria. E ‘ua, e tahi hakakotia Pipiria. ‘A’o’e e utu, e koana e tahi Ite no Iehova he’e mai e tahi ‘a ma te hepetoma ‘io to ‘oe fa’e a ko’e ‘a titahi taha ta ‘oe i ma’ima’i no te hakako i te Pipiria me ‘oe. Ma eia te koakoa nei te tau mirioni enata ma te aoma’ama. Ua pe’au te nuina ‘o atou: “Ua koana ‘ia ‘u te te’ao tiatohu!”

‘A’o’e atu e mea taetae oko! E ha’apoho’e mai te te’ao tiatohu a te Pipiria ‘ia tatou mei ‘oto mai te hana tahutahu, te kofi’i me te ha’ameta’u. E koana mai te tia’i, te koakoa me te hano no to ‘oe poho’etina. Ua pe’au Ietu: “E ‘ite otou i te te’ao tiatohu na te te’ao tiatohu otou e ha’apoho’e.”—Ioane 8:32.