Ges-y sẽn be pʋgẽ wã

Ges-y sẽn be sebrã pʋgẽ

 SAK A 8

Na-wẽngã ka paam-b ye

Na-wẽngã ka paam-b ye

MATYE 2:13-23

  • A ZEEZI NE A ROAGDBÃ ZOEEME N KẼNG EZƖPT

  • A ZOZƐF TALLA A ZAKÃ RÃMB N KẼNG NAZARƐTE

A Zozɛf neka a Maari ne yʋngo, n togs-a tɩ b tog n looga tao-tao. Bõe yĩnga? Bala a Zeova malɛk n gom ne-a zãmsd pʋgẽ, n yeel-a woto: “Yik n dɩk biigã ne a ma n zoe n kẽng Ezɩpte. Zĩnd be hal tɩ mam leb n wa n gom ne foom. Bala, Erood na n baoo biigã, sẽn na yɩl n kʋ-a.”—Matye 2:13.

Ne yʋngã bala, a Zozɛf ne a Maari yik n dɩka b biigã n zoe. B maana neer la b sẽn zoe tao-tao wã. A Erood bãngame tɩ rapã sẽn da yi yaangã belg-a lame. A ra yeel-b lame tɩ b lebg n wa togs yẽ biigã sẽn beẽ, la b loogame n ka lebg n kẽng a nengẽ ye. A Erood sũurã puuga wʋsgo. Sẽn na yɩl n paam a Zeezi n kʋ, a kɩtame tɩ neb saag Betlehɛm ne a tẽn-kɩremsã, n kʋ kom-dibli nins fãa sẽn zems yʋʋm a yiib la sẽn pa ta rẽ wã. Rapã sẽn da yi yaang n wa wã sẽn togs-a bũmb ningã n sõng-a t’a bãng biigã yʋʋm sẽn da tog n zems to-to.

Kom-dibli wã kʋʋbã sɩd yɩɩ yel-beedo! D pa tõe n bãng kom-dibli wã a Erood sẽn kʋ wã sõor ye. D sẽn mi bal yaa tɩ b ma-rãmbã wiisgã la b yãbrã pidsa gomd Wẽnnaam no-rɛɛs a Zeremi sẽn da pĩnd n togse.—Zeremi 31:15.

Wakat kãng t’a Zozɛf ne a zakã rãmb zoeeme n tɩ be Ezɩpt. Daar a ye yʋngo, a Zeova malɛk n le gom ne a Zozɛf zãmsd pʋgẽ, n yeel-a yaa: “Yik n dɩk biigã ne a ma n leb Israyɛll tẽnga, bala neb nins sẽn dag n baood biigã n na n kʋ wã kiime.” (Matye 2:20) A Zozɛf bãngame masã tɩ yẽ ne a zakã rãmb tõe n leba b ba-yirã. Woto pidsa bãngr-gomd a to no-rɛɛs a Ooze sẽn da togse. A ra yeelame tɩ Wẽnnaam na n boola a bi-riblã t’a yi Ezɩpt.—Ooze 11:1, MN.

Nand t’a Zozɛf ne a zakã rãmb zoe n kẽng Ezɩptã, yaa Betlehɛm la b ra be. Wõnda a Zozɛf ra ratame tɩ b tɩ zĩnd Zʋʋde soolmẽ wã, zĩig sẽn pẽ Betlehɛm. La a wʋmame t’a Erood biig a Arkelawuus sẽn yaa nin-wẽngã n lebg Zʋʋde soolmã naaba. Wẽnnaam le tũnuga ne zãmsd n keoog a Zozɛf t’a sã n kẽng be, tõe n yɩɩ yelle. Rẽ n so t’a Zozɛf ne a zakã rãmb kẽng hal Nazarɛt sẽn be Galɩle soolmẽ wã, n tolg n zãag ne Zeruzalɛm sẽn yaa zĩig ning zʋɩf-rãmbã tũudum sẽn tar pãng wʋsgã. A Zeezi bɩɩ Nazarɛte, tɩ pids gomd Wẽnnaam no-rɛɛsdbã sẽn da pĩnd n togse. B ra yeela woto: “B na n boola yẽnda tɩ Nazarɛt neda.”—Matye 2:23.