Ges-y sẽn be pʋgẽ wã

Ges-y sẽn be sebrã pʋgẽ

 SAK A 4

A Maari tʋtame, n yaool n pa kul sɩd ye

A Maari tʋtame, n yaool n pa kul sɩd ye

MATYE 1:18-25; LUK 1:56

  • A ZOZƐF BÃNGAME T’A MAARI TƲTAME

  • A MAARI LEBGA A ZOZƐF PAGA

A Maari pʋgã yɩɩda kiis a tãab masã. Tẽeg-y t’a pʋgã rɩkr paalem, a tɩ zĩnda Zʋʋde tãmsã sẽnẽ sẽn pẽ Zeruzalɛmmã, a kẽem a Elizabɛt nengẽ kiis a tãabo. La masã, a leba Nazarɛte. Ka ne ka tɩ nebã fãa bãngame t’a tʋtame. Ad rẽ tog n lebga yɩɩr ne-a!

Yellã meng yaa b sẽn da zoe n dɩk-a n kõ wã. B ra kõ-a-la a Zozɛf sẽn yaa ra-wãadã. A Maari ra miime me tɩ tõodã Wẽnnaam sẽn kõ Israyɛll nebã pʋgẽ, b yeelame tɩ b sã n dɩk pʋg-sad n kõ raoa, tɩ pʋg-sadã sak n kẽ ne rao a to, b tog n lob-a-la kug n kʋ. (Tõodo 22:23, 24) Yaa sɩd t’a Maari pa yo n dɩk pʋgã ye. La a ra pa mi a sẽn na n maan to-to n togs a Zozɛf t’a sak n tẽ ye. A ra pa mi bũmb ning sẽn na n maan rẽ poor me ye.

A Maari sẽn kẽng a kẽemã nengẽ n tɩ maan kiis a tãabã, sãmbg kae t’a Zozɛf ra yãgd n na n yã-a lame. B sẽn wa n yã taabã, a Maari yeela a Zozɛf t’a tʋtame, la a togs-a bũmba fãa, sẽn na yɩl t’a bãng tɩ yaa ne Wẽnnaam vʋʋsem sõngã maasem. La yaa vẽeneg tɩ yɩɩ toog ne a Zozɛf t’a sak n tẽ a Maari goamã.

A Zozɛf miime t’a Maari yaa pʋg-sõngo, n tar yʋ-noogo. A ra nong-a-la wʋsgo. La baa ne a sẽn kelg a Maari wã, a ket n sãmbda a yamẽ tɩ yaa rao a to pʋga. A Zozɛf pa rat tɩ b lob a Maari kug n kʋ ye. A pa rat me tɩ nebã yaal-a n ning-a yãnd ye. Rẽ n so t’a ra magd n na n soos n bas-a, rat n yeel tɩ n kao kãadmã. Wakat kãnga, b sã n da rɩk pʋg-sad n kõ raoa, yaa wa b sẽn zoe n kẽ kãadem. B sã n wa rat n bas taaba, b tog n kaoo kãadmã.

Yellã ra ket n namsda a Zozɛf wʋsgo. Daar a ye, a gõeem sasa, a Zeova malɛk n gom ne-a zãmsd pʋgẽ n yeel-a yaa: “Da zoe rabeem tɩ peeg f pag a Maari ye, bala pʋgã a sẽn tʋtã yita Sɩɩg-sõng nengẽ. Yẽnda na n doga bi-ribla, la fo na n pʋda a yʋʋr t’a Zeezi. Yaa yẽnda n na n yols b nebã ne yel-wẽnã.”—Matye 1:20, 21.

A Zozɛf sẽn nekã, a sũur tog n yɩɩ noogo. Bũmba fãa ra lebga vẽeneg a yamẽ masã. Tao-tao bala, a maana wa malɛkã sẽn yeel-a bũmb ningã. A peega a Maari n wa a zakẽ. Wakat kãnga, rao sã n da maan woto nebã fãa nifẽ, yaa rẽ la yi-kãadmã. Dẽnd a Zozɛf ne a Maari kẽe kãadem masã. La hal n tãag a Zeezi rogem, a Zozɛf pa tol n kẽ ne a Maari ye.

Kiis a wãn poore, a Zozɛf ne a Maari ra tog n segla b mens n tog sore, baa ne a Maari pʋgã sẽn bɩ wã. Yaa yɛ la b rabda, t’a Maari yaool n kolg rogem?