Ges-y sẽn be pʋgẽ wã

Ges-y sẽn be sebrã pʋgẽ

 SAK 91

A Zeezi vʋʋga a Lazaare

A Zeezi vʋʋga a Lazaare

ZÃ 11:38-54

  • A LAZAAR VƲƲGRÃ

  • SÃNEDRẼ WÃ RAT N KƲƲ A ZEEZI

A Zeezi ra bee Betani tẽngã noore, t’a Mart kẽng n tɩ seg-a, t’a Maari me wa wa. B tũu taab n kẽng a Lazaar yaoogẽ wã. Yaoogã ra yaa tãng boko, tɩ b pag a noorã ne kugri. B sẽn ta wã, a Zeezi yeelame yaa: “Lak-y kugrã.” A Mart sẽn da ka mi a Zeezi sẽn dat n maanã yĩnga, a yeelame: “Zu-soaba, a zoe n põogame, bala, a kũumã rasem a naas la rũndã.” La a Zeezi yeel-a lame yaa: “Mam ka yeel foom tɩ fo sã n tẽ, fo na n yãnda Wẽnnaam ziir sɩda?”—Zã 11:39, 40.

B laka kugrã, t’a Zeezi nak n ges yĩngr n yeele: “M ba, mam pʋʋsda yãmb barka, y sẽn leok mam kosgã yĩnga. Mam yẽ miime tɩ yãmb leokda mam kosg wakat fãa, la yaa neb kʋʋngã sẽn be ka wã yĩng la mam sẽn gomdã, tɩ b na tẽ tɩ yaa yãmb n tʋm maam.” A Zeezi sẽn pʋʋs Wẽnnaam nebã fãa nifẽ wã kɩtame tɩ b bãng t’a sẽn dat n maan bũmb ningã na n yɩɩ ne Wẽnnaam pãnga. Rẽ poore, a zẽka a koɛɛg n yeele: “Lazaare, wa yi ka!” A Lazaar sɩd yiime. A nao wã ne a nusã ra vila ne pɛɛla, t’a nengã me lud ne peende. A Zeezi yeela nebã tɩ b lood pɛɛlã la b bas-a t’a looge.—Zã 11:41-44.

Zʋɩf-rãmb wʋsg sẽn da wa n na n bels a Maari ne a Martã sẽn yã yel-solemdã, b tẽe a Zeezi. La neb n tɩ togs Fariizẽ-rãmbã a Zeezi sẽn maanã. Fariizẽ-rãmbã ne maan-kʋʋdbã kãsem-dãmbã tigsa taab bʋ-kaoodbã zakẽ. Maan-kʋʋdb kãsem a Kayiif zĩnda be. B neb kẽer yeelame: “Tõnd na n maana a wãna? Rao wã maanda bõn-bãn wʋsgo. Tõnd sã n bas-a t’a ket n maandẽ, nebã fãa na n tẽe-a lame, la Rome-dãmbã na n waa n sãama tõnd wẽnd doogã ne d soolmã.” (Zã 11:47, 48) Baa ne neb sẽn maan kaset ne a Zeezi yel-soalmã n wa togs-b t’a “maanda bõn-bãn wʋsgã,” b pa maan sũ-noog ne Wẽnnaam sẽn kõ a Zeezi tõog t’a maand bũmb ninsã ye. Sẽn da pak-b n yɩɩdã yaa b na n wa kong b ziirã la b naamã.

Saduusẽ-rãmbã sẽn wʋm t’a Zeezi vʋʋga a Lazaarã, yɩ yãnd n kõ-ba, bala bãmb pa tẽed kũum vʋʋgrã ye. A Kayiif sẽn yaa Saduusẽ wã yeelame: “Yãmb ka wʋmd yellã baa fɩ. Yãmb ka ne tɩ ned a yembr sã n ki nebã fãa yĩng tɩ soolmã tõr da sãam n são?”—Zã 11:49, 50; Tʋʋmã 5:17; 23:8.

Yaa Wẽnnaam n kɩt t’a Kayiif togs gom-kãensã, a sẽn yaa maan-kʋʋdb kãsmã yĩnga. Dẽnd “ka ne a mengã yam la a gom a woto ye.” A Kayiif ra ratame tɩ b kʋ a Zeezi, bala a zoeta nin-buiidã na n wa bas zʋɩf tũudmã taoor dãmb n tũ a Zeezi. A sẽn yeelã yaool n yaa bãngr-gomd sẽn wilgd t’a Zeezi tog n kiime tɩ yɩ rond zʋɩf rãmbã yĩnga, la “Wẽnnaam kambã sẽn sãeegã” me yĩnga.—Zã 11:51, 52.

A Kayiif gomdã kɩtame tɩ bʋ-kaoodbã sull na n bao b sẽn tõe n maan n kʋ a Zeezi. Rẽ yĩnga, a Nikodɛm sẽn yaa bʋ-kaoodbã sull neda, n leb n yaa a Zeezi zoa wã tɩ togs-a-la bʋ-kaoodbã sẽn dat n maanã bɩ? D pa mi ye. Sẽn yaa a soab fãa, a Zeezi yii Zeruzalɛm sẽnesã tao-tao, sẽn na yɩl tɩ b ra kʋ-a tɩ Wẽnnaam sẽn yãk wakat ningã nan pa ta ye.