Ges-y sẽn be pʋgẽ wã

Ges-y sẽn be sebrã pʋgẽ

 SAK 94

Pʋʋsg la sik-m-meng yaa tɩlɛ

Pʋʋsg la sik-m-meng yaa tɩlɛ

LUK 18:1-14

  • PƲG-KÕOR SẼN WƖNG NE PẼDGRE

  • FARIIZẼ NE YAOOD DƐƐGDA

A Zeezi ra zoe n dɩka makre, n wilg a karen-biisã tɩ b segd n wɩnga ne pʋʋsgo. (Luk 11:5-13) A tog n keta Samaari bɩ Galɩle soolmẽ wã. A le rɩka makr n wilg nebã tɩ b segd n wɩnga ne pʋʋsgo.

Ad a sẽn yeele: “Bʋ-kaood a ye n da be tẽng a yembr pʋgẽ n ka zoet Wẽnnaam, la a ka zoet ned baa a yembr nif ye. Pʋg-kõor a ye me n dag n be tẽn-kãng pʋga, n wat n yet bʋ-kaoodã yaa: ‘Bʋ-y maam ne m bʋʋd-n-taagã bʋʋd tɩrga, n kõ-ma.’ Bʋ-kaoodã zãgsame n kaoos t’a ka na n sõng-a ye. La a yaool n wa tagsa a sũurẽ n yeele: ‘Baa ne mam sẽn ka zoet Wẽnnaamã, la m ka zoet ned nifã, pʋg-kõ-kãngã sẽn pẽdgd maamã yĩnga, m na bʋ a bʋʋdã n kõ-a bʋʋm t’a ra leb n wat n pẽdgd maam woto daar fãa ye.’ ”—Luk 18:2-5.

A Zeezi wilga a makrã sẽn zãmsd nebã bũmb ningã, n yeel yaa: “Kelg-y bʋ-kaood-wẽngã sẽn yeelã. Dẽ, Wẽnnaam kõn sõng bãmb nin-tũusdsã sẽn zẽkd b koees wĩndg la yʋng n kot bãmbã sɩda? B na kaoos n sõng-ba?” (Luk 18:6, 7) A Zeezi sẽn yeel bũmb ningã wilgda bõe a Ba wã zugu?

Yaa vẽeneg t’a Zeezi pa rat n yeel tɩ Wẽnnaam a Zeova yaa wẽnem soab wa bʋ-kaoodã ye. A ra rat n yeelame tɩ bʋ-kaood sẽn yaa wẽnem soab sã n sakame n kao ned bʋʋd tɩrga, a soab sẽn pẽdgã yĩnga, bɩ d bãng tɩ Wẽnnaam n yɩɩda. Wẽnnaam yaa tɩrga, n maand neere. A nin-buiidã sã n kell n pẽdg ne pʋʋsgo, a na n deegame. A Zeezi sẽn yeel bũmb ningã sɩd wilgda rẽ. A yeelame: “Mam yeta yãmb tɩ [Wẽnnaam] na n sõnga bãmb tao-tao.”—Luk 18:8.

Naoor wʋsgo, b mongda nimbãan-nebã ne naong rãmbã bʋʋm, n yaool n maand arzɛk rãmbã ne sẽn tar-b naamã lohorem. La Wẽnnaam pa maand woto ye. A sẽn yãk wakat ningã sã n ta, a na n sãama nin-wẽnsã la a kõ wẽn-sakdbã vɩɩm sẽn kõn sa.

Ãnd dãmb n wilgd tɩ b tara tẽeb wa pʋg-kõorã? Ãnd dãmb n kɩs sɩd tɩ Wẽnnaam na n kaoa bʋʋd n ‘sõng bãmb tao-tao’? A Zeezi na n dɩka makr n wilg tɩ d segd n pẽdga ne pʋʋsgo. La sẽn na yɩl n wilg tɩ d segd n talla tẽeb tɩ Wẽnnaam kelgda pʋʋsgo, a soka woto: “La Ninsaal Bi-riblã sã n wa, b na n yãnda tẽeb tẽng zugu?” (Luk 18:8) A ra rat n yeelame bal t’a sã n wa wa, na n mikame tɩ neb wʋsg pa tẽed tɩ Wẽnnaam kelgda pʋʋsg ye.

Neb kẽer sẽn da kelgd a Zeezi ra tagsdame tɩ bãmb tara tẽeb tɩ seke. B ra kɩsa sɩd tɩ bãmb yaa nin-tɩrse, tɩ rẽ kɩt tɩ b pa nand neb a taabã ye. A Zeezi rɩka makr n na n puk nin-kãens yellã.

Ad a sẽn yeele: “Daop a yiib n dag n kẽng wẽnd-doogẽ n na n tɩ pʋʋse. A yembrã yaa Fariizẽ neda, la a to wã yaa yaood dɛɛgda. Fariizẽ nedã yalsa yĩngr n pʋʋs a sũurẽ a woto: ‘Mam Wẽnnaam, m pʋʋsda yãmb bark mam sẽn ka wẽnd wa neb a taabã sẽn yaa wagda la nin-wẽnse, la yoaadbã, la m ka wẽnd baa yaood-deegd-kãnga wã yĩnga. Mam loeta noor naoor a yiib rasem a yopoe pʋgẽ, mam yãkda m sẽn tarã piig pʋɩɩr n kõtẽ.’”—Luk 18:10-12.

Fariizẽ-rãmbã ra yaa neb sẽn nong n wilgd nebã taoor tɩ b yaa nin-tɩrse. B ra ratame tɩ nebã pẽg-ba. Ra yaa tẽnẽ la lamus daar la b ra nong n loet noore, bala yaa ra-kãens la raasã kẽed sõma, tɩ nebã tõe n yãnd-ba. Sẽn paase, b ra yãkda b sẽn tarã piig pʋɩɩr n kõtẽ, baa zẽ-vãadã menga. (Luk 11:42) Kiis a wãn sẽn looge, b ra yeela bũmb sẽn wilgd tɩ b pa nand nin-buiidã ye. B yeelame: “Kʋʋngã sẽn ka mi tõogã, b yaa neb kãab-wẽng sẽn be b zutu.”—Zã 7:49.

Makrã pʋgẽ, a Zeezi paasame yaa: “Yaood-deegdã yalsa yɩɩga, n pʋs n ka saagd n na n doog a neng yĩngr ye. La a ra pĩisda a yãoog n yetẽ: ‘Mam Wẽnnaam! Zoe-y mam nimbãaneg tɩ m yaa yel-wẽn-maanda.’” Yaood-deegdã sẽn yaa sik-m-meng soabã sak n deegame t’a kongdame. A Zeezi baasa makrã, n yeel woto: “Mam yeta yãmb tɩ rao-kãng lebg n kuila a yir ne tɩrlem. La Fariizẽ nedã ka paam ye. Bala, b na n sika ned ning sẽn zẽkd a menga, la b na n zẽka ned ning sẽn sikd a menga.”—Luk 18:13, 14.

Dẽnd a Zeezi wilga vẽeneg tɩ yaa tɩlɛ tɩ d yɩ sik-m-mens rãmba. Sagl-kãngã ra na n sõnga a karen-biisã, bala bãmb wakatẽ wã, Fariizẽ-rãmbã sẽn da get b mens wa nin-tɩrsã ra kɩtame tɩ lebg naamã la ziirã n tar yõod n yɩɩd nebã vɩɩm pʋgẽ. Saglgã tara yõod ne kiris-ned hakɩɩk fãa.