Ges-y sẽn be pʋgẽ wã

Ges-y sẽn be sebrã pʋgẽ

 SAK 89

A Zeezi yii Peere n moondẽ la a rabd Zʋʋde

A Zeezi yii Peere n moondẽ la a rabd Zʋʋde

LUK 17:1-10 ZÃ 11:1-16

  • NED SÃ N MAAN T’A TO LƲƖ, YAA WẼNG WƲSGO

  • SUGR KŨUNI, LA TẼEBO

A Zeezi zĩnda Peere sẽn be “Zʋrdẽ rʋʋndã,” la a pa kaoos wʋsg ye. (Zã 10:40) A rɩka sor masã n teesd Zeruzalɛm.

A Zeezi ra pa a yembre, bala a karen-biisã n paas “neb kʋʋng” n da tũud-a. Yaood-dɛɛgdb ne yel-wẽn-maandb ra bee kʋʋngã sʋka. (Luk 14:25; 15:1) Fariizẽ-rãmb ne tõog karen-saam-dãmb me n da tũudi. Bãmb ra nong n sãbsda a Zeezi, a goamã la bũmb nins a sẽn maandã yĩnga. B wʋma a Zeezi sẽn dɩk makr n gom pesg sẽn meneme, bi-ribl sẽn da meneme, la arzɛk soabã ne a Lazaar yellã. Dẽnd sẽn na bʋgs ra waooga.—Luk 15:2; 16:14.

Kẽndã sasa, a Zeezi wa n sõsda ne a karen-biisã. Tõe t’a tagsa Fariizẽ-rãmbã sẽn sãbs-a la b yaal-a wã yelle, n tẽeg a karen-biisã bũmb kẽer a sẽn da zoe n togs a sẽn wa n be Galɩle wã.

Wala makre, a Zeezi yeelame: “Bũmb nins sẽn wat ne lʋɩɩsã ka tõe n ka wa ye. La ned ning sẽn na n wa-a ne-bã na paam toogo. . . . Gũus-y y mense. Fo ba-biig sã n maan yel-wẽnde, bɩ f leng-a, la a sã n kos sugri, bɩ f kõ-a. La a sã n beeg foom naoor a yopoe daar a yembre, n lebg n wa fo nengẽ naoor a yopoe n yet t’a kota sugri, bɩ f kõ-a sugri.” (Luk 17:1-4) Tõe tɩ gom-kãensã kɩtame t’a Pɩyɛɛr tẽeg a sẽn da sok a Zeezi n na n bãng sã n yaa naoor a yopoe la a tog n kõ sugrã.—Matye 18:21.

La rẽ yĩnga karen-biisã na n tõog n maana wa a Zeezi sẽn yeelã bɩ? B kosa a Zeezi woto: “Paas-y d tẽebã.” A sẽn leok to-to wã kɩtame tɩ b bas b yam. A yeel-b lame yaa: “Yãmb sã n dag n tarẽ tẽeb sẽn zem siin-bila, yãmb na n yeela wom-sɛ-kãngã t’a vik n tɩ sel ko-kãsengã pʋga, la a na n saka yãmba.” (Luk 17:5, 6) Sɩd me, tẽeb bilf meng tõe n maana bõn-kãsemse.

A Zeezi leb n wilga a karen-biisã tɩ tara yõod tɩ b yɩ sik-m-mens rãmba. A yeel-b-la woto: “Ãnda n be yãmb sʋkã n tar tʋmtʋmd sẽn kood wall sẽn gũud rũmsi, t’a sã n yi weoog n lebg n wa bɩ a yeel tʋmtʋmdã: kell n wa zĩnd n dɩ? Yẽnda ka na n yeel tʋmtʋmdã tɩ: ‘Segl dɩɩb n kõ-ma, ning fuug n tall rɩɩbã n wa n kõ-m tɩ m dɩ la m yũ. Rẽ poore fo na yaool n dɩ la f yũ?’ Yẽnda na n pʋʋsa tʋmtʋmd-kãng barka, a sẽn maan bũmb ning b sẽn yeel-a t’a maanã yĩng sɩda? Woto me, yãmb sã n maan bũmb nins fãa b sẽn yeel yãmb tɩ y maanã, bɩ y yeele: Tõnd yaa tʋmtʋmdb sẽn ka yõod ye, d maana tʋʋmd ning tõnd sẽn da tog n maanã bala.”—Luk 17:7-10.

Tõnd ned kam fãa tog n bãngame tɩ yaa Wẽnnaam daabã la a segd n lʋɩɩs taoor a vɩɩmã pʋgẽ. Sẽn paase, d pa segd n yĩm tɩ d sẽn paam n naag Wẽnnaam nin-buiidã n tũud-a wã yaa zu-zẽkr ye.

Wõnda a Zeezi sẽn sõs ne a karen-biisã poor bilfu, rao n wa n taas-a koɛɛga. Yaa a Maari ne a Mart sẽn yaa a Lazaar tãopã n tʋm raoã. B bee Betani, Zʋʋde soolmẽ wã. Raoã yeela a Zeezi yaa: “Zu-soaba, ad ned ning yãmb sẽn nongã bẽedame.”—Zã 11:1-3.

Baa ne a Zeezi sẽn wʋm t’a zoa a Lazaar ka laafɩ wã, a pa sãam a sũur tɩ loog ye. A pʋd n yeela woto: “Bã-kãngã ka kũum bãag ye, yaa Wẽnnaam waoogr yĩnga, la tɩ Wẽnnaam bi-riblã me na n tũnuga rẽnda n paam waoogre.” A paa a sẽn da beẽ wã rasem a yiibu. Rẽ poore a yeela a karen-biisã tɩ b wa tɩ b leb Zʋʋde. La karen-biisã yeel-a lame yaa: “Karen-saamba, nindaarẽ ka bal tɩ Zʋɩf-rãmbã dag n dat n lob yãmb ne kuga, tɩ yãmb leb n lebd be?”—Zã 11:4, 7, 8.

A Zeezi leoka woto: “Yibeoog tɩ ta zaabr ka lɛɛr-dãmb piig la a yiib sɩda? Ned sã n kẽnd wĩndga, a ka lagsd ye, bala, a nee dũni-kãngã vẽenemã. La ned sã n kẽnd yʋngo, a lagsdame, bala, vẽenem ka be yẽnda pʋgẽ ye.” (Zã 11:9, 10) Tõe t’a Zeezi ra rat n wilgame tɩ wakat ning Wẽnnaam sẽn yãk n kõ yẽ t’a moon koɛɛgã nan ka sa ye. A ra rat n dɩka wakat bilfã sẽn ketã n kell n wɩng ne koɛɛgã moonego.

A Zeezi leb n yeelame yaa: “Tõnd zoa a Lazaar gũsame, la mam na n kẽng n tɩ nek-a lame.” Karen-biisã ra tẽedame t’a Lazaar sɩd gõeeme, la tɩ na n sõngame t’a yĩnsã sigi. Rẽ n so tɩ b yeel a Zeezi yaa: “A sã n gũsame, rẽnda a na n paama a menga.” A Zeezi yeel-b-la vẽeneg yaa: “A Lazaar kiime. . . . Wa-y tɩ d kẽng a nengẽ.”—Zã 11:11-15.

A Toma ra miime t’a Zeezi sã n leb Zʋʋde, b tõe n kʋ-a lame. La a sẽn da rat n wilg t’a bee a Zeezi poorẽ wã, a yeela karen-biis a taabã yaa: “Wa-y tɩ d me tũ bãmb n tɩ naag n ki.”—Zã 11:16.