Ges-y sẽn be pʋgẽ wã

Ges-y sẽn be sebrã pʋgẽ

 SAK 84

Yɩl n yɩ a Zeezi karen-biig pa nana ye

Yɩl n yɩ a Zeezi karen-biig pa nana ye

LUK 14:25-35

  • A ZEEZI KAREN-BIIG SẼN SEGD N MAANE

A Zeezi sẽn da be Fariizẽ wã zakẽ n dɩtẽ wã, a zãmsa nebã bũmb wʋsg sẽn tar yõodo. Masã a le rɩka Zeruzalɛm sore, tɩ neb kʋʋng tũud-a. Bõe yĩnga? Yaa b sẽn dat n sɩd yɩ a karen-biis hakɩɩk baa sẽn na n yɩ a soab bɩ?

B sẽn tũud taab n kẽndã, a Zeezi wa n togs-b-la bũmbu, la tõe tɩ rẽ sãama kẽer sũy wʋsgo. Ad a sẽn yeele: “Ned sã n wat mam nengẽ, n ka kis a ba la a ma la a paga la a kamba la a ba-bi-raopa la a ba-bi-pogse, la baa ne a mengã vɩɩm, a ka tõe n yɩ mam karen-biig ye.” (Luk 14:26) A Zeezi gomdã võor yaa bõe?

A Zeezi pa rat n yeel tɩ ned sẽn lebg yẽ karen-biig pa segd n nong a roagdb ye. A rat n yeelame t’a sẽn nong yẽ to-to wã tog n yɩɩda a sẽn nong a roagdbã. A Zeezi karen-biig pa tog n yɩ wa raoã sẽn yeel tɩ yẽ sẽn nan peeg a pʋg-paalã yĩnga, a pa tõe n sak boollã ye.—Luk 14:20.

A Zeezi yeelame tɩ yẽ karen-biig tog n kisga baa a mengã vɩɩm. Woto rat n yeelame t’a Zeezi karen-biig hakɩɩk tog n nonga a Zeezi n yɩɩd yẽ mengã vɩɩm, la tɩ sã n wa lebg tɩlɛ, a na n saka kũum. Dẽnd yaa vẽeneg tɩ yɩl n yɩ a Zeezi karen-biig pa nana ye. Ned pa tõe n yik woto bal n lebg a karen-biig ye. A segd n deng n tagsa neere.

Ned sã n yaa a Zeezi karen-biiga, a tõe n paama toog la namsgo, bala a Zeezi yeelame: “Ned ning fãa sẽn kõn dɩk a da-pɩk [“ra-luk,” MN] n tũ maam, ka tõe n yɩ mam karen-biig ye.” (Luk 14:27) Sɩd me, a Zeezi karen-biig hakɩɩk segd n saka yaalgo, wa b sẽn yaal a Zeezi wã. A ra yeelame meng tɩ bɛɛbã na n kʋʋ yẽ.

Dẽnd neb nins sẽn da tũud a Zeezi wã tog n maaga b yĩng n bʋgs n bãng yɩ Kirisã karen-biig sẽn dat n yɛɛlgã. A Zeezi rɩka makr n gom rẽ yelle. A yeelame: “Ãnda n be yãmb sʋkã n dat n me gãosgo, n ka reng n zĩnd n geel ligd ning fãa a sẽn tog n yiis tʋʋmdã yĩnga, n bãng a sã n tara sẽn sek tɩ me-a n sa? Sã n ka rẽ, a sã n yẽbg roogã n sa, n yaool n ka tõe n baas-a, neb nins fãa sẽn na n yãnd-a wã na n yaala yẽnda.” (Luk 14:28, 29) Neb nins sẽn da tũud a Zeezi n debd Zeruzalɛmmã sã n dat n lebg a karen-biisi, b segd n deng n yãka yam n na n sak naong buud fãa. A Zeezi rɩka makr a to n maneg n gom rẽ yelle.

A yeela woto: “Rĩm bʋg n be n dat n tɩ zab ne rĩm a to, n ka reng n zĩnd n mag n gese, yẽnda ne a nebã tus piigã sã n tara pãn-tõog tɩ kẽng n seg rĩm a to wã sẽn wat ne neb tus pisi wã? Rĩm a to wã sẽn ket n be yɩɩga, a na n tʋma neb a nengẽ tɩ b tɩ yẽs laafɩ yẽsg ne-a.” A Zeezi wilga a makrã võore, n yeele: “Woto me, yãmb ned ning fãa sẽn ka basd bũmb nins fãa a sẽn tarã ka tõe n yɩ mam karen-biig ye.”—Luk 14:31-33.

A Zeezi ra gomda ne kʋʋngã sẽn da tũud-a wã. Ned ning fãa sẽn bãng Kirisã la a rat n tũ-a segd n sak n maana wa a sẽn yeelã. Woto rat n yeelame tɩ sã n wa yaa tɩlɛ, a soab segd n sak n bõna a sẽn tar fãa, a paoongo, la baa a vɩɩmã, a sã n dat n lebg a Zeezi karen-biiga. A segd n tagsa rẽ zug neere, la a pʋʋse.

Rẽ poore, a Zeezi togsa gomd a sẽn da zoe n yeele, a sẽn wa n zãmsd nebã tãngã zugã. A ra yeelame t’a karen-biisã yaa “dũniyã yamsem.” (Matye 5:13) A ra ratame tɩ b bãng tɩ wa yamsem sẽn sõngd tɩ rɩɩb pa sãamd tao-tao wã, a karen-biisã me sõngda nebã tɩ b ra tall yel-manesem sẽn pa sõma, la tɩ bũmb da sãam b zoodã ne Wẽnnaam ye. Sẽn mik t’a koe-moonegã kolga saab masã wã, a yeelame: “Yamsem yaa bõn-sõngo. La yamsem sã n lebg poada, bõe la b na n ning-a t’a leb n paam noosem?” (Luk 14:34) Sẽn da kelgd-b a Zeezi wã ra mii yamsem buud sẽn be n pa sõma, sẽn naag ne tãnd la sagdo, n ka yõod ye.

A Zeezi ra rat n wilgame tɩ baa neb nins sẽn yaa a karen-biis hal sẽn kaoosã segd n modgame n da koms raood ye. Sã n pa rẽ, b na n lebga neb sẽn ka le tar yõodo, wala yamsem sẽn ka le tar noosem. Rẽ toe n kɩtame tɩ nebã yaal-ba. Sẽn yɩɩd fãa, b pa na n le ta Wẽnnaam yam, b pʋd n na n sãama a yʋʋre. A Zeezi wilgame tɩ yẽ sẽn yetã pa reem yell ye. A yeela woto: “Bɩ sẽn tar-a tʋb n wʋmdẽ wʋme!”—Luk 14:35.