Ges-y sẽn be pʋgẽ wã

Ges-y sẽn be sebrã pʋgẽ

 SAK 81

A Zeezi ne a Ba wã sẽn yaa yembrã võore

A Zeezi ne a Ba wã sẽn yaa yembrã võore

ZÃ 10:22-42

  • “MAAM NE M BA, TÕND YAA YEMBRE”

  • A ZEEZI WILGA VẼENEG TƖ YẼ PA WẼNNAAM YE

A Zeezi bee Zeruzalɛm, Hanuka bɩ rɩk-n-kõ kibsã yĩnga. Yaa kibs b sẽn maand n tẽegd b sẽn dɩk wẽnd-doogã n le kõ a Zeova wã. Sẽn yɩɩd yʋʋm 200 sẽn looge, Siiri rĩm a Antiokos a naas soabã b sẽn boond me t’a Epifan zabame n deeg Zeruzalɛm, n me tẽn-kugr wẽnd-doogã tẽn-kug-kẽengã zugu. Kaoosg zugẽ, maan-kʋʋd a Matatiyaas sẽn yaa zʋɩfã kom-dibli reega Zeruzalɛm, n dɩk wẽnd-doogã n le kõ a Zeova. Rẽ tɛka, yʋʋmd fãa, kislɛɛv kiuugã rasem 25, b ra maanda kibs n tẽegd rẽ yelle. Kislɛɛv kiuugã sɩngda tõnd sɩpaolg kiuugã pʋɩ-sʋk n tãag yʋʋm-sar kiuugã pʋɩ-sʋka.

Yaa waood wakate. A Zeezi bee wẽnd-doogã zĩig ning b sẽn boond t’a Salomo zãndẽ wã, n kẽnda. Zʋɩf-rãmb n wa n gũbg-a n sok woto: “Hal tɩ ta dabʋr la yãmb na n bas tõnd tɩ d yamã gõodẽ? Yãmb sã n yaa Kirisã, bɩ y togs tõnd vẽenega.” (Zã 10:22-24) A Zeezi leokame tɩ bõe? A yeel-b lame yaa: “Mam togsa yãmba, la yãmb ka tẽed ye.” A Zeezi zɩ n togs-b vẽeneg tɩ yẽ la Mesi wã, wa a sẽn togs Samaari pagã bulgã noorã ye. (Zã 4:25, 26) La a ra zoe n wilg-b-la bũmb sẽn tõe n sõng-b tɩ b bãng yẽ sẽn yaa ned ninga. A ra yeelame yaa: “Sẽn deng a Abrahaam dogem, mam dag n beeme.”—Zã 8:58.

A Zeezi ratame tɩ nebã ges bũmb nins yẽ sẽn maandã, n mak rẽ ne no-rɛɛsdbã sẽn da togs Kirisã zugã, n tõog n bãng tɩ yẽ n sɩd yaa Kirisã. Rẽ n so t’a ra yet a karen-biisã tɩ b ra togs ned tɩ yẽ la Mesi wã ye. A yeela zʋɩf-kãensã sẽn da tugd beem ne-a wã vẽeneg yaa: “Tʋʋm nins mam sẽn maand ne m ba wã yʋʋrã kɩta mam kaseto. La yãmb ka tẽed ye.”—Zã 10:25, 26.

Bõe yĩng tɩ b ka tẽ t’a Zeezi la Kirisã? A Zeezi yeelame: “Yãmb ka tẽed ye, bala, yãmb ka mam piis ye. Mam piisã wʋmda mam koɛɛga. Mam mi-b lame, la b pʋgda maam. Mam kõt-b-la vɩɩm sẽn kõn sa. B kõn tol n sãam ye, la ned baa a yembr kõn yiis-b mam nugẽ ye. Mam ba sẽn kõ-a maam piisã yɩɩda fãa, la ned baa a yembr ka tõe n yiis-b m ba nugẽ ye.” A Zeezi wilg-b lame tɩ yẽ ne a Ba wã zemsda taab hal sõma. A yeel-b lame yaa: “Maam ne m ba, tõnd yaa yembre.” (Zã 10:26-30) A Zeezi ra bee tẽngã zugu, t’a Ba wã be saasẽ. Dẽnd b yiibã pa tõe n yɩ nin-yend ye. A rat n yeelame bal tɩ b raabã yaa yembre, la tɩ b yaa noor a ye bũmb fãa pʋgẽ.

Zʋɩf-rãmbã sũy yika ne a Zeezi, hal tɩ b le wʋk kug n na n lob-a n kʋ. A Zeezi pa zoe rabeem ye. A yeelame: “Mam wilga yãmb tʋʋm-sõamyã wʋsg sẽn yit m ba nengẽ tɩ y yãnde. Tʋʋm-sõng bʋg poorẽ la yãmb dat n lob maam kugã?” B leokame yaa: “Ka tʋʋm-sõng yĩng la tõnd dat n lob yãmb kug ye, yaa Wẽnnaam tʋʋsg yĩnga. . . . Yãmb geenda y meng wa Wẽnnaam.” (Zã 10:31-33) A Zeezi zɩ n yeel tɩ yẽ yaa Wẽnnaam ye. La bõe yĩng tɩ nebã rõt-a t’a yeela woto?

A Zeezi goamã yaa sẽn na n wilg tɩ yẽ tara tõog zʋɩf-rãmbã sẽn tẽed tɩ yaa Wẽnnaam bal n tare. Wala makre, a goma a “piisã” yelle, n yeel woto: “Mam kõt-b-la vɩɩm sẽn kõn sa.” (Zã 10:28) Ninsaal ka tõe n maan rẽ ye. A Zeezi wilga vẽeneg tɩ tõog ning yẽ sẽn tarã yaa a Ba wã n kõ-a. La zʋɩf-rãmbã pa sak n deeg ye.

Sẽn na yɩl n wilg tɩ yaa rõdga, a Zeezi sok-b lame: “B ka gʋls yãmb tõogã sebr [Yɩɩn-sõamyã 82:6] pʋgẽ tɩ: ‘Mam yetame tɩ yãmb yaa wẽnnaam-dãmb’ sɩda? Sã n yaa tɩ tõogã boola Wẽnnaam sẽn gom ne neb ninsã tɩ wẽnnaam-dãmba, . . . yãmb yeta ned ning d ba wã sẽn welg toor la b tʋm-a wã t’a tʋʋsda Wẽnnaam, mam sẽn yeel tɩ m yaa Wẽnnaam bi-riblã yĩnga”?—Zã 10:34-36.

Sɩd me, Wẽnnaam Gomdã pʋgẽ b boonda baa bʋ-kaoodb sẽn kaood bʋʋd kɛgr tɩ “wẽnnaam-dãmba.” Bõe yĩng masã tɩ zʋɩf-rãmbã ningd a Zeezi taale, a sẽn yeel t’a yaa “Wẽnnaam bi-riblã” yĩnga? Sẽn na yɩl tɩ b sak n deeg a goamã, a yeelame: “Mam sã n ka tʋmd m ba wã tʋʋmd bɩ y ra tẽ maam ye. La mam sã n tʋmdame, baa yãmb sã n ka tẽed maam me, bɩ y tẽ tʋʋm-kãense, tɩ y tõe n bãng la y reeg tɩ d ba wã bee mam pʋgẽ, tɩ mam be bãmb pʋgẽ.”—Zã 10:37, 38.

Zʋɩf-rãmbã sẽn wʋm woto wã, b baoome n na n yõk a Zeezi. La so-kãngã yɛsa, b ka paam-a ye. A yii Zeruzalɛm n kẽng Zʋrdẽ kʋɩlgã rʋʋnde, zĩig ning a Zã sẽn da lisd nebã sẽn kolg yʋʋm a naas masã wã. Wõnda beenẽ pa zãr ne Galɩle mogrã ye.

Neb wʋsg waa a Zeezi nengẽ. B ra yeta woto: “A Zã ka maan bõn-bãnd baa a yembr ye. La bũmb nins fãa a Zã sẽn togs ne rao-kãngã yellã yaa sɩda.” (Zã 10:41) Woto wilgdame tɩ zʋɩf-rãmb wʋsg tẽe a Zeezi.