Ges-y sẽn be pʋgẽ wã

Ges-y sẽn be sebrã pʋgẽ

 SAK 77

Sagls a Zeezi sẽn kõ arzɛkã wɛɛngẽ

Sagls a Zeezi sẽn kõ arzɛkã wɛɛngẽ

LUK 12:1-34

  • ARZƐK SOABÃ YEL-BŨNDÃ

  • A ZEEZI GOMA BÕN-YƖGDƖ LA RULG-LƐLEM YELLE

  • SẼN NA N KẼ-B WẼNNAAM SOOLMẼ WÃ SÕOR PA WAOOG YE

A Zeezi keta Zʋʋde. A sẽn wa n be Fariizẽ wã zakẽ n dɩtẽ wã, neb kʋʋng n da be yɩng n gũud-a. A sẽn da be Galɩle wã me yɩɩ woto. (Mark 1:33; 2:2; 3:9) La Zʋʋde wã, nebã sẽn gũud-a wã yaa b sẽn dat n paam n yã-a la b kelg-a. B manesmã yaa toor fasɩ ne Fariizẽ-rãmbã sẽn da zĩ ne a Zeezi n dɩtẽ wã.

A Zeezi reng n togsa gomd a karen-biisã sẽn wʋmd a võor sõma. A yeelame: “Gũus-y y mens ne Fariizẽ-dãmbã rã-bɩllã sẽn yaa zãmbã.” A ra zoe n sagl-b-la woto, la bũmb ning a sẽn yã rɩɩbã zĩigẽ wã wilgame tɩ yaa tɩlɛ t’a lebg n tẽeg-ba. (Luk 12:1; Mark 8:15) Tõe tɩ Fariizẽ-rãmbã maanda wa b yaa wẽn-zoɛtba, sẽn na yɩl n solg b wẽnemã, la yaa tɩlɛ tɩ b bãongã puk tɩ nebã bãnge. A Zeezi yeela woto: “Bũmb ka be sẽn ludi, sẽn kõn puk ye. La bũmb ka be sẽn solge, b sẽn kõn bãng ye.”—Luk 12:2.

Tõe tɩ Zʋʋde neb wʋsg sẽn be kʋʋngã sʋkã ra pa paam n kelg a Zeezi, a sẽn wa n zãmsd nebã Galɩle wã ye. Rẽ n so t’a lebg n togs bũmb kẽer a sẽn yeele, tɩ tar yõod wʋsgo. A yeela a kɛlgdbã yaa: “Mam yeta yãmb tɩ y ra zoe neb nins sẽn kʋʋd yĩngã n yaool n ka tõe n maan bũmb a to n paasã ye.” (Luk 12:4) Wa a sẽn da zoe n togsã, a yeelame t’a karen-biisã tog n kɩsa sɩd tɩ Wẽnnaam na n gesa b yelle. Yaa tɩlɛ me tɩ b tẽ Ninsaal Biigã, la b sak n deeg tɩ Wẽnnaam tõe n sõng-b lame.—Matye 10:19, 20, 26-33; 12:31, 32.

Dẽ, rao n zĩnd kʋʋngã sʋk n yeel a Zeezi yaa: “Karen-saamba, yeel-y m ba-biigã t’a pʋɩ tõnd dogem pʋɩɩrã n yãk m dẽnd n kõ-ma.” (Luk 12:13) Tõogã pʋgẽ, b yeelame tɩ b sã n na n pʋɩ rogem pʋɩɩre, bi-ribl-kãsengã tara pʋɩɩr a yiibu. Yel-kãngã pʋgẽ, no-koeemd pa tog n zĩnd ye. (Tõodo 21:17) La wõnda raoã ra ratame t’a pʋɩɩrã yɩɩd b sẽn tog n kõ-a wã. A Zeezi pa sak n kẽes a noor rẽ pʋgẽ ye. A yeelame: “Daoa, ãnda n yãk maam tɩ m yɩ yãmb bʋ-kaooda, wall y te-pʋɩta?”—Luk 12:14.

Dẽ poor la a Zeezi sagl nebã woto: “Gũus-y y mens ne rat wʋsgã. Bala, hal baa naar pʋgẽ, ninsaal vɩɩmã ka tũud ne bũmb nins a sẽn tarã ye.” (Luk 12:15) Baa ned paoong sẽn yaa wʋsg to-to, a na n wa kiime n bas fãa. Sẽn na yɩl n wilg rẽ, a Zeezi rɩka makr a kɛlgdbã sẽn pa tõe n yĩmi, la sẽn wilgd me tɩ yʋ-noog Wẽnnaam taoor n tar yõod n yɩɩda.

A Zeezi yeelame: “Arzɛk soab a yembr pʋt n da sak sõama. La a da tagsda a sũurẽ n yetẽ yaa: ‘Mam na n maana a wãna? Bala, mam ka tar zĩig n na n bĩng m koodã ye.’ A yeelame yaa: ‘Ad bũmb ning mam sẽn na n maane: Mam na n wãa m baoã n lebs n me sẽn yaa bɛd n yɩɩda, n bĩng m koodã fãa ne m teedã be. La mam na n yeela m meng yaa: Fo tara paoong wʋsg sẽn sekd yʋʋm wʋsg yĩnga. Bɩ f vʋʋse, n dɩ la f yũ, la f maan sũ-noogo.’ La Wẽnnaam yeela yẽnda yaa: ‘Yalma! Yʋn-kãngã bala, mam na n deega fo vɩɩmã. La bũmb nins fo sẽn seglã na n yɩɩ ãnda rẽnda?’ Yaa a woto ne ned ning fãa sẽn tigsd paoong a meng yĩnga, n yaool n ka tar Wẽnnaam arzegsã.”—Luk 12:16-21.

Arzɛkã baoobã, bɩ bao n zamã tõe n bẽda a Zeezi karen-biisã la neb nins fãa sẽn kelgd-a wã. Vɩɩmã yɩɩrã me tõe n kɩtame tɩ b pa le tũud a Zeova ne b sũur fãa ye. Rẽ n so t’a Zeezi lebg n togs saglg ning a sẽn kõ neb nins a sẽn zãms tãngã zug na maan yʋʋmd la pʋɩ-sʋkã.

A yeel-b lame: “Yaa woto yĩng tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, wall ne y yĩngã yelle, y sẽn na n yeelg bũmb ning ye. . . . Ges-y gãabdã! B ka bʋta, b ka tigsda, b ka tar pilgu wall baoor ye. La Wẽnnaam rɩlgd-b lame. Yãmb ka be yõod n yɩɩd bõn-yɩgdɩ wã sɩda? . . . Ges-y rulg-lɛlem sẽn bɩt to-to. B ka tʋmda, la b ka wĩid lamdo. Baoosgo, mam yeta yãmb t’a Salmo mengã ne a naamã fãa ka tõog n maneg a meng ne fut n yɩ neer wa rulg-lelemd a yembr ye. . . . Dẽ wã, bɩ y da nams y mens n baood y sẽn na n dɩ bũmb ninga, wall y sẽn na n yũ bũmb ning ye. . . . Yãmb ba wã miime tɩ yãmb dat-b lame. Bas-y rẽ la y bao Wẽnnaam soolmã, la b na n kõo yãmb bõn-kãensã n paase.”—Luk 12:22-31; Matye 6:25-33.

Yaa ãnd dãmb la sẽn na n bao Wẽnnaam soolmã? A Zeezi wilgame tɩ yaa wẽn-sakdb kẽere, la tɩ b sõorã pa na n yɩ wʋsg ye. A bool-b lame tɩ [“wubr pa zemb bũmbu,” Sebr Sõngo] rat n yeel tɩ bãg-bila. Kaoosg zugẽ, Wẽnnaam vẽnegame n togs tɩ b na n yɩɩ neb 144 000. Bõe la b na n paame? A Zeezi yeela woto: “A taa yãmb ba wã yam tɩ b kõ yãmb b soolmã.” Nin-kãensã pa na n dɩk b sẽkã n bao paoong dũniyã zug ka, wagda sẽn tõe n zu wã ye. B na n baoo “paoong sẽn ka sat arzãn [“saasẽ,” MN] pʋga.” Beenẽ la b na n wa rɩ naam ne Kirisã.—Luk 12:32-34.