Ges-y sẽn be pʋgẽ wã

Ges-y sẽn be sebrã pʋgẽ

 SAK 44

A Zeezi kɩtame tɩ sobg sẽn fugd mogrã zug yõke

A Zeezi kɩtame tɩ sobg sẽn fugd mogrã zug yõke

MATYE 8:18, 23-27 MARK 4:35-41 LUK 8:22-25

  • SOB-KÃSENG N YIK GALƖLE MOGRÃ ZUG T’A ZEEZI KƖT TƖ YÕKE

A Zeezi yaame bala a tʋma wʋsgo. Zĩigã sẽn wa n sobge, a yeela a karen-biisã tɩ b wa tɩ b “kẽng ko-kãsengã rʋʋnde.” B sɩd yii Kapɛrnawom n na n pɩʋʋg mogrã n kẽng rʋʋnd a to.—Mark 4:35.

Tẽns wʋsg n be Galɩle mogrã rʋʋnd sẽn be yaangã. B boonda be tɩ Geraasa bɩ Gadara, tɩ kẽer me boondẽ tɩ Dekapolle. Gɛrk-rãmbã minundã n da tar pãng tẽn-kãens pʋsẽ, baa ne zʋɩf-rãmb wʋsg sẽn be be wã.

A Zeezi sẽn na n yi Kapɛrnawom n loogã, neb n bãnge. Neb kẽer kẽe koom-kogend n na n pʋg-ba. (Mark 4:36) Rʋʋndã ra pa zãr woto ye. Sɩd me, Galɩle mogrã yaa wa kʋɩl-kẽenga, t’a woglmã ta kɩlo 21, t’a yalma me ta kilo 12. La zulmame.

Baa ne a Zeezi sẽn yaa ned sẽn zems zãngã, a ra yaame. A sẽn tʋm tʋʋm ningã me sɩd seka yaamse. Dẽnd koglgã sẽn sɩng loogrã bala, a kẽnga poorẽ wã n tɩ kʋgl a zug n gãand n gũsi.

A Zeezi tʋm-tʋmdb wʋsg ra minim n dugda mogrã zug ne koom-kogendo. La so-kãngã, so-toakã pa na n yɩ nana ye. Tãens n gũbg Galɩle ko-kãsengã. Tãensã zug pemsmã yaa maasga, tɩ kʋɩlgã zug pemsmã yaool n wae n yaa tʋʋlga. Rẽ kɩtame tɩ pems-maasgã ne pems-tʋʋlgã mi n yek taab koomã zugu, tɩ lebg sob-kãseng zĩig pʋgẽ. Woto buud n maan a Zeezi ne a tʋm-tʋmdbã sẽn wa n be mogrã zugã. Ko-pɛmã yik n wẽeda koglgã ne pãnga, tɩ koomã kẽed koglgã tɩ “lebg yel-pakr ne-ba.” (Luk 8:23) La a Zeezi yẽ ra ket n gõeeme!

Baa ne karen-biisã sẽn tar minimã, b maana b sẽn tõe fãa sẽn na yɩl tɩ koglgã ra bõre, la so-kãngã wã yɩɩga b pãnga. Rabeem yõk-b lame, tɩ b tags tɩ b na n kiime. Rẽ n so tɩ b nek a Zeezi n yeel-a yaa: “Zu-soaba, fãag-y-do! Ad-y tõnd na n kiime!” (Matye 8:25) Karen-biisã sɩd yɛɛsame tɩ b na n bõrame.

A Zeezi sẽn nekã, a yeela tʋm-tʋmdbã woto: “Tẽeb bilf rãmba, yaa bõe tɩ yãmb zoet rabeem?” (Matye 8:26) Rẽ poore, a “lenga sobgã, n yeel ko-kãsengã t’a bas bʋʋr la a sĩndi!” (Mark 4:39) Sobgã sɩd yõkame, tɩ lebg sɩddd. (A Mark ne a Luk sẽn na n togs yel-solem-kãngã a Zeezi sẽn maanã, b reng n goma a sẽn kɩt tɩ sobgã yõkã, n yaool n na n togs a sẽn yeel tɩ karen-biisã ka tar tẽebã.)

Tags-y n ges-y yel-solemdã sẽn ling karen-biisã to-to! Sob-kẽengã sẽn da gudgd mogrã tiig n yõka zĩig pʋgẽ. Ling-b-la wʋsgo, tɩ b yɛɛse, n da yet taab yaa: “Nin-kãngã yaa bõe neda, tɩ hal baa sobgã ne ko-kãsengã sakd bãmba?” B tõog n pasga mogrã n ta rʋʋndã tɩ bũmb pa maan-b ye. (Mark 4:41–5:1) Tõe tɩ neb a taabã paam n lebga ne b kogendã.

D sẽn mi tɩ Wẽnnaam Biigã tara tõog sobgã ne mogrã zugã, kengda d raood wʋsgo. A sã n wa rɩt naam tẽngã gill zugu, a na n gesa bũmb fãa yelle, tɩ nebã fãa zĩnd bãane, bala bũmb baa a ye, baa sa-bɛda, sob-bɛda, la tẽn-digimdg pa na n le kẽes ned rabeem ye.