Ges-y sẽn be pʋgẽ wã

Ges-y sẽn be sebrã pʋgẽ

 SAK 61

A Zeezi sãooga biig zĩn sẽn da tare

A Zeezi sãooga biig zĩn sẽn da tare

MATYE 17:14-20 MARK 9:14-29 LUK 9:37-43

  • YƖL N DƖG ZĨNÃ SẼN KẼ BIIGÃ, YAA TƖLƐ TƖ B TẼEBÃ TALL PÃNGA

A Zeezi ne a Pɩyɛɛr la a Zak ne a Zã sẽn yi tãngã zug n sigdã, b sega neb kʋʋngo. La bũmb n maane. Tõog karen-saam-dãmb n tigim n wẽed no-koeemd ne a Zeezi karen-biisã. Nebã sẽn yã a Zeezi wã, b sũyã yɩɩ noogo, tɩ b zoe n tɩ seg-a n pʋʋs-a, t’a sok-b woto: “Yaa bõe yell la yãmb gomd ne bãmba?”—Mark 9:16.

Rao a ye n yi kʋʋngã sʋk n yĩgimd a Zeezi taoor n yeel-a yaa: “Karen-saamba, mam waa ne m biig yãmb nengẽ. Zĩn sẽn kɩtd tɩ ned lebg mukã n tar-a. A sẽn yõk-a zĩig ning fãa, a lubd-a-la tẽnga tɩ tãntãmpuud yit a noorẽ wã, tɩ biigã wãbd a yẽn n tɩrdẽ. La mam kosa yãmb karen-biisã tɩ b rig zĩnã la b ka tõog ye.”—Mark 9:17, 18.

Wõnda tõog karen-saam-dãmbã ra sãbsda a Zeezi karen-biisã, n yaand-ba, b sẽn ka tõog n sãoog biigã. A Zeezi pa yɩ tao-tao n leok biigã ba wã sũur sẽn sãamã ye. A reng n goma ne kʋʋngã, n yeel yaa: “Zamaan neb sẽn ka tẽeb la sẽn yaa nin-wẽnse! Mam na n paa ne yãmb hal tɩ ta wakat bʋgo? Mam na n maana sũ-mar ne yãmb tɩ ta wakat bʋgo?” Yaa vẽeneg t’a Zeezi ra gomda ne tõog karen-saam-dãmbã sẽn bas t’a wa ka be yambẽ, tɩ b bao n na n nams a karen-biisã. A wẽnemdame n yeel biigã ba wã yaa: “Tall f biigã n wa ne ka.”—Luk 9:41.

Biigã sẽn wat a Zeezi nengẽ wã, zĩnã fabg-a-la tẽnga, n kɩt t’a virsd ne pãnga. Biigã ra gãee tẽng n bilimdẽ, tɩ tãntãmpuud yit a noorẽ wã. A Zeezi soka biigã ba yaa: “Wakat bʋg la a sɩng n maand biigã a woto?” Raoã leokame: “Hal a yãadem wakate. La naoor wʋsgo, a lub-a-la bugmẽ bɩ koomẽ n dat n kʋ-a.” A kosa a Zeezi woto: “Yãmb sã n tõe n maana bũmb bɩ y zoe d nimbãaneg n sõng-do.”—Mark 9:21, 22.

Biigã ba wã ra ka le mi a sẽn maand ye. Bala karen-biisã meng pa tõog n sãoog biigã ye. La a Zeezi sẽn leok raoã to-to wã sɩd kenga a raoodo. A yeel-a lame yaa: “Yãmb sã n tõe? Ned ning fãa sẽn tẽed tõee bũmb fãa.” Tao-tao bala, biigã ba zẽka a koɛɛg n yeele: “Mam tẽedame. Sõng-y-ma, tɩ m tẽebã paoodame.”—Mark 9:23, 24.

A Zeezi sẽn yã tɩ kʋʋngã kaoog n watẽ wã, a tãsa zĩn-dẽgdã n yeel-a: “Zĩn sẽn maand ned t’a lebg muk la wʋngã, mam yeta foom, yi n bas biigã la f ra leb n kẽ-a yɛs ye.” La nand tɩ zĩnã yi, a kɩtame tɩ biigã kelme, la a virsd ne pãnga. Zĩnã sẽn yi wã, biigã ra gãee sɩɩ. Nebã sẽn yã rẽ, wʋsg yeelame tɩ biigã kiime. (Mark 9:25, 26) La a Zeezi gãda a nug n zẽk-a, la a “paama laafɩ wakat-kãng bala.” (Matye 17:18) A Zeezi sẽn maan bũmb ningã yɛɛsa nebã wʋsgo.

A Zeezi sẽn tʋm a karen-biisã tɩ b tɩ moon koɛɛgã, b riga zĩn-dãmb tɩ b yi n bas neba. Rẽ n so tɩ b sẽn wa n be roogẽ ne a Zeezi tɩ neb a taab ka be, b sok-a lame yaa: “Bõe tɩ tõnd ka tõog n dig zĩn-kãngã?” A wilg-b lame tɩ yaa b tẽebã sẽn ka waoogã. Ad a sẽn yeele: “Zĩn-kãngã buud ka yita, tɩ sã n ka ne pʋʋsg ye.” (Mark 9:28, 29) Yɩl n tõog n dig zĩn sẽn tar pãng wʋsg woto, ra yaa tɩlɛ tɩ b tall tẽeb sõma, la b pʋʋs Wẽnnaam n kos pãnga.

A Zeezi baasa a gomdã, n yeel woto: “Mam yeta yãmb sɩd-sɩd tɩ yãmb sã n tar tẽeb sẽn zem siin-bila, yãmb na n yeela tãn-kãngã t’a serg ka n kẽng ka, la a na n serg n kẽngame. La bũmb kõn zĩnd yãmb sẽn kõn tõog n maan ye.” (Matye 17:20) Ad tẽeb sɩd tõe n talla pãng wʋsgo.

Zu-loeesã n paas yɛl a taab tõe n kɩtame tɩ ned getẽ tɩ tõog n tũ Wẽnnaam yaa toogo, bɩ pʋd n pa tõe ye. Yaa wa b sẽn kos a soab t’a kɩt tɩ tãng yẽrg a zĩigẽ. La d tẽebã sã n tar pãnga, d na n tõog n maoo ne zu-loees sẽn wõnd tãmse.