Ges-y sẽn be pʋgẽ wã

Ges-y sẽn be sebrã pʋgẽ

 SAK 24

A Zeezi moona koɛɛgã Galɩle tẽns wʋsgo

A Zeezi moona koɛɛgã Galɩle tẽns wʋsgo

MATYE 4:23-25 MARK 1:35-39 LUK 4:42, 43

  • A ZEEZI NE A KAREN-BIIS A NAASÃ SAAGA GALƖLE

  • NEB WƲSG WƲMA A ZEEZI KOE-MOONEGÃ LA A YEL-SOALMÃ KIBARE

Daar ning a Zeezi ne a karen-biisã sẽn yi Kapɛrnawom karen-doogẽ wã n kẽng a Pɩyɛɛr zakẽ wã, b tʋma wʋsgo. Tẽngã neb waa ne b bãad-dãmb t’a Zeezi sãoog-ba. A pa tol n yã vɩʋʋg n zĩnd a yembr ye.

Vẽkembeoogã, a Zeezi yikame tɩ zĩigã ket n yaa libsgu, n kẽng neb sẽn ka beẽ, n na n paam n pʋʋs a Ba wã. La pa na n kaoos ye. Bala a “Sɩmo ne neb nins sẽn be ne yẽnda wã” sẽn wa n bãng t’a ka be wã, b sɩnga a gẽesgo. Tõe t’a Sɩmo Pɩyɛɛr lʋɩɩ taoor n na n gẽes a Zeezi, sẽn mik tɩ yaa yẽ zakẽ la a sig-yã.—Mark 1:36; Luk 4:38.

B sẽn wa n yã a Zeezi wã, a Pɩyɛɛr yeel-a lame: “Nebã fãa baooda yãmba.” (Mark 1:37) Dẽnd Kapɛrnawom nebã ra pa rat t’a Zeezi loog ye. La b bee bʋʋm, bala, a sẽn maan bũmb ninsã fãa yɩ-b-la noogo. Rẽ n so tɩ b ra ‘rat n gɩdg a Zeezi t’a ra loog n bas-b ye.’ (Luk 4:42) La rẽ yĩnga, yaa yel-soalmã yĩng la a Zeezi sẽn wa tẽngã zugã bɩ? Yaa Kapɛrnawom bal la a na n tʋm a tʋʋmã bɩ? Bõe la yẽ mengã yeel-yã?

A Zeezi yeela a karen-biisã woto: “Wa-y tɩ d kẽng tẽn-kɩremsã, tɩ m tɩ moon koe-noogã beenẽ me, tɩ yaa rẽnda yĩng la m wa-yã.” A pʋd n yeela neb nins sẽn da pa rat t’a loogã yaa: “Yaa tɩlɛ tɩ mam moon Wẽnnaam soolem koe-noogã tẽms a taabã me. Bala, yaa bõn-kãng yĩng la b sẽn tʋm maamã.”—Mark 1:38; Luk 4:43.

Sẽn tɩ yɩɩd fãa, yaa sẽn na n moon Wẽnnaam Rĩungã koe-noogã yĩng la a Zeezi wa tẽngã zugu. Ne Rĩungã maasem, a Ba wã yʋʋr na n paama waoogre, ãdem-biisã namsgã me na n saa wakat fãa yĩnga. A Zeezi sẽn maan yel-soalem n maag bãasã yaa sẽn na yɩl n wilg vẽeneg tɩ yaa Wẽnnaam n tʋm yẽ. Yʋʋm kobs sẽn deng a Zeezi rogem, a Moyiiz me maana yel-soalem sẽn na yɩl n wilg tɩ yaa Wẽnnaam n tʋm-a.—Yikri 4:1-9, 30, 31.

A Zeezi sɩd yii Kapɛrnawom n na n tɩ moon koɛɛgã tẽns a taaba. A karen-biis a naasã tũ-a lame. Yaa a Pɩyɛɛr ne a ba-biig a Ãndere, n paas a Zã ne a ba-biig a Zak. Sẽn zems semen la a Zeezi bool-ba, tɩ b na n lebg a pipi karen-biis sẽn na n tũ-a wakat fãa n moon koɛɛgã.

A Zeezi ne a karen-biis a naasã sẽn saag Galɩle n moon koɛɛgã, sɩd woma biis wʋsgo. Sɩd me, b ra gomda a Zeezi yell zĩig fãa. “Bãmb yʋʋr saaga Siiri soolem fãa,” la Dekapoll soolmã sẽn tar tẽns piigã, ne tẽns sẽn be Zʋrdẽ rʋʋndã. (Matye 4:24, 25) Neb kʋʋng yii tẽn-kãense, la baa Zʋʋde, n wa tũ a Zeezi ne a karen-biisã. B talla bãad-rãmb wʋsg n wa a Zeezi nengẽ. A sãooga b fãa. A maaga bãad-rãmbã, la a rig zĩn-dãmb tɩ b yi n bas b sẽn da namsd-b rãmbã.