Ges-y sẽn be pʋgẽ wã

Ges-y sẽn be sebrã pʋgẽ

 SAK 28

Bõe yĩng t’a Zeezi karen-biisã pa loet noore?

Bõe yĩng t’a Zeezi karen-biisã pa loet noore?

MATYE 9:14-17 MARK 2:18-22 LUK 5:33-39

  • A ZÃ KAREN-BIISÃ SOKA A ZEEZI SOKR NO-LOEERÃ WƐƐNGẼ

A Zeezi sẽn kẽng n tɩ maan yʋʋmd 30 Pakã, kiis a wãn poor bala, b yõka a Zãmbatiis n kẽes bãens-roogẽ. A ra ratame t’a karen-biisã lebg a Zeezi karen-biisi. La a Zã roogã kõom taa kiis t’a karen-biisã kẽer ra nan pa lebg a Zeezi karen-biis ye.

Yʋʋmd 31 Pakã sẽn wa n kolgdẽ wã, a Zã karen-biis kẽer wa n soka a Zeezi woto: “Yaa bõe tɩ tõnd ne Fariizẽ-dãmbã loet noor tɩ yãmb karen-biisã yaool n ka loetẽ?” (Matye 9:14) Fariizẽ-dãmbã ra getame tɩ no-loeerã yaa tɩlɛ. Vugri a Zeezi rɩka makr n gom Fariizẽ yelle, n yeel t’a sẽn get a meng wa nin-tɩrgã, a pʋʋsa Wẽnnaam n yeel yaa: “Mam Wẽnnaam, m pʋʋsda yãmb bark mam sẽn ka wẽnd wa neb a taabã . . . Mam loeta noor naoor a yiib rasem a yopoe pʋgẽ.” (Luk 18:11, 12) Wõnda a Zã karen-biisã me ra minim n loeta noore. Tõe me tɩ yaa a Zã sẽn be bãens-roogẽ wã yĩnga. B ra sokda b mens bõe yĩng t’a Zeezi karen-biisã yẽ pa loete, wala makre n na n naag bãmb n wilg b sũ-sãang ne bũmb ning sẽn paam a Zã wã.

A Zeezi rɩka makr n na n leok b sokrã. A sokame: “Dẽ yĩnga pʋg-paal sɩd tũud-n-taas tõe n maana sũ-sãang wakat ning a sẽn ket n be bãmb sʋk bɩ? Day n wat tɩ b na n yiis pʋg-paalã sɩd n bas-ba. Dẽ bãmb na yaool n loe noore.”—Matye 9:15.

A Zã meng ra rɩka a Zeezi n mak pʋg-paal sɩda. (Zã 3:28, 29) Dẽnd yaa a Zeezi sẽn ket n be ne a karen-biisã la b sẽn ka loet noorã. A Zeezi sã n wa ki, a karen-biisã na n maana sũ-sãanga, hal tɩ rɩɩb yamleoog pa le tar-b ye. La a sã n wa vʋʋge, b pa le tar bʋʋm n na n maan sũ-sãang la b loe noor ye.

Rẽ poore, a Zeezi rɩka makr a yiibu. Ad a sẽn yeelã: “Ned ka be sẽn na n dɩk peen-paalg n lisg fu-kʋdg ye. Bala, peen-paalgã na n yõbgame n kɩt tɩ fu-kʋdgã kẽeg n yɩɩg pĩnda. Ned ka be sẽn na n sui reezẽ rã-paalg ko-wao-kʋdẽ ye. Sã n ka rẽ, ko-waoosã na pusi, tɩ rãamã raage, la ko-waoosã na n yɩɩ bõne. B tog n suii reezẽ rã-paalg ko-wao-paals pʋse.” (Matye 9:16, 17) A Zeezi gomdã võor yaa bõe?

A ra rat n sõnga a Zãmbatiis karen-biisã tɩ b bãng tɩ ned pa segd n dat tɩ yẽ karen-biisã ket n tũud Zidayiismã minundã, wala makre no-loeerã. Zidayiismã ra lebga tũudum sẽn ka le tat Wẽnnaam yam, n na n sãame. A Zeezi pa wa n na n dems tũudum kãngã, wall n sõng t’a ra menem ye. Wakat kãnga, Zidayiismã rãmb ra tũuda ninsaalb raab bala. La a Zeezi ra pa rat tɩ nebã tũ Wẽnnaam woto ye. Dẽnd a pa wa n na n dɩk peen-paalg n lisg fu-kʋdgo, bɩ n sui reezẽ rã-paalg ko-wao-kʋdẽ ye.