Ges-y sẽn be pʋgẽ wã

Ges-y sẽn be sebrã pʋgẽ

Vẽnegre

Vẽnegre

1 A ZEOVA

Wẽnnaam yʋʋr yaa a Zeova. Zeova wã võor yaa: “A kɩtdame tɩ yɩ.” A Zeova n yaa Wẽnnaam Sẽn-tõe-a-fãa, yẽ n naan bũmb fãa. A tara pãng n tõe n maan bũmb ning fãa a sẽn date.

Ebre wã pʋgẽ, b gʋlsa Wẽnnaam yʋʋrã ne gʋls-biis a naase. Ãngilindã pʋgẽ, b lebga gʋls-biisã woto: YHWH bɩ JHVH. Wẽnnaam yʋʋrã bee sẽn ta naoor 7000 pĩnd wẽndẽ Biibl nins b sẽn gʋls ne ebre wã pʋgẽ. Dũniyã gill zugu, nebã sẽn pʋt Zeova wã to-to wã pa yembr ye. Bee ne b buud-gomdã.

Sak a 1, sull 15

2 WẼNNAAM N KƖT TƖ B GƲLS BIIBLÃ

Biiblã yaa Wẽnnaam sebre. A yãka neb tɩ b gʋlse. Yaa wa nin-kẽem sẽn na n kɩt t’a yageng gʋls lɛtr n tool neda. Wẽnnaam tũnuga ne a vʋʋsem sõngã n vẽneg neb tɩ b gʋls a sẽn datã. Vẽnegrã yɩɩ vũk toor-toore. Wala makre, kẽer yɩɩ zãmsd pʋgẽ, tɩ sãnda nengẽ pa tũ ne zãmsd ye.

Sak a 2, sull a 5

3 BÃNGR-GOMDE

Yaa gomd Wẽnnaam sẽn togse, n na n bilg a raab tɩ nebã wʋm a võore, bɩ a wilg sẽn segd la sẽn pa segde, wall a kõ noore, pa rẽ bɩ a taas bʋ-kaoor koɛɛga. Leb n tõe n yɩɩ sẽn na n togs sẽn wat beoogo. Bãngr-goam wʋsg sẽn be Biiblã pʋgẽ zoe n pidsame.

Sak a 2, sull 13

  4 BÃNGR-GOAM SẼN PIDS MESI WÃ ZUGU

Bãngr-goam wʋsg sẽn be Biiblã pʋgẽ n gomd Mesi wã yell pidsa a Zeezi zugu. Ges-y zĩ-gũbrã sẽn yet tɩ “Bũmb kẽer b sẽn deng n togs Mesi wã zugu.

Sak a 2, sull 17, tẽngr notã

5 A ZEOVA SẼN DAT TƖ VƖƖMÃ YƖ TO-TO TẼNGÃ ZUGU

A Zeova naana tẽngã n dat t’a yɩ arzãna, tɩ sẽn nong-b yẽ wã zĩnd a zugu. A raabã pa toeem ye. Ka la bilfu, a na n kɩtame tɩ wẽnemã sa, tɩ wẽn-sakdbã vɩɩmd wakat sẽn kõn sa.

Sak a 3, sull a 1

6 A SƲƖTÃAN

Sʋɩtãanã yaa pipi malɛk sẽn kɩɩs Wẽnnaam. B boond-a lame tɩ Sʋɩtãana, sẽn dat n yeel tɩ “kɩɩsda.” Bala a kɩɩsda a Zeova. A leb n yaa kãnegda, bala a togsda goam sẽn pa sɩd a Zeova zugu, la a belgd nebã.

Sak a 3, sull a 4

7 MALƐGSÃ

A Zeova naana malɛgsã n kaoos wʋsgo, n yaool n naan tẽngã. A naan-b lame tɩ b zĩnd saasẽ. Malɛgsã sõor yaa milyõ kobse. (Dãniyɛll 7:10) B tara yʋya, b manesmã yaa toor-toore. Malɛg-sakdbã sikda b mense, n pa basd tɩ ninsaalb waoog-b ye. B yasrã pa yembr ye. B leb n tara tʋʋm buud toor-toore. Wala makre, kẽer bee a Zeova geerã taoor n waoogd-a, sãnda taasda a koeese, kẽer  kogenda a nin-buiidã sẽn be tẽngã zugã, n wilgd-b sore, tɩ sãnda sõngd tõnd koɛɛgã mooneg pʋgẽ. (Yɩɩn-sõamyã 34:8; Vẽnegre 14:6; 22:8, 9) Harmagedõ zabrã sasa, b na n naaga a Zeezi n zab ne Wẽnnaam bɛɛbã.—Vẽnegre 16:14, 16; 19:14, 15.

Sak a 3, sull a 5; Sak 10, sull a 1

8 YEL-WẼNDE

Tõnd sã n tags bũmb yelle, bɩ d yeel wall d maan bũmb sẽn pa noom a Zeova, bɩ sẽn kɩɩsd a raabã, yaa yel-wẽnde. Yel-wẽnd sãamda tõnd zoodã ne a Zeova. Rẽ n so t’a kõ-d noy la saglse, sẽn na n sõng-d tɩ d ra maan yel-wẽn ne pʋ-toog ye. Sɩngrẽ wã, a Zeova naana bũmbã fãa tɩ yaa sõma. La a Ãdem ne a Hawa sẽn kɩɩs-a wã, b maana yel-wẽnde, n lebg neb sẽn pa zems zãnga. B wa n kʋʋlame n ki. Tõnd sẽn yaa a Ãdem yagensã, d yaa yel-wẽn-maandba. Rẽ n so tɩ d kʋʋndẽ la d kiidẽ.

Sak a 3, sull a 7; Sak a 5, sull a 3

9 HARMAGEDÕ

Yaa Wẽnnaam zabre. Zab-kãng sasa la a na n sãam a Sʋɩtãan dũniyã, n kɩt tɩ wẽnemã sa.

Sak a 3, sull 13; Sak a 8, sull 18

10 WẼNNAAM RĨUNGÃ

Yaa goosneema a Zeova sẽn lugl saasẽ. A Zeezi Kiris la Rĩmã. Ka la bilfu, ne Rĩungã maasem, a Zeova na n kɩtame tɩ wẽnemã fãa sa. Wẽnnaam Rĩungã na n sooga tẽngã gilli.

Sak a 3, sull 14

 11 A ZEEZI KIRIS

Wẽnnaam naana a Zeezi, n yaool n naan bũmba fãa. A Zeova tʋma a Zeezi tẽngã zugu, t’a wa ki ninsaalbã fãa yĩnga. Rẽ poore, a Zeova vʋʋg-a lame. Masã, a Zeezi yaa Wẽnnaam Rĩungã Rĩma, n dɩt naam saasẽ.

Sak a 4, sull a 2

12 YƲƲM 70 NAOOR A 7 WÃ VÕORE

Biiblã pʋgẽ, b pĩnd n togsa wakat ning Mesi wã sẽn na n wa. B yeelame tɩ na n yɩɩ yʋʋm 69 naoor a 7 baasgẽ. Wakat kãng sõadg sɩnga yʋʋmd 455 sẽn deng a Zeezi rogmã, n baas yʋʋmd 29 a Zeezi rogmã poore.

Bõe n wilgd tɩ baasa yʋʋm-kãnga? Sõadgã sɩnga yʋʋmd 455 sẽn deng a Zeezi rogmã, Pɛrs rĩm a Artagzɛrzɛɛs sẽn kõ nooor tɩ b “lebs n me Zerizalɛmã.” (Dãniyɛll 9:25; Neemi 2:1, 5-8) D sã n sɩng yʋʋmd 455 sẽn deng a Zeezi rogmã, n na n sõd yʋʋm 483 (yʋʋm 69 naoor a 7), tekda yʋʋm 29 a Zeezi rogmã poore. Yaa yʋʋm-kãng bal kɛpɩ la a Zeezi reeg lisgu, n lebg Mesi wã.—Luk 3:1, 2, 21, 22.

Bãngr-gomdã pʋgẽ, b leb n goma yʋʋm a 7 yelle, sẽn na n pʋgl yʋʋm 483 wã. Yʋʋm a yopoe wã pʋgẽ, bɛɛbã na n kʋʋ Mesi wã. Rẽ yɩɩ yʋʋmd 33 wã. La sẽn sɩng ne yʋʋmd 36, rat n yeel tɩ yʋʋm a 7 wã baasgẽ, b na n moona Wẽnnaam Rĩungã koe-noog buudã fãa neba, pa zʋɩf rãmbã bal ye.—Dãniyɛll 9:24-27.

Sak a 4, sull a 7

 13 WẼNNAAM PA MENS A TÃAB YE

Biiblla wilgdame tɩ Wẽnnaam a Zeova n yaa naandã, la t’a naana a Zeezi n yaool n naan bũmba fãa. (Koloos-rãmbã 1:15, 16) A Zeezi pa Wẽnnaam Sẽn-tõe-a-fãa wã ye. A zɩ n yeel tɩ yẽ ne Wẽnnaam zema taab ye. A pʋd n yeelame: “M ba yɩɩda maam.” (Zã 14:28; 1 Korẽnt-rãmbã 15:28) La tũudum kẽer zãmsda nebã tɩ Wẽnnaam yaa mens a  tãabo, rat n yeel tɩ Ba wã, Biigã, la vʋʋsem sõngã naaga taab n yaa Wẽnnaam. Biiblã pa wilgd woto ye. Yaa zãmsg sẽn pa sɩda.

Vʋʋsem sõngã pa ninsaal ye. Yaa pãng ning Wẽnnaam sẽn tũnugd ne n pidsd a raabã. Wala makre, pipi kiris-nebã ra ‘pida ne Sɩɩg-sõngo.’ Sẽn paase, a Zeova yeelame: ‘Mam na n pʋdga m Sɩɩgã ninsaalbã buud fãa zutu.’—Tʋʋmã 2:1-4, 17.

Sak a 4, sull 12; Sak 15, sull 17

14 PIKÃ

Bõe yĩng tɩ kiris-neb hakɩɩkã pa tũnugd ne pikã n pʋʋsd Wẽnnaam?

  1.  Hal sẽn kaoose, ziri tũudmã rãmb tũnugda ne pikã n pʋʋsdẽ. Pĩnd wẽndẽ wã, b ra tũnugda ne pikã n pʋʋsd bõn-naandse, bɩ n maand yɛl sẽn naag ne pag ne rao lagengo. Na maan yʋʋm 300 a Zeezi kũumã poore, kiris-nebã pa tũnug ne pikã n pʋʋs Wẽnnaam ye. La kaoosg zugẽ, Rom naab a Kõnstãntẽ kɩtame tɩ pikã lebg bũmb kiris-nebã sẽn tũnugd ne n pʋʋsdẽ, sẽn na yɩl tɩ b tũudmã piuugi. Pa a Zeezi n kɩt tɩ nebã sɩng n pʋʋsd ne pikã ye. Sebr a yembr wilgame tɩ “pikã sɩng n bee buud kẽer pʋsẽ, sẽn deng kiris-nebã zãmaana, la buud wʋsg sẽn pa kiris-nebã minund pʋsẽ me.”

  2.  A Zeezi pa ki pik zug ye. Gɛrk gom-bil ning b sẽn lebg ne moor tɩ “pikã” võor meng-meng yaa “raoog sẽn yaa tɩrga,” bɩ “ra-giuugu,” wall “tɩɩga.” Biibl a ye pʋgẽ, b yeelame tɩ Kãab-paalgã pʋgẽ, gɛrk gom-bil kae sẽn wilgd tɩ yaa raad a yiib sẽn palg taab ye. A Zeezi kii raoog zugu.

  3.    A Zeova pa rat tɩ d tũnug ne yimaaz-rãmb bɩ bũmb a taab n pʋʋs ye.—Yikri 20:4, 5; 1 Korẽnt-rãmbã 10:14.

Sak a 5, sull 12

15 A ZEEZI KŨUMÃ TẼEGRE

A Zeezi yeela a karen-biisã tɩ b tẽegd yẽ kũumã yelle. B maanda rẽ yʋʋmd fãa Nizã kiuugã rasem 14 daare. Pĩndã Israyɛll nebã me ra maanda Pakã Nizã rasem 14 daare. A Zeezi kũumã tẽegr sasa, b pɩʋʋgda nebã taoor ne buri, la dɩvẽ, sẽn makd a Zeezi yĩngã, la a zɩɩmã. Yaa neb nins sẽn na n tɩ naag a Zeezi n dɩ naam saasẽ wã n wãbd burã la b yũud dɩvẽ wã. Neb nins sẽn saagd n na n wa vɩɩmd wakat sẽn kõn sa tẽngã zugã naagd n maanda a Zeezi kũumã tẽegre, la b pa wãbd burã, bɩ n yũud dɩvẽ wã ye.

Sak a 5, sull 21

16 SƖƖGA

Ebre ne gɛrk gom-biis nins sẽn yaa sɩɩgã tõe n dat n yeelame tɩ 1) neda, 2) rũnga, bɩ 3) ned wall rũng vɩɩm. Ad makr a wãna:

  • Neda: “Wẽnnaam sẽn maan sũ-mar n kaoos wakat ning a Nowe sẽn maan koom koglgã tɩ neb bilfu, dat n togs tɩ neb a nii wã kẽe a pʋgẽ n põs koomã.” (1 Pɩyɛɛr 3:20) Ka wã, b sẽn gʋls tɩ “nebã,” b ra tõe n ningame tɩ “sɩɩse,” sẽn dat n yeel t’a Nowe ne a pagã, n paas a kom-dibli a tãabã ne b pagbã.

  • Rũnga: “Wẽnnaam yeelame: ‘Bɩ bõn-vɩɩlɩ [sɩɩs] pid ko-kãsengã pʋg n saagdẽ, tɩ bõn-yɩgdɩ me zĩnd dũniyã zugu, n yɩgd yĩngri.’ Wẽnnaam leb n yeelame: ‘Bɩ bõn-vɩɩs [sɩɩs] buud toor-toor zĩnd dũniyã zugu. Yaa yir dũmsi, bõn-vuudsi, la we-rũmsi, bãmb fãa, buud toor-toore.’ La a yɩɩ woto.”—Sɩngre 1:20, 24.

  •  Ned wall rũng vɩɩm: A Zeova yeela a Moyiiz yaa: “Neb nins sẽn dag n baood foom [baood fo sɩɩgã] n na n kʋ wã kiime.” (Yikri 4:19) A Zeezi sẽn wa n be tẽngã zugã, a yeelame: “Maam la pe-kɩɩm-sõngã. Pe-kɩɩm-sõng gẽnegda a yõor [sɩɩga] a piis yĩnga.”—Zã 10:11.

    Sẽn paase, ned sã n maand bũmb ne a “sɩɩgã fãa,” rat n yeelame t’a maanda rẽ ne yamleoogo, la a pãng tɛka. (Matye 22:37; Tõodo 6:5) Ned bɩ rũng sã n ki a lebga sɩ-kɩɩnga.—Sõdbo 6:6; Aaze 2:13.

Sak a 6, sull a 5; Sak 15, sull 17

17 VƲƲSEM

Traduction du monde nouveau wã pʋgẽ, ebre ne gɛrk gom-bil ning b sẽn lebg tɩ “vʋʋsmã” võor yaa toor-toore. La fãa bilgda bũmb d sẽn pa tõe n yã ne nifu, wala makre sebgo, ninsaal wall rũng vʋʋsem. Leb n tõe n yaa malɛgsã bɩ vʋʋsem sõngã sẽn yaa Wẽnnaam pãngã. Biiblã pa wilgd tɩ ned kũum poore, bũmb n yit a yĩngẽ wã n tɩ vɩ zĩig a to ye.—Yikri 35:21; Yɩɩn-sõamyã 104:29; Matye 12:43; Luk 11:13.

Sak a 6, sull a 5; Sak 15, sull 17

18 ZEYƐN

Moorã Biibl pʋgẽ, b lebga gɛrk gom-bil ning sẽn yaa “Zeyɛnnã” tɩ “bug-tẽnga.” Zeyɛn yaa long sẽn da pẽ Zerusalɛm, tɩ b ra yõogd sagdo. Bũmb pa wilgd t’a Zeezi wakatẽ wã, b ra kẽesda rũms bɩ neb be n namsd-ba, bɩ n yõogd-b vɩɩs ye. Dẽnd Zeyɛnnã pa makd zĩig b sẽn namsd sẽn ki-bã n yõogd-b bugum wakat fãa yĩng ye. A Zeezi sẽn yeel tɩ neb la b na n kẽes Zeyɛnnã, a ra rat n yeelame tɩ b na n sãam-b-la zãng-zãnga.—Matye 5:22; 10:28.

Sak a 7, sull 20

 19 TÕND BA SẼN BE ARZÃNÃ

A Zeezi sẽn wã n zãmsd a karen-biisã, a wilg-b-la b sẽn segd n pʋʋs to-to. Yaa pʋʋs-kãng la b sẽn boond tɩ “Tõnd Ba sẽn be arzãnã.” Wala makre, a yeelame yaa:

  • “Bɩ yãmb yʋʋrã paam waoogre”

    D kotame t’a Zeova maneg a yʋʋrã b sẽn sãamã. Woto yaa sẽn na yɩl tɩ sẽn be-b saasẽ la tẽngã zugã fãa waoog a yʋʋrã.

  • “Tɩ yãmb soolmã wa”

    D kotame tɩ Wẽnnaam goosneemã sãam dũni-wẽngã, la a soog tẽngã n kɩt t’a lebg arzãna.

  • “Tɩ yãmb daab maan tẽng zugu”

    D kotame tɩ Wẽnnaam daabã pidsi, sẽn na yɩl tɩ wẽn-sakdb sẽn zems zãng vɩɩmd wakat sẽn kõn sa arzãnã pʋgẽ tẽngã zugu, wa a Zeova sẽn da rat sɩngrẽ wã.

Sak a 8, sull a 2

20 A ZEEZI MAOONGÃ

A Zeova maana bũmb sẽn na yɩl n fãag ãdem-biisã ne yel-wẽndã la kũumã. A tʋma a Zeezi tẽngã zug t’a wa ki tɩ yɩ maoongo, n dol vɩɩm sẽn zems zãngã a Ãdem sẽn bõnã, la a maneg yell ning sẽn be ninsaalbã ne Wẽnnaam sʋkã. A Zeezi kii yel-wẽn-maandbã fãa yĩnga. Rẽ kɩtame tɩ ned buud fãa tõe n wa paam n zems zãnga, n vɩɩmd wakat sẽn kõn sa.

Sak a 8, sull 21; Sak a 9, sull 13

21 YƲƲMD 1914

Bãngr-gomd ning sẽn be Dãniyɛll sak a 4 pʋgẽ wã wilgdame tɩ Wẽnnaam na n lugla a Rĩungã yʋʋmd 1914.

Bãngr-gomdã: Rĩm a Nebukatnedzaar zãmsd pʋgẽ, a Zeova kɩtame t’a yã tɩ-wok sẽn yaa bedr b sẽn kɛ n lubi. Zãmsdã pʋgẽ, b sẽba tɩɩgã viukã ne bãens la zũud n gũbgi, sẽn na yɩl t’a ra le tob ye. La a ra na n paa woto hal tɩ “wakat a yopoe” looge. Rẽ poore tɩɩgã na n le tobame.—Dãniyɛll 3:31; 4:7-13, Wẽnnaam Sebre, 1983.

Bãngr-gomdã võore: Tɩɩgã makda Wẽnnaam naamã. Na maan yʋʋma, a Zeova yãkda rĩm dãmb Zeruzalɛm tɩ b rɩt naam Israyɛll nebã zugu. (1 Kibayã 29:23) La rĩm-kãens wa n lebga wẽn-kɩɩsdba, t’a Zeova pa le yãkd rĩm ye. B sãama Zeruzalɛm yʋʋmd 607 sẽn deng a Zeezi rogmã. “Wakat a yopoe” wã sɩnga sasa kãnga. (2 Rĩm-dãmbã 25:1, 8-10; Ezekɩyɛll 21:30-32) A Zeezi sẽn yeel tɩ “bu-zẽms na n sooga Zeruzalɛm ne pãng hal tɩ b wakatã pidã, a ra gomda “wakat a yopoe” wã yelle. (Luk 21:24) Dẽnd a Zeezi sẽn wa n ket tẽngã zugã tɩ wakat a yopoe wã nan pa sa ye. A Zeova pʋlmame tɩ “wakat a yopoe” wã baasgẽ, a na n yãka rĩma. Rĩm-kãng yaa a Zeezi. A Zeezi naamã sasa, Wẽnnaam nin-buiidã sẽn be dũniyã gill zugã na n paama bark buud toor-toore, wakat fãa yĩnga.—Luk 1:30-33.

Wakat a yopoe” wã sẽn kaoos to-to: “Wakat a yopoe” wã kaoosa yʋʋm 2520. D sã n sɩng yʋʋmd 607 sẽn deng  a Zeezi rogmã n na n sõd yʋʋm 2520, tekda yʋʋmd 1914. Yaa wakat kãng la a Zeova kɩt t’a Zeezi sẽn yaa Mesi wã lebg a saasẽ Rĩungã Rĩma.

D maana wãn n bãng tɩ yaa yʋʋm 2520? Biiblã wilgdame tɩ wakat a tãab la pʋɩ-sʋk yaa rasem 1260. (Vẽnegre 12:6, 14) Dẽnd “wakat a yopoe” wã yaa rasem 1260 naoor a yiibu. Rasem 2520 wã yaa yʋʋm 2520, bala Biiblã bãngr-goam pʋgẽ, “daar a yembr yaa yʋʋmde.”—Sõdbo 14:34; Ezekɩyɛll 4:6.

Sak a 8, sull 23

 22 MALƐGS NAAB A MIKAYƐLLE

Biiblã pʋgẽ, b gomda malɛgs naab a yembr bal yelle. A yʋʋr la a Mikayɛll bɩ Misɛlle.—Dãniyɛll 12:1; Zʋʋd 9.

A Mikayɛll n yaa malɛgs nins sẽn sakd Wẽnnaamã taoor-soaba. Vẽnegr 12:7 wã yetame: “Malegs naab a Misɛll ne a malegsã zaba ne wag-bɛɛgã. Wag-bɛɛgã me ne a malegsã zabame.” Vẽnegr sebrã pʋgẽ, b yeelame tɩ Wẽnnaam tãb-biisã taoor soab yaa a Zeezi. Dẽnd Mikayɛll bɩ Misɛllã yaa a Zeezi yʋʋr a to.—Vẽnegre 19:14-16.

Sak a 9, sull a 4

23 YAOOLEM WAKATÃ

Yaa sasa ning yel-kãsems sẽn na n zĩnd tẽngã zugu, nand tɩ Wẽnnaam Rĩungã sãam a Sʋɩtãan dũniyã. Biiblã bãngr-goam pʋgẽ, b gomda ‘dũni saab’ wakat ne “Ninsaal Bi-riblã waoong” wakat yelle. Fãa gomda yaoolem wakatã yelle. (Matye 24:3, 27, 37) Yaoolem wakatã sɩnga yʋʋmd 1914, Wẽnnaam sẽn wa n lugl a Rĩungã saasẽ wã, la na n baasa Harmagedõ, a Sʋɩtãan dũniyã sãoong sasa.—2 Tɩmote 3:1; 2 Pɩyɛɛr 3:3.

Sak a 9, sull a 5

 24 KŨUM VƲƲGRE

Wẽnnaam sã n kɩt tɩ ned sẽn ki yiki, b boonda rẽ tɩ kũum vʋʋgre. Biiblã pʋgẽ, b gomda neb a wɛ sẽn vʋʋg yelle. A Eli, a Eliize, a Zeezi, a Pɩyɛɛr la a Poll vʋʋga neb sẽn da ki. Yaa Wẽnnaam pãngã n kɩt tɩ b tõog n maan yel-soalem kãensã. A Zeova pʋlmame tɩ “nin-sõamyã la nin-wẽns na n vʋʋgame,” n zĩnd tẽngã zugu. (Tʋʋmã 24:15) Biiblã wilgdame me tɩ neb n na n vʋʋg n kẽng saasẽ. Yaa neb Wẽnnaam sẽn yãke, n kõ-b a vʋʋsem sõngã. B sã n ki, Wẽnnaam vʋʋgd-b lame tɩ b tɩ zĩnd saasẽ ne a Zeezi.—Zã 5:28, 29; 11:25; Filip-rãmbã 3:11; Vẽnegre 20:5, 6.

Sak a 9, sull 13

25 ZĨN-DÃMBÃ YƐLA

Neb kẽer gomda ne zĩn-dãmbã b toore, pa rẽ bɩ b kẽnd kinkir-bagb nengẽ n na n paam n gom ne zĩn-dãmbã. Woto fãa yaa wẽng wʋsgo. Sẽn maand-b zĩn-dãmb yɛlã tẽedame tɩ ned sã n ki, a tara sɩɩg sẽn tɩ vɩ zĩig a to, n tar pãnga. Zĩn-dãmbã maanda b sẽn tõe n dat tɩ nebã kɩɩs Wẽnnaam. Sẽn get-b ãdsã, nug-pʋsã, nensã, sẽn wẽed-b bĩisrã, sẽn lobd-b ligd-pɛɛlã, la sẽn wilgd-b zãmsd võorã, fãa yaa zĩn-dãmb yɛla. Neb kẽer tẽedame tɩ sɛba, zʋrno-rãmba, filim-dãmba, fot-rãmb la mizik rãmb sẽn gomd zĩn-dãmb yɛla, tɩ-yoada, tɩ-gãna, zũyã bɩ nug-bĩnsã pa tolg n yaa wẽng ye. Ned sã n ki, b siginda reem, bɩ n maand kʋ-sõsa, wall tigr n tẽegdẽ, n kʋʋd maand kiidã yĩnga, tɩ pʋg-kõapã ne kɩɩbsã me tar b yel-maandɩ. Woto fãa yaa zĩn-dãmb yɛla. Neb sãnda rɩkda tɩt bɩ n yũud rãam wall dorge, b sã n wa rat n tʋm ne zĩn-dãmbã pãnga.—Galat-rãmbã 5:20; Vẽnegre 21:8.

Sak 10, sull 10; Sak 16, sull a 4

 26 A ZEOVA NAAM SẼN KA TO WÃ

A Zeova n yaa Wẽnnaam Sẽn-tõe-a-fãa. Leb n yaa yẽ n naan bũmb nins sẽn be yĩngr la tẽngã. (Vẽnegre 15:3) Woto kɩtame tɩ yaa yẽ n so bũmba fãa, n tar noor bũmb nins fãa a sẽn naanã zugu. (Yɩɩn-sõamyã 24:1; Ezayi 40:21-23; Vẽnegre 4:11) A lugla noya, bũmb nins fãa a sẽn naanã yĩnga. A Zeova leb n tara sor n yãk neb tɩ b rɩ naam. D sã n nong a Zeova n sakd-a, d wilgdame tɩ d ratame t’a yɩ d naaba.—1 Kibayã 29:11.

Sak 11, sull 10

27 PƲG-YIISGU

Pʋg-yiisg yaa nin-kʋʋre. Yaa a soabã meng n yãk yam n na n kʋ biigã. Pa sabab n maan tɩ pʋgã sãam ye. Pʋgã rɩkr tɛka, Wẽnnaam nifẽ biigã lebga nin-vɩɩga. Pa a ma wã yĩngã will bal ye.

Sak 13, sull a 5

28 ZƖƖMÃ REEGRE

Yaa b sẽn mi n ning bãad zɩɩmã. Tõe n yaa ned a to zɩɩm la b yãk zĩig pʋgẽ n ning bãadã, bɩ yaa zɩɩm b sẽn da yãk n bĩngi. Tõe n yaa zɩɩmã, bɩ bũmb b sẽn yãk zɩɩmã pʋgẽ. Wala makre, plasmã wã, globil ruuz rãmbã, globil blã rãmbã la plakɛt rãmbã.

Sak 13, sull 13

 29 KIBLGU

Biiblã pʋgẽ, kiblg ne sɩbgr pa yembr ye. Kiblg tõe n dat n yeelame tɩ wilg ned sẽn segde, bɩ zãms-a bũmbu, wall rems-a. A Zeova sã n na n kibl neda, a pa maand ne toolem ye. (Yel-bũnã 4:1, 2) A Zeova kõo roagdbã mak-sõngo. A sẽn kibend to-to wã nafda a soabã hal t’a pa sãamd a sũur ye. (Yel-bũnã 12:1) A Zeova nonga a nin-buiidã, n wilgd-b sẽn segde. A kõt-b-la saglse, n na n sõng-b tɩ b toeem b tagsa wã, la b modg tɩ b tʋʋm-tʋmdɩ wã tat a yam. Roagdbã sã n wa kibind b kambã, b segd n sõng-b lame tɩ b bãng bũmb ning sẽn kɩt tɩ b segd n yɩ sakdbã. B segd n sõng-b lame me tɩ b nong a Zeova, n nong a Gomdã sẽn yaa Biiblã, la b wʋm a noyã võore.

Sak 14, sull 13

30 ZĨN-DÃMBÃ

Yaa malɛg-wẽnse, n tar pãng sẽn yɩɩd ninsaalbã. D pa tõe n yãnd-b ne nif ye. B sẽn kɩɩs a Zeova wã tɛka, b lebga malɛg-wẽnse, n yaa a bɛɛba. (Sɩngre 6:2; Zʋʋd 6) B pʋga a Sʋɩtaan a kɩɩsgã pʋgẽ.—Tõodo 32:17; Luk 8:30; Tʋʋmã 16:16; Zak 2:19.

Sak 16, sull a 4