Ges-y sẽn be pʋgẽ wã

Ges-y sẽn be sebrã pʋgẽ

Kibar 90: A Zezi ne Samari pagã

Kibar 90: A Zezi ne Samari pagã

A ZEZI yalsa Samari bulg noor n na n vʋʋse. A karen-biisã kẽe tẽngã pʋgẽ n na n bao rɩɩbo. Pag ning a Zezi sẽn gomd ne wã waame n na n wi koom. A Zezi yeela pagã yaa: ‘M kota koom n na n yũ.’

A Zezi sẽn gomd ne Samari pagã

La linga pagã wʋsgo. Yãmb mii sẽn yaa bũmb ning yĩng bɩ? Yaa a Zezi sẽn yaa Zʋɩf tɩ yẽ yaa Samari nedã yĩnga. Zʋɩf rãmbã ra kisa Samari nebã. B ra pʋd n pa gomd ne-b meng ye. La a Zezi nonga nebã fãa. A yeela pagã yaa: ‘Fo sã n da mi ned ninga sẽn yet foo tɩ f kõ-a koom t’a yũ wã, fo ra na n kosa yẽ t’a kõ-f koom sẽn kõt vɩɩm.’

La pagã yeel-a lame yaa: ‘M kẽema, bulgã zulmame, la yãmb ka tar bũmb sẽn na n wi koomã ye. Zĩ-bʋg la yãmb na n paam ko-kãng sẽn kõt vɩɩmã?’

A Zezi leok-a lame yaa: ‘Fo sã n yũ bul-kãngã koom, ko-yũud na n le yõka foo. La ned sã n yũ koom ningã mam sẽn na n kõ yẽ wã, a tõe n kɩtame t’a soab vɩɩmd wakat sẽn ka sate.’

Tɩ pagã yeel a Zezi yaa: ‘M kẽema, bɩ y kõ maam ko-kãng tɩ m yũ, tɩ ko-yũud ra le tol n yõk-ma, la m da le wat n wiid koom ka ye.’

Pagã ra tẽedame t’a Zezi gomda koom sɩd-sɩd yelle. La a Zezi ra gomda Wẽnnaam ne a rĩungã bãngr yelle. Bãng-kãng wõnda koom sẽn kõt vɩɩm, bala a kɩtdame tɩ ned paam vɩɩm sẽn ka sate.

A Zezi yeela pagã yaa: ‘Kẽng n tɩ bool f sɩdã t’a wa ka.’

La pagã yeelame t’a pa tar sɩd ye.

A Zezi yeel-a lame yaa: ‘Fo togsa sɩda, bala fo talla sɩdb a nu, la fo sẽn be ne a soab masã wa ka fo sɩd ye.’

Woto linga pagã, bala a Zezi sẽn yeelã fãa yaa sɩda. La a Zezi maana wãn n bãng rẽ fãa? Yaa Wẽnnaam n tʋm a Zezi tẽngã zugu, la yaa yẽ n wilg-a rẽ fãa. A Zezi karen-biisã sẽn yi tẽngã pʋgẽ n lebg n wa mik t’a gomd ne Samari pagã, ling-b lame.

Woto fãa wilgda tõnd bõe? T’a Zezi nonga nebã fãa. Tõnd me segd n nonga nebã fãa. Tõnd pa segd n yãk buud a ye neb n yet tɩ b pa sõma ye. A Zezi ratame tɩ nebã fãa bãng Wẽnnaam n wa paam vɩɩm sẽn ka satã. Tõnd me segd n sõnga nebã tɩ b bãng Wẽnnaam.

Zã 4:5-43; 17:3.



Sogsgo

  • Bõe yĩng t’a Zezi yals bulg noor Samari, la bõe la a yet pag ning sẽn yas be wã?
  • Bõe yĩng t’a sẽn gom ne-a wã ling-a, a Zezi yeel-a lame tɩ bõe, la bõe yĩnga?
  • Pagã ra tẽedame t’a Zezi gomda ko-bʋg yelle, la a Zezi ra gomda bõe yell menga?
  • Bõe yĩng t’a Zezi sẽn da mi yɛl nins pagã zugã ling-a wʋsgo, la wãn to la a Zezi bãng rẽ fãa?
  • Bõe la Samari pagã kibar wilgd tõndo?

Sogsg a taaba

  • Karm-y Zã 4:5-43.

    Wala a Zezi, manesem bʋg la d segd n tall ne nebã buud fãa? (Zã 4:9; 1 Kor. 9:22; 1 Tɩm. 2:3, 4; Tɩt 2:11)

    Ned sã n lebg a Zezi karen-biiga, a paamda nafa bʋse? (Zã 4:14; Ezai 58:11; 2 Kor. 4:16)

    Samari pagã sẽn yɩ tao-tao n tɩ togs nebã bũmb nins a sẽn bãngã zãmsda tõnd bõe? (Zã 4:7, 28; Mat. 6:33; Luk 10:40-42)