Ges-y sẽn be pʋgẽ wã

Ges-y sẽn be sebrã pʋgẽ

Kibar 84: Malɛk n gom ne a Maari

Kibar 84: Malɛk n gom ne a Maari

PƲG-SAD ning yãmb sẽn ne fotã zugã yʋʋr la a Maari. Yaa Israɛll pʋg-sad sẽn be Israɛll tẽng a ye sẽn boond tɩ Nazarɛte. Wẽnnaam miime t’a yaa pʋg-sõngo. Yaa rẽ n so t’a tʋm a malɛk a Gabriyɛll t’a tɩ gom ne-a. Yãmb mii a Gabriyɛll sẽn wa n yeel a Maari bũmb ning bɩ?

A Gabriyɛll yeela a Maari yaa: ‘Mam pʋʋsda foo, bala fo yaa ned Wẽnnaam sẽn ning barka. A Zeova bee ne foom.’ A Maari ra nan zɩ n yã nin-kãngã ye. A yɛɛsame, bala a ra pa wʋmd a Gabriyɛll goamã võor ye. La a Gabriyɛll yeel-a lame yaa:

A Maari

‘Maari, da zoe rabeem ye; tɩ bõe, Wẽnnaam ninga foo barka. A na n kɩtame tɩ fo rɩk pʋg n dog biiga, n pʋd a yʋʋr t’a Zezi.’

A Gabriyɛll paasa woto: ‘Biigã na n yɩɩ nin-kãsenga, la b na n boond-a lame tɩ Wẽnnaam Sẽn-ka-to biiga. A Zeova na n kɩtame t’a lebg rĩm wa a Davɩɩde, la a na n dɩɩ naam wakat fãa, la a naamã ka na n sɛ abada!’

La a Maari soka a Gabriyɛll yaa: ‘Mam na n maana wãn n tõog n dog biig tɩ m nan ka kẽ kãadem la m ka mi raoa?’

A Gabriyɛll yeel-a lame yaa: ‘Wẽnnaam pãngã na n buii foom. Woto yĩnga, b na n boonda biig ning fo sẽn na n dogã tɩ Wẽnnaam biiga. Gese, fo roagd a Elizabɛt me rɩka pʋga. Nebã ra yetame t’a kʋʋlame n pa tõe n le paam biig ye. La a na n doga bi-ribla. Tɩ bõe, bũmb ka be Wẽnnaam sẽn ka tõe ye.’

Rẽ masã a Maari yeelame yaa: ‘Mam yaa a Zeova tʋm-tʋmda. Bɩ a kɩt tɩ kell n yɩ wa yãmb sẽn yeelã.’ La malɛka loogame.

A Maari kẽnga tao-tao n na n tɩ ges a Elizabɛte. A Maari sẽn ta a Elizabɛt nengẽ wã, a Elizabɛt wʋma a koɛɛgã, la biigã sẽn da be a Elizabɛt pʋgẽ wã sũur yɩɩ noog t’a virsi. A Elizabɛt pida ne Wẽnnaam vʋʋsem sõngã, la a yeela a Maari yaa: ‘Wẽnnaam ninga foo bark pagbã fãa sʋka.’ A Maari zĩnda ne a Elizabɛt n kolg kiis a tãab n yaool n lebg n kul Nazarɛte.

A Maari ra segd n kẽe kãadem ne a Zozɛfe. La a Zozɛf sẽn wʋm t’a Maari tara pʋgã, a ra pa rat n kẽ kãadem ne-a yɛs ye. La Wẽnnaam malɛkã yeela a Zozɛf yaa: ‘Kẽ kãadem ne a Maari la f ra zoe rabeem ye. Bala yaa ne Wẽnnaam pãng la a rɩk pʋgã.’ A Zozɛf ne a Maari sɩd kẽe kãadem, n gũud a Zezi rogmã masã.

Luk 1:26-56; Matɩe 1:18-25.



Sogsgo

  • Pʋg-sad ning yãmb sẽn ne foto wã zugã yaa ãnda?
  • Bõe la a Gabriyɛll yeel a Maari?
  • A Gabriyɛll wilga a Maari tɩ na n tũu ne bõe t’a rɩk pʋg n dog biiga, baa ne a sẽn pa mi raoã?
  • A Maari sẽn kẽng a Elizabɛt nengẽ wã, bõe n maane?
  • A Zozɛf sẽn bãng t’a Maari tara pʋgã, a ra rat n maana bõe, la bõe n kɩt t’a toeem yam?

Sogsg a taaba

  • Karm-y Luk 1:26-56.

    Sã n yaa ne Luk 1:35, Wẽnnaam sẽn wa n dɩk a biigã vɩɩm n ning a Maari pʋgẽ wã, bõe n kɩt tɩ biigã pa rog ne yel-wẽna? (Aaze 2:11-13; Zã 6:69; Heb. 7:26; 10:5)

    Wãn to la a Zezi paam waoogr t’a nan pa roge? (Luk 1:41-43)

    Mak-sõng bʋg la a Maari kõ kiris-neb nins sẽn tar zu-noog tʋʋmd tigingã pʋgẽ wã? (Luk 1:38, 46-49; 17:10; Yel. 11:2)

  • Karm-y Matɩe 1:18-25.

    Baa ne b sẽn pa pʋd a Zezi yʋʋr t’a Emanuwɛllã, wãn to la a tʋʋmã wilg t’a sɩd pidsa yʋ-kãngã sẽn dat n yɛɛlgã? (Mat. 1:22, 23; Zã 14:8-10; Heb. 1:1-3)