Ges-y sẽn be pʋgẽ wã

Ges-y sẽn be sebrã pʋgẽ

Kibar 41: Waaf sẽn maan ne zũudu

Kibar 41: Waaf sẽn maan ne zũudu
A Moiiz ne waaf sẽn maan ne zũudu

WAAF ning sẽn vil raoogã pa waaf sɩd-sɩd ye. B maan-a-la ne zũudu. A Zeova yeela a Moiiz t’a rɩk waaf ning a sẽn maan ne zũudã n vil raoog zugu, tɩ nebã zẽk b nens n ges-a sẽn na yɩl n da ki ye. La wiis nins sẽn be tẽngã yaa wiis sɩd-sɩda. B kɛɛ nebã tɩ b lebg bãad rãmba. Yãmb mii sẽn yaa bũmb ning yĩng bɩ?

Yaa Israɛll nebã sẽn kɩɩs Wẽnnaam ne a Moiizã yĩnga. B yeelame yaa: ‘Yaa bõe tɩ y yiis tõnd Ezipt tɩ d wa ki weoogã pʋgẽ? Rɩɩb ne koom kae ye. La tõnd yam yii ne mannã.’

Mannã yaool n da yaa rɩ-noogo. A Zeova maana yel-solemd tɩ b paam dẽ n dɩtẽ. A ra leb n maana yel-solemd tɩ b paam koom n na n yũ. La Israɛll nebã ka pʋʋs Wẽnnaam bark rẽ fãa yĩng ye. Rẽ n so t’a Zeova tʋm wag-toos tɩ b wa kɛ-b tɩ wʋsg ki.

Wiis sẽn kɛɛd Israɛll nebã

La Israɛll nebã wa n yeela a Moiiz yaa: ‘Tõnd kongame. Bala, tõnd goma a Zeova ne foo wẽnga. Bɩ f pʋʋs a Zeova t’a yiis wag-toosã tõnd sʋka.’

A Moiiz pʋʋsa nebã yĩnga, t’a Zeova yeel-a t’a maan waaf ne zũud n vil raoog zugu, tɩ waaf sẽn kɛ ned ning fãa bɩ a soab zẽk a neng n gese. A Moiiz maana Wẽnnaam sẽn yeelã. Wiisã sẽn kɛ neb ninsã sã n zẽk b nens n ges waaf sẽn maan ne zũudã bala, b sãoogdame.

Kiba-kãngã zãmsda tõnd bũmbu. Tõnd me wõnda Israɛll nebã wiisã sẽn da kɛ tɩ b kiidẽ wã. Yãmb sã n gese, nebã bẽedame, n kʋʋndẽ la b kiidẽ. Yaa a Ãdem ne a Hawa sẽn kɩɩs a Zeova noorã tɩ tõnd yaool n yaa b kambã yĩnga. La a Zeova maana bũmb n na n fãag-do.

A Zeova tʋma a biig a Zezi Kirist t’a wa tẽngã zugu. B kaa a Zezi raoog zugu, bala neb wʋsg ra tẽedame t’a pa nin-sõng ye. La a Zeova tʋma a Zezi t’a wa fãag-do. D sã n sak-a la d tũ-a, d na n paama vɩɩm sẽn ka sate. D na n wa goma rẽ yell n paase.

Sõdbo 21:4-9; Zã 3:14, 15.



Sogsgo

  • Foto wã zugu, bũmb ning sẽn vil raoogã yaa bõe, la bõe yĩng t’a Zeova yeel a Moiiz t’a ning-a be?
  • Wãn to la Israɛll nebã wilg tɩ b ra pa tar mi-beoog ne Wẽnnaam, a sẽn da maan bũmb nins fãa n kõ-bã yĩnga?
  • A Zeova sẽn tʋm wag-toosã n na n sɩbg nebã, b kosa a Moiiz t’a maan bõe?
  • Bõe yĩng t’a Zeova yeel a Moiiz t’a maan waaf ne zũudu?
  • Kiba-kãngã zãmsda tõnd bõe?

Sogsg a taaba

  • Karm-y Sõdb 21:4-9.

    Israɛll nebã sẽn yẽgem rɩɩbã ne koomã a Zeova sẽn kõ-bã poorẽ tɩ bũmb ning paam-bã zãmsda tõnd bõe? (Sõd. 21:5, 6; Rom 2:4)

    Kaoosg poore, Israɛll nebã wa n dɩka waafã sẽn maan ne zũudã n tar n maand bõe, la rẽ kɩtame tɩ rĩm a Ezekias maan bõe? (Sõd. 21:9; 2 Rĩm 18:1-4)

  • Karm-y Zã 3:14, 15.

    Bõe yĩng tɩ d tõe n yeel tɩ waafã sẽn maan ne zũudã b sẽn vil raoogã makda b sẽn ka a Zezi ra-luk zugã bal kɛpɩ? (Gal. 3:13; 1 Pɩɛ. 2:24)