Ges-y sẽn be pʋgẽ wã

Ges-y sẽn be sebrã pʋgẽ

Kibar 34: Rɩɩb b sẽn zɩ n yã

Kibar 34: Rɩɩb b sẽn zɩ n yã

YÃMB mii nebã sẽn wʋkd bũmb ningã bɩ? Yaa rɩɩbo. A yaa pɛɛlg faddd, n yaa zom-zom.

Israɛll nebã sẽn wʋkd mann

Israɛll nebã sẽn yi Eziptã kiuug a ye la woto. B bee rasempʋɩɩgã pʋgẽ masã, la rɩɩb ka be ye. Rẽ n so tɩ b naag taab n yeel yaa: ‘A Zeova sã n da kʋẽ tõnd Ezipt n são. Beenẽ tõnd da rɩt n tɩgdame.’

A Zeova yeel-b lame yaa: ‘Mam na n kɩtame tɩ rɩɩb yi yĩngr n ni wa saaga.’ Sɩd me vẽkembeoogã yibeoogo, a Zeova kɩtame tɩ rɩɩb sẽn yaa pɛɛlg ni wa saaga. Israɛll nebã sẽn yã rẽ wã, b soka taab tɩ woto yaa bõe?

T’a Moiiz yeel-b yaa: ‘Yãoã yaa rɩɩb a Zeova sẽn kõt yãmb tɩ y rɩ.’ Israɛll nebã pʋda rɩɩbã tɩ MANN. A nooma wa maas sẽn ning sɩɩdo.

A Moiiz yeelame tɩ ned kam fãa wʋk a sẽn tõe n dɩ tɛka. Yibeoog fãa nebã ra wʋkda mannã, la wĩntoogã sã n da zẽk wʋsgo, mann ning sẽn da ket tẽngã boogdame.

A Moiiz yeelame me tɩ ned baa a ye ra bĩng mannã tɩ vẽeg beoog ye. La neb kẽer pa kelg ye. Yãmb mii bũmb ning sẽn maan bɩ? Vẽkembeoogã, mann ning b sẽn da bĩngã põogame n kẽ zũnzũy tɩ lebg yũugu.

La a Zeova ra yeelame tɩ rasem a yoob soabã, bɩ b wʋk wʋsg n bĩng vẽkembeoogã sẽn yaa rasem a yopoe soabã yĩngã, bala a ra pa na n kɩt tɩ mannã ni baraar ye. B sẽn sɩd yãk mannã n bĩng rasem a yopoe daarã yĩnga, pa põoge, la zũnzũy ka kẽ me ye. Ad woto me yaa yel-solemde!

Yʋʋm nins fãa Israɛll nebã sẽn zĩnd rasempʋɩɩgẽ wã, a Zeova kõ-b-la mannã tɩ b rɩ.

Yikri 16:1-36; Sõdbo 11:7-9; Zozue 5:10-12.



Sogsgo

  • Yaa bõe la nebã sẽn wʋkdã, la a wõnda bõe?
  • No-bʋg la a Moiiz kõ nebã mannã wʋkr wɛɛngẽ?
  • A Zeova yeela nebã tɩ b maan bõe rasem a yoob-n-soabã, la bõe yĩnga?
  • Israɛll nebã sã n da bĩng mannã rasem a yopoe daarã yĩnga, yel-solem-bʋg la a Zeova maanda?
  • Yʋʋm a wãn la a Zeova rɩlg Israɛll nebã ne mannã?

Sogsg a taaba

  • Karm-y Yikr 16:1-36 la Sõdb 11:7-9.

    Wãn to la Yikr 16:8 wilgd tɩ d segd n saka neb nins Wẽnnaam sẽn yãk tɩ b yaa kãsem dãmb tigingã pʋgẽ wã? (Heb. 13:17)

    Rasempʋɩɩgẽ wã, bõe n da maand tɩ tẽegd Israɛll nebã daar fãa tɩ yaa a Zeova n zãad b yõorã? (Yik. 16:14-16, 35; Tõo. 8:2, 3)

    A Zezi maka mannã ne bõe, la wãn to la ‘bur sẽn yit saasẽ’ wã nafd tõndo? (Zã 6:31-35, 40)

  • Karm-y Zozue 5:10-12.

    Israɛll nebã rɩɩ mannã yʋʋm a wãna, wãn to la rẽ yɩ makr n kõ-ba, la bõe la rẽ zãmsd tõndo? (Yik. 16:35; Sõd. 11:4-6; 1 Kor. 10:10, 11)