Ges-y sẽn be pʋgẽ wã

Ges-y sẽn be sebrã pʋgẽ

Kibar 31: B tɩ yãa a Farao

Kibar 31: B tɩ yãa a Farao

A MOIIZ sẽn ta Eziptã, a togsa a kẽem a Aarõ Wẽnnaam sẽn maan yel-soalem nins fãa n wilg-a wã. A Moiiz ne a Aarõ maana yel-soalmã n wilg Israɛll nebã, tɩ b fãa tẽ tɩ yaa a Zeova n sɩd tʋm-ba.

A Moiiz ne a Aarõ kẽnga a Faraõ nengẽ n tɩ yeel-a yaa: ‘Israɛll Wẽnnaam a Zeova yeelame tɩ f bas a nebã tɩ b kẽng weoogẽ wã n tɩ maan kibs n waoog-a rasem a tãabo.’ La a Faraõ leokame yaa: ‘Mam ka mi a Zeova ye. M ka na n bas Israɛll nebã tɩ b loog ye.’

A Faraõ sũurã puugame, bala Israɛll nebã da rat n basa b tʋʋmã n tɩ waoog a Zeova. A modg-b lame tɩ b tʋm wʋsg n paase. Israɛll nebã yeelame tɩ yaa a Moiiz n kɩt tɩ b namsd-b woto. Rẽ sãama a Moiiz sũurã. La a Zeova yeela a Moiiz t’a ra sãam a sũur t’a na n modga a Faraõ t’a bas a nebã tɩ b looge.

A Moiiz ne a Aarõ sẽn be a Faraõ nengẽ

A Moiiz ne a Aarõ kẽnga a Faraõ nengẽ yɛsa. La so-kãnga, b maana yel-solemde. A Aarõ loba a rasaarã tẽng tɩ lebg waafo. A Faraõ bag-bʋgdbã me loba b rasabã tẽng tɩ lebg wiisi. La a Aarõ waafã vela bag-bʋgdbã wiisã. Baasg zãnga, a Faraõ ka bas Israɛll nebã tɩ b loog ye.

Masã, a Zeova na n wilga a Faraõ yam. Yãmb mii a sẽn maan bũmb ning bɩ? A kɩtame tɩ yel-beed 10 paam Ezipt nebã.

Yel-beed sã n wa fãa, a Faraõ boonda a Moiiz n yeel-a yaa: ‘Fo sã n kɩt tɩ yel-beedã looge, m na n basa Israɛll nebã tɩ b looge.’ La yel-beedã sã n loog fãa, a Faraõ toeemda yam. A pa basd Israɛll nebã tɩ b loog ye. La yel-beed 10 soabã poore, a Faraõ basa Israɛll nebã tɩ b na n looge.

Yãmb mii yel-beed 10 fãa sẽn yaa b rãmb bɩ? Lak-y seb-neng ning sẽn pʋgdã tɩ y na bãnge.

Yikri  4:27-31;  5:1-23;  6:1-13,  26-30;  7:1-13.



Sogsgo

  • B sẽn yã a Moiiz ne a Aarõ sẽn maan yel-soalmã, Israɛll nebã maana bõe?
  • A Moiiz ne a Aarõ yeela a Faraõ tɩ bõe, la a Faraõ leokame tɩ bõe?
  • Wa sẽn be foto wã zugã, a Aarõ sẽn lob a rasaarã tẽngã, bõe n maane?
  • Wãn to la a Zeova wilg a Faraõ yam, la bõe la a Faraõ maan-yã?
  • Bõe n maan yel-beed piig soabã poore?

Sogsg a taaba

  • Karm-y Yikr 4:27-31 la 5:1-23.

    A Faraõ sẽn yeel t’a ka mi a Zeova wã, a ra rat n yeelame tɩ bõe? (Yik. 5:2; 1 Sãm. 2:12, 13a; Rom 1:21)

  • Karm-y Yikr 6:1-13, 26-30.

    Biiblã sẽn yet t’a Zeova pa wilg a Abrahaam, a Izaak la a Zakoob yẽ sẽn yaa a soabã, rat n yeelame tɩ bõe? (Yik. 3:13, 14; 6:3; Sɩng. 12:8)

    Baa ne a Moiiz sẽn da tagsd t’a pa tõe tʋʋmdã t’a Zeova baas n tʋm-a wã, wilgda tõnd bõe? (Yik. 6:12, 30; Luk 21:13-15)

  • Karm-y Yikr 7:1-13.

    A Moiiz ne a Aarõ sẽn pa zoe rabeem la b togs a Faraõ t’a Zeova na n sɩbg-a lame wã, zãmsda Wẽnnaam sõgen dãmbã bõe rũndã-rũndã? (Yik. 7:2, 3, 6; Tʋʋ. 4:29-31)

    Bõe la a Zeova maan n wilg t’a pãngã yɩɩda Ezipt wẽnnaam dãmbã rẽnda? (Yik. 7:12; 1 Kib. 29:12)