Ges-y sẽn be pʋgẽ wã

Ges-y sẽn be sebrã pʋgẽ

Kibar 12: Nebã meta gasgo

Kibar 12: Nebã meta gasgo

A NOWE kom-dibli wã roga kamb wʋsgo. Kom-kãens me lebga bɛd n dog kamba. Tarẽ-n-tarẽ, neba lebga wʋsg tẽngã zugu.

A Nowe yageng a ye n da boond t’a Nimrood. A ra yaa tãoos sẽn yaa nin-wẽnga, n kʋʋd rũms la neba. A maana a meng rĩm n na n soog nebã. La Wẽnnaam da pa nong a Nimrood ye.

Wakat kãnga, neba fãa ra gomda gom-yende. A Nimrood da ratame tɩ nebã fãa pa zĩ-yend tɩ yẽ paam n soog-ba. Yãmb mii a sẽn maan bũmb ning bɩ? A yeela nebã tɩ b wa tɩ b naag taab n zĩnd tẽng a yembre, la b me gasg a pʋgẽ. Yãmb pa ne nebã sẽn wẽed tãn-koɛɛm fotã zug sɩda?

La Wẽnnaam a Zeova ra pa rat woto ye. A ra ratame tɩ nebã sãeeg n pid tẽngã. La nebã yeelame yaa: ‘Wa-y tɩ d me tẽnga, la gãsg t’a woglem ta saasẽ, n bao yʋʋre.’ B ra ratame n bao yʋʋre, b pa rat n waoog Wẽnnaam ye.

La Wẽnnaam kɩtame tɩ b ka me gasgã n baas ye. Yãmb mii a sẽn maan bũmb ning bɩ? A kɩtame tɩ b goamã lebg toɛy-toɛya. B tiig n gomda goam toɛy-toɛy masã, n pa le wʋmd taab goam ye. Rẽ n so tɩ b boond b tẽngã tɩ Babɛll bɩ Babilon, sẽn dat n yeel tɩ “kalem-kalem.”

Nebã yii Babɛll n sãeeg n kẽng zĩis toor-toore. Neb nins sẽn da wʋmd taab goamã tũu taab n tɩ vɩɩmd zĩ-yende.

Sɩngre 10:1, 8-10; 11:1-9.

Neba sẽn met gasgo


Sogsgo

  • A Nimrood ra yaa ãnda, la Wẽnnaam da nong-a lame bɩ?
  • Bõe yĩng tɩ nebã wẽed tãn-koɛɛma?
  • Bõe yĩng tɩ gasgã meebã ra pa ta a Zeova yam?
  • Wẽnnaam maana wãn n kɩt tɩ b bas gasgã meebo?
  • Tẽngã yʋʋr da boondame tɩ bõe, la a yʋʋrã rat n yeelame tɩ bõe?
  • Wẽnnaam sẽn kɩt tɩ nebã goam lebg toor-toor tɩ b pa wʋmd taabã poore, bõe n maane?

Sogsg a taaba

  • Karm-y Yelbuna 3:31.

    A Nimrood ra yaa nin-bʋg buudu, la rẽ zãmsda tõnd bõe? (Yɩɩl 11:5)

  • Karm-y Sɩngr 11:1-9.

    Bõe yĩng tɩ nebã ra met gasgo, la bõe yĩng tɩ tʋʋmdã ra pa tõe n pa yalse? (Sɩng. 11:4; Yel. 16:18; Zã 5:44)