Ges-y sẽn be pʋgẽ wã

Ges-y sẽn be sebrã pʋgẽ

Yãmb ra miime bɩ?

Yãmb ra miime bɩ?

Wãn to la b ra tar neer n werd zom pĩnd wẽndẽ?

B ra werda bur-zomã ne nug neerẽ. Zom werb ra naaga tʋʋm nins pag sẽn segd n tʋm daarã pʋgẽ wã. Zags kẽere, yaa yem-poak n da maand rẽ zakã fãa yĩnga. Pĩnd wẽndẽ, b sã n da gomd werb bʋʋr yelle, yaa neb sẽn vɩ bãane, n tʋmd b daar fãa tʋʋmã yell la b gomda.—Yikri 11:5; Zeremi 25:10.

Pĩnd wẽndẽ Ezɩptã neb maana desẽ-rãmb la nin-naands n bilg b sẽn da werd zomã to-to. B ra yãkda ki wã n dʋʋg kugr b sẽn maneg tɩ yaa long bilf zugu, tɩ b boond tɩ ne-ma. B ra viginda kug-kãnga, tɩ sẽn da werd-a wã yĩgimd a taoore, n zãad kugr b sẽn boond tɩ ne-biig ne a nus a yiibã, n duugd n kẽngd taoor la a lebd poorẽ. Sebr a yembr wilgame tɩ ne-biig zɩslem ra zemsa kilo a yi n debd a naase. B sã n da rɩk ne-biig n lobg neda, tõe n kʋ a soabã.—Bʋ-kaoodbã 9:50-54.

Pĩnd wẽndẽ, werb ra yaa tɩlɛ sẽn na yɩl tɩ zak rãmb paam dɩɩbo. Rẽ n so tɩ Biiblã yeel woto: “Ned sã n dɩk neer bɩ ne-biig n wa n na n gãneg ne foom n deeg bũmb bɩ f ra reeg ye. Bala, wẽnda wa ned sẽn dɩk a vɩɩm n wa n na n gãneg ne foom.”—Tõodo 24:6.

Biiblã sã n yeel tɩ ned ‘bee a to nengẽ,’ tõe n dat n yeelame tɩ bõe?

Biiblã yeelame t’a Zeezi ‘bee ba a Wẽnnaam nengẽ.’ (Zã 1:18) Rẽ bilgda a Zeezi ne Wẽnnaam sẽn noom ne taab to-to wã, la Wẽnnaam sẽn nong a Zeezi to-to wã me. Gom-kãensã tika bũmb zʋɩf-rãmbã sẽn da minim n maand b sẽn wat n naag taab n dɩtẽ.

A Zeezi wakatẽ wã, zʋɩf-rãmbã sã n da na n dɩ, b gãandedame n gilg rɩɩbã taable. B ned kam fãa zug teesda taablã, t’a naoã be poorẽ. A rɩkda a goabg kãntɩɩgã n kɩ zu-kʋka. Woto kɩtdame t’a tõe n maan a sẽn dat ne a nug-rɩtgã. B fãa ra gãeeme n yeg taaba, tɩ b ned kam fãa kɩll a goabga. Sebr a yembr yeelame tɩ b ‘ned kam fãa zug ra pẽe ned ning sẽn gãe n yeg yẽ wã yãoogo, tɩ yaa wa a gãe n della a to wã.’

Ned sã n da paam n gãand zak soab wall tigr soab sɛɛgẽ n na n dɩ, b ra getame tɩ yaa zu-zẽkre. Rẽ n so t’a Zeezi sẽn wa n na n dɩ a yaoolem Pakã, yɩɩ tʋm-tʋmd a Zã sẽn yaa “soab ning bãmb sẽn dag n nongã” n da gãe n yeg-a. Woto, a Zã tõog n “kɩlla a Zeezi yãoogẽ,” n sok-a bũmbu.Zã 13:23-25; 21:20.