Ges-y sẽn be pʋgẽ wã

Ges-y sẽn be sebrã pʋgẽ

Pa-y-yã a Zeova longã pʋgẽ n paam koglgo

Pa-y-yã a Zeova longã pʋgẽ n paam koglgo

“Zusoabã na n yiime n . . . zab ne bu-kãens wa bãmb sẽn da maan zabr wakatã.”—ZAK. 14:3.

1, 2. Zab-bʋg n na n zĩnd ka la bilfu, la zab-kãng sasa, bõe la tõnd pa na n maane?

YƲƲMD 1938 zĩ-likr kiuugã rasem 30 wã daare, neb milyõ-rãmb n da kelgd radio Etazĩni soolmẽ wã, tɩ bũmb maan tɩ b yɛɛs wʋsgo. Radio wã rãmb ra maanda teyaatre. Deem-dɛɛmdb n da maand wa b yaa kiba-kɩtba, n yeel tɩ bõn-naands wʋsg n yi planɛt Mars n wa n na n sãam dũniyã. Baa b sẽn deng n togs tɩ yaa reemã, kɛlgdbã wʋsg tagsame tɩ sɩd yaa zabre, tɩ rabeem yõk-ba. Kẽer maana bũmb toor-toor meng n na n kogl b mense.

2 La ka la bilfu, zabr sɩd-sɩd n na n zĩndi. Baasgo, nebã fãa la bal pa segend b mens n na n wa paam n põs ye. Yaa Wẽnnaam sẽn na n zab ne dũni-kãngã tɩ b boond rẽ tɩ Armagedõ zabrã. Pa solemd ye, bala yaa Biiblã sẽn yaa Wẽnnaam Gomdã n togse. (Wil. 16:14-16) Zab-kãng sasa, Wẽnnaam nin-buiidã pa na n zab n kogl b mens ye. A Zeova sẽn yaa pãn-kãseng soabã n na n kogl-ba.

3. Bãngr-gom-bʋg yell la d na n gome, la bõe yĩng tɩ rẽ na n naf-do?

3 Bãngr-gomd n be Zakari sak 14 n wilgd yɛl wʋsg Armagedõ zabrã zugu. Baa sẽn yaa na maan yʋʋm 2500 la b gʋls bãngr-gomdã, a tara yõod wʋsg ne tõnd rũndã-rũndã. (Rom 15:4) A gomda bũmb ning sẽn paam Wẽnnaam nin-buiidã Kirist sẽn deeg a naamã saasẽ yʋʋmd 1914 soabã tɛkã. A wilgda yɛl sẽn na n maan ka la bilfu me. Bãngr-gomdã pʋgẽ, b gomda “long sẽn yaa yaleng wʋsg” yelle, la “koom” yelle.  (Zak. 14:4, 8) Sõs-kãngã pʋgẽ, d na n bao n bãnga longã sẽn makd bũmb ninga, la a Zeova nin-buiidã sẽn tõe n paam koglg to-to a pʋgẽ. D na n bãnga koomã me sẽn makd bũmb ningã, la a sẽn tõe n naf-d to-to. Na n sõng-d lame tɩ d bãng tɩ ko-kãng yũub yaa tɩlae, la kɩt me tɩ d tʋlg n yũ-a. Bɩ d bao n bãng bãngr-gomdã võore.—2 Pɩɛ. 1:19, 20.

A ZEOVA RAARÃ SƖNGAME

4. a) Wakat bʋg la “Zusoabã raar” sɩng-yã? b) Yʋʋm wʋsg sẽn deng yʋʋmd 1914 soabã, bõe la kiris-neb sẽn paam vʋʋsem sõng zaeebã ra moonda, la politikã la tũudmã taoor dãmb manesem yɩɩ wãna?

4 Zakari sak 14 sɩngrẽ wã, b goma “Zusoabã raar” yelle. (Karm-y Zakari 14:1, 2.) Ra-kãng la bʋgo? Yaa raar ning sẽn sɩng yʋʋmd 1914 soabã, wakat ning “dũniyã soolem fãa” sẽn lebg ‘a Zeova la a Kiristã dẽndã.’ (Wil. 1:10; 11:15) Yʋʋm wʋsg sẽn deng rẽ, kiris-neb sẽn paam vʋʋsem sõng zaeebã n da moond tɩ “bu-zẽmsã wakat” na n saa yʋʋm-kãnga. B ra yetame me tɩ yʋʋm-kãng tɛka, zu-loeesã na n lebgda wʋsgo. (Luk 21:24) La nebã manesem yɩɩ wãn ne b moonegã? Wall tɩ politikã la tũudmã taoor dãmb kelg keoogrã, b ra yaanda kiris-nin-kãens sẽn da moond ne yẽesmã la b namsd-ba. B sẽn maand woto wã, yaa Wẽnnaam sẽn yaa pãng sẽn ka to soabã meng la b sẽn da yaandã. Bala, sẽn paam-b vʋʋsem sõng zaeebã yaa “yĩngr Zerizalɛmmã” sẽn yaa Wẽnnaam Rĩungã neba, n gomd a yʋʋr yĩnga.—Heb. 12:22, 28, Sebr Sõngo.

5, 6. a) Bõe la Wẽnnaam nin-buiidã bɛɛb maan-yã? b) Ãnda rãmb la “neb nins sẽn ketã”?

5 A Zakari reng n wilga Wẽnnaam nin-buiidã bɛɛb sẽn na n maan bũmb ningã, n yeel woto: “Bãmb na n deega tẽngã.” “Tẽngã” yaa Zerizalɛm sẽn makd Wẽnnaam Rĩungã. Kiris-neb nins sẽn paam vʋʋsem sõng zaeeb n ket tẽngã zugã yaa Rĩungã neba. (Fil. 3:20) Dũni gill pipi zabrã sasa, b yõga a Zeova siglgã taoor lʋɩtb n pag bãens roog Atlãnta sẽn be Zorzi sẽn yaa Etazĩni soolmã. Bɛɛbã maana sẽn zae-bã pãng la b nams-ba, n yiis noy n gɩdg b sɛbã pʋɩɩb la b koe-moonegã. B sẽn maan woto wã, yɩɩ wa b sẽn “deeg tẽngã,” n wʋk a rotã teedo.

6 Baa bɛɛb nins sẽn da namsd Wẽnnaam nin-buiidã sẽn da tar pãng wʋsg la b rõt-bã, b pa tõog n menes tũudum hakɩkã ye. Wa a Zakari sẽn deng n togsã, sẽn paam-b zaeeb n ket tẽngã zugã kell n saka Wẽnnaam. Bãmb la “neb nins sẽn ket” tɩ bɛɛbã pa tõog n yiis tẽngã pʋgẽ wã.

7. Mak-sõng bʋg la kiris-neb nins sẽn paam zaeebã kõ tõndo?

7 La rẽ yĩnga dũni gill pipi zabrã poore, Wẽnnaam nin-buiidã bɛɛb basa b namsg bɩ? Ayo. B kell n nams-b-la wa a Zakari sẽn deng n togsã. (Wil. 12:17) Dũni gill zabr a yiib-n-soabã sasa, b nams-b-la wʋsgo. Sẽn paam-b zaeebã sẽn sak Wẽnnaam to-to sasa kãngã yaa mak-sõng sẽn tõe n keng d raood rũndã-rũndã, tɩ d tõog toog zu-loɛɛg fãa pʋgẽ. Wala makre, tõe n yɩɩ d roagdba, d tʋmd-n-taas wall d  karen-bi-taas sẽn na n yaand tõnd d tẽebã yĩnga. (1 Pɩɛ. 1:6, 7) D sẽn vɩ zĩig ning fãa, d rata ne d sũur fãa n ‘yals kãn-kãe ne yam a yembre,’ n da bas tɩ d ‘bɛɛbã kẽes-d rabeem ye.’ (Fil. 1:27, 28) La d sẽn vɩ dũni sẽn kis tõnd pʋgẽ wã, yɛ la d tõe n paam koglgo?—Zã 15:17-19.

A ZEOVA KƖTAME TƖ “LONG SẼN YAA YALENG WƲSG ZĨNDI”

8. a) Biiblã pʋgẽ, tãng tõe n makda bõe? b) Bõe la “oliiv tɩɩs tãngã” makda?

8 Wa d sẽn zoe n yã bãngr-gomdã pʋgẽ wã, “tẽngã” makda yĩngr Zerizalɛmmã sẽn yaa Wẽnnaam Rĩungã. La “oliiv tɩɩs tãngã sẽn be Zerizalɛm yaangã” makda bõe? Wãn to la “oliiv tɩɩs tãngã na n pãrg” n lebg tãens a yiibu? La bõe yĩng t’a Zeova bool b yiibã fãa tɩ yẽ “tãnga”? (Karm-y Zakari 14:3-5.) Biiblã pʋgẽ, b sã n gomd tãng yelle, tõe n yaa rĩung bɩ goosneema yell la b gomda. B wae n yetame me tɩ bark la koglg yita Wẽnnaam tãngã zugu. (Yɩɩl 72:3; Ezai 25:6, 7) Rẽnd oliiv tɩɩs tãngã makda a Zeova naam sẽn ka to wã.

9. “Oliiv tɩɩs tãngã” sẽn na n pãrgã võor yaa bõe?

9 Oliiv tɩɩs tãngã sẽn na n pãrgã võor yaa bõe? Wilgdame t’a Zeova na n lugla naam a to, n pids a raabo. Naam kãng me yaa Wẽnnaam n so, la a kɩtame t’a Zezi Kirist yaa Rĩmã. Yaa rẽ la a Zeova sẽn bool tãens a yiibã fãa tɩ yẽ “tãngã.” (Zak. 14:4) Yẽ n so b yiibã fãa.

10. “Long sẽn yaa yaleng wʋsg” n be tãens a yiibã sʋkã makda bõe?

10 Bãngr-gomdã wilgame tɩ oliiv tɩɩs tãngã sã n wa pãrg n leb goabg la rɩtgo, a Zeova naoã na n kell n bee tãngã boag a yiibã fãa zutu. “Long sẽn yaa yaleng wʋsg” n na n zĩnd a naoã tẽngre. Lon-kãng yaa bõe? A makda bũmb nins Wẽnnaam sẽn maand n kogend a nin-buiidã. Wa neb sẽn be tãens a yiib sʋk sẽn paamd koglgã, a Zeova nin-buiidã paamda koglg yẽ ne a Bi-riblã naam maasem yĩnga. A Zeova pa na n tol n bas tɩ bɛɛbã menes tũudum hakɩkã ye. La oliiv tɩɩs tãngã pãrga wakat bʋgo? Yɩɩ yʋʋmd 1914 soabã pʋgẽ, wakat ning a Zezi sẽn sɩng naam dɩɩb saasẽ wã. Bãngr-gomdã wilgame me t’a Zeova nin-buiidã ra na n zoe n kẽe “long sẽn yaa yaleng wʋsgã” pʋgẽ. Wakat bʋg la rẽ sɩng-yã?

NEBÃ SƖNGA ZOEES N KẼED LONGẼ WÃ

11, 12. a) Wakat bʋg la Wẽnnaam nin-buiidã sɩng n zoet n kẽed longã pʋgẽ? b) Bõe n wilgd t’a Zeova kogenda a nin-buiidã?

11 A Zezi yeela a karen-biisã woto: “Buud fãa na n kisga yãmb mam yʋʋrã yĩnga.” (Mat. 24:9) Yʋʋmd 1914 soabã tɛka, nebã maneg n kisa a Zezi karen-biisã. Dũni gill pipi zabrã sasa, b namsa sẽn paam-b vʋʋsem sõng zaeebã wʋsgo, la b pa tõog n menes tũudum hakɩkã ye. Yʋʋmd 1919 soabã, Wẽnnaam nin-buiidã paama b mens ne ziri tũudmã sẽn yaa Babilon-kãsengã. (Wil. 11:11, 12) * Yaa wakat kãng la Wẽnnaam nin-buiidã sɩng n zoet n kẽed longã pʋgẽ.

 12 Yʋʋmd 1919 soabã tɛka, a Zeova kogenda a nin-buiidã b sẽn beẽ fãa. Goosneema wʋsg yiisa noy n gɩdg a Zeova Kaset rãmbã koe-moonegã wall b sɛbã yiisgu. Tẽns kẽer ket n maanda woto rũndã-rũndã. La a Zeova pa na n bas goosneema baa a ye t’a menes tũudum hakɩkã ye. Baa b sẽn maandg fãa, a Zeova sẽn yaa pãng sẽn ka to soabã na n kogla a nin-buiidã.—Tõo. 11:2.

13. Bõe la d segd n maan n pa a Zeova longã pʋgẽ, la bõe yĩng tɩ tar yõod wʋsg masã meng tɩ d pa be?

13 Tõnd sã n sakd a Zeova, d paada a longã pʋgẽ n paamd a koglgo. Yẽ ne a Bi-riblã pa na n bas tɩ ned wall bũmb “deeg” tõnd b nusẽ ye. (Zã 10:28, 29) Wakat buud fãa, a Zeova sõngda tõnd sẽn na yɩl tɩ d tõog n sak yẽ sẽn yaa yĩngr la tẽng naabã, n kell n yɩ a Rĩungã neba. To-kãsengã sẽn na n sɩng ka la bilfã sasa la a Zeova sõngrã na n yɩ tɩlae ne-d n yɩɩda. Rẽ n so tɩ tar yõod wʋsg masã meng tɩ d pa a Zeova longã pʋgẽ.

‘ZABRÃ WAKAT’ TAAME

14, 15. A Zeova sã n wa na n zab ne a bɛɛbã, na n yɩɩ wãn ne neb nins sẽn pa be a longã pʋgẽ n paamd a koglgã?

14 Dũniyã saab sẽn kolgdã, a Sʋɩtãan na n maneg n zaba ne a Zeova nin-buiidã. La Wẽnnaam ‘zabrã wakat’ ta n saame t’a na n sãam a bɛɛbã. Ka la bilfu, a Sʋɩtãan na n zaba ne Wẽnnaam nin-buiidã a yaoolem zabre. A Zeova sẽn yaa yĩngr la tẽng naabã na n wilgame t’a tõee zabre, n yɩɩg a sẽn da maan pĩndã hal wʋsgo.—Zak. 14:3.

15 Wẽnnaam zabrã wakate, na n yɩɩ wãn ne neb nins sẽn pa be a Zeova longã pʋgẽ n paamd a koglgã? B pa na n paam a Zeova lohormã ye. Baraare, bãag n na n yõk bɛɛbã “wiidã ne bõn-weesã la yʋgma wã la bõensã ne rũms” a taabã sẽn makd b zab-teedã. Zab-te-kãens pa na n tall yõod ye. A Zakari wilgame me t’a Zeova na n sɩbga a bɛɛbã n kɩt tɩ “bãag” yõk-ba. B nina ne b zɩlma “na n põogame.” D pa mi sã n na n yɩɩ bãag sɩd-sɩd ye. La yaa vẽeneg tɩ nin-kãensã pa na n tõog n maan tõnd wẽng wall b gom n paoog Wẽnnaam ye. (Zak. 14:6, 7, 12, 15) “Dũniyã rĩm-dãmbã la b sodaasã” fãa na n zĩnda a Sʋɩtãan poorẽ. La b sẽn be dũniyã zĩig ning fãa, Wẽnnaam na n sãam-b lame. (Wil. 19:19-21) “Baraare, neb nins Zusoabã sẽn kʋ wã na n dɩga tẽng dũniyã kɩreng a yembr tɩ ta kɩreng a to.”—Zer. 25:32, 33.

16. a) A Zeova zabrã wakat sẽn kolgdã, sogs-bʋs la d segd n sok d mense? b) To-kãsengã sasa, bõe la d segd n maane?

16 Zabr sasa, nebã fãa tara toogo. Baa sẽn na n tõog-b zabrã meng namsdame. Tõe tɩ tõnd me na n namsa to-kãsengã sasa. Tõe tɩ rɩɩb paoog-do, wall d bõn d teedo. Tõe tɩ d pa na n le paam sor n maan yɛl kẽer d sẽn da maand ye. Sã n wa yaa woto, d maanda wãna? D tog n yɛɛsame bɩ? D tog n komsa raood n pa le tẽed manegr bɩ? D tog n basa a Zeova bɩ? To-kãsengã sasa, d segd n pa a Zeova longã pʋgẽ, rat n yeel tɩ d kell n sak-a, n kɩs sɩd t’a na n kogl-d lame.—Karm-y Habakuk 3:17, 18.

 VƖƖM ‘KOOM NA N BULAME’ N YI

17, 18. a) “Vɩɩm koomã” yaa bõe? b) Mogr ning sẽn be yaangã makda bõe, tɩ sẽn be-a “nin-taoorã” makd bõe? d) Bõe la d yãk yam n na n maandẽ?

17 Armagedõ poore, “vɩɩm koom” n na n bund n yit Mesi wã geerẽ. “Vɩɩm koomã” makda bũmb nins fãa Wẽnnaam sẽn maan tɩ ninsaalbã tõe n paam n vɩɩmd wakat sẽn kõn sa wã. A Zakari bãngr-gomdã pʋgẽ, yaa mog-kɩɩngã la moorã Biibl sẽn bool tɩ “mog-miuugã sẽn be yaang sẽnẽ” wã, tɩ sẽn be-a “nin-taoorã” yaa Mediterane mogrã. Mog-kɩɩngã makda sẽn ki-b n na n vʋʋgã, tɩ Mediterane mogrã sẽn pid ne bõn-vɩɩlɩ wã makd kʋʋn-kãsengã sẽn na n põs Armagedõ sasa wã. (Karm-y Zakari 14:8, 9; Wil. 7:9-15) Sul a yiibã fãa neb na n yũuda “vɩɩm koom kʋɩlgã” koomã, n wa lebg neb sẽn zems zãng n vɩɩmd wakat sẽn kõn sa.—Wil. 22:1, 2.

Pa-y-yã a Zeova longã pʋgẽ n paam koglgo

18 A Zeova na n kogla tõnd tɩ d põs dũni-kãngã sãoongã sasa, n kẽ dũni-paalgã pʋgẽ. Baa dũniyã buud fãa sẽn kis tõndã, d yãka yam n na n teel Wẽnnaam Rĩungã ne d sũur fãa, n pa a Zeova longã pʋgẽ n paam a koglgã.

^ sull 11 Ges-y La Révélation : le grand dénouement est proche ! sebrã neng 169-170.