Ges-y sẽn be pʋgẽ wã

Ges-y sẽn be sebrã pʋgẽ

‘Sõngo! Sõngo! A Zeova yaa sõngo’

‘Sõngo! Sõngo! A Zeova yaa sõngo’

 Bao-y n pẽneg-y Wẽnnaam

‘Sõngo! Sõngo! A Zeova yaa sõngo’

B SÃ N yeel yãmb tɩ y bilg Wẽnnaam a Zeova ne gom-⁠bi-​yɛnga, y na n bilg-⁠a-⁠la ne gom-⁠bi-​bʋgo? Yʋʋm kobs-​yopoe la zak sẽn deng a Zezi rogmã, Wẽnnaam vẽnega no-​rɛɛs a Ezai t’a yã bõn-​makre. A yãa malɛgs sẽn yɩɩnd n pẽgd a Zeova, n pʋt gom-​bil a ye sẽn wilgd a sẽn sɩd yaa Wẽnnaam ning buudã. B ra yetame t’a yaa sõngo. A Ezai sẽn yã la a wʋm bũmb ningã kareng tõe n kɩtame tɩ d maneg n zoe a Zeova, la d bao a zood me. D na n goma Ezai 6:​1-⁠3 sẽn wilgd a Ezai sẽn yã bũmb ningã yelle. Y sã n wa karemdẽ bɩ y mams tɩ yaa wa ra bee ne no-​rɛɛsã.

A Ezai yãa bõe? Ad a sẽn yeele: “Mam yãa Zusoabã sẽn zao geer sẽn yaa zãonglg wʋsgo.” (Vɛrse a 1) Yaa bõn-​makr la a Ezai sẽn yã wã, pa Saasẽ-pãng-​soab a Zeova mengã ye. Bala ninsaal pa tõe n yã Wẽnnaam la malɛgsã sẽn be saasẽ wã ye. Sɩd me, Biiblã yeelame tɩ “ned nan ka yã Wẽnnaam abada.” (Zã 1:⁠18) Dẽnd a Ezai sẽn yã wã sɩd yɩɩ bõn-​makre. * La bõn-​makrã yɩɩ vẽeneg hal t’a Ezai yɛɛs wa a sɩd yã a Zeova.

Rẽ poore, a Ezai bilga bũmb a sẽn yãa, tɩ tõe tɩ ned a to ra nan zɩ n paam n yã a buud ye. A yeela woto: “Serafẽ-rãmb bee bãmb [a Zeova] zugẽ, la a yembr fãa tara pɩgs a yoobe. Yẽ luta a neng ne a yiibu, la a nao ne a yiibu, la a yɩkd ne a yiibu.” (Vɛrse a 2) Serafẽ-rãmbã yaa malɛg-​kãsemse. Biiblã pʋgẽ, yaa a Ezai bal n gom serafẽ-rãmbã yelle. B bee a Zeova taoor n maand a raabã wakat fãa. B sẽn lut b nensã la b naoã wilgdame tɩ b waoogda a soab ning taoor b sẽn paam n yasẽ wã.

Pa bũmb ning a Ezai sẽn wã bal n yɛɛs-⁠a ye. A sẽn wʋm bũmb ningã me yɛɛs-⁠a lame. Serafẽ-rãmbã fãa ra zẽka b koees n yɩɩndẽ. A Ezai yeela woto: “B zẽka b koees n yeel taaba: ‘Sõngo! Sõngo! Saasẽ-pãng-​soabã yaa sõngo. Dũniyã fãa pida ne bãmb ziiri.’ ” (Vɛrse a 3) Hebre wã gom-​bil ning b sẽn lebg tɩ “sõngã” võor yaa yɩlemde. A rat n yeelame me tɩ “sẽn pa tar yel-​wẽnde, la sẽn zãr ne wẽng buud fãa.” Wõnda serafẽ-rãmbã ra yɩɩnd n deesda taaba, n pʋt ‘sõngã’ naoor a tãab-​tãabo, tɩ wilgdẽ t’a Zeova sõmblmã ka to ye. (Wilgri 4:⁠8) Rẽnd d tõe n tũnuga ne gom-​biig ning sẽn yaa sõmblmã n bilg a Zeova sẽn yaa Wẽnnaam ning buudã. Sɩd me a Zeova yaa yɩlemde, a zãra ne wẽng buudã fãa.

D sẽn mi t’a Zeova yaa yɩlemdã segd n kɩtame tɩ d bao a zoodo. Bõe yĩnga? A Zeova pa wa tẽng zug nanambsã sẽn mi n tõe n wa lebg nin-​wẽns la nin-​toosã ye. A sẽn yaa sõngã, d tõe n kɩsa sɩd t’a na n kell n yɩɩ Ba sẽn get d yell sõma, la t’a na n kell n yɩɩ Naab la Bʋ-​kaood sẽn yaa tɩrga. D tõe n kɩsa sɩd tɩ Wẽnnaam sẽn yaa sõngã, a pa na n tol n maan bũmb n sãam d sũur ye.

D sẽn mi t’a Zeova yaa yɩlemdã segd n kɩtame tɩ d bao a zoodo

[Tẽngr note]

^ sull 4 Étude perspicace des Écritures sebrã yeela woto: “Wẽnnaam sã n vẽneg ned t’a yã bõn-​makr a sẽn pa gõe sasa, wõnda a ningda bõn-​makrã a soabã yamẽ, tɩ baa kaoosg zugẽ bɩ a tõe n bilg bõn-​makrã, wall a gʋls n bilgi.”​—⁠A Zeova Kaset rãmbã n yiis seb-​kãnga.

[Seb-neng 32]

D sẽn mi t’a Zeova yaa yɩlemdã segd n kɩtame tɩ d bao a zoodo