A Abrahaam sẽn yɩ ned ninga

TŨUDUM wʋsg gomda a Abrahaam * yelle. Zʋɩf rãmba, moeemba, la kiris-nebã me. Neb nins sẽn mi Wẽnnaam Gomdã yetame t’a pʋgẽ wã, b gomda a Abrahaam yell wʋsgo, la t’a tẽebã buud sɩd yaa mak-sõngo. Biiblã boond-a lame tɩ neb nins fãa sẽn tẽedã ba.—Rom dãmba 4:11.

Bõe yĩng tɩ nebã pẽgd a Abrahaam wʋsgo? Bãng-y tɩ Biiblã pʋgẽ, yaa yẽ a ye bal la b boond tɩ Wẽnnaam zoa, la taa naoor a tãab menga!—2 Kibaya 20:7; Ezai 41:8; Zak 2:23.

A Abrahaam yaool n da yaa ninsaal wa tõndo. A paama zu-loees wa tõnd me sẽn paamdã, la a pa bas tɩ zu-loeesã tõog-a ye. Yãmb dat n bãnga a sẽn maan to-to bɩ? Bɩ d ges Biiblã sẽn yet bũmb ning nin-kãngã zugã.

A sẽn da yitẽ

A Abrahaam doga Uur, yʋʋmd 2018 sẽn deng a Zezi rogmã. (Sɩngre 11:27-31) Uur da yaa tẽn-kãseng sẽn tar arzɛgs wʋsgo, la bõn-naandsã pʋʋsg ra pida tẽngã. Tõe t’a Abrahaam ba a Teera me ra pʋʋsda bõn-naandse. (Zozue 24:2) Baa ne rẽ, a Abrahaam pa sak n pʋʋs bõn-naandsã sẽn yaa wẽn-faadã ye. A yãka yam n tũ a Zeova * a ye tãa.

Bõe n kɩt t’a Abrahaam maan woto? A Nowe biig a Sɛm sẽn wa n na n ki wã t’a Abrahaam tara yʋʋm 150. A sã n paam n sõsa ne a Sɛm, tog n sõng-a-la wʋsgo. Tõe t’a Sɛm togs-a-la sa-kãsengã sẽn yɩ to-to wã, la bãmb sẽn maan to-to n põsã. Tõe t’a Abrahaam yãa a Zeova tũubã yõodo, a sẽn bãng tɩ yaa a Zeova n fãag a Sɛm ne a zakã rãmbã.

Yɩɩ a Sɛm n togs-a tɩ pa yɩ yẽ me, a Abrahaam tẽe bũmb nins fãa a sẽn wʋm Wẽnnaam zugã. A Zeova sẽn ‘feesd sũyã’ yãame tɩ nin-kãngã yaa nin-tɩrga, t’a sõng-a sẽn na yɩl t’a tõog n tũ yẽ ne a sũur fãa.—Yelbũna 21:2; 2 Kibaya 16:9.

A vɩɩmã

A Abrahaam vɩɩmã pʋgẽ, bũmb wʋsg n maane. A yãa zu-loees wʋsg la baa ne rẽ, a vɩɩmã talla võore. Bɩ d ges bũmb kẽer sẽn maan a vɩɩmã pʋgẽ.

▪ Daar a yembre, Wẽnnaam yeela a Abrahaam t’a yik n bas Uur sẽn yaa a ba-yirã, n kẽng tẽng ning yẽ sẽn na n wilg-a wã. Baa ne a Abrahaam ne a Saara sẽn da pa mi b sẽn na n kẽng zĩig ningã, la b pa wʋmd b yikrã võorã, b sakame. A Abrahaam ne a Saara vɩɩmã tõre, b tɩ zĩnda sãando, n vɩɩmd fu-rot pʋsẽ Kanaã tẽngẽ wã.—Tʋʋma 7:2, 3; Hebre dãmba 11:8, 9, 13.

▪ A Zeova yeela a Abrahaam tɩ yẽ na n kɩtame t’a yɩ bu-kãseng ba, la a Abrahaam ne a Saara yaool n da pa tar biig ye. A yeelame me tɩ dũniyã buud fãa na n paama bark a Abrahaam maasem yĩnga. (Sɩngre 11:30; 12:1-3) A Zeova wa n wilga a Abrahaam t’a na n sɩd pidsa a pʋlengã. A yeel-a lame t’a yagensã sõor na n yɩɩ wa ãdsã.—Sɩngre 15:5, 6.

 ▪ A Abrahaam sẽn wa n tar yʋʋm 99, t’a Saara me yʋʋmã kolg 90, a Zeova yeel-b lame tɩ b na n doga bi-ribla. Woto ra wõnda bũmb sẽn pa tõe, la pa kaoos la a Abrahaam ne a Saara bãng tɩ ‘bũmb kae Zusoabã sẽn ka tõe n maan’ ye. (Sɩngre 18:14) A Abrahaam sẽn wa n tar yʋʋm 100, a sɩd roga bi-ribla, n pʋd a yʋʋr t’a Izaak. (Sɩngre 17:21; 21:1-5) A Zeova yeela vẽeneg tɩ ne a Izaak maasem, ãdem-biisã na n paama bark wʋsgo.

▪ Kaoosg zugẽ, a Zeova kosa a Abrahaam t’a maan bũmb sẽn yɩ toog ne-a. A yeel-a lame t’a rɩk a biig a Izaak a sẽn nong wʋsgã n maan maoongo. A Izaak yaool n da pa kẽ kãadem, a ra pa tar biig me. A Abrahaam sẽn na n dɩk a biigã n maan maoongã ra sãamda a sũur wʋsgo. Baa ne rẽ, a sɩd sakame n tall a biigã n na n tɩ maan maoongã. A Abrahaam da kɩsa sɩd tɩ baa a Izaak sã n ki, Wẽnnaam tõe n vʋʋg-a lame sẽn na yɩl t’a sẽn yeelã fãa pidsi. (Hebre dãmba 11:19) A Abrahaam sẽn wa n dat n kodg a biigã, Wẽnnaam kɩtame tɩ malɛk yeel-a t’a ra maan biigã bũmb ye. Wẽnnaam pẽga a Abrahaam a sẽn sak yẽ woto wã, la a lebg n tẽeg-a bũmb nins a sẽn pʋlm-a wã.—Sɩngre 22:1-18.

▪ A Abrahaam maana kaalem a yʋʋm 175. Biiblã yeelame t’a “lebga nin-kẽem kʋdr n tar yʋʋm wʋsgo, n yaool n maan yõore.” (Sɩngre 25:7, 8) Woto me yɩɩ bũmb a Zeova sẽn da pʋlm-a. Bala a ra yeel-a lame t’a na n kʋʋla wʋsg n yaool n maan kaalem.—Sɩngre 15:15.

A mak-sõngã

A Abrahaam pa yɩ pĩnd wẽndẽ ned tũudum wʋsg neb bɩ neb a taab sẽn gomd a yell bal ye. Hal ne rũndã, a kibarã kõta tõnd mak-sõng d sẽn segd n tũ. (Hebre dãmba 11:8-10, 17-19) D na n goma a sẽn wilg tẽebo, raoodo, sik-m-meng la nonglem to-to wã. D deng n gom bũmb ning neb wʋsg sẽn mi wã yelle. Yaa a tẽebã.

[Tẽngr not rãmbã]

[Zĩ-gũbri, seb-neng a 4]

A Abrahaam kibarã tara pãnga

Biiblã pipi sebrã b sẽn boond tɩ Sɩngr sebrã pʋgẽ, sak a 1 n tãag 10 gomda pĩnd wẽndẽ neb wʋsg sẽn tall tẽeb yelle, wa a Abɛlle, a Enok la a Nowe. La sak 11 n tãag 25 wã pʋgẽ, yaa nin-yɛng yell la b gomd n yɩɩda. Yaa a Abrahaam.

Sẽn paase, yaa a Abrahaam kibarã pʋgẽ la Biiblã gom bũmb kẽer yell pipi. Wala makre:

▪ Yaa be la b yeel pipi t’a Zeova yaa wa gãongo, bɩ koagenda, a nin-buiidã yĩnga.—Sɩngre 15:1; ges-y Tõod 33:29; Yɩɩl Sõamyã 115:9; Yelbũna 30:5.

▪ Be la b gom Wẽnnaam tẽeb yell pipi.—Sɩngre 15:6.

▪ Be la b pʋd gom-biig ning sẽn yaa no-rɛɛsã pipi.—Sɩngre 20:7.

▪ Be la b gom roagd sẽn nong a biig yell pipi.—Sɩngre 22:2.