Ges-y sẽn be pʋgẽ wã

Ges-y sẽn be sebrã pʋgẽ

A Zezi Kirist yaa ãnda?

A Zezi Kirist yaa ãnda?

 Wẽnnaam Gomdã sẽn yete

A Zezi Kirist yaa ãnda?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. A Zezi Kirist yaa ãnda?

A Zezi pa yɩ wa ninsaalb a taabã ye. A ra yaa malɛk n be saasẽ, n yaool n na n wa tẽngã zugu. (Zã 8:23) Yẽ la Wẽnnaam naan pipi, t’a sõng n naan bũmb a taabã fãa. Sẽn yaa Wẽnnaam a Zeova mengã n naan yẽ a toorã yĩnga, b boond-a lame tɩ Wẽnnaam “biig sẽn ka to.” A Zezi yɩɩ Wẽnnaam koe-taasda, rẽ n kɩt tɩ b boond-a me tɩ “Gomdã.”—Zã 1:1-3, 14; karm-y Yelbũn 8:22, 23, 30; Kolos rãmb 1:15, 16.

2. Bõe yĩng t’a Zezi wa tẽngã zugu?

Wẽnnaam dɩka a biigã vɩɩm n ning pʋg-sad sẽn da pa mi rao pʋgẽ, t’a rog-a t’a yaa ninsaala. Pʋg-sadã ra yaa zʋɩf t’a yʋʋr yaa a Maari. Dẽnd a Zezi pa tall ba tẽng zug ka ye. (Luk 1:30-35) A sẽn wa tẽngã zugã, yaa 1) sẽn na yɩl n zãms nebã tɩ b bãng sɩdã Wẽnnaam zugu, 2) sẽn na yɩl n bas mamsg Wẽnnaam daabã maaneg wɛɛngẽ, la 3) sẽn na yɩl n ki t’a vɩɩmã sẽn zems zãngã yɩ rondo, n yao ãdem-biisã yĩnga.—Karm-y Matɩe 20:28; Zã 18:37.

3. Bõe yĩng tɩ rond yaa tɩlae?

Rond yaa yaood b sẽn yaoode, sẽn na yɩl tɩ ned paam a meng ne yel-pakre. Wẽnnaam da pa rat tɩ ninsaalbã kʋʋndẽ la b kiidẽ ye. Bõe n wilgd rẽ? Bala, Wẽnnaam da yeela a Ãdem t’a sã n kɩɩs yẽ noorã la a na n ki. Dẽnd a Ãdem sã n da pa kɩɩsẽ Wẽnnaam n maan yel-wẽndã, a ra pa na n tol n ki ye. Yaa sɩd t’a Ãdem kell n vɩɩmdame n kaoos n yaool n na n ki, la a sẽn kɩɩs Wẽnnaamã tɛka, a lebga kiida, tɩ yaa wa baraar bala a sɩnga kũum. (Sɩngre 2:16, 17; 5:5) Yel-wẽndã longa a Ãdem kambã la a yagensã fãa, n kɩt tɩ b fãa yaa kiidba. Yɩɩ woto tɩ kũum “wa” dũniyã. Yaa rẽ n kɩt tɩ lebg tɩlae tɩ rond zĩnd ãdem-biisã yĩngã.—Karm-y Rom dãmb 5:12; 6:23.

  4. Bõe yĩng t’a Zezi ki?

Ãnd n da tõe n yao rondã tɩ tõnd paam d mens ne kũumã? Ninsaal sã n ki, a yaoa a meng yel-wẽnã yĩng bala. Ninsaalbã fãa sẽn dog ne yel-wẽndã n pa zems zãngã yĩnga, b baa a ye ka tõe n yao a to yel-wẽn yĩng ye.—Karm-y Yɩɩl Sõamyã 49:8-10, Sebr Sõngo.

Yel-wẽndã sẽn pa ta a Zezi wã, a sẽn ki wã pa a meng yel-wẽnd yĩng ye. A kũumã yɩɩ yaoodo, neb a taabã yel-wẽnã yĩnga. Wẽnnaam tʋma a biigã t’a wa ki tõnd yĩnga, tɩ wilgd a nonglem sẽn ka to ne ãdem-biisã. A Zezi me wilga tõnd a nonglem, a sẽn sak a Ba wã n wa ki tɩ yɩ rond tõnd yel-wẽnã yĩngã.—Karm-y Zã 3:16; Rom dãmb 5:18, 19.

5. Bõe la a Zezi maand masã?

A Zezi sẽn maag neb bãase, n vʋʋg neb sẽn da ki, la a sõng neb sẽn da namsdã, wilgda bũmb nins a sẽn na n wa maan n kõ neb nins sẽn sakd Wẽnnaamã. (Luk 18:35-42; Zã 5:28, 29) A Zezi sẽn ki wã, Wẽnnaam vʋʋg-a lame t’a le lebg malɛk n be saasẽ. (Efɛɛz rãmba 1:20) A sẽn dʋ saasẽ wã, a zĩnda a Zeova dɩtgo, n gũ hal tɩ ta wakat ning a Zeova sẽn kõ-a naam t’a na n soog tẽngã gillã. (Hebre dãmba 10:12, 13) Rũndã-rũndã, a Zezi yaa Rĩm n dɩt naam saasẽ, t’a poorẽ dãmbã moond koe-noogã dũniyã gill zugu.—Karm-y Daniɛll 7:13, 14; Matɩe 24:14.

A Zezi sẽn lebg Rĩmã, ka la bilfu a na n kɩtame tɩ namsgã buud fãa la neb nins sẽn wat ne-bã meneme. Neb milyõ rãmb sẽn tẽed a Zezi la b sakd-a na n vɩɩmda tẽngã sẽn na n lebg arzãnã zugu.—Karm-y Yɩɩl Sõamyã 37:9-11.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak a 4. A Zeova kaset rãmbã n yiis-a.

[Foto, seb-neng 11]

Neb milyõ rãmb sẽn tẽed a Zezi la b sakd-a na n vɩɩmda tẽngã sẽn na n lebg arzãnã zugu