Tõnd sẽn pa ne-b rãmbã yaa ãnd rãmba?

Erope, pʋg-​yãang n zã sapele n kẽ egiliizẽ, n yĩgimd a Maari bõn-​naandg taoor n na n pʋʋse. Afiriki, zak neb n kẽng b ned yaoogẽ n tɩ kɩrg rãam yaoogã sɛɛga. Ameriki, bi-​bɩɩg n loe noor n zĩ n bʋgsdẽ, n tẽed tɩ woto a na n paam n goma ne a malɛka. Aazi, maan-kʋʋd n yõogd seb-​vãad kulɛɛr toor-toor n na n kõ a yaab rãmba.

BÕẼ n kɩt tɩ nin-​kãensã maand woto? B fãa tẽedame tɩ bõn-​vɩɩs sẽn tar tõog n be tɩ ninsaalbã pa ne-ba, sẽn tõe n kẽes b toog tõnd vɩɩmã pʋgẽ, tɩ b tõe n gom ne-ba. Yaa vẽeneg tɩ nebã sẽn tẽed woto pa sɩng rũndã ye. La baasgo, b sẽn tagsd bũmb ning b rãmb nins tõnd sẽn pa ne wã zugã yaa toor-​toore.

Moeembã tẽedame tɩ Wẽnnaam a ye bal n be, a Alla. * Wẽnd-​dot wʋsg pʋsẽ, b yeta nebã tɩ Wẽnnaam yaa mens a taabo: Ba wã, Biigã la vʋʋsem sõngã. Ẽndu rãmbã tẽedame tɩ wẽnnaam dãmb tusr ne zak n be. Neb kẽer yetame tɩ bõn-​vɩɩs b sẽn pa ne n be rũms kẽer pʋsẽ, tɩɩsẽ, pĩisẽ, tãmsẽ la kʋɩlsẽ. Sɛb la filim dãmb wʋsg pʋgẽ, b gomda malɛgse, zĩn-​dãmba, kɩɩmse, nin-​tʋʋn la kinkirs yelle, tɩ neb kẽer sɩd tẽed rẽ.

Wala neb kẽer sẽn tagsd tɩ Wẽnnaam a ye bal n be tɩ kẽer tagsdẽ tɩ wẽnnaam dãmb wʋsg n be wã, b tagsgã me yaa toor-​toor ne d sẽn segd n maan to-to n gom ne-​bã. La d tõe n yeela vẽeneg tɩ rẽ wɛɛngẽ d segd n maana gũus wʋsgo, bala pa b fãa la d segd n gom ne ye. D rɩk makre: D sã n dat n bool ned ne telefõnne, d segd n bãnga sẽn yaa ned ning la d sẽn boondã, a soabã sã n sɩd vɩɩme, la a sã n na n sak n kelga tõndo. F sã n mak n na n gom ne ned f sẽn mams f yamẽ bala, f namsda f meng zaalem. Sẽn yaa yell n yɩɩda, yaa f sẽn na n tudg n bool ned sẽn dat-f ne wẽnga.

La tõnd sẽn pa ne-b rãmbã pʋd n yaa ãnda rãmba? Biiblã wilgda sẽn yaa b rãmba, la a wilgd d sẽn segd n gom ne a soaba bɩ n pʋʋsã, la a sã n leokda tõndo. Karm-y sẽn pʋgdã tɩ y na bãng Biiblã sẽn yet bũmb ningã. Tõe tɩ na n ling-y lame.

[Tẽngr note]