Ges-y sẽn be pʋgẽ wã

Ges-y sẽn be sebrã pʋgẽ

A Maari sẽn tar tʋʋmd ning Wẽnnaam daabã pʋgẽ

A Maari sẽn tar tʋʋmd ning Wẽnnaam daabã pʋgẽ

 A Maari sẽn tar tʋʋmd ning Wẽnnaam daabã pʋgẽ

DAAR a yembre, a Zezi ra wa n moonda koɛɛgã tɩ pag zĩnd a kɛlgdbã sʋka, n zẽk a koɛɛg n yeel woto: “Bark bee pag ninga sẽn dog yãmbã la sẽn yẽsem yãmbã zugu”! A Zezi sã n da ratẽ tɩ b zẽk a ma wã n waoogd-a n yɩɩd pagb a taabã, a ra na n pẽga pagã la a wilg tɩ nebã fãa segd n maana woto. La pa yɩ woto ye. A leoka pagã vẽeneg tɩ “neb nins sẽn wʋmd Wẽnnaam goamã n sakdẽ wã, bark bee bãmb zut n yɩɩda.”—Luk 11:27, 28.

A Zezi pa tol n wilg t’a ma yɩɩda pagb a taabã ye. A zɩ n wilg a karen-biisã me tɩ b segd n waooga a ma n yɩɩg a taabã ye. Woto yĩnga sẽn tẽed-b ne b sũy fãa tɩ b segd n waoogda a Maari la b kot-a t’a yõkd Wẽnnaam sɛɛg b yĩngã pa tudg sɩda? Bɩ d mak bũmb nins b sẽn wilgd nebã a Zezi ma wã zugã ne Biiblã sẽn yet bũmb ningã n ges tɩ d na n bãnge.

“Pid ne kũun soaba, . . . yãmb paama bark pagbã fãa sʋka”

Wẽnnaam sẽn wa n tʋm malɛk a Gabriyɛll a Maari nengẽ wã, a tɩ togs-a-la tʋʋmd ning a sẽn na n tʋm Wẽnnaam daabã pʋgẽ wã. Baraare, malɛkã pʋʋsa a Maari n yeel-a woto: “Mam pʋʋsda foom, fo sẽn yaa ned Wẽnnaam sẽn barkã. Zusoaba bee ne foom.” (Luk 1:28) Biiblã lebgr ning b sẽn boond tɩ Sebr Sõngã pʋgẽ, b lebga malɛk a Gabriyɛll gom-kãensã woto: “M pʋʋsda yãmba, pid ne kũun soaba! Soaala bee ne yãmba.” Rẽ poore, a Elizabɛt me pʋʋsa a Maari daar a yembre, n yeel-a woto: “Wẽnnaam ninga fo zug bark pagba fãa sʋka. La fo biiga yaa bark biiga.” (Luk 1:42) Rẽ yĩnga woto fãa wilgdame tɩ d segd n zẽka a Maari n waoogd-a la d kot-a t’a yõkd Wẽnnaam sɛɛg d yĩng bɩ?

Sɩd-sɩda, d pa tõe n leok tɩ n-ye ye. Baa katolik rãmbã sã n lebs n dɩkd gom-kãensã n pʋʋsda a Maari n kotẽ t’a yõk Wẽnnaam sɛɛg b yĩng me, tõnd pa tar kaset Biiblã pʋgẽ sẽn wilgd tɩ zemsame ye. A Gabriyɛll ne a Elizabɛt sẽn gom ne a Maari to-to wã, yaa sẽn na n wilg bal tɩ b sak n deegame t’a sẽn paam n na n dog Mesi wã yaa zu-no-kãsenga. La Biiblã pa wilgd tɩ b segd n pʋʋsda a Maari wa neb wʋsg sẽn tẽedã ye. A Zezi karen-biisã sẽn da wa n kos-a t’a zãms-b pʋʋsgã, a wilg-b lame tɩ b segd n pʋʋsa a Ba wã bala. Sɩd me, a sɩnga pʋʋsgã woto: ‘Tõnd Ba sẽn be [saasẽ].’—Matɩe 6:9.

A Maari na n dɩɩ naam ne rĩm dãmb a taaba

B wae n wilgda nebã me t’a Maari lebga “arzãn bɩ saasẽ rĩm-poaka.” La b zɩ n bool a Maari woto Biiblã pʋgẽ ye. B yetame bal t’a naaga neb nins Wẽnnaam sẽn bool saasẽ wã sʋka. Bõe yĩng t’a be nin-kãensã sʋka?

A Zezi ra wilgame t’a karen-biisã kẽer na n dɩɩ naam ne yẽ a Rĩungã pʋgẽ. (Luk 22:28-30) A yeelame t’a na n kɩtame t’a karen-bi-kãens ‘yɩ rĩm dãmb la maan–kʋʋdb Wẽnnaam yĩnga, n dɩ naam dũniyã zugu.’ (Wilgri 5:10) Biiblã wilgdame t’a Maari bee neb nins sẽn paam waoogr a woto wã sʋka. Kaset bʋg la d tar dẽ wɛɛngẽ?

Y tog n tẽrame tɩ Biiblã wilgame t’a Zezi kũumã poore, a karen-biisã, a ma a Maari n paas a ma-biisã “pʋʋsa ne yam a yembre n ka bas ye.” Yaa neb sõor na maan 120 n da minim n pʋʋsd woto, tɩ pagb ra be b sʋka. (Tʋʋma 1:12-15) Biiblã wilgame tɩ Pãntekotã daare, ‘bãmb fãa ra bee zĩig a yembre,’ tɩ Wẽnnaam kõ-b a vʋʋsem sõngã n kɩt tɩ b sɩng gom-zẽn goama.—Tʋʋma 2:1-4.

Sẽn mik t’a Maari zĩnda nin-kãensã sʋkã, wilgdame tɩ yẽ ne pagb nins fãa sẽn paam vʋʋsem sõngã baraarã me paama sor n na n tɩ rɩ naam saasẽ ne a Zezi. Woto fãa kɩtame tɩ d tõe n kɩs sɩd tɩ rũndã-rũndã, a Maari bee saasẽ  ne a Zezi. (Rom dãmba 8:14-17) Bɩ d ges tʋʋm nins a Maari ne a Zezi na-rɩt-n-taas a taabã sẽn na n tʋm Wẽnnaam daabã pidsg yĩnga.

B na n kɩtame tɩ nebã paam barka

Wilgr sebrã pʋgẽ, b yeelame tɩ neb 144 000 n na n vʋʋg n kẽng saasẽ n tɩ yɩ maan-kʋʋdba, bʋ-kaoodb la rĩm dãmba. (Wilgri 14:1, 4; 20:4, 6) Ne b maan-kʋʋrã maasem, b na n kɩtame tɩ ãdem-biis nins fãa sẽn yaa sakdbã rɩ a Zezi maoongã yõodo. Rat n yeel tɩ b na n tʋmame n sõng nin-kãensã tɩ b bãng Wẽnnaam sõma, tɩ b lebg nin-tɩrse, la b ra ye bẽ wall b ki ye. (Wilgri 21:1-4) Wakat kãnga, ad sɩd na n yɩɩ bark tɛkẽ n kõ neb nins sẽn tũud a Zeova wã! *

A Maari zoe n tʋmame la a ket n tʋmd Wẽnnaam daabã pidsg yĩnga. A sẽn yɩ pʋg-sõng la a ges a kambã yell sõma wã, a sik-m-mengã, a sakrã, a tẽebã la a sẽn tõog toog to-to wã kɩtame tɩ d segd n dɩk a makre. A sẽn dog Mesi wã la a sẽn na n sõng n kɩt tɩ ãdem-biisã paam bark toor-toorã me kɩtame t’a segd ne waoogre.

La bũmb ning d sẽn mi a Maari zug tɩ tar yõod n yɩɩd yaa tɩ yẽ ne Wẽnnaam nebã fãa tũuda Wẽnnaam a Zeova a yen tãa. Biiblã yetame t’a Maari ne Kiristã na-rɩt-n-taas a taabã sẽn be saasẽ wã zẽka b koees n yeel woto: “Pẽgr la naam la waoogr la pãng bee ne sẽn zaoa geerã zugã [rat n yet t’a Zeova], la ne Pe-bilã, [rat n yet t’a Zezi Kirist] wakat sẽn ka sɛta.”—Wilgri 5:13; 19:10.

[Tẽngr note]

^ sull 13 Y sã n dat n paam kibay bark kãensã wɛɛngẽ n paase, bɩ y ges Biiblã sɩd yetame tɩ bõe? sebrã sak a 8. A Zeova Kaset rãmbã n yiis seb-kãngã.

[Goam sẽn tar pãngã, seb-neng a 4]

A Maari sik-m-mengã, a tẽebã la a sakrã yĩng kɩtame tɩ d segd n dɩk a makre