Yãmb mii d saasẽ Ba wã sẽn sɩd yaa a soab bɩ?

NEB wʋsg tõe n lebs n togsa pʋʋsg ning a Zezi sẽn wilg a karen-biisã ne zugu. (Matɩe 6:9-13) B sã n wa pʋʋsd wa a Zezi sẽn wilgã, b boonda Wẽnnaam tɩ “tõnd Ba.” La b sʋkã neb a wãn n tõe n yeel tɩ b mi-a-la sõma?

La yãmb yẽ? Y mii Wẽnnaam sõma bɩ? Y tara zood sẽn tar pãng ne Wẽnnaam, tɩ kɩt tɩ y pʋʋsd-a n togsd y sũ-noog la y sũ-sãams bɩ? Bõe n yaa tɩlae sẽn na yɩl n bãng Wẽnnaam?

“A yʋʋrã la a Zeova”

B sã n sok bi-kɩdg t’a ba yʋʋr la a bõe, a na n yeelame bal t’a papa. La a sã n wa bɩ, a wat n bãnga a ba wã yʋ-peelle, la a sẽn sɩd yaa a soabã, t’a sũur noom ne rẽ. La d saasẽ Ba wã sẽn yaa vɩɩm kõtã yẽ? Y mii a yʋ-peelã, la yʋ-kãng võor bɩ?

Baa neb wʋsg sẽn nong n pʋʋsd wa a Zezi sẽn wilga, la b yet n yɩlemdẽ tɩ Wẽnnaam “yʋʋr paam pẽgrã,” f sã n sok-b tɩ yʋ-kãng la bʋgo, b pa mi b sẽn na n leok to-to ye. (Sebr Sõngo) Ãdsã, kiuugã, wĩntoogã, la tãensã d sẽn ne wã wilgdame tɩ Wẽnnaam beeme. La rẽ pa kɩtd tɩ d bãng a yʋʋrã ye. Dẽnd sẽn na yɩl n bãng a yʋʋrã, d segd n gesa Biiblã pʋgẽ. Biiblã yeta woto koɛɛg-koɛɛga: “A yʋʋrã la a Zeova.”—Yikri 15:3, NW.

Wẽnnaam datame tɩ tõnd bãng a yʋʋrã sẽn yaa Zeova wã. Bõe yĩnga? Bala a yʋʋrã n wilgd a sẽn yaa a soaba. Yʋ-kãng võor yaa “A kɩtdame tɩ yɩ,” rat n yeel t’a lebgda a sẽn dat n yɩ a soab fãa sẽn na yɩl n pids a raabã. Wala makre, zak soab tõe n yɩɩ sagenda, yel-welgda, se-yokda, kogend la karen-saamba, a zakã rãmb neer yĩnga. A sẽn lebgd woto fãa wã bee ne yɛl nins sẽn be zakã pʋgẽ wã la bũmb nins zakã neb sẽn baoodã. Woto me, baa ne yɛlã sẽn yaa to-to fãa, Wẽnnaam yʋʋrã sẽn yaa Zeova wã kɩtdame tɩ d bãng tɩ bũmb pa tõe n gɩdg-a t’a pa pids a raabã, la a ning neb nins sẽn maand yẽ raabã bark ye.

D ges bũmb toɛy-toɛy Wẽnnaam sẽn maand tɩ zemsd ne a yʋʋrã sẽn dat n yɛɛlgã. Rẽ na n sõng-y lame tɩ y bãng Wẽnnaam a Zeova sẽn yaa a soaba, la bũmb ning y sẽn segd n maan sẽn na yɩl n paam n yɩ a zoa.

“Wẽnnaam sẽn yaa nonglem la laafɩ soaba”

Tʋm-tʋmd a Poll boola d naandã tɩ “Wẽnnaam sẽn yaa nonglem la laafɩ soaba.” (2 Korẽnt dãmba 13:11) Bõe yĩnga? Bala a Zezi pĩnd n yeelame tɩ “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Wẽnnaam sẽn nong ninsaalbã wʋsgã yĩnga, kɩtame t’a tʋm a bi-yendã t’a wa ki b yel-wẽnã yĩnga. Rẽ kɩtame tɩ neb nins sẽn na n tẽ-a wã na n wa paam b mens ne yel-wẽnã biis sẽn yaa namsg la toog buud toɛy-toɛyã, la b wa paam n vɩɩmd wakat sẽn kõn sa. Rẽ n so t’a Poll yeel tɩ “yel-wẽnã yaood yaa kũum, la Wẽnnaam kũunã yaa vɩɩm sẽn ka sɛt tõnd Zusoaba Kirist Zezi maasem yĩnga.” (Rom dãmba 6:23) Woto segd n kɩtame tɩ d nong Wẽnnaam la d baood zems-n-taar ne-a.

Wẽnnaam wilgame t’a nonga ãdem-biisã  fãa, la a nonga neb nins sẽn sakd yẽ wã yembr-yembre. A Moiiz yeela Israɛll nebã sẽn da yaa tõatbã woto: “Yalemba, yaa woto la yãmb lebsd Zusoabã? Ka bãmb n yaa yãmb ba n so yãmb la? Ka bãmb n maan yãmb n kɩt tɩ y lebg neb la?” (Tõodo 32:6) Yãmb mii bũmb ning sẽn kɩt t’a Moiiz yeel-b woto wã bɩ? Wala ba sẽn nong a kamba, a Zeova gesa b yell baa ne a sẽn da mi tɩ b yaa yel-wẽn-maandbã. Wala makre, a kõ-b-la rɩɩbo, futu, la a sõng-b tɩ kell n tall zems-n-taar sẽn yaa sõma ne yẽ.

D fãa segda zu-loees toɛy-toɛya, tɩ wakat ninga tõe n kɩt tɩ d sũurã sãame, bɩ pʋd n kɩt tɩ d yamã yi d mense. D nong n datame tɩ ned sõng-d tɩ d wʋm d zu-loeesã võore, la d bãng d sẽn na n maanega. La ãnd n tõe n sõng tõndo? Ne Biiblã maasem, a Zeova kõta tõnd saglse, la a get d yelle. Biiblã wilgda bũmb ning sẽn kɩt tɩ d namsdẽ wã, la d sẽn tõe n mao ne rẽ n tõog to-to. Wala ba sẽn na n sak n sõng a biig sẽn lʋɩ n pogl t’a paam tɩbsgã, a Zeova me sẽn nong tõnd wʋsgã yĩnga, a sikda a meng n sõngd tõnd tɩ d paamd d sẽn datã. Vẽenega, a Zeova nug pa koɛɛg tɩ kɩt t’a pa tõe n sõng neb nins sẽn tẽed-a wã ye.—Ezai 59:1.

Kaset a to sẽn wilgd tɩ Wẽnnaam nonga tõnd yaa a sẽn ‘wʋmd pʋʋsgã.’ (Yɩɩl Sõamyã 65:3) Bõe yĩng tɩ d yet woto? Tʋm-tʋmd a Poll wilga a võorã woto: “Da maan-y yɩɩr ne bũmb ba a yembr ye, la ne pʋʋsgo la ne bark pʋʋsgo bɩ y wilg Wẽnnaam yãmb sẽn dat bũmb ninsi. La Wẽnnaam laafɩ sẽn yɩɩd nebã bãngr fãa na gũ yãmb sũyã la yãmb tagsg Kirist Zezi maasem yĩnga.” (Filip rãmba 4:6, 7) Yãmb sã n pʋʋs Wẽnnaam n togs bũmb ning sẽn be y sũyã pʋsẽ wã takɩ, la y tũud Biiblã sor-wilgri, y na n paama “Wẽnnaam laafɩ sẽn yɩɩd nebã bãngrã.”

A yaa “Wẽnnaam sẽn mi fãa”

Biiblã wilgame t’a Zeova tara ‘bãngr sẽn zems zãnga.’ A sẽn yaa “Wẽnnaam sẽn mi fãa” wã yĩngã, ned kae n mi ninsaal sõma, la a mi bũmb ning sẽn yaa tɩlae ne ninsaal n ta yẽ ye. (Zoob 36:4; 1 Sãmwɛll 2:3) A tũnuga ne a Moiiz n wilg tɩ “ninsaal ka na n vɩ ne rɩɩb bal ye, la a tog n vɩɩmda ne goam nins sẽn yit [yẽ] noorẽ wã.” (Tõodo 8:3; Matɩe 4:4) Woto rat n yeelame tɩ pa d sẽn na n tar rɩɩbo, futu, la laog n tõe n kɩt tɩ d paam sũ-noog hakɩk ye.

D Naandã tũnugda ne a Gomdã sẽn yaa Biiblã n wilgd tõnd sor la a kõt-d saglse. D sã n zãmsd Biiblã la d tũud a saglsã d vɩɩmã pʋgẽ, “goam nins sẽn yit Zusoabã noorẽ wã,” na n naf-d lame. Wala makre, pag a yembr sẽn yaa kiris-ned tɩ b boond-a t’a Zuzanna yeela woto b kãadmã wɛɛngẽ: “Yaa tõnd sẽn naagd taab n zãmsd Biiblã, n tũud taab n kẽnd tigissã la d wilgd nebã tõnd sẽn zãmsd bũmb ninsã n kɩt tɩ d kãadmã yaa sõma wã. D sẽn tũud Biiblã saglsã yĩnga, kɩtame tɩ bũmb ning d sẽn yãk n dat n wa maanã yaa a ye. Sẽn paase me, d tara zems-n-taar sẽn yaa sõma.”

Yãmb rat n paama Wẽnnaam sor-wilgrã la a saglsã bɩ? Sã n yaa woto, y sã n zãmsd Biiblã wakat fãa la y tũud a saglsã, Wẽnnaam na n ning-y-la bark wʋsgo.—Hebre dãmba 12:9.

Wẽnnaam sẽn yaa fãagda

Dũni kãngã pida ne yɛla. Nebã pa mi beoog daar sẽn na n yɩ to-to ye. Y sã n vɩya tẽng zabr sẽn beẽ, y ratame tɩ laafɩ zĩndi. Tẽns wʋsg pʋsẽ, wẽnemã, ligdã kaalem la terorismã kɩtame tɩ rabeem tar nebã. La ãnd n na n fãag tõnd yel-kãensã fãa pʋgẽ? Yaa masã la ãdem-biisã rat koglg la fãagr n yɩɩda.

 Biiblã wilgame tɩ “Zusoabã yʋʋr yaa wa gasg sẽn tar pãnga. Nin-tɩrg tõe n kẽe be tɩ bũmb da paam-a ye.” (Yelbũna 18:10) D sã n bãng Wẽnnaam yʋʋrã la d teeg-a, tõe n sõng-d lame tɩ d bʋgs bũmb nins a sẽn zoe n maanã zugu, la a sẽn na n wa maan bũmb nins n fãag neb nins sẽn tẽed-a wã. Wẽnnaam a Zeova zoe n wilga vẽeneg t’a tõe n fãaga a nin-buiidã. Wala makre, a sãama a Faraõ sodaasã la b saar dãmbã n fãag Israɛll nebã. Woto kɩtame tɩ nebã bãng vẽeneg t’a Zeova yaa Wẽnnaam sẽn yaa kɩs-sɩd soaba, la t’a tẽra neb nins sẽn namsdã yelle, n dat n sõng-ba.—Yikri 15:1-4.

Sẽn na yɩl n wa paam vɩɩm sẽn kõn sa wã, d segd n tẽeme tɩ Wẽnnaam a Zeova yaa fãagda. Israɛll rĩm a Davɩɩd sẽn da tall zu-loees wʋsg n segd n mao ne wã ra tẽeda woto. A yeela a Zeova yaa: “Yãmb yaa Wẽnnaam sẽn fãagd maam.” (Yɩɩl Sõamyã 25:5) Ne bas-m-yam, tʋm-tʋmd a Pɩɛɛr me yeelame t’a Zeova ‘mii a sẽn na n fãag nin-sõamyã makr pʋgẽ’ to-to.—2 Pɩɛɛr 2:9.

Wẽnnaam pʋlma ned ning fãa sẽn na n teeg yẽ woto: “Mam na n fãaga yẽnda; tɩ bõe, . . . yẽ mii mam yʋʋre.” (Yɩɩl Sõamyã 91:14) Neb nins sẽn maand Wẽnnaam daabã rũndã-rũndã wã sɩd yãta gom-kãensã pidsgu. Poloyn rao a ye yʋʋr sẽn boond t’a Henryk maanda a Zeova raabã ne kɩs-sɩd sẽn na maan yʋʋm 70 masã, baa ne a sẽn seg toog buud toɛy-toɛy la namsg a tẽebã yĩngã. A sẽn wa n tar yʋʋm 16, b talla a ba wã n kẽng Auschwitz kã de kõnsãntrasiõ wã pʋgẽ, la b ning yẽ ne a kẽemã zĩig Nazi rãmbã sẽn kẽesd kom-bɩɩse. Rẽ poore, b yiis-a-la zĩ-kãng n tɩ ning zĩig a to. A Henryk wa n yeela woto: “Mam zu-loeesã fãa pʋgẽ, a Zeova pa tol n bas-m ye. A sõnga maam wakat fãa tɩ m kell n tall m tẽebã, baa ne yɛlã kẽer sẽn da rat n tũ ne m yõorã.” Vẽenega, a Zeova kõta neb nins sẽn maand yẽ raabã tẽeb la pãng sẽn na yɩl tɩ b tõog toogo.

Ka la bilfu, Wẽnnaam na n fãaga neb nins fãa sẽn tẽed yẽ n gũudẽ t’a wa fãag-bã. A yeela woto: “Mam yaa [a Zeova]. Fãagd a to ka be tɩ ka maam ye.” (Ezai 43:11) “Wẽnnaam sẽn tõe fãa da-kãsengã zabr” daare, a na n sãama nin-wẽnsã fãa la a fãag nin-tɩrsã. (Wilgri 16:14, 16; Yelbũna 2:21, 22) A Zeova yeela woto: “Sũ-maasem dãmbã na n sooga dũniyã n maan sũ-noog laafɩ wʋsg yĩnga.”—Yɩɩl Sõamyã 37:11.

D sẽn tõe n yɩ “Wẽnnaam kamb” to-to

No-rɛɛs a Malaki wakatẽ wã, Israɛll nebã ra yetame tɩ bãmb ba la a Zeova. La b sã n da rat waoog-a, b rɩkda rɩ-põaas la rũms sẽn yaa zoens la wobs n maand maoong n kõt-a. Rẽ n so t’a Zeova sok-b woto: “Mam sã n yaa y ba, m waoogrã bee yɛ?”—Malaki 1:6.

Ra maan-y wa Israɛll nin-kãensã sẽn yɩ wẽn-kɩɩsdbã sẽn maanã ye. D sagend-y lame tɩ y bao n bãng Wẽnnaam a Zeova sẽn yaa a soabã, la y bao n pẽneg-a. A Zezi karen-biig a  Zak me yeelame tɩ y “kolg Wẽnnaam, la bãmb na kolg yãmba.”—Zak 4:8.

Yãmb sẽn paam t’a Zeova yaa y ba wã, bũmb la y segd n maane. Y sã n modgd n tũud Wẽnnaam noyã y vɩɩmã nens fãa pʋsẽ n wilg tɩ y waoogd-a lame, a pa na n tol n yĩm modgr ning yãmb sẽn maandã ye. A na n sõng-y lame tɩ y kẽn so-tɩrg ning sẽn tar n debd dũni paalg ning a sẽn kãabã pʋgẽ wã. Dũni-kãng pʋgẽ, “kũum ka na n le zĩnd ye. Sũ-sãoong bɩ yãbr walla toog kõn le zĩnd yɛs ye.” (Wilgri 21:4) Wakat kãngã, wẽn-sakdbã fãa na n paama “yolsg ne faoolem yembdo, n paam pʋɩɩr ne Wẽnnaam kambã b lohormã ne b ziirã pʋgẽ.”—Rom dãmba 8:21.

[Goam sẽn tar pãngã, seb-neng a 5]

Wẽnnaam datame tɩ tõnd bãng a yʋ-peellã sẽn yaa Zeova wã t’a võor yaa “A kɩtdame tɩ yɩ” wã

[Goam sẽn tar pãngã, seb-neng a 6]

“Mam zu-loeesã fãa pʋgẽ, a Zeova pa tol n bas-m ye.”—A HENRYK

[Goam sẽn tar pãngã, seb-neng a 7]

“Yaa tõnd sẽn naagd taab n zãmsd Biiblã, n tũud taab n kẽnd tigissã la d wilgd nebã tõnd sẽn zãmsd bũmb ninsã n kɩt tɩ d kãadmã yaa sõma wã.”—A ZUZANNA