A Zeova kogenda neb nins sẽn teeg yẽ wã
A Zeova kogenda neb nins sẽn teeg yẽ wã
“Yãmb nonglem ne y sɩda na n gʋʋla maam n ka bas ye.”—Yɩɩl Sõamyã 40:12.
1. Bõe la rĩm a Davɩɩd kos a Zeova, la wãn to la kos-kãng paamd reegr masã?
PĨND wẽndẽ Israɛllã rĩm a Davɩɩd ‘gesa a Zeova ne tẽebo,’ la a yeelame t’a Zeova ‘sulga yẽ sẽnẽ n kelg a kɛlengã.’ (Yɩɩl Sõamyã 40:2) Naoor wʋsgo, yẽ mengã maana kaset t’a Zeova sɩd kogenda neb nins sẽn nong-a wã. Woto yĩnga, a Davɩɩd ra tõe n kosame t’a Zeova kogl-a wakat fãa. (Yɩɩl Sõamyã 40:12) B sẽn sõdg a Davɩɩd rap la pagb nins b sẽn kãab ‘vʋʋgr sẽn yaa neer n yɩɩda’ sʋkã, a bee a Zeova pʋ-tẽerẽ wã masã n gũud keo-kãngã. (Hebre dãmba 11:32-35) A ra pa tõe n paam beoog-daar sẽn be bas-m-yam n yɩɩd woto ye. A yʋʋrã gʋlsa a Zeova ‘tẽegr sebrã’ pʋgẽ.—Malaki 3:16.
2. Wãn to la Gʋlsg Sõamyã sõngd tõnd tɩ d wʋm a Zeova koglgã võore?
2 Baa ne wẽn-sakdb nins yell b sẽn gom Hebre dãmb sak 11 pʋgẽ wã sẽn vɩɩmd sẽn deng a Zezi Kirist waoong tẽng zugã, b vɩɩmdame tɩ zems ne a Zezi zãms-kãngã: “Ned ninga sẽn nong a vɩɩm, a vɩɩm na sãam. La ned ninga sẽn ka nong a vɩɩm dũniyã zug ka, a na tall a vɩɩm wakat sẽn ka sɛta.” (Zã 12:25) Rẽnd vẽenega, paam a Zeova koglg pa rat n yeel tɩ d pa na n namse, bɩ tɩ b pa na n nams tõnd d tẽebã yĩng ye. Rat n yeelame tɩ d na n paama koglg tẽebã wɛɛngẽ n tõog n ket n tat Wẽnnaam yam.
3. Kaset bʋg la d tar t’a Zeova kogla Kirist Zezi, la rẽ baasa ne bõe?
3 A Zezi mengã paama nams-toaag la paoogr a tẽebã yĩnga, la a bɛɛbã wa n tõog n kɩtame t’a ki toog la yãnd meng-menga pʋgẽ. La rẽ pa kɩt tɩ Wẽnnaam sẽn kãab t’a na n kogla Mesi wã pa pids ye. (Ezai 42:1-6) A Zezi sẽn vʋʋg a kũumã rasem a tãab-n-soabã wilgdame t’a Zeova kelga a sẽn kelem n kos sõngrã, n sõng-a t’a kell n yɩ wẽn-sakda, wala a sẽn da kelg a Davɩɩd me kosgã. (Matɩe 26:39) A Zezi sẽn paam koglg woto wã, a kẽnga saasẽ n ye pa tõe n ki, la kɩtame tɩ neb milyõ rãmb sẽn wilgd tɩ b tẽeda rondã tar vɩɩm sẽn pa satã saagre.
4. Bas-m-yam bʋg la b kõt kiris-neb nins sẽn paam vʋʋsem sõng zaeebã la ‘piis a taabã’?
4 D tõe n kɩsa sɩd t’a Zeova ratame la a tõe n kolga a sõgen dãmbã wa a sẽn maan to-to ne a Davɩɩd la a Zezi wã. (Zak 1:17) A Zezi ba-biisã sẽn paam vʋʋsem sõng zaeebã sõor bilf sẽn ket tẽng zugã tõe n kɩsa sɩd ne a Zeova kãab-kãngã: ‘Dogem-pʋɩɩr sẽn ka tõe n sãam, la sẽn ka dẽgemda, la sẽn ka loogda, n bĩng yãmb yĩng [saasẽ]. Yaa yãmb la Wẽnnaam pãnga gũud tẽeb yĩnga, tɩ yãmb paam fãagr sẽn segl n na n puk yaoolem wakate.’ (1 Pɩɛɛr 1:4, 5) ‘Piis a taabã’ sẽn tar tẽngã zug vɩɩmã saagrã me tõe n teega Wẽnnaam la a kãabgã yɩɩl gʋlsdã sẽn wilgã: “Yãmb sẽn yaa Zusoaba neba, bɩ y nong bãmba. Zusoaba gũuda sɩd dãmbã.”—Zã 10:16; Yɩɩl Sõamyã 31:24.
B tẽebã paamda koglgo
5, 6. a) Wãn to la Wẽnnaam nin-buiidã paamd koglg rũndã-rũndã? b) Zems-n-ta-bʋg buud la sẽn zae-bã tar ne a Zeova, la yaa wãn to ne neb nins sẽn saagd n na n vɩɩmd tẽng zugã?
5 Tõnd wakatã, a Zeova rɩka segls sẽn na yɩl n kogl a nin-buiidã tẽebo. Baa ne a sẽn pa kogend bãmb ne namsgã b tẽebã yĩnga bɩ ne vɩɩmã zu-loees la sabaab rãmbã, wakat fãa a sõngd-b lame la a kengd b raoodo, sẽn na yɩl tɩ b kell n tall zood ning b sẽn tar ne yẽ wã. Yaa b sẽn tar tẽeb ne rondã Wẽnnaam sẽn kõ ne nonglmã zug la b tikd n baood zood kãnga. Kiris-nin-kãens sẽn yaa wẽn-sakdbã sãnda paama zaeeb ne Wẽnnaam vʋʋsem sõngã n na n lebg na-rɩt-n-taas ne Kirist saasẽ. B yeelame tɩ b yaa tɩrse, n yaa Wẽnnaam tẽeb komdibli, la gom-kãensã pidsda b zutu: “Bãmb yiisa tõnd lik pʋgẽ t’a ka le tar noor ne tõnd ye, la bãmb ninga tõnd bãmb Bi-nongra soolem pʋgẽ. Yaa ne bãmb la tõnd paam fãagre sẽn yaa yel-wẽna sugri.”—Kolos rãmba 1:13, 14.
6 B kõo kiris-neb nins sẽn yaa wẽn-sakdb milyõ rãmb a taab bas-m-yam tɩ bãmb me tõe n dɩɩ rondã Wẽnnaam sẽn kõ wã nafa. D karemda woto: ‘Ninsaal Biiga ka wa tɩ b sõng-a ye, a waame n na n sõng nebã, la a kõ a vɩɩm n yao neb wʋsg yĩnga.’ (Mark 10:45) Kiris-nin-kãensã gũuda wakat sẽn na n ta tɩ b paam ‘Wẽnnaam kamba lohorma ne b ziirã.’ (Rom dãmba 8:21) La nananda, b geta zood ning b sẽn tar ne Wẽnnaamã wa bũmb sẽn tar yõod wʋsgo, la b maooda ne b sũy fãa n dat n paas zems-n-ta-kãng pãngã.
7. Rũndã-rũndã, yaa ne bõe maasem la a Zeova kogend a sõgen dãmbã tẽebo?
7 Ne zãmsg na-kẽndr b sẽn tũud wakat fãa maasem, a Zeova kogenda a nin-buiidã tẽebo. Rẽ kɩtdame tɩ b bãngd sɩdã sõma n paasdẽ. A Zeova leb n kõta sor-wilgr wakat fãa ne a Gomdã, a siglgã la a vʋʋsem sõngã maasem. Wẽnnaam nin-buiidã sẽn be tẽnsã fãa pʋsẽ wã sẽn tũud ‘tʋm-tʋmd sẽn tũud sɩd la sẽn tar yama’ sor-wilgrã kɩtame tɩ siglgã neb sẽn be dũniyã gill zugã yaa wa zag-yɛng neba. Tʋm-tʋmdã sull geta a Zeova sõgen dãmbã fãa sẽn be zag-kãngã pʋgẽ wã tẽebã yelle, la b yĩngã bõn-datem yell meng tɩ sã n yaa tɩlae, n pa get a nebã sẽn yit tẽng ninga, bɩ b tarem sẽn yaa to-to ye.—Matɩe 24:45.
8. A Zeova kɩsa sɩd t’a sõgen dãmb nins sẽn sakd-a wã na n maana bõe, la a kõt-b-la bas-m-yam bʋgo?
8 Wa a Zeova sẽn pa kogl a Zezi a bɛɛbã zabr taoorã, a pa kogend kiris-nebã me b bɛɛbã kɩɩsg taoor rũndã-rũndã ye. La rẽ pa wilgd tɩ b pa tat Wẽnnaam yam ye. Ayo. La wilgdame t’a kɩsa sɩd tɩ b na n zĩnda yẽ poorẽ gomd ning sẽn pak ãndũniyã nebã fãa wã pʋgẽ. (Zoob 1:8-12; Yelbũna 27:11) A Zeova pa na n tol n yĩm neb nins sẽn sakd-a wã ye, “tɩ bõe, Zusoaba nonga tɩrlem, la bãmb ka basd neb nins sẽn nong bãmba ye. Bãmb gũuda bãmb wakat sẽn ka sɛta.”—Yɩɩl Sõamyã 37:28.
A nonglem kãsengã la a sɩdã kogend-b lame
9, 10. a) Wãn to la sɩd ning sẽn yit a Zeova nengẽ wã kogend a nin-buiidã? b) Wãn to la Biiblã wilgd t’a Zeova nonglem kãsengã kogenda a sõgen dãmbã?
9 A Davɩɩd pʋʋsg ning sẽn be Yɩɩl Sõamyã 40 soabã pʋgẽ, a kosame t’a Zeova nonglem kãsengã la a sɩdã kogl-a. A Zeova sẽn yaa sɩd soabã, la a sẽn nong tɩrlmã, rẽ baoodame t’a wilg a noyã sẽn yaa b rãmb vẽenega. Neb nins sẽn tũud no-kãensa wã paamda koglg wʋsg ne yɩɩre, rabeem la zu-loees nins sẽn paamd neb nins sẽn pa sakd no-kãensa wã. Wala makre, d tõe n kogla d mens la d sẽn nong-b rãmbã ne zu-loees wʋsg sẽn wat ne sũ-sãamse, d sã n zãag d mens ne dorg rɩkre, rã-yũuri, yoob la nen-kɛglem. La baa neb nins sẽn bʋdg n bas a Zeova sɩdã sor wa a Davɩɩd sẽn da mi n maan wakat ningã tara bas-m-yam tɩ Wẽnnaam ket n yaa “zĩ-soalgdg” n kõ yel-wẽn-maandb nins sẽn tekd yam n kos sugrã. B tõe n kaasa ne sũ-noogo n yeel woto: “Yãmb gũuda maam tɩ toog ra paam-m ye.” (Yɩɩl Sõamyã 32:7) Woto wilgdame tɩ Wẽnnaam sɩd tara nonglem wʋsgo!
10 Wẽnnaam leb n wilgdame t’a tara nonglem wʋsg n keoogd a sõgen dãmbã tɩ b kell n welg b mens ne dũni wẽngã a sẽn na n sãam ka la bilfã. D karemda woto: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye. Tɩ bõe, bũmb nins fãa sẽn be dũniyã n yaa yĩng ratem wẽnga la nin datem wẽnga ne tɩtaama ka yit tõnd Ba nengẽ ye. Bãmb yaa dũniyã rẽnda.” D sã n kelg keoog-kãngã la d sake, na n sɩd kogla tõnd vɩɩmã wakat sẽn pa sat yĩnga, bala verse wã paasda woto: “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”—1 Zã 2:15-17.
Tags neerã, yam-vẽenemã la yamã kogend-b lame
11, 12. Wilg-y tagsg neerã, yam-vẽenemã la yamã sẽn kogend tõnd to-to.
11 Wẽnnaam vẽnega a Davɩɩd biribl a Salomo t’a gʋls neb nins sẽn dat n ta Wẽnnaam yamã woto: “Yẽesem ne bãngr na n gũu foom n gɩdg foom ne wẽnga.” A sagla woto me: “Bao yam ne bãngre. . . . Ra sak n bas yam ye. A na n gũu foom. Bɩ f nong-a t’a na n kɩtame tɩ f zĩnd ne laafɩ.”—Yelbũna 2:11; 4:5, 6.
12 D wilgdame tɩ d tagsda neere, d sã n bʋgsd d sẽn zãmsd bũmb ning Wẽnnaam Gomdã pʋgẽ wã zugu. D sã n maan woto na n sõnga tõnd tɩ d paam yam n paas n tõog n yãk yɛl nins d sẽn segd n lʋɩɩs taoor d vɩɩmã pʋgẽ wã. Woto tara yõodo, bala tõnd neb wʋsg miime, tõe tɩ yaa d sẽn yã d toor yĩnga, tɩ nebã sã n ning bũmb pipi zĩigẽ b vɩɩmã pʋgẽ tɩ pa zemse, yaa ne b meng yam-yãkr tɩ yaa zɩɩlem yĩng me, wata ne zu-loeese. A Sʋɩtãan dũniyã sẽn dat tɩ tõnd bao bũmb nins yaa arzɛka, naam la tõogo, t’a Zeova yaool n yet tõnd tɩ d ning tẽebã yɛl pipi zĩigẽ tɩ rẽ n tar yõod n yɩɩda. Ned sã n pa rɩk tẽebã yɛl n lʋɩɩs taoor a vɩɩmã pʋgẽ, tõe n wãa a zaka, n sãam zoodo, la kɩt tɩ tẽebã bõn-datɩ wa leb poorẽ. Rẽ tõe n kɩtame tɩ ned wa baas wẽng wa a Zezi sẽn wilg woto wã: “Ned sã n paam dũniyã bũmb fãa t’a meng vɩɩm yaool n sãam, a yõod bee yɛ?” (Mark 8:36) Yaa yam tʋʋmd tɩ d sak n tũ a Zezi sagl-kãngã: “Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.”—Matɩe 6:33.
D sã n pa gũusi d tõe n wa lebga rat-m-yembr soaba
13, 14. Yɩ rat-m-yembr soab rat n yeelame tɩ bõe, la bõe yĩng tɩ woto yɩɩb yaa yalemdo?
13 Ninsaalbã nong n tagsda bãmb mens yelle. La tõnd mengã tʋlsem la d raabã sã n wa lʋɩ taoor d vɩɩm pʋgẽ, wata ne zu-loeese. Rẽ n so t’a Zeova yet tõnd tɩ sẽn na yɩl n kogl d zoodã ne yẽ bɩ d ra yɩ rat-m-yembr dãmb ye. Rat-m-yembr rat n yeelame tɩ bao n pids f meng tʋlsem bɩ f raab bala. Rẽ yĩnga woto pa bilgd neb wʋsg sẽn yaa to-to rũndã-rũndã wã sɩda? Zemsame la Biiblã sẽn deng n togs t’a Sʋɩtãan dũni wẽngã “yaoolem wakate . . . neba na n yɩɩ beed dãmba,” bɩ tɩ b na n lebga rat-m-yembr dãmbã.—2 Tɩmote 3:1, 2.
14 Kiris-nebã miime tɩ yaa yam tʋʋmd tɩ b tũ Biiblã noor ning sẽn yet tɩ d tags taab yelle, la tɩ d nong d to wa d mengã. (Luk 10:27; Filip rãmba 2:4) Neb wʋsg tõe n gesame tɩ ned pa tõe n tũ no-kãngã ye, la a tũub yaool n yaa tɩlae, d sã n dat tɩ d kãadem yɩ sõma, tɩ d zak vɩɩm tall sũ-noogo, la d paam zo-rãmb hakɩka. Woto yĩnga, a Zeova sõgen hakɩk pa segd abada n bas tɩ yẽ mengã raab lʋɩ taoor a vɩɩmã pʋgẽ n bas yɛl a taabã sẽn tar yõod n yɩɩdã ye. Yaa a Zeova sẽn yaa Wẽnnaam ning a sẽn balemdã raab n tar yõod n yɩɩda.
15, 16. a) Mak-bʋs n wilgd rat-m-yembr sẽn tõe n wa baas ne bũmb ninga? b) Ned sã n yɩt tao-tao n kaood neb a taabã bʋʋdo, sɩd-sɩda bõe la a maanda?
15 Rat-m-yembr tõe n kɩtame tɩ ned yaa tɩrg a meng nifẽ, tɩ kɩt t’a yamã yẽde, t’a lebg tɩta-neda. Wa sẽn zemse, Biiblã yeta woto: “Fo sẽn kaood neb a taab bʋʋdã, fo ka tõe n yã bũmb n dõd n yi ye. Tɩ bõe, fo sẽn bʋʋd neb a taab bʋʋdã, fo kaooda f meng bʋʋdo; tɩ bõe, fo bʋʋda neb a taab bʋʋdo la fo meng yaool n maanda wa bãmba.” (Rom dãmba 2:1; 14:4, 10) A Zezi wakatẽ tũudmã nanambsã ra kɩsa sɩd ne b mensã tɩrlem hali tɩ kɩt tɩ b ra tagsdẽ tɩ b tõe n sãbga a Zezi la a karen-biisã. B sẽn maan woto wã, b kaoa neb a taabã bʋʋdo. B sẽn da pa ne bãmb mensã pãn-komsmã waa ne taal b mens zutu.
16 A Zida sẽn yɩ a Zezi tũud-n-taag n yaool n wa zãmb-a wã ra wa n lebga ned sẽn kaood a taab bʋʋdo. Vugri, b sẽn da wa n be Betani, a Lazaar tão a Maari zaea a Zezi ne kaam sẽn tar yũ-noogo, t’a Zida yẽgem a Maari sẽn maan bũmb ningã poorẽ wʋsgo. A wilga a sũ-yikrã woto n yeele: “Yaa bõe t’a ka koos tɩdar kaam kãng denie kobs-tã n kõ naong rãmba?” La kɩbarã wilga woto n paase: “Yẽ sẽn gom woto wã ka tɩ yẽ tagsda naong rãmba yell ye. Yaa yẽ sẽn yaa wagdre la yẽ sẽn zãad ligda korgã, yẽ zuuda bãmb sẽn suiid a pʋgẽ wã.” (Zã 12:1-6) Bɩ d ra tol n yɩ wala a Zida bɩ tũudmã taoor dãmb sẽn da yɩt tao-tao n kao neb a taabã bʋʋdo, tɩ woto ra wat ne taal b mens zutã ye.
17. Rɩk-y makr n wilg tɩ yaa yelle, d sã n wuk d menga, bɩ d sã n tall bas-m-yam ne d mengã tɩ looge.
17 Zu-bʋko, baa pipi kiris-neb kẽer sã n pa lebg wagda wa a Zida me, b yɩɩ wuk-m-mens rãmba, n lebg tɩta-neba. A Zak gʋlsa woto nin-kãensã zutu: “Yãmb maanda sũ-noog ne yãmb tɩtaam tagsgã.” La a paas tɩ: “Tɩtaam a woto yaa bõn-wẽnga.” (Zak 4:16) Ned sẽn wukd a meng ne bũmb nins a sẽn maane, bɩ ne zu-nood tʋʋm nins a sẽn tar a Zeova tʋʋmdã pʋgẽ wã baasda wẽnga. (Yelbũna 14:16) D tẽra bũmb ning sẽn paam tʋm-tʋmd a Pɩɛɛr sẽn tall bas-yard ne a meng tɩ loog nug n wuk a meng vugr n yeel woto wã: “Baa neba fãa sã n na n zoe n bas yãmba mam ka na n zoe n bas yãmb abada ye. . . . Baa a sã n yaa tɩlae tɩ [mam] ki ne yãmba, mam kõn kɩɩs yãmb ye.” Sɩda, tõnd ka bʋʋm n na n wuk d mens ne bũmb baa a yembr ye. Tõnd sẽn tar bũmb ninsã fãa yaa a Zeova nonglem kãsengã yĩnga. D sã n tẽeg rẽ, na n kɩtame tɩ d ra wuk d mens ye.—Matɩe 26:33-35, 69-75.
18. A Zeova tagsg yaa bõe ne wuk-m-menga?
18 Biiblã yeta tõnd tɩ: “Tɩtaam n lʋɩt taoor tɩ sãoong pʋgda. La wuk-m-meng n lʋɩt taoor tɩ lʋɩɩs pʋgda.” Bõe yĩnga? A Zeova leokdame: “Mam kisa tɩtaam ne wuk-m-menga.” (Yelbũna 8:13; 16:18) Rẽnd pa lingr la a Zeova sũur sẽn da yik ne “Asiri dĩma a wuk-m-menga tʋʋma fãa la a tɩtaama fãa yĩnga” ye. (Ezai 10:12) A Zeova sɩbg-a-la rẽ yĩnga. Ka la bilfu, a Sʋɩtãan dũniyã gilli, n paas a nanambsã ninsaal nif sẽn ne la sẽn pa ne wã fãa sẽn yaa wuk-m-mens la sek-m-mens rãmbã na n paama sɩbgre. Bɩ d ra tol n dɩk a Zeova bɛɛbã sẽn tar sek-m-mengã togs-n-taar ye.
19. Bõe yĩng tɩ Wẽnnaam nin-buiidã tar zu-zẽkre, n yaool n tar sik-m-menga?
19 Kiris-neb hakɩkã bee bʋʋm n na n tall zu-zẽkre, b sẽn yaa a Zeova sõgen dãmbã yĩnga. (Zeremi 9:23) La b tog n kell n talla sik-m-meng me. Bõe yĩnga? Bala, neba “fãa maana yel-wẽna n kong Wẽnnaam waoogre.” (Rom dãmba 3:23) Woto, sẽn na yɩl n ket n yaa a Zeova sõgen dãmba, d segd n talla tʋm-tʋmd a Poll tagsgã buudu. A yeelame tɩ “Kirist Zezi waa dũniyã pʋgẽ n na n fãag yel-wẽna rãmba.” La a paasame tɩ: “La mam da yaa wẽng n yɩɩd bãmb fãa.”—1 Tɩmote 1:15.
20. Wãn to la a Zeova kogend a nin-buiidã rũndã-rũndã, la wãn to la a na n kogl-b beoog-daare?
20 A Zeova nin-buiidã sẽn basd b mens raab la b lʋɩɩsd Wẽnnaam daabã taoor b vɩɩmã pʋgẽ wã yĩnga, d tõe n kɩsa sɩd t’a Zeova na n ket n kogenda b tẽebã. D tõe n kɩsa sɩd me tɩ to-kãsengã sã n wa, a Zeova na n fãaga a nin-buiidã la a kogl b tẽebã me. B sã n wa kẽ Wẽnnaam dũni paalgã pʋgẽ, b na n tõog n yeela woto: “Gese, yaa tõnd Wẽnnaam, yaa bãmb la tõnd sẽn da tẽed n baood fãagrã, bãmb yaa Zusoaba. Tõnd teega bãmba, bɩ y wa tɩ d kɩdem n maan sũ-noog bãmb fãagra yĩnga.”—Ezai 25:9.
Y tẽrame bɩ?
• Wãn to la b kogl rĩm a Davɩɩd la a Zezi Kirist?
• Wãn to la a Zeova nin-buiidã paamd koglg rũndã-rũndã?
• Bõe yĩng tɩ d pa segd n yɩ rat-m-yembr soaba?
• Bõe yĩng tɩ d tõe n tall zu-zẽkr la d yaool n ya sik-m-meng rãmba?
[Zãmsgã sogsgã]
[Foto, seb-neng 19]
Wãn to la a Zeova kogl a Davɩɩd ne a Zezi?
[Foto, seb-neng 20, 21]
Wãn to la a Zeova kogend a nin-buiidã tẽeb rũndã-rũndã?
[Foto, seb-neng 22]
Baa ne yɩ a Zeova sõgen sẽn yaa zu-zẽkr bũmbã, d segd n talla sik-m-meng wakat fãa