Ges-y sẽn be pʋgẽ wã

Ges-y sẽn be sebrã pʋgẽ

Neb b sẽn pek tɩ b yaa yɩlma, tʋʋm sõma maaneg yĩnga

Neb b sẽn pek tɩ b yaa yɩlma, tʋʋm sõma maaneg yĩnga

Neb b sẽn pek tɩ b yaa yɩlma, tʋʋm sõma maaneg yĩnga

“Bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.”—2 KORẼNT DÃMBA 7:1.

1. A Zeova baoodame tɩ neb nins sẽn balemd-a wã yɩ wãn-wãna?

“ÃNDA n na n dʋ Soaala tãnga, ãnda n na n tɩ kẽ a ro-sõngẽ?” Pĩnd Israɛll Rĩm a Davɩɩd maana sʋk-kãngã sẽn kɩtd tɩ ned tagse, sẽn tɩ loe ne baleng ning a Zeova sẽn sakdã. Rẽ poore a leokame n yeele: “Yɩta nus sẽn pa rẽgem la sũ-tɩrg soaba, yɩta sẽn ka pʋgd-a wẽnga, kõn yɩ wẽen-faad soab ye.” (Yɩɩl Sõamyã 24:3, 4, Sebr Sõngo) A Zeova mengã yaa sõngo, dẽ ned ning fãa sẽn dat n ta a yam tog n yɩɩ yɩlemd la sõngo. A Zeova da reng n tẽega Israɛll tigingã neb woto: “Yãmb na n yɩlga y mense n lebg sõma tɩ mam yaa sõngo.”—Maankʋʋre 11:44, 45, Sebr Sõngo; 19:2.

2. Wãn to la a Poll la a Zak wilg vẽeneg tɩ yɩlemdã yaa bũmb sẽn tar yõod wʋsg sɩd balengã pʋgẽ?

2 Yʋʋm kobs loogr poore, tʋm-tʋmd a Poll gʋlsa a kiris-nin-taas sẽn da be Kolosã, sẽn da yaa galʋ-tẽng t’a neba vɩɩm manesem sãama woto: “M zo-nongdse, tõnd sẽn tar kãabg kãensã, bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.” (2 Korẽnt dãmba 7:1) Woto leb n wilgda yɛs tɩ ned sã n dat n tall zems-n-taar ne Wẽnnaam la a paam keoor nins a sẽn kãabã, dẽnd a yɩ yɩlemd la a ra tall rẽgd la bũmb sẽn yaa wẽng yĩngã la tẽebã wɛɛngẽ ye. Woto me, a Zak sẽn da wa n gʋlsd baleng ning sẽn tat Wẽnnaam yamã wɛɛngẽ wã, a yeelame: “Wẽnnaam d Ba wã tũudum hakɩka la woto: kɩɩb-bi la pʋg-kõap yell gesgo, la b zu-loees yolsgo n paas zãag-m-meng ne zamaana rẽgd buud fãa.”—Zak 1:27, Sebr Sõngo.

3. D sã n dat tɩ Wẽnnaam sak tõnd balengã, bõe la d tog n tʋlg n tũ ne d sũur fãa?

3 Sẽn mik tɩ sɩd balengã pʋgẽ, tara yõod wʋsg tɩ ned yɩ yɩlemd la sõngã, ned ning fãa sẽn dat n ta Wẽnnaam yam segd n tʋlg n tũu Wẽnnaam noyã ne a sũur fãa zĩ-kãensã wɛɛngẽ. La rũndã-rũndã neba noy la b tagsa sẽn yaa toɛy-toɛy wʋsg ne taab yɩlemdã wɛɛngẽ wã, d segdame n bãng bũmb ning a Zeova sẽn get tɩ yaa yɩlemd la a sakdẽ wã la d tũ rẽ. D segdame n bao n bãng bũmb ning Wẽnnaam sẽn baood t’a balemdbã maan zĩ-kãngã wɛɛngẽ, la bũmb ning a sẽn zoe n maan sẽn na yɩl n sõng-b tɩ b lebg neb sẽn yaa yɩlem la sẽn tat a yamã, la b kell n pa woto wã.—Yɩɩl Sõamyã 119:9; Daniɛll 12:10.

Yɩlma sɩd balengã yĩnga

4. Wilg-y yɩlemdã võor sẽn ya a soab sã n yaa ne Biiblã.

4 Sã n yaa ne neb wʋsgo, yɩ yɩlemd rat n yeelame bal tɩ f ra bas tɩ bũmb dẽgem f yĩng bɩ f teoog ye. La Biiblã pʋgẽ, Hebre la Gerɛk gom-biis wʋsg la b tũnug ne n wilg tagsg ning sẽn tɩ loe ne yɩlemdã. Gom-bi-kãens bilgda yĩngã yɩlemd yaa sɩda, la naoor wʋsg a sẽn tɩ bilgd n yɩɩd yaa yɩlemdã vɩɩm manesmã la tũudmã wɛɛngẽ. Rẽ n so tɩ Biiblã kɩbay wɛgsg sebr a yembr yeel woto: “B ka wɛ n tũnugd ne gom-biis nins sẽn yaa ‘yɩlemd’ la ‘sẽn pa yɩlemdã’ b sã n wa gomd yĩng yɩlemd yell ye, sẽn yɩɩd fãa gom-bi-kãensa tɩ loee ne tũudum yɛla. Sã n yaa ne võor wilgr a woto, ‘yɩlemdã’ yaa bũmb sẽn pak ned vɩɩm nens fãa la bala.”

5. Hal sẽn ta zĩ-bʋg la a Moiiz Tõogã kõ noy yɩlemdã wɛɛngẽ Israɛll neba vɩɩm pʋgẽ?

5 Sɩda, a Moiiz Tõogã ra tara noy sẽn tɩ loe ne Israɛll nebã vɩɩm nens toɛy-toɛy fãa la bala, n wilgd bũmb ning sẽn da yaa yɩlemd la sẽn sakda, la bũmb ning sẽn da ka yɩlemd la sẽn ka sakda. Wala makre, Maankʋʋr sak 11 n tɩ ta 15 pʋsẽ, d yãta noy wʋsg sẽn wilgd bũmb nins sẽn yaa yɩlem la bũmb nins sẽn ka yɩlma. Rũms kẽer ra yaa rẽgd tɩ Israɛll nebã ka segd n dɩ-b ye. Biig rogem ra kɩtdame tɩ pag yaa rẽgd wakat takɩ pʋgẽ. Yĩn-gãong bãase, sẽn yɩɩd fãa wãoodo, n paas rẽgd sẽn na n yit pag bɩ rao taoorẽ kɩtdame tɩ ned lebg rẽgd me. Tõoga me leb n wilga bũmb ning ned sẽn da segd n maane, a sã n wa lebg rẽgdo. Wala makre, Sõdbo 5:2 pʋgẽ, d karemdame: “Yeel Israɛll neba tɩ b yiis wãooba ne dʋʋdsẽneg [“pʋg-sãbg buud,” NW ] sẽn tar neb ninsã la neb nins sẽn sɩɩs kũum n lebg rẽgda b sika zĩigẽ.”

6. Bõn-datl bʋg yĩng la b sẽn da kõ noyã yɩlemdã wɛɛngẽ wã?

6 Sãmbg sẽn ka be, no-kãensã la noy a taabã a Zeova sẽn kõ wã ra wilgda yɛl yĩngã tɩbsg la yĩngã sẽn tʋmd to-to wã wɛɛngẽ, hal daar zãr tɩ bãngdbã ra nan ka mi b tiir ye. La neba sã n da tũ no-kãensã nafd-b lame. Baasg zãngã, b ra pa kõ no-kãensã tɩ b yaa sor-wilgr noy laafɩ wã wɛɛngẽ bal ye. Ra naaga sɩd balengã pʋgẽ. No-kãensa ra tɩ loee ne neba daar fãa vɩɩm yɛla, sẽn yaa rɩɩbo, rogem, kãadem la yɛl a taaba. Woto fãa ra yaa sẽn na yɩl n wilg vẽeneg tɩ b Wẽnnaam a Zeova ra tara sore, n na n wilg bũmb ning sẽn zems la bũmb ning sẽn ka zems b vɩɩmã b sẽn da rɩk n kõ a Zeova zãngã nens fãa pʋsẽ.—Tõodo 7:6; Yɩɩl Sõamyã 135:4.

7. Israɛll buudã sã n da sak Tõogã, bark bʋg la a ra na n paamẽ?

7 Tõogã ra kogenda Israɛll neba me ne tẽn-yagsã tʋʋm dẽgdo. Israɛll nebã sã n da sak Tõogã wakat fãa, noy nins fãa sẽn baood tɩ b yɩ yɩlem Wẽnnaam nifẽ wã sẽn paase, b ra na n tõog n balma a Zeova tɩ ta a yam n paam a lohorem. Zĩ-kãngã wɛɛngẽ, a Zeova yeela buudã woto: “Yãmb sã n sak mam koɛɛga la y sak mam kãabgã, yãmb na n lebga mam neb buuda fãa sʋka. Tɩ bõe, dũniyã fãa yaa maam n so. La yãmb buuda na n yɩɩ maan-kʋʋdba la neb sẽn welg mam yĩnga.”—Yikri 19:5, 6; Tõodo 26:19.

8. Bõe yĩng tɩ b sẽn yeel bũmb ning Tõogã pʋgẽ yɩlemdã wɛɛngẽ wã segd n pak kiris-nebã rũndã-rũndã?

8 Sẽn mik tɩ ya a Zeova n ning no-kãensã Tõogã pʋgẽ n na n zãms Israɛll nebã tɩ b bãng b sẽn na n maan to-to n yɩ yɩlma, sõmse, la b ta a yamã, rẽ yĩnga rũndã-rũndã ka zems tɩ kiris-nebã gũus neer n ges b sẽn tũud no-kãensã to-to sɩda? Baa ne Tõogã tũub sẽn ka tɩlae ne kiris-nebã, wa a Poll sẽn wilgã b segd n ninga b yamẽ tɩ bũmb nins b sẽn da gʋls Tõogã pʋgẽ wã “yaa bũmb nins sẽn na n wa wã mamsgo, la bũmba meng yaa Kirist.” (Kolos rãmba 2:17; Hebre dãmba 10:1) Wẽnnaam a Zeova sẽn yeel tɩ ‘mam ka tekã’ sã n da getame tɩ yɩ yɩlemdã ra yaa bũmb sẽn tar yõod wʋsg sɩd balengã pʋgẽ wakat kãnga, rũndã-rũndã d sã n dat n ta a yam n paam a barka, d ka tog n ges yɩlemdã yĩngã, vɩɩm manesmã, la tẽebã wɛɛngẽ wã wa reem bũmb ye.—Malaki 3:6; Rom dãmba 15:4; 1 Korẽnt dãmba 10:11, 31.

Yĩngã yɩlemd wilgdame tɩ d zemsame

9, 10. a) Bõe yĩng tɩ yĩngã yɩlemd tar yõod wʋsg ne kiris-neda? b) Bõe la neba nong n yet a Zeova Kaset rãmbã tigis-kãsems wɛɛngẽ?

9 Yĩngã yɩlemd ket n yaa sɩd balengã bõn-kãseng a yembr bɩ? Baa ne yĩngã yɩlemd bal sẽn ka sek a na kɩt tɩ ned yɩ Wẽnd balemd hakɩkã, yaa vẽeneg tɩ zemsame tɩ balemd hakɩk yɩ yɩlemd yĩngã wɛɛngẽ wa sẽn zems ne a tõogo. Sẽn yɩɩd fãa, tõnd wakatã neb wʋsg sẽn ka manegd b mense, b futu, la b sẽn vɩ zĩis ninsã tɩ yaa yɩlma yĩngã, neb nins sẽn manegd-b mens n yaa yɩlmã manesem pukda vẽeneg tao-tao neba nifẽ. Rẽ tõe n woma biis sẽn yaa sõma, wa a Poll sẽn da yeel Korẽnt kiris-nebã woto wã: “Tõnd maoodame n ka rat n lub neda ba a sẽn yaa ne bũmb ninga ye, tɩ ned da gom Wẽnnaam tʋʋmda wẽng ye. La ne bũmb fãa tõnd maanda sẽn zems Wẽnnaam tʋm-tʋmdba.”—2 Korẽnt dãmba 6:3, 4.

10 Naoor wʋsgo tẽng taoor dãmb pẽga a Zeova Kaset rãmbã b yɩlemdã, b sẽn ka yaarã, la b sẽn tar waoogr manesmã yĩnga, sẽn yɩɩd fãa b tigis-kãsemsẽ wã. Wala makre, zʋrnall La Stampa yeela woto tigis-kãseng b sẽn maan Itali porvẽns ning sẽn boond tɩ Savona wã pʋgẽ tɩ: “F sã n pasgd tigis-kãsengã zĩigẽ, zĩig pʋgẽ bala bũmb ning f sẽn yãt vẽeneg yaa neb nins sẽn tigim zĩigẽ wã yɩlemd la b yɛlã sẽn ka yaarã.” São Paulo sẽn be Berzillã ɛstaadẽ, Kaset rãmb tigis-kãseng poore, ɛstaada taoor soab a yembr yeela a ɛstaadã pɩɩsdb la a pɛkdb sull taoor soab woto: “Rũndã tɛka, d ratame tɩ y manegd ɛstaadã t’a yɩ yɩlemd wa a Zeova Kaset rãmbã sẽn maan to-to wã.” Ɛstaad kãng taoor soab a to yeela woto: “A Zeova Kaset rãmbã sã n dat ɛstaadã n luaase, bũmb nins sẽn pak-d yaa b sẽn na n maan b tigis-kãsengã wakat ningã bala. Sã n ka rẽ, bũmb ka leb n be n yɛɛsd tõnd ye.”

11, 12. a) Tõnd mengã yɩlemd wɛɛngẽ, Biiblã no-bʋs la d segd n ning d yamẽ? b) Sʋgs-bʋs la b tõe n sʋk tõnd mengã minund la d sẽn vɩ d vɩɩmã to-to wã wɛɛngẽ?

11 Yɩlemdã, la yaarã sẽn ka be tõnd balengã zĩigẽ wã sã n tõe n kɩt tɩ neb pẽg Wẽnnaam ning tõnd sẽn balemdã, yaa vẽeneg tɩ tara yõod me tɩ d tall zʋg-sõma a woto d mengã vɩɩm pʋgẽ. Baasg zãngã, d yiri d tõeeme n wa tagsdẽ tɩ d tara sor n na n bas d mens yaar n maan d sẽn date. Futã ningr la mengã manegr wɛɛngẽ, yaa vẽeneg tɩ yaa tõnd n yãkd d sẽn tagsd tɩ zemsame la be yamleoogo! La naoor wʋsgo, d ka tõe n maan d sẽn datã zãng-zãng ye. Tẽeg-y t’a Poll sẽn da wa n sõsd rɩɩb kẽer ned kam fãa sẽn tar sor n tõe n dɩ wã zugã, a keooga a kiris-nin-taasã tɩ: “Bɩ y gũus tɩ yãmb lohorma ra lub neb nins tẽeb sẽn paooda ye.” Rẽ poore a wilga noor sẽn tar yõodo, n yeele: “Lohorem beeme tɩ maan bũmb fãa, la a ka bũmb fãa n be yõod ye. Lohorem beeme tɩ maan bũmb fãa, la a ka bũmb fãa n sõngd ye.” (1 Korẽnt dãmba 8:9; 10:23) Yɩlemdã wɛɛngẽ, wãn-wãn la a Poll saglga pak tõndo?

12 Yaa bũmb sẽn zemse, tɩ neba gũudẽ tɩ Wẽnnaam sõgen yɩ yɩlemd la a ra yɩ yaar soab a vɩɩmã pʋgẽ ye. Woto yĩnga, d segdame n modg tɩ d zakã yalẽ, a pʋgẽ la poor zems ne d sẽn yet tɩ d yaa Wẽnnaam Gomdã koe-moondbã. Kaset bʋg buud la tõnd zakã kõt tõnd mengã la d tẽebã zutu? Rẽ yĩnga, wilgdame tɩ d sɩd ratame n vɩɩmd tɩrlem dũni paalgã tõnd sẽn moond nebã, sẽn yaa yɩlemd la sẽn ka tar yaarã pʋgẽ bɩ? (2 Pɩɛɛr 3:13) Woto me, yaa pemsem kokr wakat tɩ yaa koe-moonegã wakat me, tõnd mengã yalẽ tõe n paasame bɩ a boog koɛɛg ning tõnd sẽn moondã yamleoog ne nebã. Wala makre, ges-y kɩba-kɩt a yembr sẽn yeel Megsiki: “Sɩda, a Zeova Kaset rãmbã sʋka, kom-bɩɩsã yaa wʋsgo, la m sẽn ne bũmb ning n yɩɩd bãmb nengẽ yaa b zoobdã wõrsgo, b yɩlemdã, la b futã ningr sẽn zemsã.” Ad d sũur nooma d sẽn tar kom-bɩɩs a woto d sʋkã!

13. Bõe la d tõe n modg n maan tɩ tõnd daar fãa vɩɩmã nens fãa pʋsẽ bɩ d yɩ yɩlma, la d ra yɩ neb sẽn yaa yaare?

13 Yaa sɩd tɩ modg tɩ tõnd mengã, d sẽn so wã, la d zakã yɩ yɩlem la kɛpɩ wakat fãa wã ka nana ye. La ka tɩlae tɩ d paam nasaar te-bɛd bɩ teed ligd sẽn yaa toog n tõog n maan dẽ ye, d sẽn baood yaa sigl d mengã yɛl sõma la d maand modgr wakat fãa. D tog n yãa sẽk wakat fãa n sood koom, n manegd d zakã tɩ yaa yɩlemde, n pɛgsd d futã, d bõn-zombdsã la d teed a taabã. Tõnd moonda koe-noogã, n debd tigissã, n maand d meng zãmsgo, la d get bõn-yood a taab yell daar fãa. La d ka segd n dõd bõn-kãensã d sẽn maandã n ka yɩ yɩlemd la d tall yalẽ sẽn sakd Wẽnnaam la ninsaalb taoore, wa d sẽn segdã ye. Noor ning d sẽn mi sõma wã sẽn yet tɩ ‘bũmb fãa tara a wakatã’ paka tõnd vɩɩmã nen-kãngã me.—Koɛɛg Soaba 3:1.

Sũur sẽn pa rẽgme

14. Bõe yĩng tɩ b tõe n yeel tɩ vɩɩm manesmã la tẽebã yɩlemd tara yõod meng n yɩɩd yĩngã yɩlemde?

14 Yaa bũmb sẽn tar yõod wʋsg tɩ d ges d yĩngã yɩlemd yelle, la leb n tara yõod n yɩɩd meng tɩ vɩɩm manesmã la tẽebã yɩlemd pak-do. D yeta woto, bala d tẽrame t’a Zeova sẽn da bas Israɛll buudã, ra ka tɩ b yaa rẽgd yĩngã wɛɛngẽ ye, la yaa b vɩɩm manesmã la b tẽebã sẽn da sãamã yĩnga. A Zeova tũnuga ne no-rɛɛs a Ezai n yeel tɩ b sẽn yaa “buud sẽn yaa koangdba, yel-wẽn maandba” yĩngã, b maandã, b ki-paalsa kibs rãmb ne b vʋʋsg daarã, ne b pʋʋsgã meng ra ka noom-a ye. Bõe la b ra segd n maan n leb n paam Wẽnnaam lohorem? A Zeova yeelame: “Bɩ y so koom n maneg y mens n yɩ sõama. Yiis-y yãmb tʋʋm wẽnsa mam nifẽ n bas wẽnga.”—Ezai 1:4, 11-16.

15, 16. A Zezi yeelame tɩ bõe n dẽgemd neda, la wãn to la a Zezi goamã tõe n naf tõndo?

15 Sẽn na yɩl n bãng n paas tɩ vɩɩm manesmã la tẽebã yɩlemd tara yõodo, bɩ d ges a Zezi sẽn yeel bũmb ninga, Fariziẽ rãmbã sẽn da wa n yetẽ t’a karen-biisã ka yɩlma, b sẽn da ka pɛgsd b nus n dɩtẽ wã yĩnga. A Zezi yeela woto n dems b tagsgã: “A ka bũmb ninga sẽn kẽed ninsaal noorẽ wã n maand-a t’a yɩ rẽgd ye, yaa bũmb ninga sẽn yit ninsaal noorẽ wã n maand t’a yɩ rẽgdo.” Rẽ poore, a Zezi wilga woto: “Bũmb ninga sẽn yit noorẽ yita sũurẽ, la yaa bõn-kãng n maand ned t’a yɩ rẽgdo. Tɩ bõe, tags wẽnse la nin-kʋʋbo la yoob buud fãa la wagdem ne ziri la kãnegre yita sũur pʋgẽ. Yaa bãmb n maand ned t’a yɩ rẽgdo. La tɩ rɩ ne nus sẽn ka nudgi, yõ wã ka maand ned t’a yɩ rẽgd ye.”—Matɩe 15:11, 18-20.

16 Bõe la a Zezi gom-kãensã zãmsd tõndo? A Zezi ra wilgdame tɩ yaa ned sũur tʋlsem sẽn yaa wẽnse, sẽn yaa yoob tʋlsem, la sẽn yaa rẽgd n wat ne tʋʋm wẽnse, yoobo, la tʋʋm dẽgdo. Wa karen-biig a Zak sẽn yeelã, “ned kam fãa tara makr a meng wẽnga ratem sẽn makd yẽnda n bẽt yẽnda.” (Zak 1:14, 15) Dẽ, tõnd sã n ka rat n wa maan yel-wẽn-kãsems nins a Zezi sẽn bilgã, dẽnda d yiis tʋlsem wẽns a woto d sũurẽ n da tol n bas tɩ b zĩnd be ye. Woto wilgdame tɩ d tog n maana gũusg ne bũmb nins d sẽn karemdã, d sẽn getã la d sẽn kelgdã. Rũndã-rũndã, nebã sẽn tar sor n tõe n yeel b sẽn dat la b tʋm b sẽn datã yĩngã, sẽn yiisd-b reemã la sẽn maand-b piblisite wã yiisda bõn-yood ka tɛk tɩ neb kelgdẽ la b getẽ, sẽn pidsd yĩngã sẽn pa zems zãngã raabo. D segd n dɩka sard sẽn ka vigsd n da bas tɩ tagsa a woto kɩ yẽg d sũurã pʋgẽ ye. Bũmb ning sẽn tar-a yõod n yɩɩdã yaa tɩ d sã n dat n noog Wẽnnaam sũur la d ta a yam, wakat fãa d tog n maana gũusgu, sẽn na yɩl n kell n tall d sũurã t’a yɩ yɩlemde.—Yelbũna 4:23.

Neb b sẽn pek tɩ b yaa yɩlema, tʋʋm sõma yĩnga

17. Bõe yĩng la a Zeova sẽn kɩt t’a nin-buiidã yaa yɩlma?

17 Sãmbg sẽn ka be, a Zeova sẽn sõng-d tɩ d tõe n yɩ yɩlem a taoorã sɩd yaa zu-no-kãseng la koglg ne-do. (2 Korẽnt dãmba 6:14-18) La d leb n miimi me t’a Zeova kɩtame t’a nin-buiidã yaa yɩlem bõn-datl takɩ yĩnga. A Poll yeela a Tɩt tɩ Kirist Zezi “kõo bãmb meng tõnd yĩnga n fãag tõnd ne yel-wẽna fãa la b kɩt tɩ tõnd lebg bãmb neb b sẽn pek tɩ yɩ sõama, la tɩ tõnd wɩng ne tʋʋm sõama maanego.” (Tɩt 2:14) D sẽn yaa neb b sẽn pek tɩ d yaa yɩlma, d segd n wɩnga ne tʋʋm sõma bʋs maanego?

18. Wãn to la d tõe n wilg tɩ d wɩngda ne tʋʋm sõma maanego?

18 Pipi, d segd n modga wʋsg n togs nebã Wẽnnaam Rĩungã koe-noogo. (Matɩe 24:14) D sã n maan woto, zĩig fãa d kãabda neba saagr ning sẽn yaa wa paam n vɩɩmd wakat sẽn-kõn-sa tẽng zugu, zĩig ning rẽgd buud ba a ye sẽn ka na n leb n zĩndã. (2 Pɩɛɛr 3:13) Tʋʋm sõma kãens me leb n baoodame tɩ d puk Wẽnnaam vʋʋsem sõngã biis d daar fãa vɩɩmã pʋgẽ, n kõ d saasẽ Ba wã ziiri. (Galat dãmba 5:22, 23; 1 Pɩɛɛr 2:12) Sẽn paase, d leb n ka yĩmd neb nins sẽn ka be sɩdã pʋgẽ wã, tɩ sabaab rãmb la yel-beed namsd-bã ye. D ningda a Poll sagl-kãngã d yamẽ: “Woto yĩnga, tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.” (Galat dãmba 6:10) Tʋʋm a woto fãa, sũur sẽn yaa yɩlemd la yam-tusdi sẽn yaa sõma sẽn tusd tõnd tɩ d maanã, nooma Wẽnnaam.—1 Tɩmote 1:5.

19. Tõnd sã n kell n tũ yɩlemd noy sẽn yaa sõma wʋsg yĩngã wɛɛngẽ, vɩɩm manesmã la tẽebã wɛɛngẽ, bõn-sõma bʋs la d na n wa paame?

19 D sẽn yaa Zãntlem Sẽn-ka-to soaba sõgen dãmbã, d tũuda a Poll sagl-kãngã: “M ba-biisi, mam kota yãmb ne Wẽnnaam nimbãan-zoeere, tɩ y kõ y yĩnsa tɩ yɩ maan-vɩɩs sẽn yaa sõma la sẽn zems Wẽnnaam yam. La yõ wã zemsa yãmb maanego.” (Rom dãmba 12:1) Bɩ d kell n tall naneb ne zu-noog ning d sẽn tar n yaa neb a Zeova sẽn yɩlgã, la d maan d sẽn tõe fãa, n kell n tũ yɩlemd noy sẽn yaa sõma wʋsgã yĩngã wɛɛngẽ, vɩɩm manesmã wɛɛngẽ, la tẽebã wɛɛngẽ. D sã n maan woto, na n kɩtame tɩ d tall meng waoogr la sũ-noog masã, la sẽn paase d na n leb n paama saagr ning sẽn yaa yã “dẽenem bũmb fãa” wã, sẽn yaa masã zamaan wẽngã sẽn dẽgmã loogre, wakat ning Wẽnnaam sẽn na n ‘maan bũmb fãa paalsã.’—Wilgri 21:4, 5.

Yãmb tẽrame bɩ?

• Bõe yĩng tɩ b ra kõ Israɛll nebã noy wʋsg yɩlemdã wɛɛngẽ?

• Wãn to la yɩlemd yĩngã wɛɛngẽ kɩtd tɩ koɛɛgã tõnd sẽn moondã be yamleoog ne nebã n yɩɩda?

• Bõe yĩng tɩ vɩɩm manesmã la tẽebã yɩlemd tar yõod n yɩɩd yĩngã yɩlemde?

• Wãn to la d tõe n wilg tɩ d yaa neb sẽn ‘wɩngd ne tʋʋm sõma maanego’?

[Zãmsgã sogsgã]

[Foto rãmba, seb-neng 29]

Yɩlemd yĩngã wɛɛngẽ kɩtdame tɩ koɛɛgã tõnd sẽn moondã be yamleoog ne nebã n yɩɩda

[Foto, seb-neng 30]

A Zezi keoogame tɩ tags-wẽns n wat ne tʋʋm wẽnse

[Foto rãmba, seb-neng 31]

A Zeova Kaset rãmbã yaa neb b sẽn yɩlge, sẽn wɩngd ne tʋʋm sõma maanego