Y tõe n paama tẽeb hakɩka

A Saray Jayne sẽn da wa n tar yʋʋm 19, a bãngame t’a tara bãag ning b sẽn boond tɩ kãnsɛɛrã a rogsẽ wã. Wopeerã poore, a yĩnsã ra sãoome, t’a ye paam saagr ne beoog-daare. A saagrã ra yaa wʋsg hali n kɩt t’a sẽn da wa n tar yʋʋm 20, a sɩnga gɛɛl n dat n kẽ kãadem. Yʋʋm kãng bal la kãnsɛɛrã ye lebg n wa, t’a bãng t’a ra tara semen a wãn bal n na n vɩɩmde. A Sarah Jayne kii yʋʋmd 2000, sigr kiuugã, a sẽn da wa n pẽneg yʋʋm 21.

BŨMB ning sẽn ling nebã sẽn da wat n get a Sarah Jayne logtorã yir a gãagẽ wã, ra ya a sẽn da tar bas-m-yam beoog-daarã wɛɛngẽ tɩ rabeem kaẽ wã, n paas a sẽn da tar tẽeb kãseng ne Wẽnnaam la ne a Gomdã sẽn yaa Biiblã. Baa ne a sẽn da be yel-be-kãseng pʋgẽ wã, a ra kɩsa sɩd ne vʋʋgrã, n da saagdẽ t’a ra na n leb n yãa a zo-rãmbã fãa yɛsa. (Zã 5:28, 29) “Mam na n yãa yãmb fãa Wẽnnaam dũni paalgã pʋgẽ,” woto la a yeel-yã.

Neb kẽer yetame tɩ tẽeb kãng buudã yaa zãmsdo. A Ludovic Kennedy sʋkame tɩ “Laasr yaa bõe n zʋʋg neb yam sẽn yood sẽn tẽed tɩ yaoolem bargã peebgẽ rɩ-nood n na n zĩndi, tɩ Edɛn zĩ-neer n na n zĩnd tɩ b paam sũ-noog be ne neb nins sẽn deng bãmbã la ne neb a taab sẽn na n wa bãmb poorẽ wã?” Rẽ wɛɛngẽ wã d pa sak ye. Bõe n zems n yɩɩda, tẽ tɩ “vɩ-kãngã tɛk la woto, tɩ d segd n dɩ a nafr wa d sẽn tõe tɛk” wala a Kennedy sẽn yetã, bɩ yaa d sẽn na n tẽ Wẽnnaam la vʋʋgrã kãabgo? A Sarah Jayne yãkame n na n tẽ Wẽnnaam la vʋʋgrã. Yaa wãn to la a bɩɩs tẽeb a woto?

 “Bao-y Wẽnnaam . . . la y sɩd yã-a”

F sã n dat n bɩɩs tẽeb ne ned la f teeg-a, rẽnda f bãng-a la f bao n bãng a tagsg la a tʋʋm manesem. Sũurã ne yamã kẽeda sʋka. Sɩd yaa woto, f sã n dat n bɩɩs tẽeb hakɩk ne Wẽnnaam. Y segd n bãng-a lame, n zãms n bãng a zʋg-sõma wã la a nedemdã, n yã a sẽn zems ne bas-yard to-to, la b sẽn tõe n teeg-a to-to yɛl nins fãa a sẽn yeel la a maana pʋgẽ.—Yɩɩl Sõamyã 9:11; 145:1-21.

Kẽer tagsdame tɩ rẽ pa tõe ye. B yetame tɩ Wẽnnaam zãra wʋsgo, t’a yaa yel-solemde, rẽ me ya a sẽn na n beẽ. Sãmb-sãmb rãmbã sʋkda woto: “Wẽnnaam sã n sɩd yaa vẽeneg wa sẽn wẽnd yaa to-to ne kiris-neb wa a Sarah Jayne, bõe yĩng t’a pa kɩtd tɩ tõnd me bãng-a woto?” La Wẽnnaam sɩd zãra wʋsg tɩ b pa tõe n bao n yã-a bɩ? Tʋm-tʋmd a Poll sẽn da wa n gomd ne filozof rãmb la bãngdb Atɛn tẽngã, a yeelame tɩ “Wẽnnaam sẽn naan dũniyã ne bũmb nins fãa sẽn be a pʋgẽ” wã leb n kõo bũmb nins fãa sẽn yaa tɩlaeyã tɩ b “bao[-a] . . . n yã.” Sɩda, a Poll yeelame: “Bãmb ka zãr ne tõnd fãa ye.”—Tʋʋma 17:24-27.

Rẽ, wãn to la y tõe n “bao Wẽnnaam . . . n yã”? Kẽer maana woto, b sẽn ges ãndũniyã sẽn gũbg bãmbã bala. Ne neb wʋsgo, ãndũniyã meng kõta kaset sẽn sek sẽn na yɩl tɩ b sak tɩ Naand n segd n beẽ. * (Yɩɩl Sõamyã 19:2; Ezai 40:26; Tʋʋma 14:16, 17) B tagsda wa tʋm-tʋmd a Poll tɩ “bũmb nins sẽn naan hal dũniyã naanega wakata pukda Wẽnnaam zemsgo nin sẽn ka tõe n yã ye, la bãmb pãnga sẽn ka sɛta la bãmb wẽnego hal tɩ b lebg vẽenes wa nin sẽn tõe n yã.”—Rom dãmba 1:20; Yɩɩl Sõamyã 104:24.

Biiblã yaa tɩlae ne-yã

La sẽn na yɩl n tall tẽeb hakɩk ne Naandã, bũmb a to a sẽn kõ la y segd n talle. Yaa bõe? Yaa Biiblã, sẽn yaa Wẽnnaam Gomd a vʋʋsem sõngã sẽn vẽneg tɩ b gʋlsã, t’a raabã la a sẽn na n maan bũmb ninsã be pʋgẽ be wã. (2 Tɩmote 3:16, 17) La ned tõe n yeelame tɩ: “Yaas-y ka. Wãn to la f tõe n tẽ Biiblã sẽn yetã, f sã n ne bõn-wẽns nins neb nins sẽn yet tɩ b tũuda Biiblã sẽn maandã?” Yaa sɩd tɩ dũni kiris-nedemdã sẽn tʋm tɩ loogã ka neer baa bilf ye. Sɩda, a talla zãmbo, a maana neb pãnga, a maana yoobo. La ned buud fãa sẽn tagsd tɩrg tõe n yãame tɩ dũni kiris-nedemdã yetame bal t’a tũuda Biiblã noy n yaool n pa tũud-b ye.—Matɩe 15:8.

Biiblã meng n keoogd tɩ neb wʋsg ra na n yeelame tɩ b balemda Wẽnnaam, n yaool n ‘kɩɩsd Zusoaba sẽn dag n da bãmba.’ Tʋm-tʋmd a Pɩɛɛr yeelame tɩ “bãmb yĩnga, neb na n goma sɩd sor wẽnga.” (2 Pɩɛɛr 2:1, 2) A Zezi Kirist yeelame tɩ nin-kãensã ra yaa “tʋʋm wẽns maandba,” tɩ b tʋʋm-wẽnsã ra na n kɩt tɩ b bãng-b vẽenega. (Matɩe 7:15-23) F sã n zãgs Wẽnnaam Gomdã dũni kiris-nedemdã tʋʋm wẽnsã yĩnga, yaa wala f sẽn na n lobg lɛtr f zoa f sẽn tar kɩs-sɩd ne sẽn tool-fo, ned ning sẽn wa ne lɛtrã sẽn pa tar yʋ-noogã yĩng bala.

Wẽnnaam Gomdã sã n kaẽ, ned pa tõe n paam tẽeb hakɩk ye. Yaa Biiblã pʋgẽ bal la a Zeova wilgd a sẽn tagsd to-to ne yɛlã. A kɩtdame tɩ b bãng sʋgsg nins nebã sẽn maand wakat fãa wã leoore, wala bũmb ning sẽn kɩt t’a bas tɩ namsg la toog beẽ wã, la a sẽn na n maan bũmb ning rẽ wɛɛngẽ wã. (Yɩɩl Sõamyã 119:105; Rom dãmba 15:4) A Sarah Jayne wa n tẽeme tɩ Biiblã yaa Wẽnnaam Gomd vʋʋsem sõngã sẽn vẽneg tɩ b gʋlse. (1 Tesalonik rãmba 2:13; 2 Pɩɛɛr 1:19-21) Wãn to? Pa a roagdbã sẽn togs-a wã yĩng bal ye, la ya a sẽn dɩk sẽk ne pʋ-peelem n vaees kaset ning fãa sẽn wilgd tɩ Biiblã yaa vẽnegr sẽn pa wõnd a to sẽn yit Wẽnnaam nengẽ wã. (Rom dãmba 12:2) Wala makre, a yãame tɩ Biiblã tara pãng neb nins sẽn tũud a noyã vɩɩm zugu. Ne sɛb sõngr wala La Bible : Parole de Dieu ou des hommes ? * sebrã, a leb n vaeesa kaset wʋsg sẽn be Biiblã pʋgẽ sẽn wilgd tɩ yaa Wẽnnaam vʋʋsem sõngã n vẽneg tɩ b gʋls-a.

 “Kelgr wata ne tẽebo”

Baasg zãnga, pa sek bal tɩ d tar Biiblã bɩ d tẽ bal tɩ yaa vʋʋsem sõngã n vẽneg tɩ b gʋls-a ye. Tʋm-tʋmd a Poll gʋlsame n wilg tɩ “kelgr wata ne tẽebo.” (Rom dãmba 10:17) Yaa Biiblã kelgr n kɩtd tɩ f tall tẽebo, la pa f sẽn na n tar Biibl bal ye. Yãmb ‘kelgda’ bũmb ning Wẽnnaam sẽn dat n togsã, y sã n karemd a Gomdã la y zãmsd-a. Kamb meng tõe n maana woto. A Poll yeelame tɩ ‘hal a Tɩmote yãadem wakate,’ a ma wã la a yaab poakã ra zãms-a-la “Gʋlsg Sõamyã.” Woto rat n yeelame tɩ b lebga a zugã ne zãmsg buud bɩ? Ayo! B ra pa soog a Tɩmote yamã bɩ n belg-a ne manesem ba a yembr ye. B kɩtame t’a ‘bãng’ tɩ bũmb nins a sẽn wʋm la a karma “yaa sɩdã.”—2 Tɩmote 1:5; 3:14, 15.

Yaa woto me la b kɩt t’a Sarah Jayne tẽ. Wala yʋʋm pipi kob-gĩndẽ Beere nebã, a ‘deega Wẽnnaam koɛɛga [a roagdbã la karen-saam dãmb a taab nengẽ] ne a sũurã fãa.’ A sẽn da wa n yaa bi-kɩdga, sãmbg sẽn ka be, a ra tara tẽeda ne a roagdbã sẽn yet-a wã nana-nana. A sẽn wa n bɩ, a pa sak bũmb nins fãa b sẽn zãms-a wã zond-yaar ye. A ‘baoo Gʋlsg Sõamyã pʋgẽ n na n bãng bũmb nins b sẽn yet yẽ wã sã n yaa tɩrga.’—Tʋʋma 17:11.

Y tõe n talla tẽeb hakɩka

Yãmb me tõe n talla tẽeb hakɩka, tẽeb ning buud tʋm-tʋmd a Poll sẽn bilg a lɛtr ning a sẽn taas Hebre kiris-nebã pʋgẽ wã. A yeelame tɩ tẽeb a woto “yaa bãngr sũur pʋgẽ tɩ tõnd na n paama bũmb nins tõnd sẽn gũuda, la a yaa kaset sũur pʋgẽ tɩ bũmb n be neb sẽn ka yãt ye.” (Hebre dãmba 11:1) Y sã n tar tẽeb a woto wã, y na n kɩsa sɩd zãng fasɩ tɩ y saagrã la bũmb nins fãa y sẽn gẽegdã, tɩ Wẽnnaam sẽn kãab vʋʋgrã be sʋkã, na n pidsame. Y na n kɩsa sɩd tɩ saagr kãens yẽbga yɛl sẽn tar bas-yard kaset zugu, la pa yɛl d sẽn tʋll n paam zut bal ye. Y na n bãngame t’a Zeova zɩ n vaal a kãabsã pidsg ye. (Zozue 21:45; 23:14; Ezai 55:10, 11; Hebre dãmba 6:18) Dũni paalgã Wẽnnaam sẽn kãabã na n yɩɩ sɩd ne yãmb wala a zoe n bee masã. (2 Pɩɛɛr 3:13) La ne y tẽebã nini, y na n yãa vẽeneg tɩ Wẽnnaam a Zeova, a Zezi Kirist la Wẽnnaam Rĩungã yaa yel-sɩda, pa mams-zaal ye.

B pa bas-y tɩ y mao y yembr n tall tẽeb hakɩk ye. A sẽn kɩt tɩ b tõe n paam a Gomdã nana-nana wã toor sẽn ka be, a Zeova leb n kõo kiris-neb tigingã sẽn be dũniyã gill zugã, sẽn  maood n sõngd sũ-tɩrs rãmbã tɩ b tall tẽeb ne Wẽnnaam. (Zã 17:20; Rom dãmba 10:14, 15) Sak-y sõngr ning fãa a Zeova sẽn kõt ne a siglgã maasem yĩngã. (Tʋʋma 8:30, 31) La sẽn mik tɩ tẽebã yaa Wẽnnaam vʋʋsem sõngã biigã, bɩ y pʋʋs wakat fãa sẽn na yɩl tɩ vʋʋsem kãng sõng-y tɩ y bɩɩs tẽeb hakɩkã.—Galat dãmba 5:22.

La ra bas-y tɩ sãmb-sãmb rãmbã sẽn laad ned ning fãa sẽn yet t’a tẽeda Wẽnnaam ne a Gomdã koms y raood ye. (1 Korẽnt dãmba 1:18-21; 2 Pɩɛɛr 3:3, 4) Sɩda, tẽeb hakɩkã tara yõod wʋsg sẽn na yɩl n kõ yãmb pãng tɩ y mao ne kɩɩsg a woto. (Efɛɛz rãmba 6:16) A Sarah Jayne yãame tɩ woto yaa sɩda, la wakat fãa, a sõnga neb nins sẽn wa n ges-a logtor yirã tɩ b tall tẽebo. A ra yeta neba woto: “Sak-y sɩdã ne y sũur fãa. Zãms-y Wẽnnaam Gomdã. Pa-y n pẽneg Wẽnnaam siglgã. Pʋʋs-y wakat fãa. Ket-y n maand a Zeova tʋʋmdã.”—Zak 2:17, 26.

A logto-poak a yembr sẽn da ne t’a tara tẽeb ne Wẽnnaam la ne vʋʋgrã, a yeelame: “Fo sɩd tẽeda woto, bɩ bõe?” B sẽn sok-a bũmb ning sẽn kõ-a saagr a woto baa ne a sẽn be toog pʋgẽ wã, a leokame: “Yaa m sẽn tar tẽeb ne a Zeova wã yĩnga. A yaa mam zoa hakɩka, la m nong-a-la wʋsgo.”

[Tẽngr not rãmbã]

[Foto, seb-neng a 6]

‘Hal a Tɩmote yãadem wakate,’ a ma wã la a yaab poakã zãms-a-la “Gʋlsg Sõamyã”

[Foto, seb-neng a 6]

B pẽga Beere nebã, b sẽn da vaeesd Gʋlsg Sõamyã daar fãa wã yĩnga

[Fotã sẽn yitẽ]

A yita “Photo-Drame de la création” sẽn yi yʋʋmd 1914 pʋgẽ

[Foto rãmba, seb-neng a 7]

Yaa Biiblã kelgr la a tũub n kɩtd tɩ f tall tẽebo, la pa f sẽn na n tar-a bal ye

[Foto, seb-neng a 7]

“Mam na n yãa yãmb fãa Wẽnd dũni paalgã pʋgẽ”