Ges-y sẽn be pʋgẽ wã

Ges-y sẽn be sebrã pʋgẽ

Tẽeb hakɩkã: Ket n tõeeme bɩ?

Tẽeb hakɩkã: Ket n tõeeme bɩ?

 Tẽeb hakɩkã: Ket n tõeeme bɩ?

“Tẽeb yaa kɩs-sɩd sẽn tar pãng ne Wẽnnaam nimbãan-zoeerã, a yaa bũmb sẽn yaa waazib hali n kɩt tɩ tẽedã tõe n dɩk a vɩɩmã n tik a zug naoor tusa.”—MARTIN LUTHER, 1522.

“Tõnd fãa la bal bee nin-buiid sʋk kiris-neb tẽebã la a minund sẽn tar saab wʋsg n debda.”—LUDOVIC KENNEDY, 1999.

NEBÃ tagsg ne tẽebã yaa toɛy-toɛy wʋsg ne taaba. Pĩndã, nebã ra nong n tẽeda Wẽnnaam. Rũndã-rũndã zãmaana neb sẽn tar sãmb-sãmbã, tɩ namsgã beẽ wã me kɩtame tɩ tẽeb hakɩk ne Wẽnnaam la ne Biiblã tar meneng tʋʋll-tʋlle.

Tẽeb hakɩkã

Ne neb wʋsgo, “tẽeb” yaa f sẽn na n tar tũudum, bɩ n tʋmd baleng tʋʋmde. Baasg zãnga, sã n yaa ne Biiblã, “tẽeb” rat n yeelame tɩ kɩs-sɩd zãnga, bas-yard sẽn pa vigsd ne Wẽnnaam la ne a kãabsã. Yaa bũmb sẽn welgd a Zezi Kirist karen-biig toore.

Vugri, a Zezi Kirist wilgame tɩ d segdame “n da yɛ” ne pʋʋsg ye. A sẽn yeel woto wã, a maana sʋkr n gese tẽeb hakɩkã sã n da na n zĩnda tõnd wakatã. A sʋkame: “Ninsaal Biiga sã n wa, b na n yãa tẽeb dũniyã zugu?” Bõe yĩng t’a maan sʋk-kãngã?—Luk 18:1, 8.

Tẽeb sẽn menem

Yɛl wʋsg n tõe n kɩt tɩ nebã menems tẽeb buud fãa b sẽn tare. Vɩɩmã daar fãa sũ-sãams la a yel-tood bee yel-kãens sʋka. Wala makre, porfesɛɛr a Michael Goulder da yaa tũudum taoor soab Mansɛstɛɛr sẽn be Ãngeletɛɛrã, sasa ning sɩlg sẽn lʋɩ yʋʋmd 1958 Munik tɩ Mansɛstɛɛr Yunaitid ball tãoodb wʋsg ki wã. Bibisi televiziõ wã kɩba-kɩt a Joan Bakewell wilgame t’a Goulder “da pa mi a sẽn maandg nebã sũ-sãang kãsengã taoor ye.” Rẽ kɩtame t’a “ka leb n tar tẽeb ne Wẽnnaam sẽn kẽesd a toog ãdem-biisã yɛlẽ ye.” A Goulder togsame t’a tẽedame tɩ “Biiblã pa . . . Wẽnnaam gomd  sẽn pa tudgd ye,” sẽn yaa lebende, a yeelame t’a yaa “ninsaalb gomd sẽn tar tudgri, la tõe t’a tara Wẽnnaam vẽnegr zĩis kẽere.”

Wakat ninga tẽeb satame bala. Yɩɩ woto ne gʋlsd la kɩba-kõt a Ludovic Kennedy. A yeelame tɩ sẽn sɩng a yãadem wẽnde, “sãmb-sãmb [Wẽnnaam wɛɛngẽ] n da wat a yamẽ wã, tɩ kɩt [t’a] tẽebã basg paam pãnga.” Yaa wa ned ba a yembr da pa tõe n leok a sʋgsgã tɩ zems ye. A ba wã kũum mogrẽ wã ra yaa bũmb a sẽn da pa gũudi, sẽn koms a tẽebã sẽn da zoe n ka pãng baa bilfã hal wʋsgo. B sẽn pʋʋs Wẽnnaam t’a “kogl tõnd ne mogrã zug yɛl la ne bɛ wã” a pa reeg ye. A ra tagsda Alemayn zabr koom kogendã sẽn sãam koom koglg ning pʋgẽ a ba wã sẽn da beẽ wã yelle, Dũni gill Zabr a Yiib n soabã sasa wã.—All in the Mind—A Farewell to God.

Ra-kãngã pa a yembr yel-kãngã buud pʋg ye. Tʋm-tʋmd a Poll yeelame tɩ “ka fãa n tar tẽeb ye.” (2 Tesalonik rãmba 3:2) Yãmb tagsg yaa wãn to? Tẽeb hakɩk ne Wẽnnaam la ne a Gomdã ket n yaa bũmb sẽn tõe dũni sẽn tar sãmb-sãmb n paasdẽ pʋgẽ bɩ? Ges-y sõsg ning sẽn pʋgdã sẽn yet bũmb ning yel-kãngã zugu.