Ges-y sẽn be pʋgẽ wã

Ges-y sẽn be sebrã pʋgẽ

“Bɩ yãmb gũusi”

“Bɩ yãmb gũusi”

 “Bɩ yãmb gũusi”

“Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.”—MATƖE 24:42.

1. Wãn-wãn la neb sẽn sõgen a Zeova hal sẽn kaoos tagsd ne yʋʋm wʋsg nins b sẽn dɩk n sõgen ne yẽesma? Kõ-y makre.

NEB wʋsg sẽn sõgend a Zeova hal sẽn kaoos bãnga sɩdã b sẽn da yaa kom-bɩɩs wakate. Wala toand ning sẽn yã kĩndf yõod sẽn yaa wʋsg n koos a sẽn da tara fãa sẽn na yɩl n da-a wã, nin-kãensã sẽn nong Biiblã zãmsgã kɩɩsa b mens n dɩk b vɩɩmã n kõ a Zeova. (Matɩe 13:45, 46; Mark 8:34) B tagsg yaa wãn-wãna, b sẽn da segd n gũ tɩ kaoos n yɩɩg bãmb sẽn da gũud sẽn na yɩl n yã Wẽnnaam daabã pidsg ne tẽngã? B pa maand m bãngẽ ye! B sak n deega Saam-biig a Alexander Macmillan sẽn sõgen Wẽnnaam ne yẽesem yʋʋm 60 la balã sẽn yeel woto rẽ poorã: “M dɩka sard kãn-kãe n yɩɩd pĩndã n na n ket n kẽngd taoor m tẽebã pʋgẽ. A kɩtame tɩ mam vɩɩmã tall võor ne-ma. A ket n sõngda maam tɩ m get beoog-daarã tɩ rabeem kaẽ ye.”

2. a) Sagl-bʋg sẽn zems a wakat la a Zezi kõ a karen-biisã? b) Sʋgs-bʋs la d na n vaees sõs-kãngã pʋgẽ?

2 Yaa wãn to yẽ ne yãmba? Baa yãmb yʋʋmã sẽn yaa to-to, ges-y a Zezi gom-kãensã: “Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.” (Matɩe 24:42) Gom-nana kãngã tara sɩd sẽn tagem. Tõnd pa mi daar ning Soaalã sẽn na n wa pids bʋ-kaoorã yɛl siglg wẽng kãngã zugu, la pa tɩlae ne tõnd tɩ d bãng rẽ ye. La d segdame n vɩɩmd d vɩɩmã sẽn na yɩl t’a sã n wa me bɩ d ra maan m bãngẽ ye. Rẽ wɛɛngẽ, mak-bʋs la d yãt Biiblã pʋgẽ sẽn na n sõng tõnd tɩ d ket n gũusdẽ? Wãn-wãn la a Zezi maan bilgr n wilg tɩ woto yaa tɩlae? La kaset bʋg la d tar rũndã-rũndã sẽn wilgd tɩ d vɩɩ dũni kãngã sẽn yaa wẽn-kɩɩs dũniyã yaoolem daya?

Makr sẽn yaa keoogre

3. Wãn-wãn la neb wʋsg wõnd a Nowe wakatẽ nebã rũndã-rũndã?

3 Rũndã-rũndã, yɛl wʋsg pʋsẽ nebã yaa wa roap la pagb nins sẽn vɩɩmd a Nowe wakatã. Wakat kãngã tẽngã ra pida ne nen-kɛglem, tɩ ninsaal sũurã “tagsg fãa yaa wẽng bala.” (Sɩngre 6:5) Neb wʋsg sẽn yɩɩd ra fõr n kẽe vɩɩmã daar fãa tʋʋmẽ wã. Sẽn deng t’a Zeova wa ne sãoong Sa-kãsengã, a kõo nebã sor tɩ b tek yam n kos sugri. A yeela a Nowe t’a moone, la a Nowe sakame, n yɩ “tɩrlem koe-moaanda,” tõe t’a maana rẽ yʋʋm 40 bɩ 50 bɩ sẽn yɩɩd woto. (2 Pɩɛɛr 2:5) Baasg zãnga, neba pa kelg a Nowe keoogrã ye. B ra pa gũusd ye. Baasgo, saabã  sasa, ra yaa a Nowe la a zakã bal n põs a Zeova bʋ-kaoorã pidsgu.—Matɩe 24:37-39.

4. Wãn-wãn la b tõe n yeel t’a Nowe ministɛɛrã tõogame, la wãn-wãn la d tõe n yeel woto me ne yãmb moonegã tʋʋmde?

4 A Nowe ministɛɛrã ra tõogame bɩ? Ra tik-y neb sõor bilfã sẽn sakã n yeel t’a tʋʋmdã yɩɩ sõma bɩ a pa yɩ sõma ye. Sɩd-sɩda, a Nowe moonegã ta a bõn-datlã, baa nebã manesem sẽn yɩ a soab fãa. Bõe yĩnga? Bala tʋʋmdã kõo nebã sor tɩ b yãke, b sã n da na n sõgena a Zeova bɩ b sã n da pa na n sõgen-a. Yaa wãn to ne teritoaar ning pʋgẽ yãmb sẽn moondã? Baa nebã sã n pa wʋsg n sakdẽ me, y paamda tõogr kãsenga. Bõe yĩnga? Bala ne y sẽn moondã, y togsda Wẽnnaam keoogrã, la woto y pidsda tʋʋmd ning a Zezi sẽn bobl a karen-biisã.—Matɩe 24:14; 28:19, 20.

B pa kelg Wẽnnaam no-rɛɛsdbã ye

5. a) Yel-bʋs n da be Zida wʋsg a Habakuk wakatã, la neba manesem yɩɩ wãn-wãn ne a koɛɛgã sẽn yaa bãngr-goamã? b) Wãn-wãn la Zida nebã wilg kisgr ne a Zeova no-rɛɛsdbã?

5 Yʋʋm kob-gĩn sãoong Sa-kãsengã poore, Zida rĩungã talla zu-loees wʋsgo. Bõn-naands pʋʋsgã, kɛgrã, wẽgbã la nin-kʋʋrã meng ra yaa yɛl sẽn wɛ. A Zeova yika a Habakuk t’a keoog nin-buiidã tɩ b sã n pa tek yam n kos sugri, Kalde bɩ Babilon nebã ra na n waa ne yel-beed b zutu. (Habakuk 1:5-7) La nin-buiidã zãgsa kelgre. Tõe tɩ b tagsa woto: ‘Ges-y, maana sẽn yɩɩd yʋʋm koabg no-rɛɛs a Ezai sẽn moon keoogr kãngã, la baa fʋɩ nan pa wa la!’ (Ezai 39:6, 7) Zida nin-kãsems wʋsg toog ra kae ne koɛɛgã yembo, la sẽn paase, b ra kisa koe-taasdbã. Vugri, b makame n na n kʋ no-rɛɛs a Zeremi, la b ra na n tõogẽ lame, a Ahikam sã n da pa kẽesẽ a toogo. A sũur sẽn yik ne koɛɛg a to sẽn yaa bãngr-gomde, Rĩm a Zehoyakim kɩtame tɩ b kʋ no-rɛɛs a Uri.—Zeremi 26:21-24.

6. Wãn-wãn la a Zeova kõo a Habakuk pãnga?

6 A Habakuk koɛɛgã me ra yaa raood koɛɛga, la a ra yaa koɛɛg nin-buiidã sẽn da pa nonge, wa a Zeremi koɛɛgã. Wẽnnaam vʋʋsmã ra vẽnega a Zeremi t’a reng n togs tɩ Zida ra na n lebga raboog yʋʋm 70 yĩngã. (Zeremi 25:8-11) Woto yĩnga, d tõe n wʋma a Habakuk sũ-sãangã võore, a sẽn wa n yãbd n yet woto wã: “Zusoaba, yaa wakat a wãn la m na n bool yãmb tɩ y wa sõng-m tɩ y ka wʋm? Mam kelmame n bool yãmb wẽnga yĩnga, la yãmb ka fãag tõnd ye.” (Habakuk 1:2) Ne ninbãan-zoeere, a Zeova leoka a Habakuk ne gom-kãensã sẽn kengd tẽebã: “A wakata nan ka ta ye, la a pidsga kolgda tao-tao. Mam sẽn na n wilg foom bũmb ninga ka na n vaal ye. Ba a sã n wẽnd wa a kaoosdame, bɩ f gũ-a. Wakat ninga mam sẽn na n yãkã, a na n maaname n ka vaal ye.” (Habakuk 2:3) Woto, a Zeova ra “yãka wakat” n na n kɩt tɩ kɛgrã la wẽgbã sa. Baa sã n da wõnd kaoosdame tɩ looge, a Habakuk ra pa segd n koms raood ye, a ra pa segd me n maag ye. Sẽn yaa lebende, a ra segd n ‘ket n gũudame,’ n vɩ daar fãa ne yãgdem yam. A Zeova daarã ra pa na n kaoos tɩ loog a waoongã wakat ye!

7. Bõe yĩng tɩ sãoong a to ra gũud Zerizalɛm yʋʋm kob-yendẽ T.W.?

 7 A Zeova sẽn gom ne a Habakukã yʋʋm 20 poor la b sãam Zerizalɛm sẽn yaa Zida na-tẽngã. B lebs n me-a-la kaoosg poore, la rɩ tɩ wẽng wʋsg nins sẽn da sãam a Habakuk sũur wʋsgã ra paama remsgo. La yʋʋm kob-yendẽ T.W., galʋ-tẽngã ra gũuda sãoong yɛsa, a nebã sẽn ye pa kɩs-sɩd dãmbã yĩnga. Ne ninbãan-zoeere, a Zeova rɩka segls sẽn na yɩl tɩ pʋ-peelem dãmbã põse. So-kãngã, a tũnug ne no-rɛɛs kãseng a Zezi Kirist mengã n taas koɛɛgã. Yʋʋmd 33 T.W., a Zezi yeela karen-biisã: “Yãmb sã n wa yã tɩ sodaas wʋsg gũbg Zerizalɛm, dẽ, bɩ y bãng t’a sãoong kolgame. Wakat kãnga neb nins sẽn be Ziide, bɩ b zoe n kẽng tãens zutu.”—Luk 21:20, 21.

8. a) Tõe tɩ bõe n paam kiris-neb kẽere, wakat sẽn loog a Zezi kũumã poorã? b) Wãn-wãn la a Zezi bãngr-goamã Zerizalɛm zugã paam pidsgu?

8 Yʋʋmã sẽn tall loogrã sasa, tõe tɩ kiris-neb kẽer sẽn da be Zerizalɛm ra rat n bãnga wakat bʋg la a Zezi bãngr-gomdã ra na n paam pidsgu. Yãmb we n ges maan-m-meng maoong nins bãmb neb sãnda sẽn da maan tɩ sãmbg ka be wã. Tõe tɩ b ra basa leebg tʋʋm sẽn da kẽesd ligd wʋsg b sẽn da kãabd-b tɩ lʋɩ, b sẽn dɩk sard kãn-kãe n na n ket n gũusdẽ wã yĩnga. La tarẽ-n-tarẽ, b wa n yaame bɩ? B wa n baas n yeelame tɩ b ra sãamda b sẽka, n tagsdẽ t’a Zezi goamã ra paka zãmaan sẽn wat neba, la pa bãmb zãmaana neb bɩ? Yʋʋmd 66 T.W., a Zezi bãngr-gomdã sɩnga pidsgu, Rom tãb-biisã sẽn wa n gũbg Zerizalɛma. Neb nins sẽn kell n gũusã bãnga bãndã, n zoe n yi galʋ-tẽngã pʋgẽ, n paam n põs Zerizalɛm sãangã.

A bilgame n wilg tɩ d segd n yɩɩ gũusdba

9, 10. a) Wãn-wãn la y ra na n kʋms a Zezi bilgr ning sẽn tɩ loe ne yembs nins sẽn gũ tɩ b zu-soabã yi a pʋg-peegrã n wa wã? b) Bõe yĩng tɩ zu-soabã gũub yɩ bũmb sẽn tõe n da yaa toog ne yembsã? d) Bõe yĩng tɩ ra yaa nafr bũmb ne yembsã tɩ b tall maag-m-menga?

9 Sẽn na yɩl n wilg sõma n paas tɩ d segd n gũusame, a Zezi maka a karen-biisã ne yembs sẽn gũud b zu-soab sẽn na n yi a pʋg-peegrẽ n lebg n wa. B ra miime t’a ra na n lebg n waa yʋngo, la yaa wakat bʋgo? Yaa yʋngã pipi babgã bɩ? Yaa a babg a yiib-n-soabã sasa, bɩ yaa tãab-n-soabã sasa? Rẽ fãa b ra pa mi ye. A Zezi yeelame: “Bark bee tʋm-tʋmdb kãens zutu, [zu-soabã] sã n wa yʋʋn-sʋka wala no-kɛleng wakate n mik tɩ bãmb gũuda yẽnda.” (Luk 12:35-38) Yãmb we n mams n ges yembs kãensã gũubã ne yãgbã. Sãmbg sẽn ka be, sẽn yɩ pẽra fãa, bũmb sẽn yɩ lila fãa paasda b gũusgã: ‘Yaa tõnd zu-soabã bɩ?’

10 Yaa wãn to, zu-soabã sã n wa yʋngã wakat a yiib-n-soabã, sẽn da sɩngd yʋng nevɛɛr n tat yʋʋn-sʋkã? Yembsã fãa, neb nins sẽn da sɩng n tʋmd yibeoog pĩndã sẽn naage, ra na n segl n saame n pʋʋs-a ne a waoongo, bɩ kẽer da na n gũsame? Yaa wãn to, zu-soabã sã n da lebg n wa yʋngã babg a tãab-n-soabã sasa, wakat sẽn sɩngd ne yʋʋn-sʋk n digd yibeoog lɛɛr a tãab sẽnesã? Yembsã kẽer daood ra na n komsame, hal tɩ b sũy sãam ne b zu-soabã sẽn wõnd a kaoosdame wã bɩ? * Yaa neb nins bal b sẽn da na n mik tɩ b gũusda zu-soabã waoong sasa wã n da na n paam sũ-noogo. Yaa bãmb zut la Yelbũna 13:12 wã na n sɩd paam pidsgu: “Fo sã n ka paam f sẽn data tao-tao, fo sũur sãamdame. La f sã n wa paam-a raare, a lebgda wa vɩɩm tɩɩga.”

11. Wãn-wãn la pʋʋsg tõe n sõng tõnd tɩ d ket n gũusdẽ?

11 Sẽn da wõnd kaoosdame tɩ loogã sasa, ra yaa bõe n da na n sõng a Zezi karen-biisã tɩ b pa gũusg pʋgẽ? B sẽn da wa n be Gɛtsemane zẽedẽ wã, sẽn deng a yõkrã, a Zezi yeela a tʋm-tʋmdb a tãab woto: “Bɩ yãmb gũ la y pʋʋse n da wa kẽ makr ye.” (Matɩe 26:41) Yʋʋm loogr poore, a Pɩɛɛr sẽn da be be sasa kãnga kõo a kiris-nin-taasã sagl-kãngã buudu. A  gʋlsame: “Bũmb fãa sɛɛb wakat kolgame. Dẽ yĩnga, bɩ yãmb paam yam sõama la y gũusi la y wɩng ne pʋʋsgo.” (1 Pɩɛɛr 4:7) Vẽenega, pʋʋsg sẽn maan ne d sũur fãa segd n zĩnda d kiris-ned daar fãa tʋʋmã pʋsẽ. Sɩda, wakat fãa d segd n kota a Zeova sõngr sẽn na yɩl n ket n gũusdẽ.—Rom dãmba 12:12; 1 Tesalonik rãmba 5:17.

12. Bõe welgr n be mams-n-geelã la gũusgã sʋka?

12 Bãng-y t’a Pɩɛɛr yeelame me: “Bũmb fãa sɛɛb wakat kolgame.” A kolgame n ta zĩ-bʋgo? Ninsaalbã pa tõe n togs sẽn yaa daar la lɛɛr ning takɩ ye. (Matɩe 24:36) La kẽes f meng magb sẽn yaa mamsg pʋgẽ Biiblã sẽn sagend-d tɩ d lak d mens ne wã, yaa toor ne ket n gũusd saabã, Biiblã sẽn sagend tõnd tɩ d maana. (Mak-y ne 2 Tɩmote 4:3, 4; Tɩt 3:9.) Manesem a yembr tõnd sẽn tõe n ket n gũud saabã yaa bʋgo? Yaa d sẽn na n gũus neer n ges kaset ning sẽn wilgd tɩ saabã kolgame wã. Woto yĩnga, bɩ d lebg n ges yɛl a yoob sẽn wilgd tɩ d vɩɩ dũni kãngã sẽn yaa wẽn-kɩɩsã yaoolem dayã.

Yɛl a yoob sẽn yaa kaset b sẽn pa tõe n kɩɩse

13. Wãn-wãn la a Poll bãngr-gomd ning sẽn be 2 Tɩmote sak a 3 pʋgẽ wã kɩtd tɩ yãmb kɩs sɩd tɩ d vɩɩ “yaoolem wakate”?

13 Pipi, tõnd nee tʋm-tʋmd a Poll bãngr-gomd ning sẽn tɩ loe ne ‘yaoolem wakatã’ pidsg vẽenega. A Poll gʋlsame: “Yaoolem wakate tood na n zĩndame. Tɩ bõe, neba na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba la ma rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere la sũ-to neba, tẽng-kãn neba, neb sẽn ka tar yõk-m-menga, pʋto rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmba sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga. Lak ne bãmb dãmba. La nin-wẽnsa ne zãmb dãmba na n maana wẽng n paase, b na n belga neb a taaba la bãmb mens na n paama belgre.” (2 Tɩmote 3:1-5, 13) Tõnd pa ne bãngr-gom-kãngã sẽn pidsd tõnd wakatã sɩda? Yaa neb nins sẽn zãgsd yel-sɩdã bal n kɩɩsd woto! *

14. Wãn-wãn la goam nins sẽn be Wilgri 12:9 pʋgẽ sẽn tɩ loe ne Munaafɩɩkã paamd pidsg rũndã-rũndã, la bõe n na n paam-a ka la bilfu?

14 Yiib-n-soaba, d nee yɛl nins sẽn wa, b sẽn dig a Sʋɩtãan la a zĩn dãmbã n yiis saasẽ wã, tɩ pidsd Wilgr 12:9 wã. Be d karemda woto: “B riga dragõ kãsenga sẽn yaa wag-kʋdre sẽn boond tɩ diable la Sʋɩtãana sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk rãmba me tɩ b tũ yẽnda.” Rẽ waa ne yel-beed wʋsg tẽngã zugu. Sɩd-sɩda, yel-beed wʋsg n wa ãdem-biisã zutu, sẽn yɩɩd fãa yʋʋmd 1914 tɛka. La bãngr-gomd ning sẽn be Wilgr sebrã pʋgẽ wã paasdame tɩ sasa ning b sẽn dig Munaafɩɩkã t’a sig tẽngã zugã, a miime ‘t’a wakatã yaa bilfu.’ (Wilgri 12:12) Sasa kãngã pʋgẽ, a Sʋɩtãan zabda ne Kirist karen-biis nins sẽn zaeyã. (Wilgri 12:17) Sɩd-sɩda d nee a zabrã biis tõnd wakatã. * Baasg zãnga, ka la bilfu, b na n suya a Sʋɩtãan bog-zulungã pʋgẽ “t’a ka tõe n le belg neba sẽn be soolom toɛ-toɛya yɛs ye.”—Wilgri 20:1-3.

15. Wãn-wãn la Wilgri 17:9-11 kõt kaset tɩ d vɩɩ saabã wakate?

15 Tãab-n-soaba, d vɩɩ “rĩm” a nii soabã la baasg soabã yell b sẽn gom bãngr-gomd ning sẽn be Wilgri 17:9-11 pʋgẽ wã sasa. Beenẽ, tʋm-tʋmd a Zã gomda rĩm dãmb a yopoe yelle, sẽn makd dũni gill pãn-soaadb a yopoeyã sẽn yaa, Ezipt, Asiri, Babilon,  Medo-Pɛrs, Gerɛse, Rom, la Ãngletɛɛr ne Amerik sẽn lagem taab b yiib n yaa dũni gill pãn-soaadã. A leb n yãa “rĩm a nii soaba,” sẽn yit ‘a yopoe rãmbã’ pʋgẽ. Sã n yaa ne masã, rĩm a nii soab kãngã, yaoolem soabã a Zã sẽn yã wã makda O.N.U wã. A Zã yetame tɩ rĩm a nii soab kãngã “na n kẽnga sãoong zĩigẽ,” rẽ poore, b pa gom tẽng zug rĩm dãmb yell yɛs ye. *

16. Wãn-wãn la yɛl nins sẽn pidsd a Nebukadnezaar zãmsdã bõn-naandgã wilgd tɩ d vɩɩ yaoolem dayã?

16 Naas-n-soaba, d vɩɩ wakat ning a Nebukadnezaar zãmsdã pʋgẽ bõn-naandgã nao sẽn makdã. No-rɛɛs a Daniɛll wilga zãmsd kãngã sẽn yaa yel-solemd sẽn tɩ loe ne bõn-naandg sẽn yaa parwẽnd sẽn wõnd ninsaalã võore. (Daniɛll 2:36-43) Bõn-naandgã bõn-kug a naasã makda dũni gill pãn-soaadb toɛ-toɛya, sẽn sɩng ne zugã (sẽn yaa Babilon Soolmã) n ta nao wã la na-biyã (sẽn yaa goosneema nins sẽn dɩt naam masã wã). Dũni gill pãn-soaadbã fãa b sẽn mak bõn-naandg kãngã pʋgẽ wã waame. Tõnd vɩɩ wakat ning bõn-naandgã nao sẽn makdã pʋgẽ. B pa gom pãn-soaadb a taab waoong yell ye. *

17. Wãn-wãn la tõnd Rĩungã mooneg tʋʋmd kõt kaset n paasdẽ tɩ d vɩɩ saabã wakate?

17 Nu soaba, d nee moonegã tʋʋmd sẽn maand dũniyã gill zugu, a Zezi sẽn yeel tɩ ra na n zĩndame tɩ yɛl siglg kãngã yaool n sa wã. A Zezi yeelame: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) Rũndã-rũndã, bãngr-gomdã tara pidsg ne manesem d sẽn zɩ n yã. Yaa sɩd tɩ zĩis n be tɩ b nan pa moon ye, la tõe tɩ wakat ning a Zeova sẽn datã bɩ kʋɩleng pak tɩ b tʋm tʋʋmdã wʋsg n yɩɩd woto. (1 Korẽnt dãmba 16:9) Baasg zãnga, Biiblã pa yet t’a Zeova na n gũume tɩ ned kam fãa sẽn be tẽngã zug paam tɩ b kõ-a kasetã ye. Walla tɩ yɩ woto, koe-noogã segd n mooname tɩ ta wa a Zeova sẽn dat to-to wã. Yaa rẽ poor la saabã na n wa.—Mak-y ne Matɩe 10:23.

18. Vẽenega, bõe n na n yɩ sɩd ne neb kẽer sẽn zae, to-kãsengã sã n wa sɩnge, la wãn-wãn la d tõe n bãng rẽ?

18 Yoob-n-soaba, Kirist karen-biis nins sẽn sɩd paam zaeebã sõor boogdame, baa ne sẽn yaa vẽeneg tɩ to-kãsengã sɩngrẽ kẽer na n ket n vɩɩ tẽngã zugã. Kellã sẽn zaeyã neb wʋsg sẽn yɩɩd kʋʋlame, la yʋʋmã sẽn tong taabã pʋsẽ, neb nins sẽn sɩd paam zaeebã sõor talla yõbgre. Ne rẽ fãa, a Zezi goma to-kãsengã yell woto n yeele: “La ra-kãensã sã n ka booge, ned ba a ye kõn põs ye, la nin-tũusdsã yĩnga ra-kãens na n boogame.” (Matɩe 24:21, 22) Rẽnd vẽenega, Kirist ‘nin-tũusds’ sãnda na n ket n bee tẽng zug to-kãsengã sɩngrẽ. *

Yaa bõe n gũud-du?

19, 20. Bõe yĩng tɩ ne tõndo, masã yaa yãgb bũmb n yɩɩd pĩndã tɩ d ket n gũusdẽ?

19 Yaa bõe n gũud tõnd beoog-daare? Yaa yɛl sẽn nekd ratem la sẽn watã. A Poll keoogame tɩ “Zusoaba daar na n waa wa wagdr sẽn  wat yʋngo.” A sẽn gomd neb sẽn da wõnd b tara yam sã n yaa ne dũniyã nif gesg wɛɛngẽ, a yeelame: “Wakat ninga neba sẽn na n yeel tɩ laafɩ la yĩn-maasma, wakat kãng bala, toog na n paama bãmb[a].” Woto yĩnga a Poll sagenda a karemdbã woto: “Bɩ tõnd da gũs wa neb a taaba ye, la bɩ d gũusi n da tɩg ne rãam ye [la d tall d yam-vẽenemã, NW].” (1 Tesalonik rãmba 5:2, 3, 6) Sɩd-sɩda, neb nins sẽn teeg ninsaalbã sigls tɩ b wa ne laafɩ la bãanã pa get yɛlã ne sɩd ye. Neb a woto gõee hal wʋsgo!

20 Yɛl siglg kãngã sãoong na n waa ne tʋʋlem sẽn pa tõe n bãng n bilgi. Woto yĩnga, ket-y n gẽegd a Zeova daarã. A Zeova mengã yeela a Habakuki: “A ka na n kaoos tɩ loog a waoongã wakat ye”! (NW ) Sɩda, zɩ n yɩ yãgb n yɩɩd woto tɩ d ket n gũusdẽ ye.

[Tẽngr not rãmbã]

^ sull 10 Zu-soabã ra pa kõ a yembsã sɛk ye. Woto yĩnga, a pa tar kolg-n-togs ne-b a tʋʋmã wɛɛngẽ ye. Ra pa tɩlae me t’a togs-b bũmb ning fãa sẽn wõnd a kaoosame tɩ loogã võor ye.

^ sull 13 Sẽn na yɩl n yã sõsg sẽn gom bãngr-gom-kãngã yell n welge, bɩ y ges Bãngr Sẽn Tar n Debd Vɩɩm Sẽn-Kõn-Saẽ Wã sebr Watchtower Bible and Tract Society of Pennsylvania sẽn yiisã, sak 11.

^ sull 14 Sẽn na yɩl n paam kɩbay n paas bɩ y ges La Révélation: le grand dénouement est proche! sebrã Watchtower Bible and Tract Society of Pennsylvania sẽn yiisã, seb-vã-neng 180-6.

^ sull 15 Ges-y La Révélation: le grand dénouement est proche! seb-vã-neng 251-4.

^ sull 16 Ges-y Prêtons attention à la prophétie de Daniel! sebrã Watchtower Bible and Tract Society of New York, Inc. sẽn yiisã, sak a 4.

^ sull 18 Piisã la bʋʋsã yel-bũnd pʋgẽ, ninsaal Biriblã wata a ziirã pʋgẽ to-kãsengã wakat n zĩnded n na n kao bʋʋdo. A tikda nebã sã n teelame bɩ b pa teel Kirist saam-biis sẽn zaeyã zug n kao b bʋʋdã. No-kãngã zug b sẽn tikd n kaood bʋʋdã ra pa na n tall võore, sã n mik tɩ bʋʋdã wakate, Kirist saam-biisã fãa zoe n yii dũniyã hal sẽn kaoos ye.—Matɩe 25:31-46.

Y tẽrame bɩ?

• Gʋlsg Sõamyã mak-bʋs n tõe n sõng tõnd tɩ d ket n gũusdẽ?

• Wãn-wãn la a Zezi tũnug ne bilgr n wilg tɩ d segd n gũusdame?

• Kaset a yoob bʋs n wilgd tɩ d vɩɩ yaoolem dayã?

[Zãmsgã sogsgã]

[Foto rãmba, seb-neng a 3]

A Alexander Macmillan sõgena a Zeova ne kɩs-sɩd sẽn na maan yʋʋm pis-yoobe

[Foto, seb-neng a 4]

A Zezi maka a karen-biisã ne yembs sẽn ket n gũusdẽ