Ges-y sẽn be pʋgẽ wã

Ges-y sẽn be sebrã pʋgẽ

Sẽn wa n yaa Wẽnnaaam bal n dɩt naamã, laafɩ la zems-n-taar ra bee bõn-vɩɩsã fãa sʋka

Bõe yĩng tɩ Wẽnnaam Rĩungã yaa tɩlɛ ne-do?

Bõe yĩng tɩ Wẽnnaam Rĩungã yaa tɩlɛ ne-do?

Ninsaalbã naaneg tɛka, yaa d Naandã yʋʋr sẽn yaa a Zeova wã bal n da rɩt naam. Bũmb nins fãa a sẽn maan n kõ ninsaalbã yaa a sẽn nong-bã yĩnga. A maana zĩ-neer b sẽn boond tɩ Edɛnne, tɩ ninsaalbã na n vɩɩmd a pʋgẽ. Sẽn paase, a naana bũmb toor-toor b sẽn tõe n dɩ. A leb kõ-b-la tʋʋmd sẽn be yamleoog wʋsgo. (Sɩngre 1:28, 29; 2:8, 15) Ãdem-biisã sã n da kell n sak Wẽnnaam naamã, b ra na n zĩnda ne laafɩ.

D yaab a Ãdem ne a Awa zãgsa Wẽnnaam naamã

Biiblã wilgdame tɩ malɛk n lebg kɩɩsda, n yeel tɩ Wẽnnaam pa tar sor n na n dɩ naam ninsaalbã zug ye. Yaa malɛk-kãng la b sẽn wa n boond t’a Sʋɩtãanã. A yeelame tɩ ninsaalbã tõe n paama sũ-noogo, baa Wẽnnaam pa n wilgd-b sore, la a pa rɩt naam b zugu. Bʋko, d yaab a Ãdem ne a Awa tũu a Sʋɩtãan raabã, n kɩɩs Wẽnnaam.—Sɩngre 3:1-6; Vẽnegre 12:9.

A Ãdem ne a Awa sẽn tõdg tɩ Wẽnnaam kõn dɩ naam b zugã, b bõna arzãnã. B leb n da pa tõe n kell n yɩ neb sẽn zems zãnga, n paam n vɩɩmd wakat sẽn kõn sa ye. (Sɩngre 3:17-19) B yam-yãkrã waa ne zu-loees b kambã zug me. Biiblã yeelame t’a Ãdem beegrã yĩnga, ‘yel-wẽndã kẽe dũni wã, tɩ kũum tũ ne yel-wẽndã n wa.’ (Rom dãmbã 5:12) Yel-wẽndã waa ne yell a to me. Ad Biiblã sẽn yete: “Ninsaal tõe a to n maand-a wẽnga.” (Koɛɛg soaba 8:9) Koɛɛg-koɛɛga, ninsaalbã sã n dɩt naam, wakat fãa wata ne zu-loeese.

NINSAAL SẼN SƖNG NAAM RƖƖB WAKAT NINGA

A Nimrood kɩɩsa a Zeova naamã

Pipi ninsaal sẽn sɩng naam rɩɩb tɩ Biiblã gomd a yell yɩɩ a Nimroode. A kɩɩsa a Zeova naamã. Sẽn sɩng ne a Nimrood wakatã, rap sẽn tar tõog la pãng n tũnug ne rẽ n nams b taabã. Sẽn zems yʋʋm tus a 3 woto, rĩm a Salomo ra yeelame yaa: “Gese, b sẽn namsd-b rãmbã nintãm yitame, la ned ka belsd bãmb ye. Bãmb namsdbã tara pãnga.”—Koɛɛg soaba 4:1.

Rũndã-rũndã, yɛlã pa toeem ye. Yʋʋmd 2009 wã, Nasiõzĩni wã sebr a ye pʋgẽ, b wilgame tɩ nebã sẽn pa rɩt naamã sõma wã “yaa yel-kãseng a ye sẽn kɩt tɩ wẽngã fãa be rũndã-rũndã wã.”

WAKAT TAAME TƖ YƐLÃ SEGD N TOEEME!

Ãdem-biisã rata neb sẽn na n dɩ naamã sõma, la naam buud sẽn zemse. Yaa rẽ la tõnd Naandã pʋlem tõndo!

Baa ninsaalbã goosneema nins sẽn yaa sõma n yɩɩd b taabã pa tõog n welg ãdem-biisã zu-loees nins sẽn yaa kɛgemsã ye

Wẽnnaam lugla Rĩungu, bɩ goosneema sẽn na n ledg ninsaalbã goosneema-rãmbã, la sẽn na n ‘zĩnd wakat sẽn kõn sa.’ (Dãniyɛll 2:44) Yaa Rĩun-kãng yĩng la neb milyõ-rãmb sẽn pʋʋsda. (Matiye 6:9, 10) La pa Wẽnnaam meng n na n yɩ goosneema-kãng naab ye. A yãka ned sẽn zĩnd dũniyã zug ka, t’a na n yɩ Naaba. Yaa ãnda la Wẽnnaam yãk-yã?