1. A Zeova naana ninsaalbã tɩ bõe yaa tɩlɛ ne-ba? (Matiye 5:3)

 A ZEOVA naana ninsaalbã tɩ bũmb kẽer yaa tɩlɛ ne-ba. Wala makre, rɩɩbo, fut la gãag zĩig yaa tɩlɛ ne-do. Bõn-kãensã a ye sã n paoog-d baa yaa wakat bilf yĩnga, vɩɩmã lebgda toogo. La a Zeova miime tɩ bũmb a to n yaa tɩlɛ ne ninsaalbã. A naana tõnd tɩ d segd n bao-a. (Karm-y Matiye 5:3.) D sã n dat n paam sũ-noog hakɩɩka, yaa tɩlɛ tɩ d sak n deeg tɩ d segd n baoo Wẽnnaam, la d modgd n baood-a.

2. Mak-bʋg n wilgd d sẽn tõe n wilg to-to tɩ d ‘miime tɩ d segd n baoo Wẽnnaam’?

² Wilg tɩ d ‘miime tɩ d segd n baoo Wẽnnaamã’ rat n yeelame tɩ bõe? Gɛrkã gom-biis nins b sẽn lebg woto wã kɩtdame tɩ d tags bõaas sẽn kot sõngr yelle. Mams-y bõaas sẽn yer fu-kʋɩdse, n zĩ sor noore. A pa paamd n dɩtẽ tɩ sekd-a, tɩ kɩt t’a pa tar pãng wʋsg ye. A yalẽ wã kɩtame tɩ nebã pa rat n kolg-a ye. Wĩntoogo, wĩndgã pãbd-a lame. La yʋngo, waoodã namsd-a lame. Bõaasã miime t’a sã n dat t’a yɛlã toeeme, yaa tɩlɛ t’a paam sõngre. Woto me, ned sẽn mi t’a segd n baoo Wẽnnaam sak n deegame tɩ yaa tɩlɛ t’a paam Wẽnnaam sõngre, a sã n dat t’a yɛlã manege. Rẽ n so t’a maand a sẽn tõe fãa, n dɩt bũmb nins a Zeova sẽn maand neb nins sẽn nong-a wã yĩngã yõod sõma.

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ d na n deng n goma Fenisi pag sẽn kos a Zeezi sõngr yelle, n bao n bãng yam ning d sẽn tõe n dɩk a mak-sõngã pʋgẽ. A kibarã wilgda zʋg-sõma a tãab neb  nins sẽn mi tɩ b segd n baoo Wẽnnaamã sẽn segd n bɩɩse. Rẽ poore d na n goma tẽn-tʋmd a Pɩyɛɛr la a Poll ne rĩm a Davɩɩd yelle. B fãa wilgame tɩ b ra teega a Zeova t’a sõng-ba.

ZƲG-SÕMA A TÃAB SẼN YAA TƖLƐ NE-DO

4. Bõe la Fenisi pagã ra rat t’a Zeezi maane?

⁴ Daar a ye, Fenisi pag n wa a Zeezi nengẽ. ‘Zĩn n da tar a bi-puglã, n namsd-a wʋsgo.’ (Mat. 15:21-28) Pagã yĩgimda a rũmã zugu, n kos a Zeezi sõngre. Pʋg-kãng sẽn wa n wa a Zeezi nengẽ wã, a wilgame t’a tara zʋg-sõma sẽn tar yõodo. Bɩ d gom bãmb b wãn yelle.

5. Pagã wilgame t’a tara zʋg-sõma-bʋse, la a Zeezi manesem yɩɩ wãna? (Ges-y fotã me.)

⁵ Fenisi pagã wilgame t’a yaa sik-m-meng soabã. Bõe n kɩt tɩ d tõe n yeel woto? Bala a sũur pa yik ne a Zeezi sẽn leok-a to-to wã ye. A Zeezi gomame tɩ yaa wa a maka pagã ne ba-bil sẽn yaa rũng bu-zẽmsã neb sẽn wae n tar b zagsẽ wã. Sã n da yaa yãmb la a Zeezi sẽn yeel woto wã, y manesem na n yɩɩ wãna? Y na n tagsame t’a tʋʋs-y lame, n bas n pa le bao a sõngr bɩ? La Fenisi pagã pa maan woto ye. A ra yaa sik-m-meng soaba. La a maana bũmb a to me. A kell n pẽdga ne kosgo. Bõe n kɩt t’a maan woto? Yaa a sẽn da tẽed a Zeezi wã. Sɩd me, a Zeezi yãame tɩ pagã tẽebã tara pãnga, tɩ kɩt t’a yãk yam n sõng-a. Baa ne a Zeezi sẽn yeel tɩ b tʋma yẽ “Israyɛll buudã neb nins sẽn wõnd piis sẽn menemã nengẽ” wã balã, a riga zĩnã sẽn da namsd pagã sẽn yaa bu-zẽng nedã bi-puglã.—Mat. 15:24.

6. Yam-bʋg la d tõe n dɩk Fenisi pagã kibar pʋgẽ?

⁶ D sã n dat n bao Wẽnnaam, d segd n bɩɩsa pagã zʋg-sõma wã buudu. D segd n yɩɩ sik-m-meng soaba, ned sẽn tõe pẽdgre, la sẽn tar tẽeb sẽn tar pãnga. Yaa sik-m-meng soab bal n na n pẽdgd n kot Wẽnnaam sõngre. Sẽn paase, d segd n tẽe Kirist Zeezi ne d sũur fãa, la d kɩs neb  nins a sẽn tũnugd ne n wilgd a karen-biisã sorã sɩda. (Mat. 24:45-47) A Zeova ne a Zeezi sã n neẽ tɩ d yaa sik-m-mens rãmba, tɩ d pẽdgdame n kot b sõngre, la tɩ d tara tẽebo, b sũur noomame. D sã n maand woto, b na n sõngd-d lame la b wilgd-d sore. (Ges-y Zak 1:5-7.) Masã, bɩ d bao n bãng a Zeova sẽn wilgd-d sor to-to, la a sõngd-d ne bũmb nins sẽn yaa tɩlɛ sẽn na yɩl tɩ d paam sũ-noogã. D leb n na n yãa yam ning d sẽn tõe n dɩk tẽn-tʋmd a Pɩyɛɛr ne a Poll la rĩm a Davɩɩd nengẽ, tɩ sõng-d tɩ d rɩ bũmb nins a Zeova sẽn maand tõnd yĩngã yõodo.

D RƖK A PƖYƐƐR TOGS-N-TAARE, N KET N ZÃMSD WẼNNAAM GOMDÃ

7. Tʋʋm-bʋg la b kõ a Pɩyɛɛre, la bõe me la a ra segd n maane? (Ebre-rãmbã 5:14–6:1)

⁷ D gom tẽn-tʋmd a Pɩyɛɛr yelle. A sak n deegame t’a Zeezi n yaa Mesi wã, la t’a Zeova tũnugda ne-a n wilgd nebã “vɩɩm sẽn ka sɛt goama.” (Zã 6:66-68) Nand t’a Zeezi rʋ saasẽ a vʋʋgrã poore, a kõo a Pɩyɛɛr tʋʋmde, n yeel-a yaa: “Rɩlg mam pe-bi wã.” (Zã 21:17) A Pɩyɛɛr tʋma tʋʋm-kãng ne a sũur fãa. A Zeova pʋd n kɩtame t’a gʋls lɛta a yiib n tool a tẽed-n-taasã, tɩ lɛt-kãens be Biiblã pʋgẽ rũndã-rũndã. La a Pɩyɛɛr mengã ra segd n zãmsda Wẽnnaam Gomdã. Wala makre, a zãmsa lɛta nins Wẽnnaam sẽn vẽneg tẽn-tʋmd a Poll t’a gʋls tɩ naag Gʋls-sõamyã pʋgẽ wã. A Pɩyɛɛr sak n deegame tɩ bũmb nins a Poll sẽn gʋlsã kẽer “võor wʋmb yaa toogo.” (2 Pɩy. 3:15, 16) La a Pɩyɛɛr kell n pẽdga ne bõn-kãens zãmsgo, n kɩs sɩd t’a Zeova na n sõng-a lame t’a wʋm bũmb nins sẽn be a Poll lɛta wã pʋsẽ tɩ b tõe n dɩk n mak ne “rɩɩb sẽn yaa taokã” võore, la a sõng-a t’a tõog n tũ a sẽn na n bãngã.—Karm-y Ebre-rãmb 5:14–6:1.

8. A Pɩyɛɛr manesem yɩɩ wãna, a Zeova sẽn wa n tʋm malɛk t’a yeel-a t’a maan bũmb sẽn yaa toor ne a sẽn da minim n maandẽ wã?

⁸ A Pɩyɛɛr tẽebã sẽn da tar pãngã yĩnga, a ra tũuda noy nins a Zeova sẽn kõt-a wã. Wala makre, a sẽn wa n be Zope sẽn yaa tẽng sẽn be mogrã noorã, a paama vẽnegr tɩ malɛk yeel-a t’a kʋ rũms a Moyiiz tõogã sẽn da wilg tɩ yaa rẽgd n wãbe. Sã n yaa ne Zʋɩf-rãmbã, bũmb a woto pa sakd ye. Sɩngrẽ wã a Pɩyɛɛr yeelame yaa: “Zu-soaba, a bada. Bala m zɩ n dɩ bũmb sẽn kisi, wall bũmb tõogã sẽn wilg tɩ yaa rẽgd ye.” Tɩ b yeel-a yaa: “Da le bool bũmb nins Wẽnnaam sẽn yɩlgã tɩ rẽgd ye.” (Tʋʋ. 10:9-15) A Pɩyɛɛr sak n toeema a sẽn da get yɛlã to-to wã. Bõe n wilgd rẽ? A sẽn paam vẽnegrã poor bilfu, rap a tãab n wa. Yaa b zu-soab a Korney sẽn da yaa bu-zẽng nedã n tʋm-b tɩ b wa bool a Pɩyɛɛr t’a wa sõs ne-a. Sã n da yaa pĩndã, a Pɩyɛɛr da pa na n sak n kẽ bu-zẽng ned zakẽ ye. Zʋɩf-rãmbã ra getame tɩ bu-zẽmsã neb yaa rẽgdo. (Tʋʋ. 10:28, 29) La a Zeova sẽn wa n wilg a Pɩyɛɛr t’a ratame masã tɩ ned buud fãa wʋm koe-noogã, a sak n toeema a tagsgã zĩig pʋgẽ n tũ a Zeova raabã. (Yel. 4:18) A moona a Korney ne a zakã rãmb koe-noogã tɩ b sak sɩdã, n paam vʋʋsem sõngã la b reeg lisgu.—Tʋʋ. 10:44-48.

9. D sã n zãmsd bũmb nins sẽn be Wẽnnaam Gomdã pʋgẽ tɩ b võor wʋmb yaa toogã, tõe n nafa tõnd zĩis a yiib wɛɛngẽ. Bãmb la bʋse?

⁹ Tõnd me segd n zãmsda Wẽnnaam Gomdã zãms-nana wã b sẽn mak ne bĩismã wakat fãa wa a Pɩyɛɛre. La d segd n nonga rɩɩb sẽn yaa taokã me, rat n yeel tɩ bũmb nins võor wʋmb sẽn yaa toogã zãmsgo. D segd n baooda sẽk la d  maand modgr sẽn na yɩl n wʋm Wẽnnaam Gomdã võor sõma. La d modgrã pa na n yɩ zaalem ye. Bõe yĩnga? Na n naf-d-la zĩis a yiib wɛɛngẽ. Pipi, d na n bãngda a Zeova n paasdẽ, tɩ kɩt tɩ d maneg n nong-a la d waoogd-a. Yiibu, na n kɩtame tɩ d maneg n dat n gom d Ba sẽn be saasẽ wã sẽn yaa kãsengã yell ne neb a taabã. (Rom. 11:33; Vẽn. 4:11) A Pɩyɛɛr mak-sõngã leb n wilgda tõnd bũmb a to sẽn tar yõodo: B sã n wa toeem d sẽn da wʋmd Biiblã gomd ning võor to-to wã, d segd n yɩɩ tao-tao n sak n toeem d tagsa wã la d manesmã. Woto la d na n paam t’a Zeova ket n wilgd-d sore, tɩ d ket n tũud-a ne d sũur fãa.

D RƖK A POLL TOGS-N-TAARE, N YEELG NIN-PAALGÃ

10. Sã n yaa ne Kolos rãmb 3:8-10, bõe la d tõe n maan t’a Zeova sũur yɩ noogo?

¹⁰ D sã n dat n noog Wẽnnaam sũuri, d segd n dɩɩ bũmb a to a sẽn maand d sõngr yĩng yõodo: Yaa a sẽn wilgd-d sor sẽn na yɩl tɩ d bɩɩs zʋg-sõma sẽn tat a yamã. A vẽnega tẽn-tʋmd a Poll t’a yeel tɩ d segd n “yeega nin-kʋdgã,” la d “yeelg nin-paalgã.” (Karm-y Kolos rãmb 3:8-10.) Yɩl n yeelg nin-paalgã baooda sẽk la modgre. Yɩɩ woto ne a Poll mengã. Hal a bi-bɩɩlmẽ, a modga wʋsg sẽn na yɩl n ta Wẽnnaam yam. (Gal. 1:14; Fili. 3:4, 5) La a ra pa tar bãngr hakɩɩk Wẽnnaam daabã wɛɛngẽ, tɩ kɩt t’a ra maand yɛl sẽn pa tat Wẽnnaam yam. A sẽn da pa mi bũmb nins Kiristã sẽn zãms nebã n paas a sẽn da yaa wuk-m-meng soabã kɩtame t’a ra yaa “tɩta-neda,” la a tar zʋg-wẽns a taaba.—1 Tɩm. 1:13.

11. Bõe la a Poll ra segd n modg n toeeme, la bõe yĩnga?

¹¹ Nand t’a Poll lebg kiris-neda, a sũurã ra yikda tao-tao. Tʋʋm sebrã wilgame t’a Poll sũur ra yika wʋsg ne a Zeezi karen-biisã, t’a “bugsd-b t’a na n kʋ-b lame.” (Tʋʋ. 9:1) Yaa vẽeneg t’a Poll sẽn lebg kiris-nedã poore, a modga wʋsg n yeeg nin-kʋdgã, n bas sũ-yikrã. (Efɛɛ. 4:22, 31) Baa ne rẽ, yẽ ne a Barnabas moorã sẽn wa n yõsg taabã, waa ne “sũ-pu-kãseng” bãmb sʋka. (Tʋʋ. 15:37-39) So-kãnga, a Poll manesmã pa zems ne Wẽnnaam daabã ye. La a pa koms raood n bas ye. A ra ket n ‘pãbda a yĩngã,’ rat n yeel t’a ra ket n maooda ne a pãn-komsmã sẽn na yɩl n ta a Zeova yam.—1 Kor. 9:27.

12. Bõe n sõng a Poll t’a tõog n bas a zʋg-wẽnsã?

¹² A Poll tõog n basa zʋg-wẽnsã la a yeelg nin-paalgã, bala a ra pa teeg a meng pãng ye. (Fili. 4:13) A Poll ra teega “pãng ning Wẽnnaam sẽn kõtã” wa a Pɩyɛɛre. (1 Pɩy. 4:11) Baasgo, a Poll ra mi n kongame tɩ koms a raoodo. La a sã n da wa koms raoodo, a tẽegda bõn-sõma nins a Ba sẽn be saasẽ wã sẽn maan n kõ-a wã, tɩ kɩt t’a rat n kell n modg n ta a yam.—Rom. 7:21-25.

13. Wãn to la d tõe n dɩk a Poll togs-n-taare?

¹³ D tõe n dɩka a Poll togs-n-taare, n sak n deeg tɩ baa d sã n tũu a Zeova yʋʋm wʋsgo, d segd n ket n modgd n yeegda nin-kʋdgã, la d yeelgd nin-paalgã. D na n mi n kongame. Wala makre, d sũur tõe n yikame, pa rẽ bɩ d yeel gomd wall d maan bũmb n sãam d to sũuri. Sã n wa yaa woto, d pa segd n koms raoodo, n tagsdẽ tɩ d pa le tõe n ta a Zeova yam ye. La d segd n ket n modgd n toeemda d tagsa wã la d manesmã tɩ lebgd sõma n paasdẽ. (Rom. 12:1, 2; Efɛɛ. 4:24) D segdame me n tẽeg bũmb sẽn tar yõod wʋsgo:  Nin-paalgã pa wa fuug sɩd-sɩd ye. D tõe n manega fuug sɩd-sɩd tɩ zems ne tõndo, la yaa tõnd n segd n toeem tɩ zems ne nin-paalgã a Zeova sẽn dat tɩ d yeelgã. Zemsame tɩ d toeem sẽn na yɩl tɩ d sẽn vɩ to-to wã zems ne noy nins Wẽnnaam sẽn gãnegã.

D RƖK A DAVƖƖD TOGS-N-TAARE, N BAO KOGLG A ZEOVA NENGẼ

14-15. Wãn to la a Zeova kogend a nin-buiidã? (Yɩɩn-sõamyã 27:5) (Ges-y fotã me.)

¹⁴ Sẽn na yɩl n paam sũ-noog hakɩɩka, d segd n paamame me t’a Zeova kogl-do. Wãn to la a Zeova kogend tõndo, la bõe la d segd n maan n paam t’a kogl-do?

¹⁵ Rĩm a Davɩɩd ra kɩsa sɩd t’a Zeova na n kogl-a-la yel-pakr wakate. (Karm-y Yɩɩn-sõamyã 27:5.) Wãn to la a Zeova kogend a nin-buiidã rũndã-rũndã? A Zeova kogenda a nin-buiidã tɩ ned wall bũmb pa tõe n sãam b tẽebã wakat fãa yĩng ye. A pʋlmame tɩ zab-teoog ning fãa b sẽn na n maan n zab ne-b pa na n tõog ye. (Yɩɩn. 34:7; Eza. 54:17) Baa a Sʋɩtãan ne a poorẽ dãmbã sẽn tar pãngã, b pa tõe n maan tõnd wẽng tɩ tɩɩm kae ye. Baa b sã n kʋ tõndo, a Zeova na n wa vʋʋg-d lame. (1 Kor. 15:55-57; Vẽn. 21:3, 4) D sã n wa maand yɩɩr me, a Zeova sõngd-d lame sẽn na yɩl tɩ d ra wa koms raood n bas a tũub ye. (Yel. 12:25; Mat. 6:27-29) Sẽn paase, d Ba sẽn nong-dã kõ-d-la saam-biis la saam-bi-pogs sẽn kengd d raood la b teend-d toog wakate. A leb n yãka kãsem-dãmbã tɩ b get d yelle. (Eza. 32:1, 2) D tigissã sasa me, b tẽegd-d-la bũmb a taab d sẽn tõe n maan n paam t’a Zeova kogl-do.—Ebre. 10:24, 25.

16. Wãn to la a Zeova kogl a Davɩɩde?

¹⁶ A Davɩɩd sẽn wa n sakd a Zeova wã, a ra sõngd-a lame t’a bãngd n yãkd yam tɩ sõng-a t’a pa maan yel-wẽnd ne yamleoog tɩ wa tar-a n namsdẽ ye. (Ges-y Yel-bũn 5:1, 2.) La a sẽn wa n kɩɩs a Zeova noyã, a Zeova pa kogl-a t’a kɩɩsgã biis pa  nams-a ye. (2 Sãm. 12:9, 10) La wakat kẽere, a Davɩɩd namsa neb a taab nusẽ. Yɛl a woto sasa a Davɩɩd pelga a pʋg n pʋʋs a Zeova, t’a Zeova sõng-a t’a bas a yam t’a nong-a-la wʋsgo, la t’a na n gesa a yelle, tɩ boog a yɩɩrã.—Yɩɩn. 23:1-6.

17. Wãn to la d tõe n dɩk a Davɩɩd togs-n-taare?

¹⁷ D tõe n dɩka a Davɩɩd togs-n-taare, d sẽn na n baood sagls a Zeova nengẽ d sã n wa rat n yãk yam. D segd n tẽegame me tɩ d sã n kɩɩs a Zeova, a pa na n kɩt tɩ kɩɩsgã sẽn tõe n wa ne bi-wẽns ninsã pa nams-d ye. (Gal. 6:7, 8) La d sã n wa tar zu-loees tɩ pa d sẽn kɩɩs a Zeova yĩnga, d tõe n pelga d pʋg n pʋʋs a Zeova, n kɩs sɩd t’a na n gũu d sũurã la d tagsa wã.—Fili. 4:6, 7.

D KELL N TEEG A ZEOVA T’A WILG-D SORE

18. Neb wʋsg tagsg yaa wãn ne sagls nins Wẽnnaam sẽn kõtã, la bõe la d segd n maane, d sã n dat t’a Zeova ket n wilgd-d sore? (Ges-y fot-rãmbã me.)

¹⁸ Yʋʋmd 2026 vɛrse wã yetame: “Sũ-noog rãmb la neb nins sẽn mi tɩ b segd n baoo Wẽnnaamã.” Yaa masã meng la d segd n tũ a Zeezi sẽn yeel bũmb ningã, n teeg a Zeova t’a wilg-d sore. Bõe yĩnga? Bala rũndã-rũndã, neb wʋsg pa sak n deeg tɩ b segd n baoo Wẽnnaam la b tũ a saglsã ye. Kẽer tẽeda Wẽnnaam, la b tũud-a-la wa b sẽn date. Neb sãnda me teega ninsaalb bãngre. Woto kɩtame tɩ b pa tar sũ-noog ye. D pa segd n dɩk b togs-n-taar ye. Woto wã, bõe la d segd n maan n kell n teeg a Zeova? Yaa d sẽn na n ket n zãmsd a Zeova Gomdã, n yeelgd nin-paalgã, la d tũud a Zeova noyã t’a kogend-do.