2026, TƲƲLG RASEM 30–TƲƲL-NIF RASEM A 5
YƖƖLL 76 Koɛɛgã mooneg kõta sũ-noogo
Gomd-y sɩdã yell ne bʋgsem
“ Zeova sẽn yaa sɩdã Wẽnnaam.”—YƖƖN. 31:5.
D SẼN NA N BÃNGE
D na n yãa d sẽn tõe n togsd neb a taabã sɩd to-to, la d sẽn tõe n gomd Biiblã yell ne-b to-to tɩ naf-b n yɩɩda.
1. D sã n dat n yɩ a Zeova zakã neda, bõe la d segd n maane?
D SÃ N bãng a Zeova Kaset soab paalem, sokr d sẽn wae n sokdẽ yaa: “Fo maana a wãn n bãng sɩdã?” Kẽer na n leokame tɩ yaa b roagdbã n zãms-b Biiblã. Sãndã na n yeelame tɩ b sẽn bãng sɩdã nan pa kaoos ye. D wae n leokda woto, bala d tũuda sɩdã sẽn be Wẽnnaam Gomdã pʋgẽ wã d vɩɩmã nens fãa pʋgẽ. Bõe yĩnga? Yaa tɩ d miime tɩ d sã n dat n yɩ a Zeova zakã neda, d segd n wilgdame tɩ d nonga sɩdã, la d tũud-a d vɩɩmã nens fãa pʋsẽ. Wala makre, d no-goamã la d tʋʋm-tʋmdɩ wã segd n wilgdame tɩ d yaa pʋ-peelem dãmba.—Yɩɩn. 15:1-3.
2. a) Bõe la nebã ra mi a Zeezi zugu? b) A Zeezi ra miime t’a sẽn zãmsd nebã sɩdã na n waa ne bõe?
2 A Zeezi ra togsda sɩd wakat fãa. A bɛɛbã sak n deegame t’a togsda sɩda, baa a sã n wa gomd bũmb sẽn pa noom neb wʋsg yelle. (Mat. 22:16) A Zeezi goma nebã manesem sẽn na n yɩ to-to ne sɩdã a sẽn zãmsd-bã yell n yeel yaa: “M waame n na n kɩt tɩ welgr zĩndi: Bi-ribl na n zabda ne a ba, tɩ bi-pugl zabd ne a ma, la pag na n zabda ne a sɩd-ma.” (Mat. 10:35) A Zeezi ra pa rat tɩ nebã zãgs koɛɛg ning yẽ ne a karen-biisã sẽn da moondã ye. La a ra miime tɩ na n yɩɩ woto. (Mat. 23:37) A ra miime tɩ koɛɛg ning a sẽn moondã na n welga nebã sul a yiibu. Pipi sullã na n yɩɩ neb nins sẽn nong sɩdã sẽn be Biiblã pʋgẽ wã, tɩ sull a to wã yɩ neb nins sẽn pa nong sɩdã.—2 Tes. 2:9-11.
3. Bõe yell la d na n gom sõs-kãngã pʋgẽ?
3 Tõnd me modgdame n na n yɩ pʋ-peelem dãmb wa a Zeezi n togsd sɩd wakat fãa, baa rẽ sã n tõe n kɩt tɩ neb a taabã pa nong-do. Sẽn paase, d moonda sɩdã sẽn be Biiblã pʋgẽ wã la d zãmsd nebã rẽ, baa sẽn tõe n kɩt tɩ neb kẽer sũy yik ne tõndã. Woto rat n yeelame tɩ d segd n maana d toog kae ne d sẽn gomd to-to wã la sẽn yaa wakat ningã, d sẽn togsd sɩdã yĩng bɩ? A bada! Sõs-kãngã pʋgẽ, d na n deng n leoka sokr sẽn tar yõodo: Yɛ la d tõe n bãng sɩdã a Zeova zugu? Rẽ poore d na n leoka sogsg a taaba: Bõe yĩng tɩ d segd n gomd sɩdã sẽn be Biiblã pʋgẽ wã yell ne neb a taabã? Wãn to la d tõe n maan dẽ, la wakat-bʋgo? Sogs-kãensã leoorã na n sõng-d lame tɩ d bãng d sẽn tõe n gomd koe-noogã yell la d togsd sɩd ne bʋgsem to-to, rat n yeel tɩ n gomd ne gũusgu, la wakat sẽn zemse.
YƐ LA D TÕE N BÃNG SƖDÃ A ZEOVA ZUGU?
4. Bõe yĩng tɩ d tõe n yeel tɩ sɩdã yita a Zeova nengẽ?
4 Sɩdã yita a Zeova nengẽ. A sẽn yet fãa yaa sɩda. Wala makre, a sẽn yeel bũmb ning sõma la wẽngã wɛɛngẽ wã yaa sɩda. (Yɩɩn. 19:9; 119:142, 151) Bũmb nins fãa a sẽn pʋlem tɩ watame wã pidsdame. (Eza. 55:10, 11) A zɩ n pʋlem bũmb n pa maan ye. (Sõd. 23:19) Sɩd-sɩda, a Zeova pa tõe n yag ziri ye! (Ebre. 6:18) Sɩd bee bʋʋm la b sẽn boond a Zeova tɩ “sɩdã Wẽnnaamã.”—Yɩɩn. 31:5.
5. Bõe yĩng tɩ pa toog tɩ d yã “sɩdã Wẽnnaamã”? Wilg-y y leoorã võore. (Tʋʋma 17:27)
5 Neb kẽer yetame tɩ yaa toog tɩ d bãng a Zeova sẽn yaa “sɩdã Wẽnnaamã,” la b tudgame. Bõn-naandsã sẽn gũbg tõndã wilgda vẽeneg tɩ Wẽnnaam beeme. (Rom. 1:20) Tẽn-tʋmd a Poll sẽn wa n sõsd ne Gɛrɛs soolmã bãngdb Atɛnnã, a yeelame tɩ Wẽnnaam datame tɩ d “yã-a,” la t’a “pa zãr ne tõnd ned baa a yembr ye.” (Karm-y Tʋʋm 17:27.) Sɩd me, a Zeova takda sik-m-mens rãmbã sẽn baood n bãng sɩdã a zugã tɩ b wat a nengẽ.—Zã 6:44.
6. Togs-y bũmb kẽer d sẽn bãng Biiblã pʋgẽ tɩ yaa sɩda, la bũmb ning sẽn kɩt tɩ y sũur noom ne rẽ wã?
6 Bũmb a ye d sẽn tõe n maan n bãng a Zeova yaa d sẽn na n zãms Biiblã. Wẽnnaam tũnuga ne a vʋʋsem sõngã n vẽneg rap tɩ b gʋls Biiblã. (2 Pɩy. 1:20, 21) Rẽnd bũmb nins fãa sẽn be Biiblã pʋgẽ wã yaa sɩda, tɩ d tõe n bas d yam ne rẽ. Wala makre, d tõe n tẽe bũmb ning a sẽn yeel ãndũniyã naaneg la bõn-vɩɩsã sẽn be tẽngã zugã sẽn sɩng to-to wã wɛɛngẽ wã. (Sɩng. 1:1, 26) D tõe n tẽe a sẽn wilg bũmb ning sẽn kɩt tɩ d fãa maand yel-wẽnã, la bũmb ning sẽn kɩt tɩ ninsaalbã namsdẽ la b yaa kiidbã. (Rom. 5:12; 6:23) D tõe n kɩsa sɩd zãng-zãng ne a sẽn yeel t’a Zeova na n tũnuga ne a Biigã n maneg bũmb nins fãa a Sʋɩtãan sẽn yaa “ziri wã ba” wã sẽn sãamã. (Zã 8:44; Rom. 16:20) Sẽn paase, d tõe n kɩsa sɩd ne Biiblã sẽn pʋlem t’a Zeezi na n wa sãama nin-wẽnsã, n vʋʋg sẽn ki-bã, n kɩt tɩ tẽngã lebg arzãna, la a sõng tõnd tɩ d lebg neb sẽn zems zãngã. (Zã 11:25, 26; 1 Zã 3:8) A Zeova sɩd kõo tõnd bõn-kãseng tɩ yaa zu-zẽkre! A sõnga tõnd tɩ d bãng sɩdã yẽ zugu, la a yeel tõnd tɩ d rɩk-a n zãms neb a taaba.—Mat. 28:19, 20.
BÕE YĨNG TƖ D SEGD N TOGSD SƖDA?
7-8. Bũmb ning sẽn kɩt tɩ d togsd sɩdã tara yõod bɩ? Rɩk-y makre. (Mark 3:11, 12) (Ges-y fot-rãmbã me.)
7 D zoe n yaame tɩ d sã n dat n yɩ a Zeova zakã neda, d segd n togsda sɩda. La sẽn na yɩl n ta a yam, d segd n maaname tɩ zʋʋg togs sɩd bala. Bũmb ning sẽn kɩt tɩ d togsd sɩdã tara yõod a Zeova nifẽ. D gom bũmb sẽn maan a Zeezi sẽn wa n be tẽngã zug n moond koɛɛgã yelle. (Karm-y Mark 3:11, 12.) Daar a ye, a Zeezi ra moonda koɛɛgã Galile mogrã noore, tɩ neb kʋʋng gũbg-a. Neb zĩn-dãmb sẽn tar n da be b sʋka. B ra wõgemdeda a Zeezi taoor n yetẽ yaa: “Yãmb yaa Wẽnnaam Biiga.” Bõe yĩng tɩ zĩn-dãmbã togs sɩd a Zeezi zugu? Tõe tɩ b raabã ra yaa kɩt tɩ neb nins sẽn wʋm b goamã kɩs-b sɩda, tɩ b wa tõog n belg-b tɩ b bas a Zeova tũubu. Bũmb ning zĩn-dãmbã sẽn togsã yaa sɩda, la b maana woto ne yam-wẽnga. A Zeezi bãnga bũmb ning sẽn kɩt tɩ b togs sɩdã, tɩ pa yɩ-a noog ye. A pʋd n yeela zĩn-dãmbã tɩ b ra le gom a yell ye.
8 Yam-bʋg la d tõe n dɩk kiba-kãngã pʋgẽ? Kibarã wilgdame tɩ bũmb ning sẽn kɩt tɩ d togsd sɩdã tara yõod a Zeova nifẽ. Rẽnd tara yõod wʋsg tɩ d zãmsd nebã sɩdã a Zeova zug d sẽn nong-a wã yĩnga, tɩ nebã sã n dat n pẽg-d rẽ yĩng me bɩ d wilg tɩ yaa a Zeova n segd ne pẽgrã.—Mat. 5:16; ges-y Tʋʋm 14:12-15.
Y sã n wa zãmsd ned Biiblã, y wilgdame t’a Zeova n segd ne pẽgrã bɩ? (Ges-y sull a 7-8)
9. Bõe la d pa segd n maane, la bõe yĩnga?
9 D rɩk makr a to sẽn wilgd tɩ d pa segd n bao tɩ nebã pẽg-d ye. Mams-y wa saam-biig sẽn yaa taoor lʋɩt sẽn na n togs-y kibar neb wʋsg sẽn pa mi, tɩ y rɩk n togs neb a taaba. Neb nins y sẽn togs kibarã sã n wa bãng tɩ yaa sɩda, b tõe n tagsame tɩ y pa nin-bila, bala y mii yɛl neb wʋsg sẽn pa mi. Rẽ tõe n kɩtame tɩ b maneg n nand-yã, la pa noom Wẽnnaam ye. (Yel. 11:13) Bõe yĩnga? Bala y pa vẽneg yel-solgds bal ye. Y togsa sɩdã ne yam-wẽng me.
WÃN TO LA D TÕE N GOM SƖDÃ YELL NE NEB A TAABÃ?
10. Goam sẽn be yamleoog yaa wãn to? (Kolos rãmbã 4:6)
10 Karm-y Kolos rãmb 4:6. Tẽn-tʋmd a Poll sagla Kolos kiris-nebã tɩ b modg tɩ b goamã “tall yamleoog wakat fãa.” Woto rat n yeelame tɩ bõe? Gɛrkã gom-biis nins b sẽn lebg woto wã bilgda goam sẽn nafd kɛlgdã, n leb n yaa goam sẽn togs ne bʋgsem la sõmblem.
11-12. Bõe yĩng tɩ d segd n gũus ne d sẽn zãmsd neb a taabã sɩdã to-to wã? Rɩk-y makre. (Ges-y fot-rãmbã me.)
11 D sã n wa zãmsd ned sɩdã sẽn be Biiblã pʋgẽ wã, d segd n tũu a Poll saglgã. Biiblã maka sɩdã sẽn be a pʋgẽ wã ne sʋʋg sẽn dɩt sõma, n tõe n welg sɩɩgã ne vʋʋsmã, rat n yeel t’a tõe n sõnga tõnd mengã la d taabã tɩ d bãng bũmb ning sẽn be d sũurẽ wã, la bũmb ning sẽn kɩt tɩ d maand yɛl kẽerã. (Ebre. 4:12) La d sã n pa bãng n tʋm ne Biiblã sõma, tõe n sãama neb a taabã sũy zaalem, wall kɩt tɩ b wẽ no-koɛɛm ne-do. Bõe n tõe n wa kɩt tɩ yɩ woto?
12 D rɩk makre. Koɛɛgã mooneg sasa, y sega ned sẽn minim n pʋʋsd bõn-naandse, la a maand Nowɛllã la Pakã ne a zakã rãmb hal tɩ noom-a. A maanda rẽ n tẽed tɩ yaa sõma. D tõe n talla Biiblã n wilg nin-kãng tɩ bõn-naands pʋʋsg ka yõodo, la tɩ Nowɛllã ne Pakã maaneg kɩɩsda Biiblã sẽn yetã. (Eza. 44:14-20; 2 Kor. 6:14-17) D sã n maan woto d pipi sõsgã sasa, d togsa sɩda. La d pa bãng n tʋm ne Wẽnnaam Gomdã sõma ye.
Wãn to la y tõe n bãng n wilg ned sɩdã sẽn be Biiblã pʋgẽ wã? (Ges-y sull 11-12) a
13. Wãn to la d tõe n maan tɩ yaa wa d goamã yugla yamsem?
13 A Poll yeelame me tɩ d segd n kɩtame tɩ d goamã yɩ wa b yugla yamsem. A gomdã pa rat n yeel tɩ d segd n golma sɩdã, wall d sĩnd n pa togs sɩd ye. A sagend-d lame tɩ d tũnugd ne goam sẽn be yamleoog n wilgd nebã sɩdã sẽn be Biiblã pʋgẽ wã tɩ sak kelgr ne-ba. (Zoob 12:11) Woto maaneg tõe n yɩɩ toogo. D sã n na n kõ neb rɩɩbo, d tõe n ninga yamsmã tɩ zems wa tõnd sẽn datã, n tagsdẽ tɩ rẽ n na n yɩ-b noogo. No-goamã wɛɛngẽ me, d tõe n tagsdame tɩ d sẽn gomd to-to wã na n yɩɩ ned buud fãa noogo, la pa woto ye. Wala makre, buud kẽer neb getame tɩ b sã n na n togs ned b tagsgo pa tɩlɛ tɩ b gom ne gũusgu, baa sã n yaa ned yʋʋm sẽn yɩɩd-ba. Buud a taab neb tõe n getame tɩ f sã n gom ne-b woto pa sakde, wall tɩ f paoog-b lame menga. A Poll yeelame tɩ d segd n bãnga d “sẽn segd n leok ned kam fãa to-to.” Woto rat n yeelame tɩ d segd n gũusame tɩ d goamã yɩ d kɛlgdã noogo, n da gomd wa sẽn noom tõndo, wall sẽn zems ne tõnd buudã neb sẽn gomd to-to wã ye.
WAKAT-BƲG LA D NA N GOM SƖDÃ YELLE?
14. A Zeezi sẽn wa n be tẽngã zugã a wilga a karen-biisã a sẽn mi wã fãa bɩ? Wilg-y y leoorã võore.
14 A Zeezi ra gomda ne a karen-biisã ne bʋgsem wakat fãa, la a zãmsd-b bũmb wʋsgo. (Mark 6:34) La bũmb wʋsg la b ra ket n pa mi. A Zeezi pa bao n na n zãms-b bũmb nins fãa a sẽn da mi wã ye. A ra geta b sẽn tõe n wʋm bũmb nins võorã. A ra miime tɩ wakat ra nan pa ta t’a na n zãms-b bũmb kẽer ye. Sɩd me, a yeel-b lame tɩ b nan pa tõe n wʋm bõn-kãens võor ye. (Zã 16:12) Yam-bʋg la d tõe n dɩk a Zeezi sẽn maan to-to wã pʋgẽ?
15. D segd n wilgda d Biibl karen-biisã bũmb nins fãa d sẽn mi wã zĩig pʋgẽ bɩ? Wilg-y y leoorã võore. (Yel-bũnã 25:11) (Ges-y fotã me.)
15 A Zeezi sẽn maan to-to wã wilgdame tɩ pa d sẽn mi sɩdã yĩng la d na n togs nebã bũmb nins fãa d sẽn mi wã zĩig pʋgẽ ye. Wãn to la d tõe n dɩk a togs-n-taare? D segd n geta neb a taabã yɛl sẽn yaa to-to wã. D tẽeg rao ning sẽn maand Nowɛllã la Pakã ne a zakã rãmb tɩ noom-a wã yelle. D miime tɩ tig-kãens sɩnga ne bõn-naands pʋʋsdbã, la tɩ b pa tat Wẽnnaam yam ye. Mams-y wa yãmb sẽn na n sɩng Biiblã zãmsg ne ra-kãng semen wall semen a yiib sẽn deng Nowɛllã. Yãmb sã n wilg-a Biiblã sẽn yet bũmb ning tig-kãens zugã, n saagdẽ t’a na n basa Nowɛllã maaneg zĩig pʋgẽ y gomda ne bʋgsem sɩda? Yaa sɩd tɩ Biibl karen-biis kẽer na n sak n tũu b sẽn bãng bũmb ning Biiblã pʋgẽ wã zĩig pʋgẽ. La sãnda nengẽ, kaoosda bilf tɩ b yaool n wa tõog tɩ b tagsa wã la b tʋʋm-tʋmdɩ wã zems ne b sẽn bãngã. D sã n wilgd d Biibl karen-biisã bũmb nins b sẽn segd n bãngã a wakate, rat n yeel tɩ wakat ning b sẽn tõe n wʋm b võorã, na n sõng-b lame tɩ b toeeme.—Karm-y Yel-bũn 25:11.
D rɩk a Zeezi togs-n-taare, n baood n bãngd wakat sẽn zems tɩ d togs neb Biiblã sẽn yetã, la d togs-b tɩ zems b sẽn tõe n wʋm a võore (Ges-y sull 15)
16. Bõe la d tõe n maan n sõng d Biibl karen-biisã tɩ b ‘kell n kẽn sɩdã pʋgẽ’?
16 Bũmb paood sẽn kõt tõnd sũ-noog n ta sõng neb a taabã tɩ b bãng sɩdã a Zeova zugu. Ad d sẽn tõe n maan n sõng-b tɩ b ‘kell n kẽn sɩdã pʋgẽ’: D ket n kõt-b mak-sõngo. (3 Zã 3, 4) Modg-y tɩ y sẽn vɩ to-to wã wilgdẽ tɩ y tẽeda Wẽnnaam pʋlemsã sẽn be a Gomdã pʋgẽ wã. Togsd-y sɩdã ne yam-sõngo. Y sã n wa zãmsd ned Biiblã bɩ y gom ne bʋgsem, tɩ y goamã tall yamleoogo. Ned sã n wa pẽgd-y bɩ y wilg tɩ yaa a Zeova n segd ne pẽgrã. Y sã n maand woto, y wilgdame tɩ yaa a Zeova sẽn yaa sɩdã Wẽnnaamã n so yãmba.
YƖƖLL 160 ‘Koe-noogo!’
a FOTÃ BILGRI: Pipi fotã yaa saam-biig sẽn yã rao sẽn nags a zak Nowɛllã yĩnga, n wilgd-a sõsg sẽn gomd Nowɛllã sẽn sɩng to-to wã yelle. Fot a yiib-n-soabã pʋgẽ, saam-biigã wilgda raoã sõsg sẽn wilgd rao sẽn tõe n ges a kamb yell sõma to-to. Manesem a yiibã sʋka, bʋg n na n yɩ raoã noog n yɩɩda?
