1-2. A Zeezi sẽn ki tɩ yɩ maoongã segd n kɩtame tɩ d maan bõe, la bõe yĩnga? (2 Korẽnt rãmbã 5:14, 15) (Ges-y fotã me.)

 ROOG sã n lʋɩ n põd yãmb tɩ ned wa fãag-yã, y sũur kõn yɩ noog wʋsg ne-a sɩda? Baa sã n yaa neb wʋsg la a fãag-yã, yaa vẽeneg tɩ yãmb mengã na n dat n pʋʋs-a-la barka, n wilg tɩ y pa na n tol n yĩm a sẽn maan bũmb ningã ye.

² Sõsg ning sẽn loogã pʋgẽ, d yãame tɩ d pa tõe n fãag d meng ne yel-wẽnã la kũumã d toor ye. La a Zeezi maoongã maasem yĩnga, d tõe n paama d menga. Bala a kɩtame tɩ d tõe n paam d yel-wẽnã sugri, tɩ d tõe n wa zems zãnga, la d tõe n maneg d yell ne Wẽnnaam. Rẽ kɩtame tɩ d tõe n wa paam n vɩɩmd wakat sẽn kõn sa a Zeova dũni-paalgã pʋgẽ. Sɩd-sɩda, a Zeezi maoongã wilgdame t’a nonga ninsaalbã. Sɩng n yaa woto nand meng t’a wa tẽngã zugu. (Yel. 8:30, 31) Tẽn-tʋmd a Poll yeelame yaa: “Kirist nonglmã n so tõndo.” (Karm-y 2 Korẽnt rãmb 5:14, 15.) Woto rat n yeelame tɩ d segd n wilgame tɩ d sũur yaa noog ne Kirist nonglmã, la tɩ d pa segd n yĩm bũmb ning a sẽn maan d yĩngã yell a bada.

3. Bõe yĩng tɩ d sẽn segd n maan bũmb nins n wilg tɩ d sũur yaa noog ne a Zeezi maoongã yaa toor-toore?

³ Bõe la y tõe n maan n wilg tɩ y sũur yaa noog ne a Zeezi sẽn ki tɩ yɩ maoongã? Y sẽn na n leok to-to wã tõe n yɩ toor ne ned a to leoore. Sẽn na yɩl n sõng-y tɩ y bãng bũmb ning sẽn kɩt tɩ yaa woto wã, d na n dɩka makr ne neb a tãab sẽn dat n kẽng zĩ-yɛng n yaool n be tẽns toor-toor pʋsẽ. Soay nins b sẽn na n dɩkã na n yɩɩ toor-toore. Woto me, y sẽn na n maan to-to n wilg tɩ y sũur nooma ne a Zeezi  maoongã bee ne y yɛlã sẽn yaa to-to rũndã-rũndã wã. Rẽ n so tɩ d na n gom neb sul a tãab yell sõs-kãngã pʋgẽ: Yaa Biibl karen-biisã, sẽn deeg-b lisgã, la neb nins sẽn lak n bas bãgrã.

BIIBL KAREN-BIISÃ

4. A Zeova tagsg yaa wãn ne Biibl karen-biisã?

⁴ Yãmb sã n yaa Biibl karen-biiga, ad bũmb y sẽn tõe n ning y yamẽ: Yãmb sẽn zãmsd Biiblã wilgdame tɩ y naaga neb nins a Zeova sẽn takd sẽn na yɩl tɩ b lebg a zo-rãmbã sʋka. (Zã 6:44; Tʋʋ. 13:48) “A Zeova n yaa soab ning sẽn feesd sũyã.” Woto wilgdame t’a mii y sẽn modgd to-to n dat n bãng-a wã, la t’a sã n ne y sẽn toeemd sẽn na yɩl n tũ a noyã, noom-a lame. (Yel. 17:3; 27:11) A Zeezi sẽn ki tɩ yɩ maoongã kɩtame tɩ y tõe n paam a Zeova zoodo. (Rom. 5:10, 11) Ra tol-y n yĩmi rẽ ye.

5. Wãn to la Biibl karen-biisã tõe n tũ saglg ning sẽn be Filip rãmb 3:16?

⁵ Yãmb a Biibl karen-biisi, bõe la y tõe n maan n wilg tɩ y sũur yaa noog ne a Zeezi sẽn ki tɩ yɩ maoongã? Bũmb a ye yaa y sẽn na n tũ saglg ning tẽn-tʋmd a Poll sẽn kõ Filip kiris-nebã. A yeelame: “Baa d sẽn bɩ to-to fãa, bɩ d kell n kẽn sõma woto.” (Fili. 3:16) Sagl-kãngã wilgdame tɩ y pa segd n bas tɩ baa fʋɩ gɩdg-y tɩ y pa kẽn vɩɩmã sor zug ye.—Mat. 7:14; Luk 9:62.

6. Biibl karen-biig sã n getẽ tɩ yaa toog t’a toeem bũmb ninga, bõe la a tõe n maane? (Tõodo 30:11-14) (Ges-y fotã me.)

⁶ B sã n wilg-y bũmb Biiblã pʋgẽ tɩ yaa toog ne-y tɩ y sak n deege, bõe la y tõe n maane? Maan-y vaeesg bõn-kãng zugu, la y pʋʋs a Zeova n kos t’a sõng-y tɩ y wʋm a võor sõma. (Yɩɩn. 86:11) Sã n ket n yaa toog ne-y tɩ y wʋm bõn-kãng võore, bɩ y bas rẽ yell tagsg nanda, la y ra bas Biiblã zãmsg ye. La sã n yaa bũmb Biiblã sẽn gɩdg la y maand tɩ yaa toog ne-y tɩ y bas yẽ? Tẽeg-y t’a Zeova zɩ n yeel ninsaalbã tɩ b maan bũmb sẽn yɩɩd b pãng ye. Yãmb tõe n tũ a noyã. (Karm-y Tõod 30:11-14.) Sẽn paase, a pʋlmame t’a na n sõnga yãmba. (Eza. 41:10, 13; 1 Kor. 10:13) Rẽ wã, ra koms-y raood n bas ye. Ra tagsd-y bũmb nins sẽn yaa toog ne-yã yell ye. Tagsd-y bõn-sõma nins a Zeova sẽn maan n kõ-yã yelle, sẽn  yɩɩd fãa a sẽn kɩt t’a Zeezi wa ki y yĩngã yelle. Y sẽn nong a Zeova to-to wã pãng sã n paasdẽ y na n wa neeme t’a “noyã sakr . . . pa toog ye.”—1 Zã 5:3. a

7. Bõe yell la kamb nins roagdb sẽn yaa a Zeova Kaset rãmbã segd n tagse?

⁷ La yãmb a kamb nins roagdb sẽn yaa a Zeova Kaset rãmbã yẽ? Yãmb me yaa Biibl karen-biisi. Sɩd me, yãmb n yaa y roagdbã Biibl karen-biis nins sẽn tar yõod n yɩɩd ne-bã. Biiblã yeelame: “Bɩ y kolg Wẽnnaam, tɩ yẽ me na n kolga yãmba.” (Zak 4:8; 1 Kib 28:9) Y sã n modgd n dat n kolg Wẽnnaam, yẽ me kolgda yãmba. A Zeova pa get yãmb wa ned sẽn be sull pʋgẽ bal ye. A takda nebã yembr-yembre, baa kamb nins roagdb sẽn yaa a Zeova Kaset rãmbã. Bõe n kɩt tɩ yãmb tõe n lebg a Zeova zoa? Yaa a Zeezi sẽn ki tɩ yɩ maoongã. Y pa segd n yĩm rẽ a bada. (Rom. 5:1, 2) Woto wã, a Zeezi kũumã tẽegr sã n wa kolgdẽ bɩ y bʋgs a kũumã sẽn nafd yãmb to-to wã zugu. Rẽ poor bɩ y tags rẽ sẽn kɩt tɩ y rat n maan bũmb nins a Zeova yĩngã zugu, n wilg a Zeova tɩ y sũur nooma ne a sẽn kɩt t’a Biigã wa n ki tɩ yɩ maoongã. b

SẼN DEEG-B LISGÃ

8. Bõe yĩng tɩ d tõe n yeel tɩ ned sẽn deeg lisg zoe n wilgame t’a tẽed a Zeezi maoongã?

⁸ Y sã n deega lisgu, y zoe n maana bũmb wʋsg sẽn wilgd tɩ y tẽeda a Zeezi maoongã. Wala makre, y maana bũmb toor-toor sẽn na yɩl n kolg a Zeova la sẽn na yɩl tɩ y sẽn vɩ to-to wã zems ne a noyã. Y moonda koɛɛgã n wilgdẽ tɩ y saka noor ning a Zeezi sẽn kõ n yeel tɩ d sõng nebã tɩ b lebg a karen-biisã. Y rɩka y meng n kõ a Zeova n deeg lisgu. B namsda yãmb y sẽn tũud a Zeova wã yĩng bɩ? (2 Tɩm. 3:12) Y sẽn ket n tõogd toogã wilgdame tɩ y nonga a Zeova, la tɩ y sũur nooma ne a sẽn kɩt t’a Biigã wa ki tɩ yɩ maoongã.—Ebre. 12:2, 3.

9. Bõe la kiris-nebã segd n gũus b mens ne?

⁹ D sẽn deeg lisg n lebg kiris-nebã, bũmb n be tɩ d segd n gũusd d mens ne. Bilf-bilfu, d tõeeme n wa pa le nand a Zeezi sẽn ki tɩ yɩ maoongã ye. Bõe n tõe n wa kɩt tɩ yɩ woto? Tẽeg-y sẽn yɩ to-to ne Efɛɛz kiris-nebã. A Zeezi pẽg-b-la b sẽn da tõogd toogã yĩnga. Baa ne rẽ, a yeel-b lame yaa: “Bũmb n be tɩ mam ningd foom taal a poorẽ: Yaa tɩ fo basa nonglem ning fo sẽn da tar  sɩngrẽ wã.” (Vẽn. 2:3, 4) A Zeezi goamã wilgdame tɩ kiris-ned tõe n wa tʋmda tũudmã tʋʋm rok-m-zugẽ bala. Kiris-ned a woto tõe n pʋʋsdame, n kẽnd tigissã la a moond koɛɛgã a sẽn minim n maand rẽ wã yĩng bala. Pa le yaa nonglem n kɩt t’a maand rẽ ye. Y sã n wa mik tɩ y sẽn nong a Zeova to-to wã pãng pa le yaa wa pĩndã, bõe la y tõe n maane?

10. Wãn to la d tõe n wilg tɩ d tũuda saglg ning a Poll sẽn kõo a Tɩmote wã? (1 Tɩmote 4:13, 15)

¹⁰ Tẽn-tʋmd a Poll sagla a Tɩmote t’a tags tʋʋm nins a sẽn tʋmde, tɩ yaa tʋʋm kiris-nebã sẽn segd n tʋmã “yell neere,” la t’a ‘maan-b ne a sũur fãa.’ (Karm-y 1 Tɩmote 4:13, 15.) Sẽn na yɩl n tũ sagl-kãnga, bɩ y tags n ges y sẽn tõe n maan to-to n maneg n tũ a Zeova ne a sũur fãa la y “bas tɩ vʋʋsem sõngã kɩt tɩ y tall yẽesem.” (Rom. 12:11) Wala makre, y tõe n segenda y meng sõma tigissã yĩnga, sẽn na yɩl n kelgd sõma. Y leb n tõe n baooda zĩig sẽn yaa sɩddd n zãmsd Biiblã sẽn na yɩl n tõog n tags n wʋm y sẽn zãmsdã võor sõma. Y sã n yõgen bugum n pa rat tɩ ki y segd n ningda raoodo. Woto me y sã n dat tɩ y sũur ket n yaa noog ne a Zeezi maoongã la ne bũmb a taabã a Zeova sẽn maan n kõ-yã, y segd n zãmsda Biiblã sõma la y bʋgsdẽ. Sẽn paase, a Zeezi kũumã tẽegr sẽn kolgdã, y tõe n bʋgsa bõn-sõma nins d sẽn paamd d sẽn yaa a Zeova Kaset rãmb yĩngã zugu. Sãmbg sẽn kae, rẽ na n kɩtame tɩ y sũur maneg n yɩ noog ne a Zeezi maoongã sẽn kɩt tɩ y tõog n paam a Zeova zoodã.

11-12. Y yẽesmã sã n mi n booge, wilgdame t’a Zeova pa le kõt-y a vʋʋsem sõngã bɩ? Wilg-y y leoorã võore. (Ges-y fotã me.)

¹¹ Y sã n mi n getẽ tɩ y pa le tar yẽesem tũudum hakɩɩkã pʋgẽ wa pĩndã, bɩ y ra koms raood wall y tags t’a Zeova pa le kõt-y-yã a vʋʋsem sõngã ye. Tẽeg-y tẽn-tʋmd a Poll sẽn gom a koe-moonegã yell n yeel Korẽnt kiris-nebã bũmb ningã. A yeelame: “Mam sã n pa maan dẽ ne yamleoogo, ket n yaa tʋʋmd Zu-soabã sẽn kõ maam.” (1 Kor. 9:17) A gomdã rat n yeelame tɩ bõe?

¹² A Poll yamã ra mi n pa be koɛɛgã mooneg ye. Baa ne rẽ, a yãka yam n na n kell n wɩng ne koɛɛgã moonego, baa a yam sã n wa pa be rẽ maanego. Yãmb me tõe n yãka yam n maand woto. Yãk-y yam n na n maand sẽn yaa tɩrga, baa y yam sã n wa pa be rẽ maanego. Woto wã, bɩ y pʋʋs a Zeova n kos t’a kõ-y “raab la tõog sẽn na yɩl tɩ y maan sẽn noom-a.” (Fili. 2:13) Ket-y n maand-y bũmb nins sẽn paasd yãmb ne a Zeova zoodã pãngã. Y tõe n kɩsa sɩd tɩ rẽ na n kɩtame tɩ y sẽn nong a Zeova to-to wã pãng paas tɩ y le paam yẽesem.

13. Wãn to la d tõe n ‘feesd d mens n get d sã n bee tẽebã pʋgẽ’?

 ¹³ Wakat-wakate, yɩta sõma tɩ d feesd d meng wa 2 Korẽnt rãmb 13:5 sẽn yetã. Be b yetame: “Bɩ y feesd y mens n get y sã n bee tẽebã pʋgẽ. Makd-y y mens n get y sẽn yaa neb nins buudu.” Wala makre, d tõe n soka d meng yaa: ‘Mam rengd n baooda Wẽnnaam Rĩungã bɩ?’ (Mat. 6:33) ‘Mam sẽn maand bũmb nins n kokd pemsmã wilgdame tɩ m kisa sẽn yaa wẽng bɩ?’ (Yɩɩn. 97:10) ‘Mam maanda m sẽn tõe sẽn na yɩl tɩ zems-n-taar kell n zĩnd tigingã pʋgẽ bɩ?’ (Efɛɛ. 4:2, 3) Zemsame tɩ d tagsd bõn-kãensã yell a Zeezi kũumã tẽegr wakate. D sã n bʋgs a Zeova ne a Zeezi sẽn maan bũmb nins tõnd yĩngã zugu, na n kɩtame tɩ d rat n wilg a Zeova tɩ d sũur yaa noog ne rẽ, la d wilg tɩ d vɩɩ Kiristã yĩnga, la pa tõnd mensã yĩng ye.

SẼN LAK-B N BAS BÃGRÃ

14. Bõe n kɩt tɩ kiris-neb kẽer lak n bas bãgrã?

¹⁴ Neb kẽer tũu a Zeova n maan kiis wall yʋʋm meng n wa lak n bas tigingã. Bõe yĩnga? Kẽer nengẽ, yaa “vɩɩmã yɛlã” n loog-ba. (Luk 21:34) Sãnda nengẽ, yaa b tẽed-n-taag no-goam wall a manesem n sãam b sũuri. (Zak 3:2) Kẽer me maana yel-wẽn-kãseng n zoe yãnd n pa bao sõngr ye. Sẽn yaa a soab fãa bõe la y tõe n maane, sã n mikame tɩ y lak n basa bãgrã? Bõe la a Zeezi maoongã segd n kɩt tɩ y maane?

15. Wãn to la a Zeova wilgd t’a pa maand a toog kae ne sẽn lak-b n bas bãgrã? (Ezekɩyɛll 34:11, 12, 16)

¹⁵ A Zeova manesem yaa wãn ne neb nins sẽn lak n bas bãgrã? A pa raag-b n bas ye. A pʋd n gẽesd-b lame. A rɩlgd-b lame la a sõngd-b sẽn na yɩl tɩ b lebg n wa a nengẽ. (Karm-y Ezekɩyɛll 34:11, 12, 16.) A Zeova maanda woto ne yãmb me bɩ? N-ye! Yãmb sẽn zãmsd sõs-kãnga wã wilgdame tɩ y rat n maana sẽn yaa tɩrg a nifẽ. A Zeova ra yãa bõn-sõma yãmb sũurẽ wã n sõng-y tɩ y bãng sɩdã. A ket n nee bõn-sõma yãmb sũurẽ wã, n dat tɩ y lebg n wa tigingã pʋgẽ.

16. Bõe n tõe n sõng sẽn lak-b n bas bãgrã tɩ b lebg n wa a Zeova nengẽ? (Ges-y fotã me.)

¹⁶ Lebg n wa a Zeova nengẽ borsɩɩrã pʋgẽ, b togsa goam sẽn kengd raoodo. B yeelame: “Bas f yam. F sã n lebg n wa a Zeova nengẽ, a na n deeg-f lame.  Sã n yaa yɩɩre, a na n sõng-f lame tɩ f tõoge. Sã n yaa yell sẽn zabd foo, a na n sõngame tɩ welge. Sã n yaa f sũurã n ningd-f taale, a na n sõng-f lame tɩ f yam gãande. Rẽ, f na n tõogame n le naag f tẽed-n-taasã n tũ a Zeova.” Tẽeg-y me tɩ kãsem-dãmbã rat n sõng-y lame. B tõe n yɩɩ “wa zĩ-soalgdg sobg wakate, wa soondg zĩig sa-kẽeng wakate.” (Eza. 32:2) D miime tɩ y sũur nooma ne a Zeezi maoongã n dat n wilg a Zeova rẽ. Woto wã, bɩ y sok y meng yaa: ‘Bõe la m tõe n maan “welg yell ning” sẽn be maam ne a Zeova sʋkã?’ (Eza. 1:18; 1 Pɩy. 2:25) Wala makre, y tõe n kẽnga tigsg Rĩungã roogẽ. Y tõe n kolga kãsem-soab a ye n yeel-a tɩ y rata sõngr sẽn na yɩl n lebg n wa a Zeova nengẽ. A tõe n gesame tɩ y paam ned sẽn na n zãms-y Biiblã wakat bilfu. Y tõe n basa y yam tɩ y sã n pʋʋsd a Zeova la y modgd n na n wilg tɩ y sũur nooma ne a Biigã sẽn ki tɩ yɩ maoongã, a na n ning-y-la barka.

BÕE LA Y NA N MAANE?

17-18. A Zeezi kũumã tẽegr sã n wa kolgdẽ, bõe la y tõe n maan n wilg tɩ y pa sãamd y sẽkã?

¹⁷ A Zeezi yeelame t’a kiime tɩ yɩ maoong “sẽn na yɩl tɩ ned ning fãa sẽn tẽed yẽ ra sãame, la a wa paam vɩɩm sẽn ka sɛtã.” (Zã 3:16) Yaa ne a Zeezi maoongã maasem la a Zeova na n fãag tõnd ne yel-wẽndã la kũumã. Tõnd ned baa a ye pa segd n yĩm rẽ ye. (Rom. 3:23, 24; 2 Kor. 6:1) A Zeezi kũumã tẽegr sã n wa kolgdẽ bɩ d bao weer n bʋgs a Zeova ne a Zeezi sẽn wilg tɩ b nonga tõndã zugu. Rẽ na n kɩtame tɩ d wilg tɩ d sũur yaa noog ne-ba.

¹⁸ Bõe la yãmb na n maan n wilg tɩ y sũur yaa noog ne a Zeezi sẽn ki tɩ yɩ maoongã? Y sẽn na n leok to-to wã tõe n yɩɩ toor ne neb a taabã. Y tõe n basa y yam t’a Zeova na n ninga y modgrã barka, yãmb ne neb milyõ-rãmbã sẽn pa le “vɩ b mens yĩnga, la b vɩ a soab ning sẽn ki bãmb yĩng n lebg n vʋʋgã yĩngã.”—2 Kor. 5:15.