1-2. Tẽn-tʋmd a Poll tagsg ra mi n yaa wãna, la bõe yĩng t’a mak-sõngã tõe n naf tõndo? (Rom dãmbã 7:21-24)

 B SÃ N gomd tẽn-tʋmd a Poll yelle, bõe n wat y yamẽ? Y tagsda misioneer sẽn da tar raood yelle, karen-saamb sẽn da tar minim wall ned sẽn gʋls Biiblã sɛb wʋsg yell bɩ? Yaa sɩd t’a Poll ra yaa woto. La wakat ninga, a sũur da mi n sãamame. A ra mi komsa raoodo, wall a maand yɩɩre. Yẽ me ra mi n tara tags-kɛg wa tõnd sʋka neb wʋsgo.

² Karm-y Rom dãmb 7:21-24. Lɛtr ning a Poll sẽn gʋls n tool Rom kiris-nebã pʋgẽ, a goma bũmb kẽer sẽn da namsd-a yelle, tɩ yaa bũmb sẽn namsd tõnd sʋkã neb wʋsgo. Baa ne a Poll sẽn da yaa kiris-ned sẽn maand sɩdã, n da rat n maan sẽn noom Wẽnnaam ne a sũur fãa wã, a sẽn da yaa ned sẽn pa zems zãngã yĩnga, a mi n tara tʋls-wẽnse. Rẽ sẽn yãk a toogo, a Poll ra mi n tara tags-kɛg bũmb nins a sẽn maan pĩndã yĩnga, la zu-loɛɛg a sẽn da tar tɩ tõt saab yĩnga.

3. Bõe yell la d na n gom sõs-kãngã pʋgẽ? (Ges-y “Gomdã võorã” me.)

³ Baa ne a Poll sẽn da mi n tar tags-kɛgã, a a modgame n da pa tagsd rẽ yell wʋsg ye. Sõs-kãngã pʋgẽ, d na n leoka sogs nins sẽn pʋgdã: Bõe n kɩt t’a Poll ra mi n tagsdẽ t’a yaa “nimbãan-neda”? Bõe n sõng-a t’a ra pa tagsd bũmb nins sẽn komsd a raoodã yell wʋsgo? La d sã n wa tar tags-kɛga, bõe la d tõe n maane?

 BÕE N KƖT T’A POLL RA MI N TAR TAGS-KƐGA?

4. Bõe n kɩt t’a Poll ra mi n tar tags-kɛga?

⁴ Bũmb nins a sẽn da maan pĩndã. Nand t’a Poll lebg kiris-neda, a maana bũmb kẽer n wa maand a bãngẽ. Wala makre, b sẽn wa n na n lob a Etɩɛn sẽn da maand sɩdã kug n kʋ wã, a Poll ra bee be, n da tagsdẽ tɩ rẽ zemsame. (Tʋʋ. 7:58; 8:1) Sẽn paase, a lʋɩɩ taoor tɩ b nams kiris-nebã ne toolem.—Tʋʋ. 8:3; 26:9-11.

5. Wãn to la bũmb nins a Poll sẽn da maan pĩndã ra namsd-a?

⁵ A Poll sẽn lebg kiris-neda poore, a ra mi n tẽega bũmb nins a sẽn maan pĩndã yelle, tɩ sãam a sũuri. Baa ne a sẽn lebg kiris-nedã yʋʋm wʋsg poore, tõe t’a sã n da lebg n tẽeg a sẽn nams kiris-nebã ne toolmã yelle, a sũurã ra manegd n sãamame. Wala makre, a sẽn wa n na n gʋls pipi lɛtr ning a sẽn tool Korẽnt kiris-nebã yʋʋmd 55 soabã sẽnesã, a yeelame: “Mam pa zems tɩ b bool maam tɩ tẽn-tʋmda, mam sẽn nams Wẽnnaam tigingã yĩnga.” (1 Kor. 15:9) Yʋʋm a nu poore, lɛtr ning a sẽn tool Efɛɛz kiris-nebã pʋgẽ, a goma a meng yell n yeel t’a “pa ta nin-sõamyã wã yao-zʋʋg” ye. (Efɛɛ. 3:8) A Poll yeela a Tɩmote me tɩ yẽ ra yaa ‘wẽn-tʋʋsa, ned sẽn da namsd neb la tɩta-nedã.’ (1 Tɩm. 1:13) Mams-y n ges-y-yã a Poll tagsg sẽn da segd n yaa to-to, a sã n da tɩ kaag tiging n yã ned a sẽn da namse, wall ned a woto zak rãmbã.

6. Bõe me n da sãamd a Poll sũur wʋsgo? (Ges-y tẽngr notã me.)

⁶ Gõaag yĩngã pʋgẽ. A Poll goma bũmb sẽn sãamd a sũur wʋsg yelle, n yeel tɩ yaa wa ‘gõaag sẽn be a yĩngã pʋgẽ.’ (2 Kor. 12:7) Tẽn-tʋmdã pa wilg rẽ sẽn yaa bũmb ningã takɩ ye. Tõe tɩ ra yaa bãaga, wall zu-loɛɛg a to sẽn da kɩt t’a maand yɩɩr wʋsgo. b

7. Bõe n kɩt tɩ ra yaa toog ne a Poll t’a maan sẽn noom Wẽnnaam wakat fãa? (Rom dãmbã 7:18, 19)

⁷ A pãn-komsmã. A Poll ra tara pãn-komsem toor-toore, tɩ ra pa nana ne-a ye. (Karm-y Rom dãmb 7:18, 19.) Baa ne a sẽn da rat n maan sẽn yaa tɩrg ne a sũur fãa wã, a pãn-komsmã kɩtame tɩ ra yaa toogo. A sak n deegame tɩ wakat fãa a rat n maana sẽn tat Wẽnnaam yam, la t’a yĩngã tʋls-wẽnsã kɩtame tɩ pa nana ye. La baasgo, a Poll modga wʋsg sẽn na yɩl n toeeme. La a ra ket n kongdame. (1 Kor. 9:27) Yaa vẽeneg t’a sã n da yeel gomd wall a maan bũmb sẽn wilgd t’a pa tõog n bas a zug-wẽng ninga, ra sãamda a sũur wʋsgo.

BÕE N SÕNG A POLL T’A RA PA TAGSD BŨMB NINS SẼN SÃAMD A SŨURÃ YELL WƲSGO?

8. Bõe la a Poll maan tɩ sõng-a t’a pãn-komsmã pa tõog t’a maan sẽn yaa wẽnga?

⁸ A Poll bʋgsa Wẽnnaam vʋʋsem sõngã sẽn tõe n sõng kiris-ned to-to t’a bas tʋls-wẽnsã yell tagsgo, la a bɩɩs zug-sõma wã zugu. D sã n karem a lɛta wã d nee rẽ vẽenega. (Rom. 8:13; Gal. 5:16, 17) A Poll ra wae n gomda zug-wẽns la tʋls-wẽns nins kiris-nebã sẽn segd n modg n zãag b mens ne wã yelle. (Gal. 5:19-21, 26) Yaa vẽeneg t’a Poll bʋgsa a pãn-komsem toor-toorã zugu, n bao sagls Gʋls-sõamyã pʋgẽ, la a bao n bãng a sẽn  tõe n maan to-to n da sak a tʋls-wẽnsã ye. D tõe n kɩsa sɩd t’a tũu sagls nins a sẽn da kõt neb a taabã.

9-10. Bõe n sõng a Poll t’a ra pa tagsd bũmb nins sẽn sãamd a sũurã yell wʋsgo? (Efɛɛz rãmbã 1:7) (Ges-y fotã me.)

⁹ Baa ne a Poll sũurã sẽn da mi n sãamdẽ wã, bũmb wʋsg n sõng-a t’a kell n tall sũ-noogo. Wala makre, a tʋmd-n-taasã ra mi n toga sor n yi zĩ-zãrsẽ n wa togs-a koe-noodo, tɩ noog a sũuri. (2 Kor. 7:6, 7) A yõga zood ne a tẽed-n-taasã tɩ ra kõt-a sũ-noogo. (2 Tɩm. 1:4) Sẽn paase, a ra miime t’a tata a Zeova yam. Hakɩɩka, a Poll sũurã ra noomame bala a ra tũuda Wẽnnaam ne “sũur-kaset sẽn yaa yɩlemde.” (2 Tɩm. 1:3) Baa a Poll sẽn wa n be bãens roog Rommã, a sagla a tẽed-n-taasã tɩ b ‘kɩdem sũ-noog Zu-soabã pʋgẽ.’ (Fili. 4:4) Goam a woto pa ned sẽn da tar tags-kɛg wakat fãa goam ye. Vẽenega, a Poll sã n da wa sɩng bũmb sẽn komsd a raood yell tagsgo, a yɩta tao-tao n toeem n tagsd bũmb sẽn kõt-a sũ-noog yelle.

¹⁰ Bũmb a to me n sõng a Poll t’a ra pa tagsd bũmb nins sẽn sãamd a sũurã yell wʋsg ye. Yaa a sẽn da tẽed t’a Zeezi sẽn ki tɩ yɩ maoongã yaa kũun b sẽn kõ yẽ menga. (Gal. 2:20; karm-y Efɛɛz rãmb 1:7.) Rẽ kɩtame t’a ra kɩs sɩd t’a Zeova kõ-a-la sugr a Zeezi Kirist maasem yĩnga, n na n ket n maand woto. (Rom. 7:24, 25) Baa a Poll sẽn da maan yel-wẽnd pĩndã la a ra tar pãn-komsmã, a tõog n tũu Wẽnnaam ne sũ-noogo.—Ebre. 9:12-14.

11. Bõe yĩng t’a Poll kibarã kengd raoodo?

¹¹ Tõnd me yaa wa a Poll n dat n maan sẽn yaa sõma wakat fãa, la d mi n tara tʋls-wẽnse. Mi n yaa toog tɩ d tõog tɩ d tagsa wã, d tʋʋm-tʋmdɩ wã wall d no-goamã ta a Zeova yam. Tõnd me mi n komsa raood wʋsg tɩ yaa wa d yetame yaa: ‘Mam yaa nimbãan-ned bala!’ Saam-bi-poak yʋʋr sẽn boond t’a Eliiza c sẽn tar yʋʋm pis-yi la zak yeelame: “M sã n tags a Poll yɛlã sẽn da yaa to-to wã yelle, kengda m raoodo. M sẽn bãng tɩ pa maam m ye bal n maood sẽn na yɩl n maan sẽn yaa tɩrgã belsd-m lame. A Poll kibarã wilgdame me t’a Zeova mii zu-loees nins a nin-buiidã sẽn maood ne wã.” Bõe la d tõe n maan n tõog n tũ a Zeova ne sũur-kaset sẽn yaa yɩlemd la ne sũ-noog wa a Polle, baa ne d sẽn mi n tar tags-kɛgã?

D SẼN TÕE N MAAN TO-TO D SÃ N WA TAR TAGS-KƐGA

12. D sã n dat n paam sũ-noogo, bõe la d segd n maand wakat fãa?

¹² Maand-y bũmb nins sẽn paasd y tẽebã pãngã n pa vaandẽ ye. D sã n maand bũmb nins sẽn paasd d tẽebã pãngã n pa vaandẽ, d na n tõog n tagsda bũmb nins sẽn kõt-d sũ-noogã yelle. D tõe n dɩka bõn-kãens n mak ne bũmb toor-toor d sẽn maand sẽn na yɩl tɩ d yĩnsã tall laafɩ. D sã n rɩt rɩbd sẽn yaa sõma, n wɩsgd d yĩngã la d gõe tɩ sekdẽ, d wae n tara keelem. Woto me, d fãa miime tɩ d sã n karemd Wẽnnaam Gomdã n pa vaandẽ, tɩ d sã n segend tigissã, n kẽnd tigissã la d kẽesd d toogo, la d moond koɛɛgã, paasda d sũ-noogã. D sã n maand bõn-kãensã, sõngdame tɩ d tags-kɛgã booge.—Rom. 12:11, 12.

13-14. D tẽed-n-taas kẽer sẽn maand bũmb nins sẽn paasd b tẽebã pãngã, wãn to la naf-ba?

¹³ D gom a Zã yelle. A sẽn wa n tar yʋʋm pis-tã la wɛ wã, logtoɛɛmbã yãame t’a  bẽeda kãnsɛɛr bãag sẽn pa wae. Sɩngrẽ wã, a ra tara tags-kɛga. A ra sokda a meng yaa: ‘Bõe yĩng tɩ mam lʋɩɩ bãag baa ne m sẽn ket n yaa bi-bɩɩga?’ Wakat kãng t’a biigã tara yʋʋm a tãab bala. Bõe n sõng a Zã t’a pa tags bũmb nins sẽn sãamd a sũurã yell wʋsgo? A yeelame: “Baa ne m sẽn mi n ya wʋsgã, m modgdame tɩ d zakã rãmb maand bũmb nins sẽn paasd d tẽebã pãngã n pa vaandẽ ye. D kẽnda tigissã fãa, n moond koɛɛgã semen fãa la d maand zak pʋgẽ Biibl zãmsgã n pa vaandẽ ye. D maanda woto fãa, baa sã n wa yaa toog wʋsgo.” A yeelame me: “Yel-kɛgeng taoore, d sũur tõe n sãama wʋsgo. La m bãngame tɩ pa yãt n kaoos la d yã t’a Zeova kõt-d-la pãng ning d sẽn datã, la t’a nong-d-la wʋsg ye. A Zeova tõe n sõng-y-lame wa a sẽn sõng maamã.”

¹⁴ A Eliiza sẽn yaa saam-bi-poak ning yell d sẽn zoe n gomã yeelame: “M sã n kẽng tigsg fãa, la m sã n wa zãmsd Biiblã, tẽegd-m lame t’a Zeova kelgda m pʋʋsgã, la t’a sɩd nong-m lame. Rẽ noogda m sũuri.” A Nolan sẽn yaa tigims sull yel-gɛt n be Afirikã goma yẽ ne a pagã yʋʋr yĩng n yeel yaa: “Baa d sã n wa koms raoodo, d ket n maanda bũmb nins sẽn paasd d tẽebã pãngã. Wakat fãa d nee vẽeneg t’a Zeova sõng-d lame tɩ d tar sũ-noogo. D sã n wa koms raoodo, d tẽegdame t’a Zeova na n sõng-d lame, la a ning-d barka. D pa mi a sẽn na n maan rẽ to-to wã ye. La d kɩsa sɩd t’a na n sõng-d lame.”

15. Bõe la d tõe n maan n da tagsd bũmb nins sẽn sãamd d sũurã yell wʋsgo? Rɩk-y makre.

¹⁵ D sã n wae n tar tags-kɛg tɩ namsd-do, bũmb a taab me la d tõe n maan tɩ sõng-do. Mams-y wa y sɛɛg sẽn na n zabdẽ. Y sã n kẽnd daar fãa tõe n yols-y lame. La y sã n dat tɩ zabdmã sa, y segd n maana sẽn yɩɩd rẽ. Tõe tɩ y na n  deng n bao n bãnga bũmb ning sẽn kɩt tɩ y sɛɛgã zabdẽ wã, wall y kẽng logtor yir menga. Woto me, y sã n wae n tar tags-kɛga, y segd n maana vaeesg Biiblã la tõnd sɛbã pʋsẽ n bãng y sẽn segd n maanega, la y kos kiris-neb tẽeb sẽn bɩ sõngr menga. Ad bũmb a wãn y sẽn tõe n maan tɩ sõng-yã.

16. Bõe n tõe n sõng-y tɩ y bãng bũmb nins sẽn wat ne y tags-kɛgã? (Yɩɩn-sõamyã 139:1-4, 23, 24)

¹⁶ Pʋʋs-y-yã a Zeova n kos t’a sõng-y tɩ y bãng y sẽn sɩd rat bũmb ninga. Rĩm a Davɩɩd ra miime t’a Zeova mi-a-la sõma. Rẽ n so t’a kos a Zeova t’a sõng-a t’a bãng bũmb ning sẽn kɩt t’a tar ‘tagsa sẽn wat ne yɩɩrã.’ (Karm-y Yɩɩn-sõamyã 139:1-4, 23, 24.) Yãmb me tõe n pʋʋsa a Zeova n kos t’a sõng-y tɩ y bãng bũmb ning sẽn kɩt tɩ y tar tags-kɛgã, la a sõng-y tɩ y bãng y sẽn tõe n maan to-to n da le tagsd bũmb nins sẽn sãamd y sũurã yell wʋsg ye. Y leb n tõe n soka y meng sogsg kẽer n fees y menga. Wala makre: ‘Yaa bõe meng n kɩt tɩ m maand yɩɩre? Bũmb n be n wae n kɩtdẽ tɩ m sɩngd bũmb nins sẽn sãamd m sũurã yell tagsg bɩ? M sã n wa tar tags-kɛga, m modgdame sẽn na yɩl n toeem n tagsd bũmb nins sẽn kengd raoodã yell bɩ?

17. Bõe la y tõe n zãms tõnd sɛbã pʋsẽ tɩ sõng-yã? (Ges-y fotã me.)

¹⁷ Y Biiblã zãmsg sasa, y tõe n bao bũmb sẽn zems ne y yɛlã n zãmse. Wakat ninga, y sã n bao bũmb sẽn gomd a Zeova zʋg-sõng yell n karme, tõe n sõng-y lame. Wala makre, tẽn-tʋmd a Poll ra bʋgsda a Zeezi sẽn ki tɩ yɩ maoongã la a Zeova sẽn kõt sugr to-to wã zugu, tɩ sõngd-a wʋsgo. Yãmb me tõe n maana woto. Y tõe n talla Vaeesg sebre, a Zeova Kaset rãmbã yĩnga  wall sɛb a taab sẽn be y buud-gomdã pʋgẽ, n bao sõss sẽn gomd Wẽnnaam nimbãan-zoeerã, a sugrã la a maan-neerã yell n zãmse. Y sã n yã sõss sẽn tõe n sõng-y bɩ y bao sebr n gʋls b gom-zutã. Bĩng-y sebrã zĩig y sẽn tõe n yãa, tɩ y sã n wa tar tagsa sẽn komsd raood bɩ y zãms sõs-kãense. Bao-y n bãng-y bũmb nins y sẽn karemdã sẽn tõe n sõng yãmb mengã to-to.—Fili. 4:8.

18. Bõe la kiris-neb kẽer zãms tɩ sõng-ba?

¹⁸ A Eliiza sẽn yaa saam-bi-poak ning yell d sẽn zoe n gomã zãmsa a Zoob kibarã sẽn be Biiblã pʋgẽ wã. A yeelame: “Maam ne a Zoob fãa yaa a ye. A Zoob paama zu-loees sẽn pʋg taaba. Baa ne a Zoob sẽn da pa mi bũmb ning sẽn kɩt t’a namsdẽ wã, a kell n teega a Zeova baa a sẽn wa n koms raoodã.” (Zoob 42:1-6) A Diyan sẽn yaa saam-bi-poak ning yell d sẽn zoe n gomã yeelame: “Maam ne m sɩdã yãka yam n zãmsd Approchez-vous de Jéhovah sebrã. D sũur nooma a Zeova sẽn yagd tõnd wa yagd sẽn maand to-to ne tãndã. D pa tagsd d sẽn mi n kong tɩ sãamd d sũurã yell wʋsg ye. D tẽegdame t’a Zeova zãmsd-d lame la sõngd-d sẽn na yɩl tɩ d bɩɩs zʋg-sõma. Rẽ paasda tõnd ne yẽ zoodã pãnga.”—Eza. 64:8.

D TÕE N KƖSA SƖD T’A ZEOVA NA N SÕNG-D LAME LA A KEO-DO

19. D tõe n basa d yam ne bõe?

¹⁹ Baa d sã n maand bũmb nins sẽn paasd d tẽebã pãngã n pa vaandẽ, la d baood bũmb sẽn zems ne d yɛlã n zãmsdẽ, d pa tõe tɩ d tags-kɛgã sa zãng ye. D mi n tõe n wa komsa raood wʋsgo. La ne a Zeova sõngre, d sã n wa tar tags-kɛga d tõe n toeemame n tagsd bũmb sẽn kengd raood yelle. D tõe n basa d yam tɩ wakat fãa la bala d na n tara sũ-noogo, bala d miime tɩ d tara zood sõma ne a Zeova, la t’a sũur nooma ne bũmb nins d sẽn maand a tʋʋmdã pʋgẽ wã.

20. Yam-bʋg la y yãk-yã?

²⁰ Bɩ d yãk yam n pa na n tol n bas tɩ tags-kɛga, bũmb nins d sẽn maan pĩndã, d zu-loeesã wall d pãn-komsmã kɩt tɩ d pa tũ a Zeova ne sũ-noog ye. D sã n wa tagsd bũmb sẽn kɩt tɩ d maand yɩɩr yelle, a Zeova tõe n sõng-d lame tɩ d yam gãand bãane. (Yɩɩn. 143:10) D gũuda wakat ning tags-kɛgã sẽn na n sa zãngã ne yãgbo. Wakat kãngã, baa fʋɩ pa na n kɩt tɩ d maand yɩɩr ye. D na n yika yibeoog fãa ne sũ-noogo, d sẽn paam n tũud d Wẽnnaam a Zeova sẽn nong-dã yĩnga.